Sarong Isyu na Kalabot Kamo

IGWA daw kamo nin sarong katood o kapamilya na espesyalmenteng kadayupot nindo? Paano kun kamo sahotan nin sarong tawo na pinapagdanay nindo an relasyon na iyan huli sana sa maimot na mga dahelan? Dai daw kamo makokolgan, tibaad maggurobgutob pa ngani? Iyan an mismong sahot ni Satanas na Diablo sa gabos na may dayupot na relasyon ki Jehova Dios.

Horophoropa kun ano an nangyari kan an enot na tawong mag-agom, si Adan asin Eva, nadara ni Satanas na bumalga sa ley nin Dios asin umiba sa saiya sa pagrebelde nia sa Dios. An nangyari daw nangangahulogan na an mga tawo magdadanay sana na makinuyog ki Jehova sagkod na nakikinabang sinda sa paggibo kaiyan? (Genesis 3:1-6) Mga 2,500 na taon pakatapos kan pagsuway ni Adan, pinalataw ni Satanas an mismong isyung ini—ngonyan may koneksion sa sarong tawo na an ngaran Job. Huling an sahot kan Diablo malinaw na nagsasabi kun ano an isyung kalabot, maingat niatong siyasaton an pagkasaysay na iyan sa Biblia.

‘Dai Ko Hahaleon an Sakuyang Integridad’

Si Job “sarong lalaking daing katuyawan asin tanos, na natatakot sa Dios asin naglilikay sa maraot.” Minsan siring, pinakaraot ni Satanas an pagigin tanos ni Job. “Natatakot daw si Job sa Dios na mayo nin kabayadan?” an hapot nia ki Jehova. Dangan, pinakaraot kan Diablo an Dios sagkod si Job paagi sa pagsahot na binakal ni Jehova an kaimbodan ni Job paagi sa pagprotehir asin pagbendisyon sa saiya. “Ngonyan,” an angat ni Satanas, “tabi unata an saimong kamot asin dotdota an gabos niang sadiri asin helinga kun baga dai ka nia sumpaon nin atubangan.”—Job 1:8-11.

Tanganing masimbag an mga paghihingakong ini, tinogotan ni Jehova si Satanas na baloon si Job. Sa paghihingoang italikod sia sa paglilingkod sa Dios, an Diablo nagpaabot nin sunod-sunod na kalamidad sa maimbod na lalaking iyan. Magsalang hinabon o ginadan an gabos na ataman na hayop ni Job asin ginadan an mga katabang saka mga aki nia. (Job 1:12-19) Alagad mapanggana daw si Satanas? Dai nanggad! Minsan ngani daing pakaaram na an Diablo an causa kan mga pagbalo sa saiya, si Job nagsabi: “Si Jehova an nagtao, asin si Jehova an buminawe. Padagos logod na pag-omawon an ngaran ni Jehova.”—Job 1:21.

Pagkatapos, inatubang ni Satanas si Jehova, na nagsasabi sa saiya: “[Si Job] nangangapot pa giraray . . . nin higot sa saiyang integridad, minsan ngani sinusutsutan mo ako tumang sa saiya na paraon sia na mayo nin dahelan.” (Job 2:1-3) An mahalagang marhay na isyu iyo an integridad ni Job—sarong kualidad na naghahagad nin marigon na kaimbodan sa Dios asin maimbod na pagsuportar sa katanosan. Nanggana si Job sagkod sa oras na idto manongod sa isyu nin integridad. Minsan siring, dai suminuko an Diablo.

Sunod, naggibo si Satanas nin pangkagabsan na paghihingako na nakakaapektar sa bilog na katawohan. “Kublit para sa kublit,” an sabi nia ki Jehova, “asin an gabos na sadiri nin tawo itatao nia para sa saiyang kalag. Alagad ta unata tabi an saimong kamot asin dotdota sagkod an saiyang tolang asin an saiyang laman patin helinga kun baga dai ka nia sumpaon nin atubangan.” (Job 2:4, 5) Paagi sa paggamit  kan pangkagabsan na terminong “tawo” imbes na kan ngaran na Job, kinukuestion kan Diablo an integridad nin lambang tawo. Garo man sana iniinsistir nia: ‘Gigibohon nin sarong tawo an gabos tanganing iligtas an saiyang buhay. Tawan mo ako nin oportunidad, asin kaya kong italikod an siisay man sa Dios.’ Mayo daw nin tawo na magdadanay na maimbod sa Dios sa irarom nin gabos na kamugtakan asin sa gabos na panahon?

Tinogotan ni Jehova an Diablo na pasakitan nin makuri si Job paagi sa sarong nakakagadan na helang. Nagsakit na marhay si Job kaya namibi sia na magadan na sia. (Job 2:7; 14:13) Pero, sinabi ni Job: “Sagkod na ako magadan dai ko hahaleon sa sakuyang sadiri an sakuyang integridad!” (Job 27:5) Sinabi ini ni Job huling namomotan nia an Dios, asin mayo nin makakapabago kaiyan. Pinatunayan ni Job na sia sarong tawo na may integridad. “Kun manongod ki Jehova,” an sabi kan Biblia, “binendisyonan nia an kasagkodan ni Job nin labi pa sa saiyang kapinonan.” (Job 42:10-17) Igwa daw nin iba pang arog ni Job? Ano an ihinayag kan pag-agi nin panahon?

Kun Paano Nasimbag an Angat

Sa kapitulo 11 kan libro sa Biblia na Hebreo, sinambit ni apostol Pablo an ngaran kan dakol na maimbod na lalaki asin babae kan mga panahon bago kan mga Kristiano, kaiba si Noe, Abraham, Sara, asin Moises. Dangan an apostol nagsabi: ‘Magkukulang ako nin panahon kun padagos kong isasaysay an manongod sa iba pa.’ (Hebreo 11:32) Dakolon an maimbod na mga lingkod na ini nin Dios kaya inaapod sinda ni Pablo na ‘dakulaon na panganoron nin mga saksi,’ na iinaagid sinda sa sarong dakulaon na panganoron sa langit. (Hebreo 12:1) Iyo, sa nag-aging mga siglo, dai mabilang na kaburunyogan nin tawo an ginamit an saindang libreng kabotan asin nagdesisyon na itao an saindang kaimbodan ki Jehova Dios.—Josue 24:15.

An nangongorog na simbag sa paghihingako ni Satanas na kaya niang italikod an mga tawo ki Jehova iyo an hale sa Aki mismo nin Dios, si Jesu-Cristo. Dawa an makuring kolog sa hariging pasakitan dai nakaraot sa saiyang integridad sa Dios. Kan si Jesus naghihingagdan na, sia kuminurahaw: “Ama, sa saimong mga kamot ipinagkakatiwala ko an sakong espiritu.”—Lucas 23:46.

Malinaw na ipinaheling kan pag-agi nin panahon na dai nakaya kan Diablo na italikod an gabos sa paglilingkod sa tunay na Dios. An dai mabilang na mga tawo namidbid si Jehova asin ‘namotan sia sa bilog nindang puso asin sa bilog nindang kalag patin sa bilog nindang isip.’ (Mateo 22:37) Pinatunayan kan saindang marigon na kaimbodan ki Jehova na sala si Satanas sa isyu nin integridad nin tawo. Puede man nindong patunayan na sala an Diablo paagi sa pagigin sarong lalaki o babae na may integridad.

Ano an Dapat Nindong Gibohon?

Kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:4) Paano nindo magigibo iyan? Mag-iskedyul nin panahon na pag-adalan an Biblia asin ‘maglaog sa isip nin kaaraman dapit sa iyo sanang tunay na Dios, asin dapit sa saro na saiyang sinugo, si Jesu-Cristo.’—Juan 17:3.

Inangat ni Satanas an integridad nin tawo paagi sa pagkuestion sa mga motibo nin tawo sa paglilingkod sa Dios. Tangani na an kaaraman an makaimpluwensia sa saindong motibo, iyan dapat na makataros sa saindong puso. Asin tanganing mangyari ini, bako sanang paghanap nin impormasyon gikan sa Biblia an kaipuhan na gibohon nindo. Kultibaron an ugale na paghorophorop sa saindong nanonodan. (Salmo 143:5) Kun nagbabasa nin Biblia o sarong publikasyon na basado sa Biblia, siertohon na tawan nin panahon na horophoropon an mga hapot na siring kaini: ‘Ano an itinotokdo kaini sa sako manongod ki Jehova? Anong mga kualidad nin Dios an naheheling ko na sinasabi digdi? Sa anong mga kabtang kan sakong buhay na kaipuhan kong magin arog kaini? Ano an inooyonan o dai inooyonan nin Dios? Paano iyan nakakaapektar sa sakong saboot manongod sa Dios?’ Huli sa siring na pagpensar mapapano an saindong puso nin pagkamoot asin pag-apresyar para sa Kaglalang.

An integridad sa Dios bakong limitado sa relihiosong paniniwala. (1 Hade 9:4) An pagpapadanay kan saindong integridad ki Jehova Dios nangangaipo nin moral na karigonan sa gabos na kabtang nin buhay. Minsan siring, sa pagpapadanay nin integridad mayo nin mawawara sa saindo sa ano man na paagi. Si Jehova “maogmang Dios,”  asin gusto nia na mag-ogma kamo sa buhay. (1 Timoteo 1:11) Estudyare ngonyan an nagkapirang ugale na kaipuhan nindong likayan tanganing magdanay na malinig sa moral asin sa siring kamtan an sarong mas maogmang buhay saka an pag-oyon nin Dios.

Likayan an Salang Gawe-Gawe sa Sekso

Sinasabi mismo ni Jehova sa saiyang Tataramon, an Biblia, an pamantayan para sa pag-agom, na nagsasabi: “Babayaan nin lalaki an saiyang ama asin an saiyang ina asin sia dapat na magdanay sa saiyang agom na babae asin sinda dapat na magin sarong laman.” (Genesis 2:21-24) Huling an mga mag-agom nagin “sarong laman,” tinatawan ninda nin onra an areglo nin Dios sa pag-agom kun an saindang seksuwal na relasyon para sa saindang duwa sana. Sinabi ni apostol Pablo: “Magin logod kagalanggalang sa gabos an pag-aragoman, asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.” (Hebreo 13:4) An pananaram na “higdaan kan mag-agom” nangangahulogan nin seksuwal na pagdodorog nin sarong lalaki asin babae na legal na kasal. An pagkaigwa kan siisay man sa sainda nin seksuwal na relasyon sa iba nangangahulogan nin pagkomiter nin pagsambay asin puedeng magresulta sa bakong paborableng paghokom gikan sa Dios.—Malaquias 3:5.

Kumusta man an pagdodorog bago an kasal? Iyan tumang man sa moral na mga pamantayan na itinao ni Jehova. “Iyo ini an kabotan nin Dios . . . na kamo lumikay sa pakikisaro,” an sabi kan Biblia. (1 Tesalonica 4:3) An homoseksuwalidad, incesto, asin pakikidorog sa hayop mga kasalan man tumang sa Dios. (Levitico 18:6, 23; Roma 1:26, 27) An siisay man na gustong paogmahon an Dios asin magkamit nin tunay na maogmang buhay dapat na rumayo sa inmoral na mga gibo.

Kumusta man an nakakapukaw sa horot na seksuwal na paggawe bago an kasal? Ikinakaanggot ni Jehova an gibong ini. (Galacia 5:19) An isip dapat man na papagdanayon na malinig sa inmoral na mga kaisipan. Sinabi ni Jesus: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:28) An mga tataramon na iyan minaaplikar man sa pagheling nin pornograpikong mga ladawan na nasa inimprentang papel, pelikula asin video, o Internet; pagbasa nin mga estorya nin seksuwal na mga aktibidad; asin paghinanyog sa nagsusuherir nin bakong disenteng mga liriko sa mga kanta. An paglikay sa mga siring nagpapaogma sa Dios asin igwa nin nakakapakosog na impluwensia sa buhay nin saro.

Kumusta man an pakigitilan? An pakigitilan tinawan nin kahulogan na “bakong seryosong pagkamoot o mapan-akit sa seksong” hiro-hiro. An pagtao kan siring na atension nin sarong may agom na lalaki o babae sa saro na bako niang agom sarongat sa mga prinsipyo kan Biblia asin tanda nin dai paggalang ki Jehova. (Efeso 5:28-33) Bako nanggad na tama para sa mga daing agom na magin romantiko sa lambang saro bilang libangan sana! Paano kun an siring na pakigitilan orog na seryosohon nin saro kisa sa intension para dian? Isip-isipon an kolog nin boot na puedeng magin resulta kaiyan. Makamomondo man an katunayan na an pakigitilan puedeng sumagkod sa pagsambay o pakikisaro. Sa ibong na lado, an may kabinian na pagtratar sa mga bakong kasekso nakakadugang sa paggalang sa sadiri.—1 Timoteo 5:1, 2.

Pagpaogma sa Dios sa Iba Pang Kabtang nin Buhay

Madaling makua an mga inomon na de alkohol sa dakol na nasyon. Sala daw na uminom kaiyan? Dai ipinagbabawal sa Kasuratan an tama sanang pag-inom nin arak, serbesa, o iba pang inomon na de alkohol. (Salmo 104:15; 1 Timoteo 5:23) Minsan siring, an makosog na pag-inom asin pagbuburat sala sa pagheling nin Dios. (1 Corinto 5:11-13) Daing duwa-duwa na dai nindo gusto na raoton nin sobrang pag-inom an saindong salud asin an saindong buhay pampamilya.—Talinhaga 23:20, 21, 29-35.

Si Jehova an “Dios nin katotoohan.” (Salmo 31:5) “Dai mangyayaring magputik an Dios,” an sabi kan Biblia. (Hebreo 6:18) Kun mawot nindo an pag-oyon nin Dios, lilikayan nindo an pagputik. (Talinhaga 6:16-19; Colosas 3:9, 10) “An balang saro sa saindo magtaram nin katotoohan sa saiyang kapwa,” an sadol kan Biblia sa mga Kristiano.—Efeso 4:25.

 Yaon man an paghuego. Minsan ngani popular sa dakol, an paghuego sarong porma nin kahanaban, huling pagprobar iyan na magkakuarta paagi sa pagkapierde nin iba. Dai inooyonan ni Jehova an mga “mahanab sa madayang pakinabang.” (1 Timoteo 3:8) Kun siring, kun mawot nindong paogmahon si Jehova, lilikayan nindo an ano man na porma nin paghuego, kaiba na an mga loteriya, binggo, asin pagpusta sa mga karera nin kabayo. Bilang resulta, tibaad manompongan nanggad nindo na may damot na kamong kuarta na magagamit para sa mga pangangaipo kan saindong pamilya.

An paghabon, an boot sabihon, pagkua nin sarong bagay na bakong saindo, saro pang porma nin kahanaban. “Dai ka maghabon,” an sabi kan Biblia. (Exodo 20:15) Sala an tuyong pagbakal nin hinabonan na bagay asin kumua nin mga bagay na mayo nin permiso. “An parahabon dai na maghabon,” an sabi kan Biblia, “kundi marahay pa na sia magpagal, na naggigibo nin marahay na gibo paagi sa saiyang mga kamot, tanganing may ikatao sia sa nangangaipo.” (Efeso 4:28) Imbes na maghabon nin oras sa saindang among, an mga namomoot ki Jehova nagtatrabaho nin sadiosan. ‘Minamawot ninda na gumawe nin sadiosan sa gabos na bagay.’ (Hebreo 13:18) Asin an malinig na konsensia nakakakontribwir nanggad sa katoninongan nin isip.

Paano minamansay nin Dios an sarong tawo na grabe kaaranggoton? An Biblia nagpapatanid: “Dai ka makiiba sa siisay man na madaling maanggot; asin sa tawo na nagpuputok an kabangisan dai ka umiba.” (Talinhaga 22:24) An daing kontrol na kaanggotan parateng nagbubunga nin mga gibo nin kadahasan. (Genesis 4:5-8) Kun manongod sa pagbalos, an Biblia nagsasabi: “Dai kamo magbalos nin maraot sa maraot sa kiisay man. Magtagama nin marahay na mga bagay sa pagheling nin gabos na tawo. Kun mahihimo, sagkod na iyan nasa saindo, makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa grabeng kaanggotan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:17-19) Kun sinusunod niato an siring na sadol, an satong buhay magigin mas matoninong—asin iyan makakadugang sa satong kaogmahan.

Puede Kamong Magin Mapanggana

Puede daw kamong magin mapanggana sa pagpapadanay kan saindong integridad sa Dios sa ibong nin mga pangigipit na gibohon an sala? Iyo. Rekonoseron na mawot nin Dios na kamo magin mapanggana sa pagpatunay na sala si Satanas sa isyu manongod sa integridad, huling an Saiyang Tataramon nagsasabi: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”—Talinhaga 27:11.

Puede kamong mamibi ki Jehova na logod pakosogon kamo na gibohon an tama sa saiyang pagheling. (Filipos 4:6, 7, 13) Kaya determinadong maghingoa na dugangan an saindong kaaraman sa Tataramon nin Dios, an Biblia. An may pag-apresyar na paghorophorop sa saindong nanonodan sa Biblia makakatabang sa saindo na pararomon an saindong pagkamoot sa Dios asin mapahiro sa saindo na paogmahon sia. “Ini iyo an boot sabihon kan pagkamoot sa Dios,” an sabi kan 1 Juan 5:3, “na kuyogon niato an saiyang mga togon; pero an saiyang mga togon dai nakakapagabat.” An mga Saksi ni Jehova sa saindong lugar maoogma na tabangan kamo sa pag-adal kan Biblia. Inaagda kamo na kontakon sinda sa saindong lugar, o puede kamong sumurat sa kagpublikar kan magasin na ini.

[Ritrato sa pahina 4]

Si Job nagdanay na maimbod sa irarom nin pagbalo

[Ritrato sa pahina 7]

An pagdugang nindo sa kaaraman sa Tataramon nin Dios magpapakosog kan saindong determinasyon na gibohon an tama