Kapareho daw ni Jehova an Pagmansay Nindo sa Sagradong mga Bagay?
Kapareho daw ni Jehova an Pagmansay Nindo sa Sagradong mga Bagay?
“Maingat na nagbabantay . . . na dai magkaigwa nin parapakisaro o siisay man na dai nagpapahalaga sa sagradong mga bagay.”—HEBREO 12:15, 16.
1. Anong aktitud sa presente an dai inaarog kan mga lingkod ni Jehova?
AN KINABAN sa pangkagabsan padikit nang padikit an pag-intindi sa sagradong mga bagay. An Pranses na sosyologo na si Edgar Morin nagsabi: “An enterong pundasyon na pinagbabasaran kan moral—an Dios, naturalesa, dagang tinuboan, kasaysayan, pangangatanosan—pinagdududahan na. . . . An mga tawo an nagpipili kan saindang mga pamantayan sa buhay.” Ipinapabanaag kaini “an espiritu kan kinaban,” o “an espiritu na naghihiro ngonyan sa mga aki nin kasumbikalan.” (1 Corinto 2:12; Efeso 2:2) An espiritung iyan nin pagigin daing galang dai inaarog kan mga nagdusay kan saindang sadiri ki Jehova asin gikan sa boot na nagpapasakop sa saiyang lehitimong soberaniya. (Roma 12:1, 2) Imbes, aram kan mga lingkod nin Dios an mahalagang marhay na kabtang kan pagigin sagrado, o pagigin banal, sa saindang pagsamba ki Jehova. Anong mga bagay sa satong buhay an maninigong magin sagrado? Totokaron kan artikulong ini an limang bagay na banal para sa gabos na lingkod nin Dios. An sunod na artikulo makonsentrar sa pagigin sagrado kan satong Kristianong mga pagtiripon. Alagad ano talaga an kahulogan kan terminong “banal”?
2, 3. (a) Paano itinatampok kan Kasuratan an kabanalan ni Jehova? (b) Paano niato ibinibilang na banal an ngaran ni Jehova?
2 Sa Biblikong Hebreo, an terminong “banal” nagtatao kan ideya nin pagigin siblag. Sa pagsamba, an “banal” minaaplikar sa bagay na isiniblag sa ordinaryong paggamit, o ibinibilang na sagrado. Si Jehova banal sa absolutong sentido. Sia inaapod na an “Kabanalbanale.” (Talinhaga 9:10; 30:3) Sa suanoy na Israel, an halangkaw na saserdote nagsusulot nin turbante na may nakatakod na bulawan na plaka na inukitan kan mga tataramon na “An kabanalan ki Jehova.” (Exodo 28:36, 37) An langitnon na mga kerubin asin serafin na nakapuesto sa may trono ni Jehova ilinaladawan sa Kasuratan na nagpapahayag: “Banal, banal, banal si Jehova.” (Isaias 6:2, 3; Kapahayagan 4:6-8) Idinodoon kan pag-otrong ini na si Jehova banal, malinig, asin dalisay sa pinakahalangkaw na sokol. Sa katunayan, sia an Burabod kan gabos na kabanalan.
3 An ngaran ni Jehova sagrado, o banal. An salmista nagkagsing: “Omawon logod ninda an saimong ngaran. Dakula asin makangingirhat, iyan banal.” (Salmo 99:3) Tinokdoan kita ni Jesus na mamibi: “Ama niamo na nasa langit, santipikaron [o, “ibilang na sagrado; trataron na banal,” nota sa ibaba] logod an saimong ngaran.” (Mateo 6:9) An daganon na ina ni Jesus, si Maria, nagpahayag: “Ibinabantog kan sakong kalag an kadakulaan ni Jehova . . . an makapangyarihan na Saro naggibo nin dakulang mga gibo para sa sako, asin banal an saiyang ngaran.” (Lucas 1:46, 49) Bilang mga lingkod ni Jehova, ibinibilang niatong banal an saiyang ngaran asin linilikayan niatong gumibo nin ano man na tibaad magdara nin katuyawan sa banal na ngaran na iyan. Dugang pa, kapareho ni Jehova an satong pagmansay sa pagigin sagrado, an boot sabihon, ibinibilang niatong sagrado an mga bagay na ibinibilang niang sagrado.—Amos 5:14, 15.
Kun Taano ta Kita May Hararom na Paggalang ki Jesus
4. Taano ta ilinaladawan kan Biblia si Jesus na “an Banal”?
4 Bilang an “aking bugtong” kan banal na Dios, si Jehova, si Jesus linalang na banal. (Juan 1:14; Colosas 1:15; Hebreo 1:1-3) Kun siring, sia inapod na “an Banal nin Dios.” (Juan 6:69) Dai nawara an saiyang kabanalan kan an saiyang buhay ibinalyo hale sa langit pasiring sa daga, huling ipinangaki ni Maria si Jesus paagi sa kapangyarihan kan banal na espiritu. Sinabihan sia nin sarong anghel: “An banal na espiritu madatong sa saimo . . . an ipangangaki aapodon na banal, Aki nin Dios.” (Lucas 1:35) Sa pamibi ki Jehova, duwang beses na inapod kan mga Kristiano sa Jerusalem an Aki nin Dios na “saimong banal na lingkod na si Jesus.”—Gibo 4:27, 30.
5. Anong sagradong misyon an inotob ni Jesus digdi sa daga, asin taano ta mahal na marhay an saiyang dugo?
5 Si Jesus may sagradong misyon na dapat otobon kan yaon digdi sa daga. Sa saiyang bautismo kan 29 C.E., si Jesus linahidan bilang Halangkaw na Saserdote kan dakulang espirituwal na templo ni Jehova. (Lucas 3:21, 22; Hebreo 7:26; 8:1, 2) Dugang pa, sia kaipuhan na magadan kaidto bilang atang. An saiyang pinabolos na dugo an magseserbing pantubos na paagi kaiyan an mga makasalan na tawo puedeng maligtas. (Mateo 20:28; Hebreo 9:14) Kun siring, an dugo ni Jesus ibinibilang niato na sagrado, “mahal na marhay.”—1 Pedro 1:19.
6. Ano an satong aktitud dapit ki Cristo Jesus, asin taano?
6 Ipinapaheling na hararom an paggalang niato sa satong Hade asin Halangkaw na Saserdote, si Cristo Jesus, si apostol Pablo nagsurat: ‘Ilinangkaw nin Dios an saiyang Aki sa superyor na posisyon asin may kabootan na itinao sa saiya an ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magrekonoser na si Jesu-Cristo iyo an Kagurangnan para sa kamurawayan nin Dios na Ama.’ (Filipos 2:9-11) Ipinapaheling niato na kapareho ni Jehova an satong pagmansay sa sagradong mga bagay paagi sa magayagayang pagpapasakop sa satong Poon asin nagrereynar na Hade, si Cristo Jesus, an Payo kan Kristianong kongregasyon.—Mateo 23:10; Colosas 1:18.
7. Paano niato ipinapaheling an satong pagpapasakop ki Cristo?
7 Kalabot man sa pagpapasakop ki Cristo an pagpaheling niato nin angay na paggalang sa mga lalaking ginagamit nia tanganing mangenot sa gibohon na dinidirehiran nia ngonyan. An katongdan kan mga linahidan nin espiritu na minakompuesto kan Namamahalang Grupo asin katongdan kan mga paraataman na ninombrahan ninda sa mga sangang opisina, distrito, sirkito, asin kongregasyon maninigong rekonoseron bilang sagradong paninimbagan. Kun siring, an areglong ini maninigo sa satong hararom na paggalang asin pagpapasakop.—Hebreo 13:7, 17.
Sarong Banwaan na Banal
8, 9. (a) Sa anong paagi na sarong banal na banwaan an mga Israelita? (b) Paano itinudok ni Jehova sa isip kan mga Israelita an prinsipyo nin pagigin sagrado?
8 Si Jehova nakipagtipan sa Israel. An relasyon na ini nagtao sa bagong nasyon na iyan nin espesyal na kamugtakan. Sinda sinantipikar, o itinagama. Si Jehova mismo nagsabi sa sainda: “Magpakabanal kamo sa sako, huli ta akong si Jehova banal; asin isinusuway ko kamo sa mga banwaan tanganing magin sadiri ko.”—Levitico 19:2; 20:26.
9 Kan mismong establisaron an nasyon nin Israel, itinudok ni Jehova sa isip kan mga Israelita an prinsipyo nin pagigin sagrado. Huli ta may padusang kagadanan, dai ngani ninda puedeng dutaan an bukid kun saen itinao an Sampulong Togon. Kan panahon na idto an Bukid nin Sinai, sa sarong sentido, ibinilang na sagrado. (Exodo 19:12, 23) Ibinilang man na sagrado an pagkasaserdote, an tabernakulo, asin an mga kasangkapan kaiyan. (Exodo 30:26-30) Ano an situwasyon sa Kristianong kongregasyon?
10, 11. Taano ta masasabing sagrado an Kristianong kongregasyon nin mga linahidan, asin ano an epekto kaini sa “ibang karnero”?
10 An Kristianong kongregasyon nin mga linahidan sagrado sa pagheling ni Jehova. (1 Corinto 1:2) Sa katunayan, an bilog na grupo nin linahidan na mga Kristiano digdi sa daga sa ano man na peryodo nin panahon ibinabaing sa sarong banal na templo, minsan ngani bako sinda an minakompuesto kan dakulang espirituwal na templo ni Jehova. Si Jehova nag-eerok sa templong iyan paagi sa saiyang banal na espiritu. Si apostol Pablo nagsurat: “Kasaro [ni Cristo Jesus] an bilog na edipisyo, huling oroyon na pinagsurugpon, nagtatalubo na magin sarong banal na templo para ki Jehova. Sa pakisumaro saiya, kamo man pinapatindog na magin sarong lugar na eerokan nin Dios paagi sa espiritu.”—Efeso 2:21, 22; 1 Pedro 2:5, 9.
11 Si Pablo nagsurat pa sa linahidan na mga Kristiano: “Dai kamo nakakaaram na kamo an templo nin Dios, asin na an espiritu nin Dios nag-eerok dian sa saindo? . . . An templo nin Dios banal, templo na iyo ngani kamo.” (1 Corinto 3:16, 17) Paagi sa saiyang espiritu, si Jehova ‘nag-eerok’ sa tahaw kan mga linahidan asin ‘naglalakaw sa tahaw ninda.’ (2 Corinto 6:16) Padagos niang ginigiyahan an saiyang maimbod na “oripon.” (Mateo 24:45-47) Pinakamamahal kan “ibang karnero” an saindang pribilehio na makaasosyar an grupong “templo.”—Juan 10:16; Mateo 25:37-40.
Sagradong mga Bagay sa Buhay Niato Bilang mga Kristiano
12. Anong mga bagay an sagrado sa buhay niato, asin taano?
12 Bakong makangangalas na ibinibilang na sagrado an dakol na bagay na konektado sa buhay kan linahidan na mga miembro kan Kristianong kongregasyon asin kan saindang kairiba. An satong relasyon ki Jehova sarong sagradong bagay. (1 Cronica 28:9; Salmo 36:7) Iyan mahalagang marhay sa sato kaya dai niato totogotan an ano man asin siisay man na raoton an relasyon niato sa satong Dios, si Jehova. (2 Cronica 15:2; Santiago 4:7, 8) An pamibi may mahalagang kabtang sa pagpapadanay niato nin dayupot na relasyon ki Jehova. An pamibi sagradong marhay para ki propeta Daniel kaya dawa pa mameligro an saiyang buhay, maimbod siang nagpadagos sa saiyang kaugalean na mamibi ki Jehova. (Daniel 6:7-11) An “mga pamibi kan mga banal,” o linahidan na mga Kristiano, iinaagid sa insenso na ginamit sa pagsamba sa templo. (Kapahayagan 5:8; 8:3, 4; Levitico 16:12, 13) Idinodoon kan simbolismong ini an pagigin sagrado kan pamibi. Kanigoan na pribilehio an makapagkomunikar sa Soberano kan Uniberso! Bakong makangangalas na an pamibi sagrado sa buhay niato!
13. Anong puersa an banal, asin paano niato iyan maninigong togotan na humiro sa satong buhay?
13 Igwa nin sarong puersa sa buhay nin linahidan na mga Kristiano asin kan saindang kairiba na ibinibilang nanggad nindang sagrado—an banal na espiritu. An espiritung iyan iyo an puersa aktiba ni Jehova, asin huling iyan pirmeng naghihiro kaoyon kan kabotan kan banal na Dios, iyan angay na apodon na “banal na espiritu,” o “espiritu nin kabanalan.” (Juan 14:26; Roma 1:4) Paagi sa banal na espiritu, tinatawan ni Jehova an saiyang mga lingkod kan kosog tanganing ikahulit an maogmang bareta. (Gibo 1:8; 4:31) Itinatao ni Jehova an saiyang espiritu sa “mga nagkukuyog sa saiya bilang namamahala,” sa mga ‘padagos na naglalakaw sa espiritu,’ bakong segun sa mga horot nin laman. (Gibo 5:32; Galacia 5:16, 25; Roma 8:5-8) Huli sa makapangyarihan na puersang ini an mga Kristiano nakakapaluwas kan “mga bunga kan espiritu”—marahayon na mga kualidad—asin “banal na mga gawe asin gibo nin diosnon na debosyon.” (Galacia 5:22, 23; 2 Pedro 3:11) Kun an banal na espiritu sagradong bagay para sa sato, lilikayan niato na gumibo nin ano man na puedeng magpamondo sa espiritung iyan, o makaolang sa paghiro kaiyan sa satong buhay.—Efeso 4:30.
14. Anong pribilehio an ibinibilang na sagrado kan mga linahidan, asin paano nakikikabtang sa pribilehiong ini an ibang karnero?
14 An pribilehio niato na magdara kan ngaran kan banal na Dios, si Jehova, asin na magin mga Saksi nia saro pang bagay na ibinibilang niatong sagrado. (Isaias 43:10-12, 15) An linahidan na mga Kristiano ginibong kualipikado ni Jehova na “magin mga ministro nin sarong bagong tipan.” (2 Corinto 3:5, 6) Bilang siring, sinda isinugo na ihulit “an maogmang baretang ini kan kahadean” asin “gumibo . . . nin mga disipulo sa mga tawo kan gabos na nasyon.” (Mateo 24:14; 28:19, 20) Maimbod nindang inootob an sugong ini, asin minilyon na arog-karnerong tawo an naghihimate, na sa simbolikong paagi nagsasabi sa mga linahidan: “Maiba kami sa saindo, huli ta nabaretaan niamo na an Dios yaon dian sa saindo.” (Zacarias 8:23) An mga ini magayagayang naglilingkod sa espirituwal na sentido bilang “mga paraoma” asin “mga paraataman sa ubasan” para sa linahidan na “mga ministro kan satong Dios.” Sa paaging iyan, dakula an itinatabang kan ibang karnero sa mga linahidan sa paghaman kan saindang ministeryo sa bilog na kinaban.—Isaias 61:5, 6.
15. Anong aktibidad an ibinilang na sagrado ni apostol Pablo, asin taano ta arog man kaiyan an pagmansay niato?
15 Bilang halimbawa, ibinibilang ni apostol Pablo na sagrado, o banal, an saiyang pampublikong ministeryo. Inapod nia an saiyang sadiri na sarong “pampublikong lingkod ni Cristo Jesus sa mga nasyon, na nakikikabtang sa banal na gibohon kan maogmang bareta nin Dios.” (Roma 15:16) Kan magsurat sa mga Kristiano sa Corinto, inapod ni Pablo an saiyang ministeryo na sarong “kayamanan.” (2 Corinto 4:1, 7) Paagi sa satong pampublikong ministeryo, ipinapaaram niato an “sagradong mga kapahayagan nin Dios.” (1 Pedro 4:11) Kun siring, baga man kita kabilang sa linahidan o sa ibang karnero, ibinibilang niatong sagradong pribilehio an makikabtang sa gibohon na pagpapatotoo.
“Sinasangkap an Kabanalan sa Pagkatakot sa Dios”
16. Ano an makakatabang sa sato na dai kita magin mga tawong “dai nagpapahalaga sa sagradong mga bagay”?
16 Pinatanidan ni apostol Pablo an saiyang mga kapwa Kristiano na dai magin mga tawong “dai nagpapahalaga sa sagradong mga bagay.” Imbes kaiyan, hinatolan nia sinda na ‘pagmaigotan na magibo an kabanalan,’ “na maingat na nagbabantay na . . . mayo nin nakakahilong gamot na sumupang asin magparibok asin na iyan dai makaramog sa dakol.” (Hebreo 12:14-16) An pananaram na “nakakahilong gamot” nanonongod sa pirang nasa Kristianong kongregasyon na nagtatatsar sa kun paano ginigibo an mga bagay-bagay. Halimbawa, tibaad kontra sinda sa pagmansay ni Jehova manongod sa pagigin sagrado nin pag-agoman o sa pangangaipo na magin malinig sa moral. (1 Tesalonica 4:3-7; Hebreo 13:4) O tibaad magpalakop sinda nin apostatang mga ideya, “daing datang mga tataramon na naglalapas sa banal,” na ipinepresentar kan mga “nagsuhay sa katotoohan.”—2 Timoteo 2:16-18.
17. Taano ta kaipuhan kan mga linahidan an dayaday na paghihingoa na ipabanaag an pagmansay ni Jehova sa kabanalan?
17 Sa saiyang linahidan na mga tugang, si Pablo nagsurat: “Mga namomotan, magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 7:1) An mga tataramon na ini nagpapaheling na an linahidan na mga Kristiano, na “mga may kabtang sa langitnon na pag-apod,” dapat na dayaday na maghingoa na patunayan na ipinapabanaag ninda an pagmansay ni Jehova sa kabanalan sa gabos na aspekto kan saindang buhay. (Hebreo 3:1) Siring man, sinadol ni apostol Pedro an saiyang pinaniaki nin espiritung mga tugang: “Bilang makinuyog na mga aki, dai na kamo mamolde sono sa dati nindong mga kamawotan kan kamo yaon pa sa kamangmangan, kundi, kaoyon sa Banal na Saro na nag-apod sa saindo, magin man kamong banal sa gabos nindong gawe.”—1 Pedro 1:14, 15.
18, 19. (a) Paano ipinapaheling kan mga miembro kan “dakulang kadaklan” na kapareho ni Jehova an pagmansay ninda sa sagradong mga bagay? (b) Ano pang sagradong kabtang kan satong buhay bilang Kristiano an totokaron sa sunod na artikulo?
18 Kumusta man an mga miembro kan “dakulang kadaklan,” na makakaligtas sa “dakulang kahorasaan”? Dapat man nindang patunayan na kapareho ni Jehova an pagmansay ninda sa sagradong mga bagay. Sa libro nin Kapahayagan, sinda ilinaladawan na nagtatao ki Jehova nin “sagradong paglilingkod” sa daganon na patyo kan saiyang espirituwal na templo. Nagtubod sinda sa atang na pantubos ni Cristo, na sa simbolikong paagi ‘linalabahan an saindang haralabang gubing asin pinapaputi iyan sa dugo kan Kordero.’ (Kapahayagan 7:9, 14, 15) Nagtatao ini sa sainda nin malinig na kamugtakan sa atubangan ni Jehova asin nagtatao sa sainda nin paninimbagan na “magpakalinig . . . sa lambang ramog nin laman asin espiritu, na sinasangkap an kabanalan sa pagkatakot sa Dios.”
19 An sarong mahalagang kabtang sa buhay kan linahidan na mga Kristiano asin kan saindang mga kairiba iyo an regular na pagtiripon tanganing sambahon si Jehova asin pag-adalan an saiyang Tataramon. Ibinibilang ni Jehova na sagradong bagay an mga pagtiripon kan saiyang banwaan. Totokaron sa sunod na artikulo kun paano asin kun taano ta maninigong magin kapareho ni Jehova an pagmansay niato sa sagradong mga bagay sa mahalagang marhay na kabtang na ini.
Bilang Repaso
• Anong kinabanon na pagmansay an dai inaarog kan mga lingkod ni Jehova?
• Taano ta si Jehova an Ginigikanan kan gabos na bagay na banal?
• Paano niato ipinapaheling na iginagalang niato an kabanalan ni Cristo?
• Anong mga bagay an maninigo niatong ibilang na sagrado sa satong buhay?
[Mga Hapot Para sa Pag-adal]
[Ritrato sa pahina 23]
Sa suanoy na Israel, dapat na ibilang na sagrado an pagkasaserdote, an tabernakulo, asin an mga kasangkapan kaiyan
[Ritrato sa pahina 24]
An linahidan na mga Kristiano digdi sa daga sarong banal na templo
[Mga Ritrato sa pahina 25]
An pamibi asin an satong pampublikong ministeryo sagradong mga pribilehio