May Pakinabang an Magin Sadiosan

AN PANDADAYA yaon na poon pa sa hardin nin Eden. Minsan siring, an kadaklan na kultura asin sosyedad pinapahalagahan an pagkasadiosan asin minamansay an pagputik saka panloloko bilang bakong marahay asin kulpable. An ibilang na mapagtitiwalaan sarong bagay na maninigong ipag-orgolyo. Pero, paorog nang paorog na ibinibilang na kaipuhan an pandadaya tanganing magdanay na buhay sa modernong sosyedad. Ano an saboot nindo manongod dian? May pakinabang daw na kultibaron an pagkasadiosan? Ano an saindong pamantayan sa pagdesisyon sa kun ano an sadiosan asin bakong sadiosan na gawe-gawe?

Tanganing mapaogma an Dios, kaipuhan na kita magin sadiosan sa satong pagtaram asin sa satong pamumuhay. Sinadol ni apostol Pablo an saiyang mga kapwa Kristiano: “An balang saro sa saindo magtaram nin katotoohan sa saiyang kapwa.” (Efeso 4:25) Si Pablo nagsurat man: “Minamawot niamo na gumawe nin sadiosan sa gabos na bagay.” (Hebreo 13:18) An motibo niato sa pagigin sadiosan bakong tanganing mag-ako nin pag-omaw gikan sa mga kapwa tawo. Kita sadiosan huling iginagalang niato an satong Kaglalang asin gusto niato na paogmahon sia.

Dai Itago an Saindong Tunay na Pagkatawo

Sa dakol na nasyon, an mga tawo nagbabalatkayo tanganing makakua nin mga bentaha sa buhay. Sinda nagkukua nin mapandayang mga dokumento, diploma, asin papeles nin identipikasyon tanganing makalaog sa sarong nasyon sa ilegal na paagi o makakua nin trabaho o posisyon na bako sindang kualipikado. An nagkapirang magurang pinapalsipikar an mga sertipiko sa pagkamundag kan saindang mga aki tanganing mapalawig an pag-eskuela kan mga aki.

Minsan siring, tanganing magin nakakaogma sa Dios, dai kita puedeng magin madaya. Sinasabi kan Biblia na si Jehova “Dios nin katotoohan” asin na linalaoman nia an pagigin totoo kan mga may pakikidayupot sa saiya. (Salmo 31:5) Kun gusto niatong mapagdanay an dayupot na relasyon ki Jehova, dai niato puedeng arogon an “mga tawong putikon,” an mga “nagtatago kan saindang tunay na pagkatawo.”—Salmo 26:4.

Ordinaryo na man sa mga tawo na itago an katotoohan kun napapaatubang sa posibilidad na madisiplina huli sa salang ginibo. Dawa sa Kristianong kongregasyon, an saro tibaad matentaran na gibohon an siring. Halimbawa, sa sarong kongregasyon, inadmitir nin sarong hoben na lalaki sa kamagurangan na sia may nakomiter na mga kasalan. Minsan siring, dai nia inadmitir na sia naghabon, minsan ngani may ebidensia tumang sa saiya. Sa kahurihurihi, napatunayan na sia naghabon asin kinaipuhan na itiwalag sa kongregasyon. Bako daw na mas madonong kutana kun sia  nagin biyong sadiosan asin inako an tabang tanganing ikabalik an saiyang mahalagang marhay na relasyon ki Jehova? Sa katunayan, sinasabi kan Biblia: “Dai mo pagbasangbasangon an disiplina hale ki Jehova, ni manluya ka man kun ika itinatanos nia; huli ta an namomotan ni Jehova saiyang dinidisiplina.”—Hebreo 12:5, 6.

Kun beses, an sarong tugang na naghihingoang maabot an paninimbagan sa kongregasyon tibaad hingoahon na itago an personal na mga problema o salang gawe-gawe kan nakaagi. Halimbawa, kun linellenaran an sarong aplikasyon para sa sarong espesyal na pribilehio nin paglilingkod, tibaad dai nia isurat an kompletong simbag sa mga hapot manongod sa salud asin moral, na iniisip na an katotoohan sa siring na mga bagay tibaad magdiskualipikar sa saiya. Tibaad ipangatanosan nia, ‘Dai man talaga ako nagputik,’ alagad talaga daw na sia nagin prangka asin sadiosan sa iba? Pensaron nindo an idinoon sa Talinhaga 3:32: “An tuso makauuyam nin makuri ki Jehova, alagad Sia dayupot sa mga tanos.”

Enot sa gabos, an pagigin sadiosan nangangahulogan nin pagigin sadiosan sa satong sadiri. Parateng pinaniniwalaan niato kun ano an gusto niatong paniwalaan imbes na kun ano an tama o totoo. Kanigoan kadali na basolon niato an iba imbes na an satong sadiri! Halimbawa, hiningoa ni Hadeng Saul na ipangatanosan an saiyang kasumbikalan paagi sa pagbasol sa iba. Bilang resulta, hinaboan sia ni Jehova bilang hade. (1 Samuel 15:20-23) Kabaliktaran nanggad ki Hadeng David, na namibi ki Jehova: “Sa katapustapusi itinuga ko an sakuyang kasalan sa saimo, asin dai  ko tinahoban an sakuyang sala. An sabi ko: ‘Itutuga ko an sakuyang mga kalapasan ki Jehova.’ Asin ika mismo nagpatawad sa sala kan sakuyang mga kasalan.”—Salmo 32:5.

An Pagkasadiosan Nagbubunga nin mga Bendisyon

An pagkasadiosan, o an kadaihan kaiyan, nakakaimpluwensia sa kun paano kamo minamansay kan iba. Kun maaraman kan mga tawo na dinaya nindo sinda dawa sarong beses, mawawara an saindang pagtitiwala sa saindo, asin iyan bakong pasil na ikabalik. Sa ibong na lado, kun kamo totoo asin sadiosan, magkakaigwa kamo nin reputasyon bilang sarong tawo na may integridad, na maninigong pagtiwalaan. An mga Saksi ni Jehova nagkaigwa nin siring na reputasyon. Estudyare an nagkapirang halimbawa.

Naaraman nin sarong direktor nin kompanya na an dakol sa saiyang mga empleyado dinadaya an kompanya, kaya hinagad nia an pag-interbenir kan pulis. Kan maaraman nia na kaiba sa mga inaresto an empleyado na saro sa Mga Saksi ni Jehova, nagduman sia sa presinto tanganing paluwason tolos an Saksi. Taano? Huli ta aram kan direktor na an tawong ini sarong sadiosan na trabahador asin na sia daing kasalan. Nagdanay sa trabaho an Saksi, mantang an iba sinisante. Naggayagaya an saiyang mga kapwa Saksi, sa pakaaram na an saiyang gawe-gawe nagtaong onra sa ngaran ni Jehova.

Naririsa an marahay na paggawe. Sa sarong komunidad sa Aprika, an tulay sa sarong dakulang kanal kinaipuhan na hirahayon huling hinabon an nagkapirang tabla. An lokal na mga residente nagdesisyon na mangolekta nin kuarta tanganing salidahan an mga tabla, alagad siisay an mapagkakatiwalaan na magkapot kan pondo? An gabos nagkaoroyon na sia kaipuhan na saro sa Mga Saksi ni Jehova.

Kan an sarong nasyon sa Aprika makaeksperyensia nin grabeng kariribokan sa politika asin rasa, an sarong Saksi na nagtatrabaho bilang akauntant sa sarong internasyonal na kompanya ibinalyo kan saiyang kompanya, huling an saiyang buhay nasa peligro. Iinareglo kan kompanya na makatrabaho sia sa ibang nasyon sa laog nin dakol na bulan na sinda an magastos sagkod na magtrangkilo na an situwasyon. Taano? Huling kan nakaagi nagsayuma sia na makikolaborar sa mga nagpakana na dayaon an kompanya. Aram kan manehamento an saiyang reputasyon bilang biyong sadiosan. Magugusto daw sindang tabangan an empleyadong ini kun midbid sia sa pagkaigwa nin may pagkailegal na mga transaksion?

“An matanos naglalakaw sa saiyang integridad,” an sabi kan Talinhaga 20:7. An sadiosan na tawo may integridad. Nungka niang lolokohon o dadayaon an kapwa nia. Bako daw na iyan an mawot nindong pagtratar sa saindo kan iba? Kaipuhan an pagkasadiosan sa tunay na pagsamba. Iyan sarong kapahayagan kan satong pagkamoot sa Dios asin sa kapwa. Paagi sa pagigin sadiosan, ipinapaheling niato an satong pagmawot na sunodon an prinsipyo nin paggawe na ipinahayag ni Jesus: “Kun siring, an gabos na boot nindong gibohon sa saindo nin mga tawo, gibohon man nindo sa sainda.”—Mateo 7:12; 22:36-39.

An pagigin sadiosan sa gabos na panahon tibaad may karibay, alagad an malinig na konsensia na ibinubunga kaiyan nakakalabing marhay an halaga kisa ano man na tibaad kapierdihan. Sa katapustapusi, an pagigin sadiosan asin tanos may pinakadakulang pakinabang. An totoo iyo na an marahay na relasyon ki Jehova daing kaagid sa halaga. Taano ta raraoton iyan paagi sa paggibo nin sarong bagay na madaya tanganing tahoban an kasusupgan o kamtan an sarong ilegal na bentaha? Ano man na angat na tibaad mapaatubang sa sato, makakakompiar kita sa mga tataramon kan salmista: “Maogma an pusog na lalaki na ibinugtak si Jehova bilang saiyang pinagtitiwalaan asin dai isinalingoy an saiyang lalauogon sa mga tawong pangahas, ni sa mga nahuhulog sa mga kaputikan.”—Salmo 40:4.

[Mga Ritrato sa pahina 18]

An tunay na mga Kristiano dai nagbabakal asin naggagamit nin mapandayang mga dokumento