Kamotan Nindo an Dios na Namomoot sa Saindo
Kamotan Nindo an Dios na Namomoot sa Saindo
“Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.”—MATEO 22:37.
1, 2. Ano an tibaad nagin dahelan kan hapot manongod sa nakakalabi sa gabos na togon?
MINALATAW na an hapot na ibinangon mainit na pinagdidiskutiran kan mga Fariseo kan panahon ni Jesus. Sa labing 600 na ley na minakompuesto kan Ley ni Moises, arin an pinakamahalaga? Iyan daw an ley na may koneksion sa atang? Total, ginibo an mga atang tanganing umako nin kapatawadan kan mga kasalan sagkod magpasalamat sa Dios. O tibaad an kadarudakulai daw na ley iyo an ley sa pagturi? Mahalaga man iyan, huli ta an pagturi sarong tanda kan tipan na ipinakipagtipan ni Jehova ki Abraham.—Genesis 17:9-13.
2 Sa ibong na lado, minalataw na ipinapangatanosan kan mga konserbatibo na huling mahalaga an lambang ley na itinao nin Dios—minsan ngani an iba tibaad garo baga mas dikit an halaga—magigin sala na an arin man na togon ilangkaw sa iba. Nagdesisyon an mga Fariseo na ihapot ki Jesus an kontrobersial na hapot. Tibaad igwa siang masabi na puedeng makaraot sa saiyang kredibilidad. An saro sa sainda nagdolok ki Jesus asin naghapot: “Arin an nakakalabi sa gabos na togon sa Ley?”—Mateo 22:34-36.
3. Ano an sinabi ni Jesus na nakakalabi sa gabos na togon?
3 An itinaong simbag ni Jesus may dakulaon na halaga para sa sato ngonyan. Sa saiyang simbag, sinumaryo nia an nagin asin magigin pirmeng pinakamahalaga sa tunay na pagsamba. Nagkokotar sa Deuteronomio 6:5, si Jesus nagsabi: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakakalabi sa gabos asin enot na togon.” Minsan ngani saro sanang togon an hinagad kan Fariseo, tinawan sia ni Jesus nin saro pa. Nagkokotar sa Levitico 19:18, sia nagsabi: “An ikaduwa, na arog kaiyan, iyo ini, ‘Kamotan mo an saimong kapwa nin siring sa saimo man sana.’” Sa siring, ipinarisa ni Jesus na sinakop kan duwang ley na ini an kabilogan kan dalisay na pagsamba. Inoolang an ano man na pagprobar na ipasambit sa saiya an pagkasunodsunod sa importansia kan iba pang ley, sia nagkonklusyon: “Sa duwang togon na ini nasasarig an bilog na Ley, asin an Mga Propeta.” (Mateo 22:37-40) Sa artikulong ini, kokonsideraron niato an nakakalabi sa gabos sa duwang togon na ini. Taano ta dapat niatong kamotan an Dios? Paano niato ipinapaheling na namomotan niato an Dios? Asin paano niato mapapatalubo an siring na pagkamoot? Mahalagang marhay na maaraman an simbag sa mga hapot na ini, huling tangani na mapaogma si Jehova, dapat na kamotan niato sia sa bilog niatong puso, kalag, asin isip.
An Kahalagahan nin Pagkamoot
4, 5. (a) Taano ta dai nabigla an Fariseo sa sinabi ni Jesus? (b) Para sa Dios, ano an orog na mahalaga kisa mga atang asin dolot?
4 Minalataw na an Fariseo na naghapot ki Jesus dai nabigla ni nagngalas sa simbag na saiyang inako. Aram nia na an pagkamoot sa Dios sarong mahalagang marhay na aspekto nin tunay na pagsamba, minsan ngani dakol an dai nagpapaheling kaiyan. Sa mga sinagoga, kinaugalean na an makosog Deuteronomio 6:4-9, na dian nagkotar si Jesus. Oyon sa kaagid na pagkasaysay sa Marcos, an Fariseo kun siring nagsabi ki Jesus: “Paratokdo, mahusay an pagkasabi mo kaoyon sa katotoohan, ‘Sia Saro sana, asin mayo nang iba apuera sa Saiya’; asin an pagkamoot na ini sa saiya sa bilog na puso asin sa bilog na pakasabot asin sa bilog na kosog asin an pagkamoot na ini sa kapwa nin siring sa saiya man sana orog na mahalaga kisa gabos na dolot na tinotong asin atang.”—Marcos 12:32, 33.
na pagsambit sa Shema, o pagtuga nin pagtubod, asin kaiba digdi an halipot na kotasyon na mababasa sa5 Tunay nanggad, mantang kahagadan kan Ley an mga dolot asin atang na tinotong, an talagang mahalaga sa Dios iyo an mamomoton na kamugtakan nin puso kan saiyang mga lingkod. Mas mahalaga sa Dios an sarong dignos na idinolot sa saiya huli sa pagkamoot asin debosyon kisa sa rinibong karnero na itinao na may salang motibo. (Miqueas 6:6-8) Girumdoma an pagkasaysay dapit sa daing sukat na babaeng balo na inobserbaran ni Jesus sa templo sa Jerusalem. An duwang saradit na sinsilyo na ibinugtak nia sa kaha dai makakabakal dawa nin sarong dignos. Pero, an kontribusyon na iyan, na itinao huli sa odok sa pusong pagkamoot ki Jehova, orog na mahalaga sa saiya kisa darakulang donasyon na itinao kan mayayaman gikan sa saindang kalabihan. (Marcos 12:41-44) Nakakaparigon nanggad sa boot na maaraman na pinapahalagahan na marhay ni Jehova an kaya niato gabos na ipahayag ano man an satong mga kamugtakan—an satong pagkamoot sa saiya!
6. Ano an isinurat ni Pablo manongod sa halaga nin pagkamoot?
6 Idinodoon an halaga nin pagkamoot sa tunay na pagsamba, si apostol Pablo nagsurat: “Kun ako magtaram sa dila nin mga tawo asin nin mga anghel alagad mayo ako nin pagkamoot, garo ako sarong metal na nagtatanog o simbalo na nagdadaging. Asin kun ako igwa kan balaog nin paghula asin aram ko an gabos na banal na hilom asin gabos na kaaraman, asin kun yaon sa sako an gabos na pagtubod tanganing mapabalyo an mga bukid, alagad mayo ako nin pagkamoot, ako dai nin halaga. Asin kun itao ko an gabos kong rogaring tanganing pakakanon an iba, asin kun idolot ko an sakong hawak, tanganing ako makapaghambog, alagad mayo ako nin pagkamoot, mayo man lamang ako nin pakinabang.” (1 Corinto 13:1-3) Malinaw nanggad, mahalagang marhay an pagkamoot kun boot niato na makapaogma sa Dios an satong pagsamba. Pero, paano niato ipinapaheling an satong pagkamoot ki Jehova?
Kun Paano Niato Ipinapaheling an Satong Pagkamoot ki Jehova
7, 8. Paano niato ikakapaheling an satong pagkamoot ki Jehova?
7 Dakol an naniniwala na an pagkamoot sarong emosyon na kakadikit an kontrol niato; nagtataram an mga tawo manongod sa pagkaigwa nin romantikong pagkamoot. Pero, an tunay na pagkamoot bako sanang sarong bagay na namamatean niato. Iyan namimidbid asin nadedeterminaran paagi sa gibo, bakong emosyon. Nasasambitan kan Biblia an pagkamoot bilang “an nakakalabing marhay na dalan” asin bilang sarong bagay na ‘pinagmamaigotan na magibo.’ (1 Corinto 12:31; 14:1) Ineenkaminar an mga Kristiano na mamoot, bako sanang “sa tataramon ni sa dila, kundi sa gibo asin katotoohan.”—1 Juan 3:18.
8 An pagkamoot sa Dios nagtutulod sa sato na gibohon an nakakapaogma sa saiya asin idepensa patin suportaran an saiyang soberaniya, paagi sa mga tataramon sagkod gibo. Nagpapahiro iyan sa sato na likayan an mamoot sa kinaban asin sa bakong diosnon na mga dalan kaiyan. (1 Juan 2:15, 16) An mga namomoot sa Dios naoongis sa maraot. (Salmo 97:10) Kalabot man sa pagkamoot sa Dios an pagkamoot sa kapwa, na totokaron niato sa sunod na artikulo. Apuera kaini, an pagkamoot sa Dios naghahagad kan satong pagkuyog. An Biblia nagsasabi: “Ini iyo an boot sabihon kan pagkamoot sa Dios, na kuyogon niato an saiyang mga togon.”—1 Juan 5:3.
9. Paano ipinaheling ni Jesus an saiyang pagkamoot sa Dios?
9 Sangkap na ipinaheling ni Jesus an kahulogan kan pagkamoot sa Dios. An pagkamoot an nagpahiro sa saiya na bayaan an saiyang langitnon na erokan asin mag-erok digdi sa daga bilang tawo. Iyan an nagtulod sa saiya na pamurawayon an saiyang Ama paagi sa mga bagay na saiyang ginibo asin itinokdo. Pagkamoot an nagpahiro sa saiya na magin “makinuyog sagkod sa kagadanan.” (Filipos 2:8) An pagkuyog na iyan—sarong kapahayagan kan saiyang pagkamoot—an nagbukas kan dalan para sa mga maimbod na magkaigwa nin matanos na kamugtakan sa atubangan nin Dios. Si Pablo nagsurat: “Sa pakisuway nin sarong tawo [si Adan] dakol an nagin parakasala, siring man sa pagkuyog nin sarong tawo [si Cristo Jesus] dakol an magigin matanos.”—Roma 5:19.
10. Taano ta kalabot sa pagkamoot sa Dios an pagkuyog?
10 Kapareho ni Jesus, ipinapaheling niato an satong pagkamoot paagi sa pagigin makinuyog sa Dios. “Ini an kahulogan nin pagkamoot,” an isinurat kan namomotan ni Jesus na si apostol Juan, “na padagos kitang maglakaw oyon sa saiyang mga togon.” (2 Juan 6) An mga totoong namomoot ki Jehova minamawot na marhay an saiyang paggiya. Rinerekonoser na dai ninda mapangganang magigiyahan an saindang sadiring mga lakad, nagtitiwala sinda sa kadonongan nin Dios asin nagpapasakop sa saiyang mamomoton na paggiya. (Jeremias 10:23) Kapareho sinda kan mga noble an isip sa suanoy na Berea na nag-ako kan mensahe nin Dios na may “pagkagalaga sa isip,” na igwa nin makosog na kamawotan na gibohon an kabotan nin Dios. (Gibo 17:11) Maingat nindang siniyasat an Kasuratan tanganing masabotan nin mas lubos an kabotan nin Dios, na nakatabang sa sainda na ipahayag an pagkamoot sa dugang pang mga akto nin pagkuyog.
11. Ano an boot sabihon kan kamotan an Dios sa bilog niatong puso, isip, kalag, asin kosog?
11 Siring kan sinabi ni Jesus, kalabot sa pagkamoot sa Dios an satong bilog na puso, isip, kalag, asin kosog. (Marcos 12:30) An siring na pagkamoot naggigikan sa puso, kalabot an satong mga saboot, kamawotan, asin kairairaroming mga kaisipan, asin odok na minamawot niato na paogmahon si Jehova. Namomoot man kita paagi sa paggamit kan satong abilidad sa pag-iisip. An satong debosyon bakong buta; namidbid niato si Jehova—asin naaraman niato an saiyang mga kualidad, pamantayan, asin katuyohan. Ginagamit niato an satong kalag, an satong bilog na pagkatawo asin an satong buhay, tanganing maglingkod asin mag-omaw sa saiya. Asin ginagamit niato an satong kosog sa katuyohan man na iyan.
Kun Taano ta Maninigo Niatong Kamotan si Jehova
12. Taano ta hinahagad nin Dios na kamotan niato sia?
12 An sarong dahelan na maninigo niatong kamotan si Jehova iyo na hinahagad nia sa sato na ipabanaag an saiyang mga kualidad. An Dios an gikanan sagkod kadarudakulaing halimbawa nin pagkamoot. “An Dios pagkamoot,” an isinurat kan pinasabngan na si apostol Juan. (1 Juan 4:8) An mga tawo linalang sa ladawan nin Dios; dinisenyo kita tanganing mamoot. Sa katunayan, an soberaniya ni Jehova basado sa pagkamoot. An gusto niang magin mga sakop nia iyo idtong mga naglilingkod sa saiya huli ta namomotan sagkod minamawot ninda an saiyang matanos na paagi nin pamamahala. An totoo, mahalagang marhay an pagkamoot para sa katoninongan asin pagkaoroyon kan gabos na linalang.
13. (a) Taano ta sinabihan an mga Israelita: “Kamotan mo si Jehova na saimong Dios”? (b) Taano ta rasonable na asahan sa sato ni Jehova na kamotan sia?
13 An saro pang dahelan sa pagkamoot ki Jehova iyo na inaapresyar niato an saiyang ginibo para sa sato. Girumdomon na sinabi ni Jesus sa mga Judio: “Kamotan mo si Jehova na saimong Dios.” Dai inaasahan sa sainda na kamotan an sarong dios na daing labot asin dai midbid. Dapat na kamotan ninda an sarong Persona na naghayag kan saiyang pagkamoot sa sainda. Si Jehova an saindang Dios. Sia an Saro na nagluwas sa sainda sa Egipto pasiring sa Dagang Panuga, an Saro na nagprotehir, nagsustenir, asin nagmahal sa sainda, an Saro na nagdisiplina sa sainda sa pagkamoot. Asin ngonyan, si Jehova an satong Dios, an saro na nagtao kan saiyang Aki bilang pantubos tangani na magkaigwa kita nin buhay na daing katapusan. Rasonable nanggad na asahan sa sato ni Jehova na kamotan man niato sia! An satong pagkamoot sarong naghihimateng pagkamoot; hinahagad sa sato na kamotan an Dios na namomoot sa sato. An satong pagkamoot para sa Saro na “enot na namoot sa sato.”—1 Juan 4:19.
14. Sa anong paagi na an pagkamoot ni Jehova kapareho kan sa sarong mamomoton na magurang?
14 An pagkamoot ni Jehova para sa katawohan kapareho kan sa mamomoton na magurang sa saiyang mga aki. Minsan ngani bakong sangkap, an mamomoton na mga magurang nagpapagal sa dakol na taon sa pag-asikaso sa saindang mga aki, na ginigibo iyan na may dakulang pagsasakripisyo sa materyal asin iba pang bagay. An mga magurang nagtotokdo, nag-eenkaminar, nagsusuportar, asin nagdidisiplina sa saindang mga aki huli ta gusto nindang magin maogma asin mapanggana sinda. Ano an minamawot kan mga magurang bilang balos? Gusto nindang mamotan sinda kan saindang mga aki asin na isapuso an itinao ninda sa saindang mga aki para sa ikakarahay ninda. Bako daw na rasonable
na asahan kita kan satong sangkap na langitnon na Ama na magpaheling nin mamomoton na pag-apresyar sa gabos na ginibo nia para sa sato?Pagkultibar nin Pagkamoot sa Dios
15. Ano an enot na lakdang sa pagkultibar nin pagkamoot sa Dios?
15 Dai pa niato naheling an Dios ni nadangog an saiyang tingog. (Juan 1:18) Pero, iniimbitaran nia kita na magkaigwa nin mamomoton na relasyon sa saiya. (Santiago 4:8) Paano niato magigibo iyan? An enot na lakdang tanganing kamotan an siisay man iyo an pagkua nin kaaraman manongod sa sarong iyan; depisil na makamate nin hararom na kapadangatan sa saro na dai niato midbid. Itinao ni Jehova an saiyang Tataramon, an Biblia, tanganing makanood kita manongod sa saiya. Iyan an dahelan na si Jehova, paagi sa saiyang organisasyon, dinadagka kita na regular na basahon an Biblia. An Biblia an nagtotokdo sa sato manongod sa Dios, sa saiyang mga kualidad, sa saiyang personalidad, saka sa saiyang mga ginibo sa mga tawo sa laog nin rinibong taon. Mantang hinohorophorop niato an siring na mga pagkasaysay, matalubo an satong pag-apresyar asin pagkamoot sa saiya.—Roma 15:4.
16. Paano an paghorophorop sa ministeryo ni Jesus nagpapaoswag sa satong pagkamoot sa Dios?
Juan 14:9) Dai daw kamo napahiro kan pagmalasakit na ipinaheling ni Jesus sa pagbalik kan buhay kan solong aki kan babaeng balo? (Lucas 7:11-15) Bako daw na nakakaakit na maaraman na sia—an Aki nin Dios asin an pinakadakulang tawo na nabuhay kasuarin man—mapakumbabang naghanaw kan bitis kan saiyang mga disipulo? (Juan 13:3-5) Dai daw kamo napapahiro na maaraman na minsan ngani mas dakula asin mas madonong sia kisa siisay man, ginibo nia an saiyang sadiri na madaling dolokon kan gabos, pati kan mga aki? (Marcos 10:13, 14) Mantang hinohorophorop niato na may pag-apresyar an mga bagay na ini, nagigin arog kita kan mga Kristiano na manongod sa sainda si Pedro nagsurat: “Minsan ngani [si Jesus] dai nindo noarin man naheling, kamo namomoot sa saiya.” (1 Pedro 1:8) Mantang nagtatalubo an satong pagkamoot ki Jesus, nagtatalubo man an satong pagkamoot ki Jehova.
16 An pangenot na paagi na mapapatalubo niato an satong pagkamoot ki Jehova iyo an paghorophorop sa buhay asin ministeryo ni Jesus. Total, sangkap na gayong ipinabanaag ni Jesus an saiyang Ama kaya nasabi nia: “Sia na nakaheling sa sako nakaheling man sa Ama.” (17, 18. An paghorophorop sa anong mamomoton na mga probisyon ni Jehova an magpapatalubo kan satong pagkamoot sa saiya?
17 An saro pang paagi na mapapatalubo niato an satong pagkamoot sa Dios iyo an paghorophorop sa abundang mamomoton na probisyon na saiyang ginibo tanganing ikaogma niato an buhay—an gayon kan mga linalang, an daing katapusan na pagkalaenlaen nin masisiram na makakakan, an mamomoton na pakikiiba nin marahay na mga katood, saka an dai mabilang na iba pang nakakaogmang marhay na bagay na nagtatao sa sato nin kawilihan asin satispaksion. (Gibo 14:17) Mientras na dakol kitang nanonodan manongod sa satong Dios, orog man kitang nagkakaigwa nin mga dahelan na apresyaron an saiyang daing sagkod na karahayan asin pagigin buka an palad. Isipon an manongod sa gabos na ginibo ni Jehova para sa saindo personalmente. Dai daw kamo minaoyon na sia maninigo sa saindong pagkamoot?
18 Kabilang sa dakol na balaog hale sa Dios iyo an satong oportunidad na dumolok sa saiya sa pamibi ano man na oras, na naaaraman na hinihinanyog kita kan “Paradangog nin pamibi.” (Salmo 65:2) Ipinaniwala ni Jehova sa saiyang namomotan na Aki an autoridad na mamahala sagkod maghokom. Minsan siring, dai nia ipinaniwala sa iba, kaiba an saiyang Aki, an pagdangog sa mga pamibi. Personal niang hinihinanyog an satong mga pamibi. Sa siring, an mamomoton asin personal na pagmakolog na ipinapaheling ni Jehova irinarani kita sa saiya.
19. Anong mga panuga ni Jehova an irinarani kita sa saiya?
19 Napaparani man kita ki Jehova kun pinepensar niato an itinatagama nia sa katawohan. Nanuga sia na tataposon an helang, pagmondo, asin kagadanan. (Kapahayagan 21:3, 4) Kun an katawohan madara na sa pagkasangkap, mayo na nin mag-aagi nin makuring kamondoan, pagkadesganar, o trahedya. An pagkagutom, kadukhaan, asin guerra mawawara na. (Salmo 46:9; 72:16) An daga liliwaton na magin paraiso. (Lucas 23:43) Papangyayarihon ni Jehova an mga bendisyon na ini, bakong huli ta kaipuhan niang gibohon iyan, kundi huli ta namomotan nia kita.
20. Ano an sinabi ni Moises manongod sa mga pakinabang kan pagkamoot ki Jehova?
20 Kun siring, igwa nin mapuersang mga dahelan na kamotan an satong Dios asin na pataluboon an pagkamoot na iyan. Padagos daw nindong papakosogon an saindong pagkamoot sa Dios, na tinotogotan siang giyahan an saindong mga dalan? Nasa saindo an pagpili. Rinekonoser ni Moises an mga pakinabang kan pagkultibar asin pagpapadanay nin pagkamoot ki Jehova. Sa mga Israelita kan suanoy, si Moises nagsabi: “Dapat na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya; huli ta sia an saimong buhay asin an kahalawigan kan saimong mga aldaw.”—Deuteronomio 30:19, 20.
Nagigirumdoman daw Nindo?
• Taano ta mahalagang marhay na kamotan niato si Jehova?
• Paano niato ikakapaheling an satong pagkamoot sa Dios?
• Igwa kita nin anong mga dahelan na kamotan si Jehova?
• Paano niato makukultibar an pagkamoot sa Dios?
[Mga Hapot Para sa Pag-adal]
[Ritrato sa pahina 20]
Talagang pinapahalagahan ni Jehova an kaya niato gabos na ipahayag—an satong pagkamoot sa saiya
[Mga Ritrato sa pahina 23]
“Sia na nakaheling sa sako nakaheling man sa Ama.”—Juan 14:9