Nabuyagyag an Anticristo

PAANO nindo poprotehiran an saindong sadiri kun naaraman nindo na may nakakagadan na epidemya na daing kontrol na naglalakop sa saindong lugar? Tibaad papakosogon nindo an saindong sistema nin inmunidad asin rarayoan nindo an mga tawo na nakakaolakit. Iyan man an dapat na gibohon niato sa espirituwal na sentido. Sinasabi sa sato kan Kasuratan na an anticristo “nasa kinaban na.” (1 Juan 4:3) Kun gusto niatong dai “maimpeksion,” dapat niatong mamidbid an “mga nangongolakit” asin likayan sinda. Marahay sana ta nagtatao nin awad-awad na liwanag an Biblia manongod sa temang iyan.

An “anticristo” nangangahulogan nin “tumang ki (o imbes na si) Cristo.” Kaya sa pangkagabsan na kahulogan kaiyan, an termino nanonongod sa gabos na nagkokontra ki o falsong naghihingako na iyo an Cristo o mga representante nia. Si Jesus mismo nagsabi: “An dai sa kampi ko tumang sako [o anticristo], asin an dai nakikitipon sa sako nakakawarak.”—Lucas 11:23.

Siempre, si Juan nagsurat manongod sa anticristo labing 60 taon pakatapos na si Jesus magadan asin mabuhay liwat sa langit. Huli kaini, an mga aktibidad kan anticristo dapat na saboton paagi sa kun paano sinda nakakaapektar sa maimbod na mga parasunod ni Jesus sa daga.—Mateo 25:40, 45.

Anti-Kristiano an Anticristo

Pinatanidan ni Jesus an saiyang mga parasunod na ikakaongis sinda kan kinaban sa pangkagabsan. Sinabi nia: “Dadarahon kamo nin mga tawo sa kahorasaan asin gagadanon kamo, asin ikakaongis kamo kan gabos na nasyon huli sa ngaran ko. Asin dakol na falsong propeta an malataw asin ilalagalag an dakol.”—Mateo 24:9, 11.

Huling an mga disipulo ni Jesus pinepersegir “huli sa ngaran [ni Jesus],” an mga nagpepersegir malinaw na anticristo, tumang ki Cristo. An ‘falsong mga propeta,’ na an nagkapira sa sainda dating mga Kristiano, mga anticristo man. (2 Juan 7) An ‘dakol na anticristo’ na ini, an isinurat ni Juan, ‘nagharale  sa sato, alagad bako sindang kaagid niato; huli ta kun sinda kaagid niato, nagdanay kutana sinda sa kaibanan niato.’—1 Juan 2:18, 19.

An mga tataramon ni Jesus sagkod ni Juan sayod na nagpaparisa na an anticristo bakong sasarong tawo kundi kompuesto nin dakol na indibiduwal na anticristo. Dugang pa, huli ta sinda falsong mga propeta, an saro sa pangenot na mga katuyohan ninda iyo an pandadaya sa relihion. Ano an nagkapira sa saindang mga taktika?

Pagpapalakop nin Relihiosong mga Kaputikan

Pinatanidan ni apostol Pablo an saiyang kapwa trabahador na si Timoteo na magmaan sa mga katokdoan nin mga apostata, siring ki Himeneo asin Fileto, na ‘an tataramon makakalakop na siring sa gangrena.’ Idinugang ni Pablo: “An mga tawo mismong ini nagsuhay sa katotoohan, na nagsasabing nangyari na an pagkabuhay liwat; asin linalaglag ninda an pagtubod nin nagkapira.” (2 Timoteo 2:16-18) Minalataw na itinokdo ni Himeneo asin Fileto na simboliko an pagkabuhay liwat asin na binuhay na liwat an mga Kristiano sa espirituwal na sentido. Totoo na sa punto de vista nin Dios, an saro nagigin nang buhay kun sia magin tunay na disipulo ni Jesus, na sayod na sinabi ni Pablo mismo. (Efeso 2:1-5) Minsan siring, binasangbasang kan katokdoan ni Himeneo asin Fileto an panuga ni Jesus na literal na pagkabuhay liwat kan mga gadan sa irarom kan pamamahala kan Kahadean nin Dios.—Juan 5:28, 29.

An mga ideya na simboliko sana an pagkabuhay liwat sa huri minukna nin sarong grupo na inaapod na mga Gnostico. Huling naniniwala na an kaaraman (gnoʹsis sa Griego) puedeng makua sa sarong mistikong paagi, pinagsaro kan mga Gnostico an apostatang Kristianismo asin an Griegong pilosopiya patin mistisismo sa Oriente. Halimbawa, sinda naniniwala na an gabos na pisikal na bagay marompot, asin sa dahelan na iyan, si Jesus dai nagdatong sa laman kundi garo sana igwa nin sarong hawak nin tawo—sarong paniniwala na inaapod na Docetismo. Siring kan naheling niato, ini an mismong ipinatanid ni apostol Juan.—1 Juan 4:2, 3; 2 Juan 7.

 An saro pang kaputikan, na inimbento pakalihis nin dakol na siglo, iyo an doktrina kan banal na Trinidad daa, na naghihingako na si Jesus an Makakamhan sa Gabos na Dios saka an Aki nin Dios. Sa saiyang librong The Church of the First Three Centuries, sinabi ni Dr. Alvan Lamson na “an ginikanan [kan doktrina kan Trinidad] biyong iba sa Judio asin Kristianong Kasuratan; na iyan nagtalubo, asin idinagdag sa Kristianismo, paagi sa mga Ama na nagin Platoniko.” Sairisay ining “mga Ama na nagin Platoniko”? Sinda an apostatang mga klerigo na naakit sa mga katokdoan kan paganong Griegong pilosopo na si Plato.

An pagdagdag kan Trinidad sarong golpe de gulat kan anticristo, huling an doktrinang ini ginibo an Dios na garo baga misteryoso asin pinalibog an saiyang relasyon sa Aki. (Juan 14:28; 15:10; Colosas 1:15) Isip-isipa na sana, paano an saro ‘makakarani sa Dios,’ siring kan ineenkaminar kan Kasuratan, kun an Dios sarong misteryo?—Santiago 4:8.

Dagdag pa sa karibarawan, an dakol na paratradusir kan Biblia hinale an ngaran nin Dios, an Jehova, sa saindang mga traduksion, minsan ngani iyan minalataw nin labing 7,000 na beses sa orihinal na teksto! Malinaw nanggad, an pagprobar na gibohon an Makakamhan sa Gabos na bako sanang sarong misteryo kundi sarong daing ngaran na misteryo sarong akto nin grabeng kadaihan nin paggalang sa satong Kaglalang asin sa saiyang ipinasabong na Tataramon. (Kapahayagan 22:18, 19) Apuera kaini, an pagsalida sa ngaran nin Dios nin mga titulo na arog kan Kagurangnan asin Dios sarong pagbalga sa modelong pamibi ni Jesus, na nagsasabi sa sarong kabtang: “Pabanalon an Ngaran mo.”—Mateo 6:9, An Banal na Biblia.

Hinahaboan kan mga Anticristo an Kahadean nin Dios

An mga anticristo nagin partikular na aktibo durante kan “huring mga aldaw,” an panahon na kinabubuhayan niato. (2 Timoteo 3:1) An mayor na obheto kan mga paradaya na ini sa presenteng aldaw iyo na ilagalag an mga tawo kun dapit sa kabtang ni Jesus bilang Hade kan Kahadean nin Dios, sarong langitnon na pamamahala na sa dai na mahahaloy mamamahala sa bilog na daga.—Daniel 7:13, 14; Kapahayagan 11:15.

Halimbawa, ihinuhulit kan nagkapirang lider nin relihion na an Kahadean nin Dios sarong kamugtakan sa puso kan mga tawo, sarong punto de vista na mayo nin basehan sa Kasuratan. (Daniel 2:44) An iba naghihingako na si Cristo minahiro paagi sa mga pamamahala asin institusyon nin tawo. Alagad, sinabi ni Jesus: “An sakong kahadean bakong kabtang kan kinaban na ini.” (Juan 18:36) Sa katunayan, si Satanas, bakong si Cristo, “an namamahala sa kinaban” asin an “dios kan sistemang ini nin mga bagay.” (Juan 14:30; 2 Corinto 4:4) Ini an dahelan kun taano ta sa dai na mahahaloy hahaleon ni Jesus an gabos na gobyerno nin tawo asin sia an magigin solamenteng Namamahala sa daga. (Salmo 2:2, 6-9; Kapahayagan 19:11-21) Ipinapamibi kan mga tawo na mangyari ini kun namimibi sinda kan Pamibi kan Kagurangnan, na nagsasabi: “Dumatong logod an kahadean mo. Gibohon logod an boot mo digdi sa daga.”—Mateo 6:10, King James Version.

Huling sinusuportaran ninda an politikal na mga sistema kan kinaban, an dakol na lider nin relihion kinontra, pinersegir pa ngani, an mga nagbabalangibog kan katotoohan manongod sa Kahadean nin Dios. Interesante nanggad, nasambitan sa libro kan Biblia na Kapahayagan an sarong simbolikong patotot—an “Dakulang Babilonya”—na “burat sa dugo kan mga banal asin sa dugo kan mga saksi ni Jesus.” (Kapahayagan 17:4-6) Nagsasagibo man sia nin espirituwal na pagpapatotot paagi sa pagsuportar nia sa “mga hade,” o politikal na mga namamahala kan daga, na dian nag-aako sia nin mga pabor bilang balos. An simbolikong babae na ini mayong iba kundi an falsong mga relihion kan kinaban. Sia an mayor na kabtang kan anticristo.—Kapahayagan 18:2, 3; Santiago 4:4.

‘Nagpapagirok nin mga Talinga’ an Anticristo

Apuera sa paghabo sa katotoohan sa Biblia, isinikwal kan dakol na Kristiano daa an mga pamantayan kan Biblia sa paggawe ta an gusto ninda iyo an popular na moralidad. Ihinula kan Tataramon nin Dios an pangyayaring ini, na sinasabi: “Madatong an panahon na dai na sinda [mga tawo na  naghihingako na naglilingkod sa Dios] matagal sa ikakarahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga.” (2 Timoteo 4:3) An mga impostor na ini sa relihion ilinaladawan man bilang “falsong mga apostol, madayang mga trabahador, na nagmamalemale na mga apostol ni Cristo.” An Biblia nagsasabi pa: “An saindang masasagkodan segun sa saindang mga gibo.”—2 Corinto 11:13-15.

Kaiba sa mga gibo ninda an “malaswang gawe-gawe,” na daing supog na pagbasangbasang sa halangkaw na mga prinsipyo sa moral. (2 Pedro 2:1-3, 12-14) Bako daw na naheheling niato an nagdadakol na mga lider nin relihion asin parasunod ninda na inaako—o minsan paano kinokonsinte—an bakong sa Kristianong mga gibo, arog kan homoseksuwalidad asin pakikidorog sa bakong agom? Tabi na ikomparar nguna nindo an inaako nin dakol na mga punto de vista asin estilo nin pamumuhay na ini sa kun ano an sinasabi kan Biblia sa Levitico 18:22; Roma 1:26, 27; 1 Corinto 6:9, 10; Hebreo 13:4; asin Judas 7.

“Baloon an Ipinasabong na mga Tataramon”

Huli sa nasambitan sa enotan, maninigo niatong himateon an mga tataramon ni apostol Juan na dai ipasipara na sana o baliwalaon sana an satong relihiosong mga tinutubod. “Dai kamo tumubod sa gabos na ipinasabong na tataramon,” an patanid nia, “kundi baloon an ipinasabong na mga tataramon kun baga iyan gikan sa Dios, huli ta dakol na falsong propeta an nagruluwas sa kinaban.”—1 Juan 4:1.

Estudyare an marahay na halimbawa nin nagkapirang “noble an isip” na tawo na nakaistar sa siudad nin Berea kan enot na siglo. “Inako ninda an tataramon na igwa nin dakulang pagkagalaga sa isip, na maingat na sinisiyasat an Kasuratan aroaldaw kun baga an mga bagay na ini [mga itinaram ni Pablo asin Silas] iyo man nanggad.” (Gibo 17:10, 11) Iyo, minsan ngani galaga na makanood, sinierto kan mga taga Berea na an saindang nadangog asin inako marigon na nakabasar sa Kasuratan.

Ngonyan man, an tunay na mga Kristiano dai naiimpluwensiahan kan mga pagbarubago nin popular na mga punto de vista kundi nangangapot nin marigon sa katotoohan sa Biblia. Si apostol Pablo nagsurat: “Ini an padagos kong ipinapamibi, na an saindong pagkamoot paorog nang paorog na umabunda na may tamang kaaraman asin lubos na pakabatid.”—Filipos 1:9.

Kun dai pa nindo nagibo iyan, gibohon na pasohan nindo na kumua nin “tamang kaaraman asin lubos na pakabatid” paagi sa pag-adal sa kun ano talaga an itinotokdo kan Biblia. An mga nag-aarog sa mga taga Berea dai nadadaya kan “mga tataramon na palsipikado” nin mga anticristo. (2 Pedro 2:3) Kundi, sinda napapatalingkas kan espirituwal na katotoohan kan tunay na Cristo asin kan tunay na mga parasunod nia.—Juan 8:32, 36.

[Kahon/​Ritrato sa pahina 4]

KUN ANO AN SINASABI KAN BIBLIA MANONGOD SA ANTICRISTO

“Mga saradit na aki, ini na an huring oras [minalataw na an katapusan kan panahon kan mga apostol], asin, siring sa nadangog nindo na madatong an anticristo, minsan ngonyan dakol na an nagin mga anticristo.”—1 Juan 2:18.

“Siisay an putikon kundi an saro na nagpapainda na si Jesus iyo an Cristo? Ini an anticristo, an nagpapainda sa Ama asin sa Aki.”—1 Juan 2:22.

“Gabos na ipinasabong na tataramon na dai nagpapahayag manongod ki Jesus dai naggigikan sa Dios. Dugang pa, ini an ipinasabong na tataramon kan anticristo na saindong nadangog na madatong, asin ngonyan iyan nasa kinaban na.”—1 Juan 4:3.

“Dakol na madaya an nagralaog sa kinaban, mga tawo na dai nagpapahayag na si Jesu-Cristo napadigdi sa laman. Iyo ini an madaya asin an anticristo.”—2 Juan 7.

[Kahon/​Mga Ritrato sa pahina 5]

SARONG PARADAYA NA DAKOL AN LALAUOGON

An tataramon na “anticristo” minaaplikar sa gabos na nagdedehar sa sinasabi kan Biblia manongod ki Jesu-Cristo, gabos na nagkokontra sa saiyang Kahadean, asin gabos na nagmamaltrato sa saiyang mga parasunod. Kabilang man dian an mga indibiduwal, organisasyon, asin nasyon na falsong naghihingako na nagrerepresentar ki Cristo o salang iinaatribwir sa saindang sadiri an papel kan Mesiyas paagi sa may kapangahasan na pagpanuga na gigibohon an bagay na solamenteng si Cristo an makakagibo—an pagtao nin tunay na katoninongan asin katiwasayan.

[Credit Line]

Si Agustin: ©SuperStock/age fotostock

[Ritrato sa pahina 7]

Arog kan mga taga Berea, maninigo niatong ‘siyasaton an Kasuratan aroaldaw’