Taano ta Kaipuhan na Mamidbid an Anticristo?

“Nadangog nindo na madatong an anticristo,” an isinurat kan pinasabngan na apostol kaidtong haloy nang panahon. (1 Juan 2:18) Nakakapukaw nanggad nin interes an mga tataramon na iyan! Sa laog nin dakol na siglo, inisip-isip kan mga tawo an kahulogan kaiyan. Siisay an anticristo? Noarin sia madatong? Ano an saiyang gigibohon kun talagang dumatong sia?

HALABA an listahan kan mga sinahotan na iyo an anticristo. Kan nakaagi, kaiba sa mga sinasabing “anticristo” an mga Judio, papadong Katoliko, asin Romanong mga emperador. Halimbawa, kan pinili ni Emperador Federico II (1194-1250) na dai umiba sa sarong Krusada para sa iglesia, inapod sia ni Papa Gregorio IX na anticristo asin inekskomulgar sia kaini. Inekskomulgar giraray sia kan kasalihid ni Gregorio, si Inocentes IV. Bilang reaksion, idineklarar ni Federico si Inocentes na iyo an anticristo.

Si apostol Juan an solamenteng kagsurat kan Biblia na naggamit kan tataramon na “anticristo.” Sa duwa sa mga surat na inginaran sa saiya, an tataramon na iyan minalataw nin limang beses, sa singular sagkod plural. An mga bersikulo na kun saen naglataw an termino nakalista sa kahon na nasa sunod na pahina. Sa mga bersikulong ini, maheheling niato na an anticristo sarong putikon asin paradaya, determinadong raoton an relasyon nin sarong indibiduwal ki Cristo asin sa Dios. Huli kaiyan, sinadol kan apostol an saiyang mga kapwa Kristiano: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon tangani na maheling kun baga iyan gikan sa Dios, huli ta dakol na falsong propeta an nagruluwas sa kinaban.”—1 Juan 4:1.

Nagpatanid man si Jesus tumang sa mga paradaya, o falsong mga propeta, na sinasabi: “[Sinda] minadolok sa saindo sa gubing nin karnero, alagad sa laog sinda naninibang mga lobo. Paagi sa saindang mga bunga [o, mga gibo] mamimidbid nindo sinda.” (Mateo 7:15, 16) Pinapatanidan man daw ni Jesus an saiyang mga parasunod tumang sa piguratibong anticristo? Helingon niato kun paano niato mamimidbid an maisog na paradayang ini.