Pagpaheling nin Paggalang sa Satong Sagradong mga Pagtiripon
Pagpaheling nin Paggalang sa Satong Sagradong mga Pagtiripon
“Dadarahon ko man sinda sa sakong banal na bukid asin pagagayagayahon ko sinda sa laog kan sakong harong nin pamibi.”—ISAIAS 56:7.
1. Ano an sono sa Kasuratan na mga dahelan niato na magpaheling nin tamang paggalang sa satong mga pagtiripon?
TINIPON ni Jehova an saiyang banwaan, an linahidan na mga Kristiano asin an saindang kairiba, tanganing sumamba sa saiya sa saiyang “banal na bukid.” Pinagagayagaya nia sinda sa laog kan saiyang “harong nin pamibi,” an saiyang espirituwal na templo, na sarong “harong nin pamibi para sa gabos na nasyon.” (Isaias 56:7; Marcos 11:17) An mga pangyayaring ini nagpaparisa na an pagsamba ki Jehova banal, dalisay, asin halangkaw. Paagi sa pagpaheling nin tamang paggalang sa satong mga pagtiripon para sa pag-adal asin pagsamba, pinapatunayan niato na kapareho ni Jehova an pagmansay niato sa sagradong mga bagay.
2. Ano an nagpaparisa na ibinibilang ni Jehova na sagrado an lugar na pinili nia para sa pagsamba sa saiya, asin paano man iyan ipinaheling ni Jesus?
2 Sa suanoy na Israel, dapat na ibilang na sagrado an lugar na pinili ni Jehova para sa pagsamba sa saiya. An tabernakulo asin an mga kasangkapan patin kagamitan kaiyan dapat na lahidan asin santipikaron “tanganing an mga iyan magin nanggad kabanalbanale.” (Exodo 30:26-29) An duwang kuarto kan santuaryo inapod na “an Banal na Lugar” asin “an Kabanalbanale.” (Hebreo 9:2, 3) An tabernakulo kan huri sinalidahan kan templo sa Jerusalem. Bilang an sentro kan pagsamba ki Jehova, an Jerusalem inapod na “banal na siudad.” (Nehemias 11:1; Mateo 27:53) Durante kan saiyang ministeryo sa daga, si Jesus mismo nagpaheling nin maninigong paggalang sa templo. Sia naanggot sa mga tawo huli sa daing galang na paggamit ninda kan lugar kan templo para sa komersial na mga katuyohan asin bilang madaling agihan.—Marcos 11:15, 16.
3. Ano an nagpapaheling kan pagigin sagrado kan mga katiriponan nin Israel?
3 An mga Israelita regular na nagtitiripon kaidto tanganing sambahon si Jehova asin tanganing maghinanyog sa pagbasa kan saiyang Ley. May nagkapirang aldaw kan saindang mga kapiestahan na inaapod na banal na mga kombension o solemneng mga katiriponan, na nagpaparisa kan pagigin sagrado kan mga pagtiripon na ini. (Levitico 23:2, 3, 36, 37) Sa sarong pampublikong katiriponan kan panahon ni Esdras asin Nehemias, ‘ipinaliwanag kan mga Levita an ley sa banwaan.’ Huling “an bilog na banwaan nagtatarangis mantang nadadangog ninda an mga tataramon kan ley,” an mga Levita ‘nagboot sa bilog na banwaan na tumoninong, na nagsasabi: “Dai kamo maggirong! huli ta an aldaw na ini banal.”’ Dangan, sineselebrar kan mga Israelita an pitong aldaw na Kapiestahan nin mga Payag-Payag na may “dakulaon na paggayagaya.” Dugang pa, “nagkaigwa nin makosog na pagbasa kan libro kan ley kan tunay na Dios aroaldaw, poon sa enot na aldaw sagkod sa huring aldaw; asin nagpadagos sindang gibohon an kapiestahan nin pitong aldaw, asin sa ikawalong aldaw may solemneng katiriponan, segun sa regulasyon.” (Nehemias 8:7-11, 17, 18) Tunay nanggad na an mga ini banal na mga okasyon na naghahagad nin magalang na pag-atento kan mga nag-aatender.
An Satong mga Pagtiripon Sagrado
4, 5. Anong mga aspekto kan satong mga pagtiripon an nagpapatunay na iyan sagrado?
4 Totoo, si Jehova mayo ngonyan nin literal na banal na siudad digdi sa daga, na may espesyal na templo na idinusay sa pagsamba sa saiya. Minsan siring, dai niato maninigong lingawan an katunayan na an mga pagtiripon para sa pagsamba ki Jehova sagrado. Tolong beses kada semana, nagtitiripon kita tanganing basahon asin pag-adalan an Kasuratan. An Tataramon ni Jehova “ipinapaliwanag nin detalyado,” asin siring kan panahon ni Nehemias, may “pagtao dian nin kahulogan.” (Nehemias 8:8) An gabos niatong pagtiripon minapoon asin natatapos sa pamibi, asin sa kadaklan kaiyan, nagkakanta kita nin mga awit nin pag-omaw ki Jehova. (Salmo 26:12) An mga pagtiripon kan kongregasyon tunay nanggad na kabtang kan satong pagsamba asin naghahagad nin mapagngayongayong aktitud asin magalang na pag-atento niato.
5 Binebendisyonan ni Jehova an saiyang banwaan mantang sinda nagtitiripon tanganing sambahon sia, pag-adalan an saiyang Tataramon, asin ikaogma an nakakarahay na Kristianong pag-iribaiba. Kun oras na nin pag-atender sa sarong pagtiripon, makakasegurado kita na dian ‘ipinagboboot ni Jehova na mamugtak an bendisyon.’ (Salmo 133:1, 3) Inaako niato an bendisyon na iyan kun kita presente asin atentong nagsusubaybay sa espirituwal na programa. Dugang pa, si Jesus nagsabi: “Kun saen may duwa o tolo na nagkakatiripon sa ngaran ko, yaon ako sa tanga ninda.” Base sa konteksto, an mga tataramon na ini aplikado sa Kristianong kamagurangan na nagmimiting sa pag-asikaso sa magabat na mga problema sa pag-oltanan nin mga indibiduwal, alagad sa prinsipyo, iyan aplikado man sa satong mga pagtiripon. (Mateo 18:20) Kun si Cristo, paagi sa banal na espiritu, yaon kun an mga Kristiano nagtitiripon sa ngaran nia, bako daw na maninigo na ibilang na sagrado an siring na mga pagtiripon?
6. Ano an masasabi manongod sa satong pinagtitiriponan na mga lugar, dakula sagkod sadit?
6 Totoo na si Jehova dai nag-eerok sa mga templo na gibo nin tawo. Minsan siring, an satong mga Kingdom Hall lugar nin tunay na pagsamba. (Gibo 7:48; 17:24) Nagtitiripon kita dian tanganing pag-adalan an Tataramon ni Jehova, mamibi sa saiya, asin umawit nin mga pag-omaw sa saiya. Totoo man iyan sa satong mga Assembly Hall. An mas darakulang pasilidad na inaarkila para sa satong mga kombension—siring baga nin mga auditoryum, tiriponan para sa eksibisyon, o mga istadyum sa isport—nagigin lugar nin pagsamba mantang ginagamit para sa satong sagradong mga pagtiripon. An mga okasyon na ini para sa pagsamba, dakula asin sadit, maninigo sa satong paggalang, asin iyan maninigong mabanaag sa satong aktitud asin gawe-gawe.
Mga Paagi na Ikakapaheling an Paggalang sa Satong mga Pagtiripon
7. Sa anong risang paagi ikakapaheling niato an paggalang sa satong mga pagtiripon?
7 Igwa nin risang mga paagi tanganing ikapaheling niato an paggalang sa satong mga pagtiripon. An sarong paagi iyo an pagigin presente para sa pagkanta kan pang-Kahadean na mga awit. An dakol sa mga ini ginamitan nin mga tataramon na kapareho nin mga pamibi asin kun siring maninigo na awiton na may reberensia. Sa pagkotar sa Salmo 22, si apostol Pablo nagsurat manongod ki Jesus: “Ipapahayag ko an saimong ngaran sa sakong mga tugang; sa tahaw kan kongregasyon oomawon taka paagi sa pag-awit.” (Hebreo 2:12) Huli kaini, maninigo na ugaleon niato na nakatukaw na kita bago iintrodusir kan tsirman an awit dangan magkonsentrar sa kahulogan kan mga tataramon mantang nag-aawit. Logod na an satong mga pag-awit magpabanaag kan saboot kan salmista na nagsurat: “Oomawon ko si Jehova sa bilog kong puso sa dayupot na grupo nin mga matanos asin sa katiriponan.” (Salmo 111:1) Iyo, an pag-awit nin mga pag-omaw ki Jehova sarong marahayon na dahelan na umabot nin amay sa satong mga pagtiripon asin dai maghale sagkod na matapos.
8. Anong halimbawa sa Biblia an nagpapaheling na angay na tawan niato nin magalang na atension an mga pamibi sa satong mga pagtiripon?
8 An saro pang aspekto na nagdadagdag sa espirituwal na halaga kan gabos niatong pagtiripon iyo an odok sa pusong pamibi na ipinapahayag para sa gabos na nagkakatiripon. Sa sarong okasyon, nagtiripon an mga Kristiano kan enot na siglo sa Jerusalem asin “sararo nindang kinosogan an saindang tingog sa Dios” sa odok na pamibi. Bilang resulta, sinda nagpadagos—sa ibong nin persekusyon—na ‘nagtataram kan tataramon nin Dios na may pagkapusoan.’ (Gibo 4:24-31) Maiimahinar daw niato an siisay man sa mga presente kaidto na naglalagawlagaw an isip durante kan pamibi na iyan? Dai nanggad, sinda “sararong” namibi. An mga pamibi sa satong mga pagtiripon nagpapabanaag kan mga saboot kan gabos na yaon. Iyan angay na tawan niato nin magalang na atension.
9. Paano niato ikakapaheling an satong paggalang sa sagradong mga pagtiripon paagi sa satong paggubing asin gawe-gawe?
9 Apuera kaini, ikakapaheling niato kun gurano kararom an satong paggalang sa pagigin sagrado kan satong mga pagtiripon paagi sa satong paggubing. An satong itsura kun manongod sa satong paggubing sagkod estilo nin buhok makakadugang na marhay sa dignidad kan satong mga pagtiripon. Si apostol Pablo nagkonseho: “Sakuyang minamawot na sa lambang lugar an mga lalaki magpadagos sa pamimibi, na nag-iitaas nin maimbod na mga kamot, na dai nin grabeng kaanggotan asin mga debate. Kaagid kaiyan sakuyang minamawot na an mga babae magsamno sa saindang sadiri nin husay na gubing, na may kabinian asin toltol na isip, bakong nin mga estilo nin pagsalapid nin buhok asin bulawan o perlas o mamahalon na gayong gubing, kundi sa paagi na angay sa mga babae na naghihingakong sinda may reberensia sa Dios.” (1 Timoteo 2:8-10) Kun kita nag-aatender sa darakulang kombension na ginigibo sa mga istadyum, puede kitang maggubing na angay sa kamugtakan nin panahon alagad dapat na may dignidad pa man giraray. Dugang pa, an satong paggalang sa okasyon matabang sa sato na likayan an pagkakan o pagngutanguta nin chewing gum durante kan mga sesyon. An angay na gubing asin gawe-gawe sa satong mga pagtiripon nagtatao nin onra ki Jehova Dios, sa pagsamba sa saiya, asin sa satong mga kapwa parasamba.
Gawe-Gawe na Angay sa Harong nin Dios
10. Paano ipinaheling ni apostol Pablo na kaipuhan an halangkaw na pamantayan nin gawe-gawe sa satong Kristianong mga pagtiripon?
10 Sa 1 Corinto, kapitulo 14, manonompongan niato an madonong na konseho ni apostol Pablo sa kun paano gigibohon an Kristianong mga pagtiripon. Nagkonklusyon sia sa pagsabing: “Pabayaan na an gabos na bagay mangyari sa disente asin aregladong paagi.” (1 Corinto 14:40) An satong mga pagtiripon mahalagang kabtang kan aktibidad kan Kristianong kongregasyon, asin nagkakaipo iyan nin klase nin gawe-gawe na angay sa harong ni Jehova.
11, 12. (a) Ano an maninigong itudok sa isip kan mga aki na nag-aatender sa satong mga pagtiripon? (b) Sa anong angay na paagi ikakapahayag kan mga aki an saindang pagtubod sa satong mga pagtiripon?
11 An mga aki partikularmenteng kaipuhan na tokdoan kun paano magawe sa satong mga pagtiripon. Maninigong ipaliwanag kan Kristianong mga magurang sa saindang mga aki na bakong lugar sa pagkawat an Kingdom Hall asin an mga lugar na ginagamit sa Pag-adal sa Libro kan Kongregasyon. Mga lugar iyan kun saen kita nagsasamba ki Jehova asin nag-aadal kan saiyang Tataramon. An madonong na si Hadeng Salomon nagsurat: “Maanan mo an saimong bitis kun ika minaduman sa harong kan tunay na Dios; asin rumani ka sa pagdangog.” (Eclesiastes 5:1) Tinokdoan ni Moises an mga Israelita na magtiripon an mga nasa edad asin “an saradit.” Sinabi nia: “Tiponon mo an banwaan . . . tanganing sinda maghinanyog asin tanganing sinda makanood, huli ta dapat sindang matakot ki Jehova na saindong Dios asin mag-ingat na otobon an gabos na tataramon kan ley na ini. Asin an saindang mga aki na dai pa nakakaaram maninigong maghinanyog, asin kaipuhan na makanood sindang matakot ki Jehova.”—Deuteronomio 31:12, 13.
12 Siring man ngonyan, an mga kaakian niato nag-aatender sa mga pagtiripon kaiba kan saindang mga magurang sa pangenot tanganing maghinanyog asin tanganing makanood. Oras na kaya na nindang sumubaybay asin makasabot nin kisuerra pundamental na mga katotoohan sa Biblia, an mga aki puede man na ‘magpahayag sa publiko’ kan saindang pagtubod paagi sa pagpartisipar sa pagtao nin haralipot na komento. (Roma 10:10) An sarong sadit na aki puedeng pumoon paagi sa pagsabi nin nagkapirang tataramon bilang simbag sa sarong hapot na nasasabotan nia. Sa primero, tibaad kaipuhan niang basahon an simbag, alagad pag-abot nin panahon, hihingoahon niang ipahayag an nasa isip nia sa sadiri niang mga tataramon. Kapakipakinabang asin nakakagayagaya ini sa aki, asin an siring na gikan sa boot na mga kapahayagan nin pagtubod nakakaogmang marhay sa puso kan yaon na mga mas may edad. Naturalmente, an mga magurang nagtatao nin halimbawa paagi sa pagkomento mismo ninda. Kun posible, marahay man na an mga aki magkaigwa kan sadiri nindang kopya nin Biblia, songbook, asin kopya kan publikasyon na pinag-aadalan. Maninigo sindang makanood na magpaheling nin tamang paggalang sa mga publikasyon na iyan. Ikakatudok kan gabos na ini sa isip kan mga aki na an satong mga pagtiripon sagrado.
13. Ano an satong linalaoman mapadapit sa mga nag-aatender sa satong mga pagtiripon sa kaenot-enote?
13 Siempre, habo niato na an satong mga pagtiripon magin kapareho kan mga seremonya sa simbahan kan Kakristianohan. An mga ini puedeng magsalang indiperente asin banal-banayot o maribok na siring sa mga konsiertong rock. Gusto niato na an mga pagtiripon sa satong mga Kingdom Hall magin makikatood asin mapag-istimar alagad bako man na sobra kaimpormal. Nagtitiripon kita tanganing sambahon si Jehova, kaya an satong mga pagtiripon maninigong pirmeng may dignidad. An kamawotan niato iyo na pakatapos maghinanyog sa mga pahayag asin maheling an gawe-gawe niato asin kan satong mga aki, an mga nag-atender sa kaenot-enote masabi: “An Dios tunay nanggad na yaon sa saindo.”—1 Corinto 14:25.
Sarong Permanenteng Kabtang kan Satong Pagsamba
14, 15. (a) Paano niato malilikayan na ‘pabayaan an harong kan satong Dios’? (b) Paano naootob na ngonyan an Isaias 66:23?
14 Siring kan nasambitan sa enotan, tinitipon ni Jehova an saiyang banwaan asin pinapagayagaya sinda sa laog kan saiyang “harong nin pamibi,” an saiyang espirituwal na templo. (Isaias 56:7) Ipinagirumdom kan maimbod na tawong si Nehemias sa saiyang mga kapwa Judio na maninigo sindang magpaheling nin tamang paggalang sa literal na templo paagi sa pagsuportar dian sa materyal na paagi. Sia nagsabi: “Dai niamo maninigong pabayaan an harong kan samuyang Dios.” (Nehemias 10:39) Apuera kaini, dai niato maninigong pabayaan an pangagda ni Jehova na sambahon sia sa laog kan saiyang “harong nin pamibi.”
15 Sa pagpaheling na kaipuhan na magin regular sa pagtorotiripon tanganing sumamba, ihinula ni Isaias: “‘Mangyayari nanggad na poon sa bagong bulan sagkod sa bagong bulan asin poon sa sabbath sagkod sa sabbath an gabos na laman madirigdi tanganing dumuko sa atubangan ko,’ sabi ni Jehova.” (Isaias 66:23) Nangyayari ini ngonyan. Serosemana kada bulan, an nagdusay na mga Kristiano regular na nagtitiripon tanganing sambahon si Jehova. Ginigibo ninda ini, kabilang sa iba pang bagay, paagi sa pag-atender sa Kristianong mga pagtiripon asin pakikikabtang sa pampublikong ministeryo. Saro daw kamo sa mga regular na ‘minadigdi asin minaduko sa atubangan ni Jehova’?
16. Taano ta maninigong magin permanenteng kabtang kan satong buhay ngonyan an regular na pag-atender sa mga pagtiripon?
16 An Isaias 66:23 lubos na maaplikar sa buhay sa ipinanugang bagong kinaban ni Jehova. Sa panahon na iyan, “an gabos na laman,” sa literal na sentido, serosemana asin bulan-bulan, “madirigdi tanganing dumuko,” o sumamba, ki Jehova sa bilog na panahon na daing sagkod. Huling an pagtorotiripon tanganing sambahon si Jehova magigin permanenteng kabtang kan satong espirituwal na buhay sa bagong sistema nin mga bagay, bako daw na maninigo niatong gibohon na permanenteng kabtang kan satong buhay ngonyan an regular na pag-atender sa satong sagradong mga pagtiripon?
17. Taano ta kaipuhan niato an satong mga pagtiripon “lalo na ta naheheling [niato] na an aldaw harani na”?
17 Mantang nagdadangadang an katapusan, maninigo kitang magin mas determinado kisa kasuarin man na umatender sa satong Kristianong mga pagtiripon para sa pagsamba. Huli sa paggalang sa pagigin sagrado kan satong mga pagtiripon, dai niato tinotogotan an sekular na trabaho, asignasyon sa eskuelahan, o pag-eskuela sa banggi na magin dahelan na kita magpalta sa satong regular na pakipagtipon sa satong mga kapagtubod. Kaipuhan niato an kosog na nakukua paagi sa pakikiasosyar. An satong mga pagtiripon kan kongregasyon nagtatao sa sato nin oportunidad na mamidbid an lambang saro, magtao nin pamparigon sa boot, asin dagkahon an lambang saro sa “pagkamoot asin sa marahay na mga gibo.” Kaipuhan niatong gibohon ini “lalo na ta naheheling [niato] na an aldaw harani na.” (Hebreo 10:24, 25) Kun siring, pirme logod kitang magpaheling nin tamang paggalang sa satong sagradong mga pagtiripon paagi sa regular na pag-atender, angay na paggubing, asin tamang gawe-gawe. Sa paggibo kaiyan, ipinapaheling niato na kapareho ni Jehova an satong pagmansay sa sagradong mga bagay.
Bilang Repaso
• Ano an nagpapaheling na maninigong ibilang na sagrado an mga pagtiripon kan banwaan ni Jehova?
• Anong mga aspekto kan satong mga pagtiripon an nagpapatunay na iyan sagrado?
• Paano ikakapaheling kan mga aki na iginagalang ninda an pagigin sagrado kan satong mga pagtiripon?
• Taano ta maninigo niatong gibohon na permanenteng kabtang kan satong buhay an regular na pag-atender sa mga pagtiripon?
[Mga Hapot Para sa Pag-adal]
[Mga Ritrato sa pahina 28]
An mga pagtiripon para sa pagsamba ki Jehova sagrado saen man iyan ginigibo
[Ritrato sa pahina 31]
An satong saradit na aki nag-aatender sa mga pagtiripon tanganing maghinanyog asin tanganing makanood