Pirmeng Akoon an Disiplina ni Jehova

“An disiplina ni Jehova . . . dai mo ipagsikwal.”—TALINHAGA 3:11.

1. Taano ta maninigo niatong akoon an disiplina nin Dios?

SI Hadeng Salomon kan suanoy na Israel nagtatao sa lambang saro sa sato nin marahay na dahelan tanganing akoon an disiplina hale sa Dios. “An disiplina ni Jehova, O aki ko, dai mo ipagsikwal,” an sabi ni Salomon, “asin dai mo ikasurang nin makuri an saiyang pagsagwe, huli ta an namomotan ni Jehova saiyang sinasagwe, kun paanong an sarong ama nagsasagwe sa aki na saiyang ikinakawili.” (Talinhaga 3:11, 12) Iyo, dinidisiplina kamo kan saindong langitnon na Ama huling namomotan nia kamo.

2. Paano tinawan nin kahulogan an “disiplina,” asin paano puedeng disiplinahon an sarong tawo?

² An “disiplina” nanonongod sa pagkastigo, pagtatanos, pagtotokdo, asin edukasyon. “Mayong disiplina na sa presente garo nakakagayagaya, kundi nakakamondo,” an isinurat ni apostol Pablo, “pero pagkatapos duman sa mga napatuod kaiyan iyan nagbubunga nin toninong na bunga, arin na baga, an katanosan.” (Hebreo 12:11) An pag-ako asin pag-aplikar sa disiplina nin Dios makakatabang sa saindo na sundon an matanos na dalan asin sa siring orog na magpaparani sa saindo sa banal na Dios, si Jehova. (Salmo 99:5) An pagtatanos puedeng itao paagi sa mga kapagtubod, sa mga bagay na nanonodan sa Kristianong mga pagtiripon, asin sa pag-adal nindo sa Tataramon nin Dios asin sa mga publikasyon kan “maimbod na mayordomo.” (Lucas 12:42-44) Sa siring, dapat nanggad na magpasalamat kamo kun dinadara sa saindong atension an sarong bagay na kinakaipuhan na liwaton! Alagad anong disiplina an tibaad kaipuhan kun may magabat na kasalan na nakomiter?

Kun Taano ta Itinitiwalag an Nagkapira

3. Noarin nangyayari an pagtitiwalag?

³ Pinag-aadalan kan mga lingkod nin Dios an Biblia asin an Kristianong mga publikasyon. Tinotokar an mga pamantayan ni Jehova sa saindang mga pagtiripon, asamblea, asin kombension. Kaya  naaaraman kan mga Kristiano kun ano an hinahagad sa sainda ni Jehova. Nangyayari sana an pagtitiwalag kun an sarong miembro kan kongregasyon daing pagsolsol na naggigibo nin magabat na kasalan.

4, 5. Anong sono sa Kasuratan na halimbawa nin pagtitiwalag an iinatubang digdi, asin taano ta sinadol an kongregasyon na ibalik an tawong iyan?

⁴ Estudyare an sono sa Kasuratan na halimbawa nin pagtitiwalag. Kinonsinte kan kongregasyon sa Corinto ‘an siring na pakikisaro na dai nin kaagid minsan sa tahaw kan mga nasyon, na an sarong lalaki nagkaigwa nin agom na babae na sa saiyang ama.’ Sinadol ni Pablo an mga taga Corinto na ‘itao an tawong iyan ki Satanas para sa paglaglag kan laman, tanganing an espiritu makaligtas.’ (1 Corinto 5:1-5) Kun natiwalag asin sa siring itinao ki Satanas, an parakasala nagigin kabtang giraray kan kinaban kan Diablo. (1 Juan 5:19) An paghale sa saiya paghale nin marompot na makalaman na elemento sa kongregasyon asin nagpapadanay sa diosnon na “espiritu” kaini, o nangingibabaw na aktitud.—2 Timoteo 4:22; 1 Corinto 5:11-13.

⁵ Bago mag-agi an halawigon na panahon, sinadol ni Pablo an mga Kristiano sa Corinto na ibalik an nagkasala. Taano? Iyan tangani na dai sinda “masaroan ni Satanas,” an sabi kan apostol. Minalataw na an parakasala nagsolsol asin lininig an saiyang buhay. (2 Corinto 2:8-11) Kun nagsayuma an mga taga Corinto na ibalik an nagsosolsol na tawo, masasaroan sinda ni Satanas huli ta magigin sindang matagas asin habong magpatawad siring kan gustong mangyari sa sainda kan Diablo. Posibleng marhay na dai nahaloy ‘pinatawad asin rinanga’ ninda an nagsosolsol na tawo.—2 Corinto 2:5-7.

6. Ano an nagigibo kan pagtitiwalag?

⁶ Ano an nagigibo kan pagtitiwalag? Pinapagdadanay kaiyan na mayo nin katuyawan an banal na ngaran ni Jehova asin pinoprotehiran an marahay na reputasyon kan saiyang banwaan. (1 Pedro 1:14-16) An paghale sa kongregasyon kan habong magsolsol na nagkasala nagsusuportar sa mga pamantayan nin Dios asin nag-iingat sa espirituwal na kalinigan kan kongregasyon. Puede man na matabangan kaiyan an habong magsolsol na marealisar an kaseryosohan kan saiyang kasalan.

Mahalaga an Pagsolsol

7. Ano an nagin epekto ki David sa dai nia pagtuga kan saiyang mga kalapasan?

⁷ An kadaklan kan nagkasala nin magabat talagang nagsosolsol asin dai itinitiwalag sa kongregasyon. Siempre, an tunay na pagsolsol bakong pasil na gibohon. Estudyare si Hadeng David nin Israel na nagkomponer kan Salmo 32. Ihinahayag kan awit na iyan na sa laog nin sarong peryodo nin panahon dai itinuga ni David an saiyang magabat na mga kasalan, na posibleng marhay na may koneksion ki Bat-seba. An resulta iyo na an labi-labing pagmondo huli sa saiyang mga kasalan inuubos an bagsik nia, kun paanong sinusupsop kan alang na init nin tig-init an alumaad nin sarong kahoy. Si David nagdusa sa pisikal asin mental, alagad kan ‘ituga nia an saiyang mga kalapasan, pinatawad sia ni Jehova.’ (Salmo 32:3-5) Dangan nag-awit si David: “Maogma an tawo na dai kinukuentahan ni Jehova nin sala.” (Salmo 32:1, 2) Kanigoan karahay na maeksperyensiahan an pagkaherak nin Dios!

8, 9. Paano maheheling an pagsolsol, asin gurano iyan kahalaga may koneksion sa pakabalik kan tawong natiwalag?

⁸ Kun siring, malinaw nanggad na dapat na nagsosolsol an nagkasala kun gusto niang mag-ako nin pagkaherak. Minsan siring, bakong pagsolsol an pakamate nin supog ni an pagkatakot na mabuyagyag. An “pagsolsol” nangangahulogan na “liwaton an isip” mapadapit sa maraot na gawe-gawe, huli sa pagbasol. An nagsosolsol na tawo may “pusong nalugadan asin ronot” asin kun posible, gustong ‘itanos an sala.’—Salmo 51:17; 2 Corinto 7:11.

⁹ Mahalagang marhay na bagay an pagsolsol may koneksion sa pakabalik sa Kristianong kongregasyon. An tawong natiwalag dai automatikong inaako liwat sa laog kan kongregasyon pakalihis nin sarong peryodo nin panahon. Bago sia ibalik, dapat na magkaigwa nin dakulang pagbabago sa kamugtakan kan saiyang puso. Dapat na marealisar nia an kaseryosohan kan saiyang kasalan asin an katuyawan na itinao nia ki Jehova asin sa kongregasyon. Dapat na magsolsol an parakasala, odok na mamibi para sa kapatawadan, asin sumunod sa matanos na mga kahagadan nin Dios. Kun nakikiolay na ibalik, maninigo siang makapagpaheling nin ebidensia na nagsolsol na sia asin nagpapaluwas nin “mga gibo na angay sa pagsolsol.”—Gibo 26:20.

 Taano ta Dapat na Ituga an Salang Gibo?

10, 11. Taano ta dai niato maninigong pagmaigotan na itago na sana an kasalan?

¹⁰ An nagkapirang nagkasala tibaad mangatanosan: ‘Kun sasabihon ko sa kiisay man an sakong kasalan, tibaad kaipuhan na simbagon ko an makasusupog na mga hapot asin tibaad matiwalag ako. Alagad kun dai ako matuga, puede kong malikayan iyan asin mayo nin siisay man sa kongregasyon an makakaaram.’ Dai kinokonsiderar kan siring na kaisipan an nagkapirang mahalagang bagay. Ano an mga ini?

¹¹ Si Jehova sarong “Dios na maheherakon asin maugayon, maluway sa pagkaanggot asin abunda sa mamomoton na kabootan asin katotoohan, nagpapadanay nin mamomoton na kabootan para sa rinibo, na nagpapatawad sa sala asin paglapas patin kasalan.” Pero, ikinokorehir nia an saiyang banwaan “sa tamang sokol.” (Exodo 34:6, 7; Jeremias 30:11) Kun kamo magkakasala nin magabat, paano nindo aakoon an pagkaherak nin Dios kun pagmamaigotan nindong itago an saindong kasalan? Naaaraman iyan ni Jehova, asin dai nia basta sana pinapalimanlimanan an salang gibo.—Talinhaga 15:3; Habacuc 1:13.

12, 13. Ano an puedeng magin resulta kan pagmamaigot na itago an salang gibo?

¹² Kun nakakomiter kamo nin magabat na kasalan, makakatabang sa saindo an pagtuga tanganing magkaigwa giraray nin marahay na konsensia. (1 Timoteo 1:18-20) Alagad an dai pagtuga magreresulta sa sarong nadigtaan na konsensia na puedeng magdara sa saindo sa orog pang pagkakasala. Girumdomon na an saindong pagkakasala bako sanang tumang sa ibang tawo o sa kongregasyon. Iyan tumang sa Dios. An salmista nag-awit: “Si Jehova—yaon sa kalangitan an saiyang trono. An saiyang mga mata nagmamasid, an saiyang nagliliwanag na mga mata nagsisiyasat sa mga aki nin mga tawo. Si Jehova mismo an nagsisiyasat sa matanos saka sa marigsok.”—Salmo 11:4, 5.

¹³ Dai bebendisyonan ni Jehova an siisay man na nagtatago nin magabat na kasalan asin pinagmamaigotan na magdanay sa malinig na Kristianong kongregasyon. (Santiago 4:6) Kaya kun kamo nahulog sa pagkakasala asin gustong gibohon an tama, dai mag-alangan na gibohon an sadiosan na pagtuga. Ta kun dai, magkakaigwa kamo nin riniribok na konsensia, nangorogna kun nakakabasa o nakakadangog kamo nin sadol mapadapit sa seryosong mga bagay na iyan. Paano kun haleon ni Jehova an saiyang espiritu sa saindo, siring kan saiyang ginibo ki Hadeng Saul? (1 Samuel 16:14) Kun mayo na an espiritu nin Dios, puede kamong mahulog sa orog pang magabat na pagkakasala.

Magtiwala sa Maimbod na mga Tugang Nindo

14. Taano ta maninigong sunodon kan nagkasala an sadol sa Santiago 5:14, 15?

¹⁴ Kaya, kun siring, ano an maninigong gibohon nin nagsosolsol na nagkasala? “Apodon nia an kamagurangan na lalaki kan kongregasyon, asin sinda mamibi para sa saiya, na linalahidan sia nin lana sa ngaran ni Jehova. Asin an pamibi nin pagtubod magpapaomay sa may kamatean, asin babangonon sia ni Jehova.” (Santiago 5:14, 15) An pagdolok sa kamagurangan sarong paagi tangani na an saro ‘makapagpaheling nin bunga na angay sa pagsolsol.’ (Mateo 3:8) An maimbod asin madinamayon na mga lalaking ini ‘mamimibi para sa saiya asin lalahidan sia nin lana sa ngaran ni Jehova.’ Siring sa nakakapaginhawang lana, an saindang sadol na sono sa Biblia magigin nakakaranga sa siisay man na talagang nagsosolsol.—Jeremias 8:22.

15, 16. Paano sinusunod kan Kristianong kamagurangan an halimbawa na itinao nin Dios, siring kan nakarekord sa Ezequiel 34:15, 16?

¹⁵ Kanigoan kamamomoton na halimbawa an itinao kan satong Pastor, si Jehova, kan saiyang patalingkason an mga Judio sa pagkabihag sa Babilonya kan 537 B.C.E. asin kan patalingkason nia an espirituwal na Israel sa “Dakulang Babilonya” kan 1919 C.E.! (Kapahayagan 17:3-5; Galacia 6:16) Sa siring, inotob nia an saiyang panuga: “Ako mismo an mapasabsab sa sakong mga karnero, asin ako mismo an mapahigda sa sainda . . . Hahanapon ko an nawara, asin ibabalik ko an nalagalag, asin bobogkosan ko an nabarian asin papakosogon ko an naghehelang.”—Ezequiel 34:15, 16.

¹⁶ Pinapakakan ni Jehova an saiyang piguratibong mga karnero, pinapahigda sinda sa katiwasayan, asin hinahanap an mga nawara. Kaagid kaiyan, sinesegurado kan Kristianong mga pastor na an aripompon nin Dios basog asin tiwasay sa espirituwal. Hinahanap kan kamagurangan an mga karnero na napaparayo sa kongregasyon. Kun paanong ‘binogkosan nin Dios an nabarian,’ ‘binobogkosan’  man kan mga paraataman an mga karnero na nalugadan an boot huli sa sinabi nin iba o kan sainda mismong gawe-gawe. Asin kun paanong ‘pinakosog nin Dios an naghehelang,’ tinatabangan kan kamagurangan an mga nagkakahelang sa espirituwal, posibleng huli sa personal na salang gibo.

Kun Paano Nagtatabang an mga Pastor

17. Taano ta dai kita maninigong mag-alangan na humagad nin espirituwal na tabang sa kamagurangan?

¹⁷ Maogmang sinusunod kan kamagurangan an sadol na ini: “Padagos na magpaheling nin pagkaherak . . . , na ginigibo iyan na may takot.” (Judas 23) Huli sa pagkahulog sa seksuwal na inmoralidad, an nagkapirang Kristiano nagkasala nin magabat. Alagad kun talagang nagsosolsol sinda, makakalaom sinda nin maheherakon, mamomoton na pagtratar kan kamagurangan na galagang tumabang sa sainda sa espirituwal. Iiniiba an saiyang sadiri, nagsabi si Pablo mapadapit sa siring na mga lalaki: “Bako na kami an mga kagurangnan kan saindong pagtubod, kundi kami mga kapwa trabahador para sa saindong kagayagayahan.” (2 Corinto 1:24) Kun siring, nungkang mag-alangan na humagad nin espirituwal na tabang sa sainda.

18. Paano tinatratar kan kamagurangan an napapasalang mga kapagtubod?

¹⁸ Kun kamo nagkasala nin magabat, taano ta makakapagtiwala kamo sa kamagurangan? Huli ta sa pangenot mga pastor sinda kan aripompon nin Dios. (1 Pedro 5:1-4) Mayong mamomoton na pastor an minahampak sa sarong maboot, nagbuburang kordero huli sa pakakolog kaini sa saiyang sadiri. Kun siring, kun tinatratar kan kamagurangan an napapasalang mga kapagtubod, sagkod sa mapupuede, an tatawan ninda nin pagdodoon bakong an manongod sa itataong padusa, kundi an manongod sa kasalan asin espirituwal na pagbabalik. (Santiago 5:13-20) An kamagurangan dapat na maghokom na may katanosan asin ‘magin maboot sa aripompon.’ (Gibo 20:29, 30; Isaias 32:1, 2) Kapareho kan gabos na iba pang Kristiano, an kamagurangan dapat na ‘gumibo nin hustisya, mamoot sa kabootan, asin magin hababa an boot sa paglakaw sa kaibahan nin Dios.’ (Miqueas 6:8) Mahalagang marhay an siring na mga kualidad kun naggigibo nin mga desisyon may koneksion sa buhay asin sagradong paglilingkod kan ‘mga karnero kan pasabsaban ni Jehova.’—Salmo 100:3.

19. Paagi sa anong aktitud pinagmamaigotan kan Kristianong kamagurangan na pakarhayon giraray an sarong tawo?

¹⁹ An Kristianong mga pastor ninombrahan kan banal na espiritu asin naghihingoang magpagiya dian. “Kun an sarong tawo gumibo nin sala bago nia iyan maaraman”—na garo baga nagpabaya—an mga lalaki na may espirituwal na kualipikasyon magmamaigot na “pakarhayon giraray an tawong iyan sa espiritu nin kahoyoan.” (Galacia 6:1; Gibo 20:28) May kahoyoan alagad kadungan kaiyan may karigonan para sa mga  pamantayan nin Dios, pagmamaigotan kan kamagurangan na pakarhayon giraray an saiyang kaisipan, kun paanong an sarong makonsiderasyon na doktor maingat na isinusulit an nabaring takyag, tanganing malikayan an dai kinakaipuhan na kolog alagad ta inaasikaso an problema. (Colosas 3:12) Huling an ano man na pagpaheling nin pagkaherak magigin basado sa pamibi asin sa Kasuratan, an desisyon kan kamagurangan magpapabanaag kan pagmansay nin Dios sa mga bagay.—Mateo 18:18.

20. Noarin tibaad kaipuhan na ipaisi sa kongregasyon na an sarong tawo sinagwe?

²⁰ Kun dakol an nakakaaram kan kasalan o daing duda na iyan mahahayag, an paisi sa kongregasyon tibaad angay nanggad tanganing protehiran an reputasyon kaiyan. Gigibohon man an pagpaisi kun kinakaipuhan na impormaran an kongregasyon. Durante kan panahon na nagpapaomay sa espirituwal an indibiduwal na sinagwe sa hudisyal na paagi, ikakaagid sia sa sarong tawo na nagpapaomay sa sarong lugad, na temporaryong nakakalimitar sa saiyang aktibidad. Sa laog nin sarong peryodo nin panahon, posibleng marhay na magigin kapakipakinabang para sa nagsosolsol na maghinanyog imbes na magkomento sa mga pagtiripon. Puedeng mag-areglo an kamagurangan na may saro na magkondukta nin pag-adal sa Biblia sa saiya tanganing pakosogon sia sa kabtang na sia maluya tanganing sia sa giraray magin “makosog sa pagtubod.” (Tito 2:2) An gabos na ini ginigibo huli sa pagkamoot asin bakong sa katuyohan na padusahan an nagkasala.

21. Paano puedeng asikasohon an nagkapirang kaso nin salang gibo?

²¹ An kamagurangan makakapagtao nin espirituwal na tabang sa manlaenlaen na paagi. Halimbawa, ipamugtak na an sarong tugang na lalaki na may problema sa pag-inom nin inomon na de alkohol kan nakaagi saro o duwang beses na nag-inom nin sobra kan nagsosolo sa harong. O tibaad an saro na haloy nang binayaan an paggamit nin tabako hilom na nagsigarilyo nin saro o duwang beses sa sarong panahon nin kaluyahan. Minsan ngani namibi na sia asin naniniwala na pinatawad na sia nin Dios, maninigo siang magpatabang sa sarong magurang sa kongregasyon tangani na an siring na kasalan dai magin paorootro. Puedeng asikasohon nin saro o duwang magurang sa kongregasyon an situwasyon na iyan. Minsan siring, iimpormaran kan (mga) magurang na iyan sa kongregasyon an nangengenot na paraataman, ta tibaad may iba pang bagay na kalabot.

Padagos na Akoon an Disiplina nin Dios

22, 23. Taano ta maninigo nindong padagos na akoon an disiplina nin Dios?

²² Tanganing kamtan an pag-oyon nin Dios, an balang Kristiano dapat na magtao nin atension sa disiplina ni Jehova. (1 Timoteo 5:20) Kaya isapuso an ano man na pagtatanos na inaako kun pinag-aadalan nindo an Kasuratan asin Kristianong mga publikasyon o kun nakakadangog kamo nin sadol na iinaatubang sa mga pagtiripon, asamblea, asin kombension kan banwaan ni Jehova. Magdanay na mapagbantay mapadapit sa paggibo kan kabotan ni Jehova. Sa siring tatabangan kamo kan disiplina nin Dios na mapagdanay an espirituwal na depensa—sarong makosog, garo lanob na depensa tumang sa kasalan.

²³ An pag-ako sa disiplina nin Dios magpapangyari sa saindo na magdanay sa pagkamoot nin Dios. Totoo, may nagkapira na hinale sa Kristianong kongregasyon, alagad dai ini kaipuhan na mangyari sa saindo kun ‘iingatan nindo an saindong puso’ asin ‘malakaw siring sa madonong.’ (Talinhaga 4:23; Efeso 5:15) Minsan siring, kun kamo sarong tiwalag ngonyan, taano ta dai gibohon an mga lakdang tanganing makabalik? Gusto nin Dios na an gabos na nagdusay sa saiya maimbod na magsamba sa saiya na may “kagayagayahan sa puso.” (Deuteronomio 28:47) Magigibo nindo iyan sagkod lamang kun pirme nindong aakoon an disiplina ni Jehova.—Salmo 100:2.

Ano an Isisimbag Nindo?

• Taano an nagkapira ta hinahale sa Kristianong kongregasyon?

• Ano an kalabot sa tunay na pagsolsol?

• Taano ta maninigong ituga an magabat na kasalan?

• Sa anong mga paagi na an Kristianong kamagurangan nagtatabang sa nagsosolsol na mga nagkasala?

[Mga Hapot Para sa Pag-adal]

[Ritrato sa pahina 26]

Taano an mga taga Corinto ta pinadarahan ni apostol Pablo nin mga instruksion manongod sa pagtitiwalag?

[Ritrato sa pahina 29]

Arog kan suanoy na mga pastor, ‘binobogkosan’ kan Kristianong kamagurangan an nalugadan na mga karnero nin Dios