Si Daniel Asin an Saiyang Badge Card sa Kombension

SINAWAY ni Jesus an nagpapakangmatanos na mga lider nin relihion na nagkaaranggot na marhay kan maheling ninda an mga aking lalaki na inoomaw an Dios sa publiko. Tama sana, hinapot sinda ni Jesus: “Ano dai nindo noarin man nabasa ini, ‘Gikan sa ngoso nin mga omboy asin pasusohon ika nagkamit nin pag-omaw’?”—Mateo 21:15, 16.

An sais anyos na si Daniel, na asosyado sa sarong Ruso an lenguahe na kongregasyon sa Alemania, sarong prueba na an mga aki nag-oomaw ki Jehova sagkod ngonyan. Kaiba an saiyang ina asin tugang na babae, nag-atender sia sa sarong kombension kan Mga Saksi ni Jehova sa Duisburg. Ini an enot na pag-atender ninda nin siring kadakulang kombension. An gabos bago sa sainda: an hotel, an kadakol na nagdadangog, an toninong na pagtukaw sa laog nin tolong aldaw, an bautismo, saka an drama. Asin kumusta si Daniel? Arogan an saiyang gawe-gawe.

Kan Lunes pakatapos kan kombension, kan nasa harong na giraray, amay na nagbangon si Daniel tanganing mag-eskuela sa kindergarten. Alagad ano an yaon pa sa saiyang diaket? An badge card na nagpamidbid sa saiya bilang delegado sa kombension! Ipinaliwanag kan saiyang ina sa saiya: “Tapos na an kombension. Ngonyan puede mo nang haleon an badge card.” Alagad sinabi ni Daniel: “Gusto ko na maheling kan gabos kun saen ako hale asin na maaraman ninda kun ano an sakong nanodan.” Kaya maghapon sa kindergarten, may pag-orgolyong ginamit nia an saiyang badge card. Kan hapoton sia kan saiyang maestra manongod kaiyan, isinaysay sa saiya ni Daniel an programa kan kombension.

Paagi sa paggibo nin siring, sinusunod ni Daniel an halimbawa nin rinibong aking lalaki asin babae na sa nakaaging dakol na siglo nakapagtao nin pag-omaw ki Jehova sa publiko.