“Dapat na Kuyogon Niamo an Dios Bilang Namamahala Imbes na mga Tawo”

Pagtao nin Lubos na Patotoo na ‘May Kosog nin Boot’

SARONG madahas na sururog an andam nang bugbogon sagkod na magadan an makinuyog na lingkod nin Dios. Tiempo man na inagaw an tawong iyan kan Romanong mga soldados sa mga nan-atake asin idinetener sia. Digdi nagpoon an sunod-sunod na pangyayari na naglawig nin mga limang taon. Bilang resulta, dakol na haralangkaw an ranggo na Romanong opisyal an nakadangog manongod ki Jesu-Cristo.

An biktima iyo si apostol Pablo. Mga 34 C.E., ihinayag ni Jesus na dadarahon ni Pablo (Saulo) an Saiyang ngaran sa atubangan nin “mga hade.” (Gibo 9:15) Kan taon 56 C.E., dai pa ini nangyari. Minsan siring, kan madali nang matapos an apostol sa saiyang ikatolong pagbiahe sa pagmimisyonero, maliliwat an situwasyon.

Pinagsururogan Alagad Dai Nadesganar

Padagos si Pablo sa saiyang pagbiahe pasiring sa Jerusalem, asin “paagi sa espiritu” pinatanidan sia kan nagkapirang Kristiano na may naghahalat sa saiya na grabeng persekusyon sa siudad na iyan. May kosog nin boot na sinabi ni Pablo: “Andam ako bako sanang magpagapos kundi magadan man sa Jerusalem dahel sa ngaran kan Kagurangnan na Jesus.” (Gibo 21:4-14) Pakasongkoa ni Pablo kan templo sa Jerusalem, an mga Judio gikan sa Asia na pamilyar sa kapangganahan kan pag-ebanghelyo kan apostol duman nag-agyat nin sururog tanganing gadanon sia. An Romanong mga soldados tolos na sinukorohan sia. (Gibo 21:27-32) An sukoro na iyan nagtao ki Pablo kan bihirang mga oportunidad na ipahayag an katotoohan manongod sa Cristo sa antipatikong mga nagdadangog asin sa haralangkaw an ranggong indibiduwal.

Paghuhulit sa Masakit Aboton na mga Nagdadangog

Ginuyod si Pablo parayo sa peligro pasiring sa hagyan kan kuta na midbid na Torre nin Antonia. * Sa hagyan na idto, itinao kan apostol an sarong mapuersang patotoo sa relihiosong sururog. (Gibo 21:33–22:21) Alagad pagkasambit nia kan sugo sa saiya na maghulit sa mga Hentil, biglang nagkaigwa giraray nin kadahasan. Ipinagboot kan komandante militar na si Lisias na siyasaton si Pablo na may kaibang paglatigo tanganing maaraman kun taano ta inaakusaran sia kan mga Judio. Minsan siring, naolang an paglatigo kan ipinaaram ni Pablo na sia sarong siudadano nin Roma. Kan suminunod na aldaw, dinara ni Lisias si Pablo sa atubangan kan Sanhedrin tanganing maaraman kun taano ta inaakusaran sia kan mga Judio.—Gibo 22:22-30.

Nakatindog sa atubangan kan korte supremang ini, si Pablo may saro pang marahayon na oportunidad na magpatotoo sa saiyang mga kapwa Judio. Ipinahayag kan daing takot na ebanghelisador an saiyang pagtubod sa pagkabuhay liwat. (Gibo 23:1-8) An mapanggadan na pagkaongis kan mga Judio dai pa naghuhupa, asin dinara si Pablo sa kuartel kan mga soldados. Kan suminunod na banggi, inako nia an nakakapakosog nin boot na pag-asegurar na ini gikan sa Kagurangnan: “Kosogi an boot mo! Huli ta kun paanong ika nagtao nin lubos na patotoo sa mga bagay manongod sa sako sa Jerusalem, ika kaipuhan man na magpatotoo sa Roma.”—Gibo 23:9-11.

Naolang an plano na gadanon si Pablo kan an apostol dalidaling dinara sa hilom pasiring sa Cesarea, an Romanong kabisera sa pag-administrar sa Judea. (Gibo 23:12-24) Sa Cesarea, nagkaigwa nin dugang pang mahahalagang oportunidad, asin si Pablo nagpatotoo sa “mga hade.” Pero, enot ipinaheling kan apostol ki Gobernador Felix na mayo nin ebidensia na masuportar sa mga sahot sa saiya. Pakatapos, naghulit si Pablo sa saiya asin sa saiyang agom na si Drusila manongod ki Jesus, sa pagpupugol sa sadiri, katanosan, asin sa maabot na paghokom. Minsan siring, ibinilanggo si Pablo sa laog nin duwang taon, huling nag-aasa si Felix na makaresibi nin suhol na dai noarin man nangyari.—Gibo 23:33–24:27.

 Kan sinalidahan ni Festo si Felix, ipinadagos kan mga Judio an saindang paghihingoa na kondenaron asin gadanon si Pablo. Dinangog giraray an kaso sa Cesarea, asin tanganing dai ibalyo sa Jerusalem an pagbista, si Pablo nagsabi: “Ako nagtitindog sa atubangan kan tukawan sa paghokom ni Cesar . . . Nag-aapelar ako ki Cesar.” (Gibo 25:1-11, 20, 21) Pakalihis nin nagkapirang aldaw, pakatapos na ipresentar kan apostol an saiyang kaso sa atubangan ni Hadeng Herodes Agripa II, an hade na iyan nagsabi: “Sa halipot na panahon makokombensir mo akong magin Kristiano.” (Gibo 26:1-28) Kan mga 58 C.E., ipinadara si Pablo sa Roma. Bilang preso duman, an mapamaaging apostol padagos na naghanap nin mga paagi tanganing maghulit manongod ki Cristo sa laog nin duwa pang taon. (Gibo 28:16-31) Minalataw na sa kahurihurihi si Pablo talagang nagtindog sa atubangan ni Emperador Nero, ipinahayag na daing kasalan, asin sa katapustapusi ikinapadagos an saiyang pagmimisyonero bilang sarong talingkas na tawo. Mayo nin rekord na an siisay man na iba pang apostol nagkaigwa kan oportunidad na mapaabotan kan maogmang bareta an siring na bantog na mga tawo.

Siring kan ipinapaheling sa enotan, si apostol Pablo namuhay kaoyon kan mahalagang prinsipyo na ipinahayag kan saiyang kapwa mga Kristiano sa atubangan kan Judiong tribuna: “Dapat na kuyogon niamo an Dios bilang namamahala imbes na mga tawo.” (Gibo 5:29) Marahayon nanggad na halimbawa an itinao nia sa sato! Sa ibong kan daing ontok na mga paghihingoa nin mga tawo na paontokon sia, lubos na kinuyog kan apostol an pagboot na magtao nin lubos na patotoo. Bilang resulta kan siring na marigon na pagkuyog sa Dios, inotob ni Pablo an saiyang asignasyon bilang “piniling lalagan” tanganing magdara kan ngaran ni Jesus “sa mga nasyon saka sa mga hade asin mga aki ni Israel.”—Gibo 9:15.

[Nota sa Ibaba]

[Kahon/Mga Ritrato sa pahina 9]

INTERESADO SANA DAW SI PABLO SA PAGDEPENSA KAN SAIYANG SADIRI?

Sa pagkomento manongod sa hapot na ini, an autor na si Ben Witherington III nagsurat: “Sa . . . punto de vista ni Pablo, an importanteng bagay bakong an idepensa ni Pablo an saiyang sadiri, kundi imbes makapagpatotoo sia manongod sa ebanghelyo sa mga autoridad, Judio sagkod Hentil. . . . Sa katunayan, an ebanghelyo talaga an binibista.”