“An Dakulang Aldaw ni Jehova Harani Na”
“An Dakulang Aldaw ni Jehova Harani Na”
“An dakulang aldaw ni Jehova harani na. Iyan harani na, asin iyan naghihidaling marhay.”—SOFONIAS 1:14.
1, 2. (a) Anong espesyal na aldaw an hinahalat kan mga Kristiano? (b) Anong mga hapot an kaipuhan na ihapot niato, asin taano?
GALAGANG hinahalat nin sarong masinggayang-masinggaya na hoben na babae an pag-abot kan aldaw kan saiyang kasal. May pagkamoot na inaantisipar nin sarong bados na ina an pagkamundag kan saiyang omboy. Minamawot nang marhay kan sarong pagal-pagal nang trabahador an kapinonan kan haloy na niang hinahalat na bakasyon. Ano an pagkakapareho ninda? Sinda gabos naghahalat sa sarong espesyal na aldaw—sarong aldaw na magkakaigwa nin epekto sa saindang buhay. Igwa sinda nin hararom alagad laen na marhay na emosyon. An aldaw na hinahalat ninda maabot sa katapustapusi, asin pag-abot kaiyan, naglalaom sinda na andam sinda para dian.
2 Galaga man na hinahalat kan tunay na mga Kristiano ngonyan an pag-abot nin sarong espesyal na aldaw. Iyan iyo an dakulang “aldaw ni Jehova.” (Isaias 13:9; Joel 2:1; 2 Pedro 3:12) Ano ining maabot na “aldaw ni Jehova,” asin paano makakaapektar sa katawohan an pag-abot kaiyan? Dugang pa, paano niato masesegurado na andam kita sa pag-abot kaiyan? Kaipuhan nanggad na hanapon niato ngonyan an simbag sa mga hapot na ini huling an ebidensia nagpaparisa sa pagigin totoo kan minasunod na mga tataramon kan Biblia: “An dakulang aldaw ni Jehova harani na. Iyan harani na, asin iyan naghihidaling marhay.”—Sofonias 1:14.
“An Dakulang Aldaw ni Jehova”
3. Ano “an dakulang aldaw ni Jehova”?
3 Ano “an dakulang aldaw ni Jehova”? Sa bilog na Kasuratan, an pananaram na “an aldaw ni Jehova” nanonongod sa espesyal na mga panahon kan hinokoman ni Jehova an saiyang mga kaiwal asin pinamuraway an saiyang dakulang ngaran. An bakong maimbod na banwaan nin Juda asin Jerusalem saka an mapan-aping mga nag-eerok sa Babilonya asin Egipto gabos napaatubang sa ‘mga aldaw ni Jehova’ kan maeksperyensiahan ninda an paggibo kan mga paghokom ni Jehova. (Isaias 2:1, 10-12; 13:1-6; Jeremias 46:7-10) Minsan siring, an kadarudakulaing “aldaw ni Jehova” sa ngapit pa mangyayari. Iyan an “aldaw” na an paghokom ni Jehova gigibohon sa mga nagpakaraot sa saiyang ngaran. Iyan mapoon sa paglaglag sa “Dakulang Babilonya,” an pambilog na kinaban na imperyo nin falsong relihion, asin matatapos sa pagkapara kan natatada pa kan marigsok na sistema nin mga bagay sa ralaban nin Armagedon.—Kapahayagan 16:14, 16; 17:5, 15-17; 19:11-21.
4. Taano an kadaklan kan katawohan ta maninigong matakot sa marikas an pagdangadang na aldaw ni Jehova?
4 Aram man ninda iyan o dai, an kadaklan kan katawohan maninigong matakot sa marikas an pagdangadang na aldaw na ini. Taano? Paagi sa propetang si Sofonias, si Jehova nagsimbag: “An aldaw na iyan aldaw nin kabangisan, aldaw nin kasakitan asin nin panangis, aldaw nin bagyo asin nin pangaba, aldaw nin kadikloman asin nin paglumlom, aldaw nin pagdagom asin nin pagdiklom.” Makatatakot nanggad! Dugang pa, an propeta nagsabi: “Papasakitan ko an katawohan . . . huli ta tumang ki Jehova na sinda nagkasala.”—Sofonias 1:15, 17.
5. Ano an positibong pagmansay kan minilyon na tawo mapadapit sa aldaw ni Jehova, asin taano?
5 Minsan siring, minilyon na iba pa an galagang nag-aantisipar sa pag-abot kan aldaw ni Jehova. Taano? Naaaraman ninda na panahon iyan nin kaligtasan asin pagkakalda para sa mga matanos, an aldaw na si Jehova mismo mapapamuraway na gayo asin an mamuraway na ngaran nia masasantipikar. (Joel 3:16, 17; Sofonias 3:12-17) Kun baga kakatakotan o galagang aantisiparon an aldaw na iyan minadependeng marhay sa kun ano an ginigibo kan mga tawo sa saindang buhay ngonyan. Paano nindo minamansay an pagdangadang kan aldaw na iyan? Andam daw kamo para dian? An bagay daw na madali na an aldaw ni Jehova nakakaapektar sa saindong aroaldaw na buhay ngonyan mismo?
“An mga Paraolog-olog Madatong na May Pag-olog-olog”
6. Paano minamansay kan kadaklan na tawo an “aldaw ni Jehova,” asin taano ta dai ini ipinagngangalas kan tunay na mga Kristiano?
6 Sa ibong kan pagkaapurado kan situwasyon, an kadaklan kan nag-eerok sa daga dai nahahadit manongod sa nagdadangadang na “aldaw ni Jehova.” Tinutuya asin inoolog-olog ninda an mga nagpapatanid sa sainda dapit sa madali nang pagdatong kaiyan. Dai ini ipinagngangalas kan tunay na mga Kristiano. Ginigirumdom ninda an patanid na isinurat ni apostol Pedro: “Aramon nguna nindo ini, na sa huring mga aldaw an mga paraolog-olog madatong na may pag-olog-olog, na naglalakaw segun sa saindang sadiring mga mawot asin nagsasarabi: ‘Haen man ining ipinanugang presensia nia? Tara, poon kan aldaw na an satong mga apoon magtorog sa kagadanan, an gabos na bagay pareho man sana poon kan kapinonan nin paglalang.’”—2 Pedro 3:3, 4.
7. Ano an makakatabang sa sato na mapagdanay an pakamate nin pag-apura?
7 Ano an makakatabang sa sato na labanan an siring na negatibong kaisipan asin paagi kaiyan mapagdanay an pakamate nin pag-apura? Si Pedro nagsasabi sa sato: “Pinupukaw ko an saindong malinaw na pag-iisip paagi sa pagirumdom, tanganing magirumdoman nindo an mga kasabihan na itinaram kaidto kan banal na mga propeta asin an togon kan Kagurangnan asin Paraligtas paagi sa saindong mga apostol.” (2 Pedro 3:1, 2) An pagtao niato nin atension sa propetikong mga patanid makakatabang sa sato na ‘pukawon an satong malinaw na pag-iisip.’ Tibaad paorootro na niatong nadangog an mga pagirumdom na ini, alagad mahalagang marhay na kita ngonyan, orog kisa kasuarin man, padagos na magtao nin atension sa mga patanid na ini.—Isaias 34:1-4; Lucas 21:34-36.
8. Taano ta dakol an dai nag-iintindi sa mga pagirumdom kan Biblia?
8 Taano ta dai iniintindi kan nagkapira an mga pagirumdom na ini? Si Pedro nagpapadagos: “Oyon sa saindang kabotan, an katotoohan na ini dai ninda namamangno, na igwa nin kalangitan poon kan suanoy asin sarong daga na dusok na nagtitindog hale sa tubig asin sa tahaw nin tubig paagi sa tataramon nin Dios; asin sa mga paaging iyan an kinaban kan panahon na idto nalaglag kan iyan malantopan nin tubig.” (2 Pedro 3:5, 6) Iyo, may mga habong umabot an aldaw ni Jehova. Habo nindang maabala an saindang buhay. Habo nindang manimbag ki Jehova sa saindang maimot na estilo nin pamumuhay! Siring kan sinabi ni Pedro, namumuhay sinda “segun sa saindang sadiring mga mawot.”
9. Anong aktitud an ipinaheling kan mga tawo kan mga aldaw ni Noe asin ni Lot?
9 Huli sa “saindang kabotan,” mas gusto kan mga paraolog-olog na ini na dai intindihon an bagay na si Jehova nag-interbenir sa mga aktibidad kan katawohan kan nakaagi. Si Jesu-Cristo sagkod si apostol Pedro nagsambit nin duwa sa mga pangyayaring iyan—an “mga aldaw ni Noe” asin an “mga aldaw ni Lot.” (Lucas 17:26-30; 2 Pedro 2:5-9) Bago kan Baha, an mga tawo dai nagmangno sa itinaong patanid ni Noe. Siring man, bago kan pagkalaglag kan Sodoma asin Gomorra, sa pagheling kan saiyang mga manugang na lalaki, si Lot ‘garo tawong nagsusuba.’—Genesis 19:14.
10. Ano an reaksion ni Jehova sa mga dai nagmamangno?
10 Mayo nin kalaenan ngonyan. Pero, helinga an reaksion ni Jehova sa mga dai nagmamangno: “Tatawan ko nin atension an mga tawong nagigin matagas na sa ibabaw kan saindang mga lagod asin nagsasarabi sa saindang puso, ‘Si Jehova dai maggigibo nin marahay, asin dai sia maggigibo nin maraot.’ Asin an saindang kayamanan magigin para sa pananalakat asin an saindang mga harong para sa mapungaw na kahiwasan. Asin sinda magtotogdok nin mga harong, alagad ta dai sinda mag-oontok dian; asin magtatanom sinda nin mga ubasan, alagad ta dai ninda maiinom an arak kaiyan.” (Sofonias 1:12, 13) An mga tawo tibaad magpadagos sa saindang “normal” na mga aktibidad sa aroaldaw, alagad dai sinda makakakua nin ano man na permanenteng pakinabang sa saindang kahigosan. Taano? Huli ta an aldaw ni Jehova maabot nin bigla, asin an ano man na materyal na kayamanan na tibaad natipon ninda dai makakapagligtas sa sainda.—Sofonias 1:18.
“Padagos Iyan na Halaton”
11. Anong konseho an maninigo niatong isaisip?
11 Bakong arog kan marigsok na kinaban sa palibot niato, dapat na isaisip niato an konseho na isinurat ni propeta Habacuc: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Dawa pa iyan maatraso, padagos iyan na halaton; huli ta iyan daing salto na maootob. Dai iyan mahuhuri.” (Habacuc 2:3) Dawa kun an aldaw na iyan tibaad garo naaatraso sa bakong sangkap na punto de vista niato, dapat na girumdomon niato na si Jehova bakong maluway. An saiyang aldaw maabot nin eksakto sa panahon, sa oras na dai linalaoman kan mga tawo.—Marcos 13:33; 2 Pedro 3:9, 10.
12. Ano an ipinatanid ni Jesus, asin paano ini napapalaen sa ginibo kan maimbod na mga parasunod ni Jesus?
12 Idinodoon an kahalagahan kan padagos na paghalat sa aldaw ni Jehova, nagpatanid si Jesus na dawa an nagkapira sa saiyang mga parasunod mawawaran kan saindang pakamate nin pag-apura. Naghula sia manongod sa sainda: “Kun an marompot na oripon na iyan magsabi sa saiyang puso, ‘Nag-aatraso an sakuyang kagurangnan,’ asin magpoon nang bugbogon an saiyang mga kapwa oripon asin magkakan patin mag-inom kaiba kan midbid na mga paraburat, an kagurangnan kan oripon na iyan madatong sa aldaw na dai nia linalaoman asin sa oras na dai nia aram, asin papadusahan sia nin makuri.” (Mateo 24:48-51) Sa kabaliktaran, an maimbod asin mapagmansay na klaseng oripon maimbod na pinagdadanay an saindang pakamate nin pag-apura. An klaseng oripon padagos na nagbabantay asin andam. Ninombrahan iyan ni Jesus “na mamahala sa gabos niang rogaring” digdi sa daga.—Mateo 24:42-47.
An Pangangaipong Mag-apura
13. Paano tinawan nin pagdodoon ni Jesus an pangangaipong makamate nin pag-apura?
13 Kinaipuhan na papagdanayon kan enot na siglong mga Kristiano an saindang pakamate nin pag-apura. Kinaipuhan nindang humiro tolos-tolos tanganing dumulag hale sa Jerusalem kun maheling ninda an siudad na iyan na “napapalibotan nin nagkakampong mga hukbo.” (Lucas 21:20, 21) Nangyari iyan kan taon 66 C.E. Mangnoha kun paano tinawan nin pagdodoon ni Jesus an pangangaipong mag-apura kan mga Kristiano kaidto: “An tawong nasa atop kan harong dai na humilig tanganing kuanon an mga rogaring sa saiyang harong; asin an tawong nasa oma dai na bumalik sa harong tanganing kuanon an saiyang pan-ibabaw na gubing.” (Mateo 24:17, 18) Huli sa bagay na an kasaysayan nagpapaheling na an Jerusalem nagdanay nin apat pang taon, taano ta apuradong marhay na himateon kan mga Kristiano an mga tataramon ni Jesus kan 66 C.E.?
14, 15. Taano ta kinaipuhan kan mga Kristiano kan enot na siglo na humiro na daing pag-atraso kun maheling ninda an Jerusalem na napapalibotan nin nagkakampong mga hukbo?
14 Minsan ngani totoo na kaidto sanang 70 C.E. linaglag kan hukbong Romano an Jerusalem, an mga taon sa pag-oltanan bakong daing problema. Talagang bako! An mga taon na idto pano nin kadahasan asin pagpabolos nin dugo. Ilinaladawan nin sarong historyador an kamugtakan sa Jerusalem durante kan panahon na iyan bilang “sarong makatatakot na madugong guerra sibil, na may kaibang mga gibo nin makatatakot na karingisan.” Rineklutar an mga hoben na lalaki tanganing makapasarig sa mga kuta, tanganing magkapot nin mga armas, asin tanganing magserbisyo sa militar. Nag-agi sinda sa militar na mga pagsasanay aroaldaw. Ibinilang na traydor an mga dai nag-oyon sa sobra nang marhay na ginigibong aksion. Kun an mga Kristiano naghaloy pa sa siudad, namugtak kutana sinda sa labi-labi kapeligrosong situwasyon.—Mateo 26:52; Marcos 12:17.
15 Maninigong mangnohon na sinabi ni Jesus na “an mga nasa Judea,” bako sanang Jerusalem, dapat nang pumoon na dumulag. Importante ini huli ta sa laog nin pira sanang bulan kan saindang paghale sa Jerusalem, pinonan giraray kan mga soldados na Romano an saindang pakikilaban. Enot, nadaog an Galilea kan 67 C.E., dangan sistematikong sinakop an Judea kan suminunod na taon. Nagresulta ini sa grabeng kasakitan sa bilog na probinsia. Padepisil nang padepisil man para sa siisay man na Judio na dumulag hale sa Jerusalem mismo. Guardiado an mga tata kan siudad, asin an siisay man na magprobar na dumulag ipapamugtak na minakampi sa mga Romano.
16. Anong aktitud an kinaipuhan na ipaheling kan mga Kristiano kan enot na siglo tanganing makaligtas sa panahon na idto nin kasakitan?
16 Nasa isip an gabos na bagay na ini, masasabotan niato kun taano ta idinoon ni Jesus an pagkaapurado kan situwasyon. An mga Kristiano kinaipuhan na andam na gumibo nin mga pagsasakripisyo, na dai tinotogotan an saindang sadiri na malingling sa materyal na mga rogaring. Kaipuhan na andam sinda na ‘bayaan an gabos nindang sadiri’ tanganing kuyogon an patanid ni Jesus. (Lucas 14:33) Nakaligtas an mga tolos-tolos na nagkuyog asin nagdulag pasiring sa ibong kan Jordan.
Pagpapadanay kan Satong Pakamate nin Pag-apura
17. Taano ta maninigo niatong pakosogon an satong pakamate nin pag-apura?
17 Malinaw na ihinahayag kan mga propesiya sa Biblia na nasa poro na kita kan panahon kan katapusan. Orog kisa kasuarin man, kaipuhan na pakosogon niato an satong pakamate nin pag-apura. Sa panahon na toninong dai namamatean nin sarong soldados an tension asin peligro nin ralaban. Pero, kun bilang resulta, dai sia nakakamate nin pag-apura na magdanay na mapagbantay asin biglang inapod tanganing makipaglaban, posibleng marhay na sia dai andam, na puedeng magbunga nin kagadanan. Totoo man iyan sa espirituwal. Kun papabayaan niatong lumuya an satong pakamate nin pag-apura, kita puedeng magin dai andam na labanan an mga pagsalakay na minaabot sa sato asin tibaad mabigla kita kun mag-abot sa katapustapusi an aldaw ni Jehova. (Lucas 21:36; 1 Tesalonica 5:4) Kun may mga ‘nagsiribog sa pagsunod ki Jehova,’ ngonyan na an panahon tanganing hanapon giraray ninda sia.—Sofonias 1:3-6; 2 Tesalonica 1:8, 9.
18, 19. Ano an makakatabang sa sato na mapagdanay na harani sa isip “an presensia kan aldaw ni Jehova”?
18 Bakong makangangalas na si apostol Pedro nagsasadol sa sato na papagdanayon na harani sa isip “an presensia kan aldaw ni Jehova”! Paano niato magigibo ini? An sarong paagi iyo an pagigin kalabot “sa banal na mga gawe asin gibo nin diosnon na debosyon.” (2 Pedro 3:11, 12) An pagdadanay na sibot sa siring na mga aktibidad makakatabang sa sato na galagang antisiparon an pag-abot kan “aldaw ni Jehova.” An Griegong tataramon na trinadusir na “pinapagdadanay na harani sa isip” literal na nangangahulogan na “pinaparikas.” Dai talaga niato mapaparikas an natatadang panahon sagkod na umabot an aldaw ni Jehova. Pero, mantang hinahalat niato an aldaw na iyan, an panahon garo baga mas marikas nanggad an pag-agi kun sibot kita sa paglilingkod sa Dios.—1 Corinto 15:58.
19 An paghorophorop sa Tataramon nin Dios asin pag-estudyar sa mga pagirumdom na yaon dian magpapangyari man sa sato na magibo ini—“odok na minamawot (hinahalat asin hinihidali) an pag-abot” kan aldaw na iyan, iyo, “danay na naghahalat” kaiyan. (2 Pedro 3:12, The Amplified Bible; The New Testament, ni William Barclay) Kaiba sa mga pagirumdom na ini an kadakol na propesiya na naghuhula bako sanang kan pag-abot kan aldaw ni Jehova kundi pati kan abundang mga bendisyon na itatao sa mga ‘padagos na naghahalat ki Jehova.’—Sofonias 3:8.
20. Anong sadol an maninigong isapuso niato?
20 Totoong ngonyan na an panahon na isapuso niato gabos an sadol na itinao paagi ki propeta Sofonias: “Bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”—Sofonias 2:2, 3.
21. Ano an magigin determinasyon kan banwaan nin Dios durante kan 2007?
21 Kun siring, angay nanggad an teksto kan taon na napili para sa taon 2007: “An dakulang aldaw ni Jehova harani na.” An banwaan nin Dios kombensido na “iyan harani na, asin iyan naghihidaling marhay.” (Sofonias 1:14) “Dai iyan mahuhuri.” (Habacuc 2:3) Kaya mantang hinahalat niato an aldaw na iyan, pirme logod kitang magin mapagbantay sa mga panahon na kinabubuhayan niato, na narerealisar na harani na an ultimong kaotoban kan mga propesiyang ini!
Masisimbag daw Nindo?
• Ano “an dakulang aldaw ni Jehova”?
• Taano ta dakol an dai nag-iintindi sa pagkaapurado kan mga panahon?
• Taano an mga Kristiano kan enot na siglo ta kaipuhan na humiro na may pakamate nin pag-apura?
• Paano niato mapapakosog an satong pakamate nin pag-apura?
[Mga Hapot Para sa Pag-adal]
[Blurb sa pahina 19]
An teksto kan taon para sa 2007 iyo an: “An dakulang aldaw ni Jehova harani na.”—Sofonias 1:14.
[Mga Ritrato sa pahina 16, 17]
Arog kan aldaw ni Noe, mabibigla an mga paraolog-olog kun humiro na si Jehova
[Ritrato sa pahina 18]
An mga Kristiano kinaipuhan na humiro na mayong pag-atraso kan maheling ninda an Jerusalem na “napapalibotan nin nagkakampong mga hukbo”