Taano ta Dapat Gibohon an Tama?

AN SARONG edukadong marhay na tawo nagkomento kaidto: “An kakayahan na magmawot nasa sako, alagad an kakayahan na gumibo kan marahay mayo. Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko.” Taano ta nadepisilan an tawong ini na gibohon an marahay na minamawot nia? Ipinaliwanag nia: “Kaya, nakukua ko an ley na ini sa sakong sadiri: na kun boot kong gibohon an tama, an maraot iyo an yaon sa sako. Tunay na ako naoogmang marhay sa ley nin Dios segun sa sakong pagkatawo sa laog, alagad nakakaheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak.”—Roma 7:18, 19, 21-23.

An mga tataramon na ini ni apostol Pablo, na isinurat haros 2,000 na taon na an nakaagi, nagpapaliwanag kun taano ta depisil para sa bakong sangkap na mga tawo an paggibo nin tama. An pagsusog sa tamang mga prinsipyo, nangorogna sa irarom nin masakit na mga kamugtakan, nangangaipo nin moral na kosog. Kaya maninigo na ihapot niato, Ano an pinakaimportanteng dahelan sa paggibo kan tama?

Estudyare kun ano an sinasabi kan Kasuratan manongod sa ngapit nin sarong tawo na tanos sa moral. Sa Salmo 37:37, 38, mababasa niato: “Pagmasdan mo an daing katuyawan asin helingon mo an tanos, huli ta an ngapit kan tawong iyan magigin matoninong. Alagad an mga paralapas mismo tunay na iribang paparaon; an ngapit kan mga marigsok tunay na tataposon.” An Talinhaga 2:21, 22 nagsasabi sa sato: “An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga marigsok, sinda popohoon sa mismong daga; asin kun manongod sa mga madaya, sinda hahaleon dian.”

Minsan ngani an mga panugang ini asin an iba pa na manonompongan sa Biblia nagtatao sa sato nin dahelan na mamuhay sa paagi na nakakapaogma sa Dios, bako iyan an pundamental na dahelan sa paggibo kaiyan. An dahelan na iyan konektado sa sarong isyu na personalmenteng kalabot an gabos na intelihenteng linalang. Tinotokar kan masunod na artikulo kun ano an isyung iyan asin kun paano iyan nakakaapektar sa sato.