Pagkamundag ni Jesus—Kun Paano Iyan Nagtatao nin Katoninongan

AN PAGBALANGIBOG nin “katoninongan sa mga tawo na igwa nin marahay na boot” bakong iyo sana an propesiya na konektado sa pagkamundag ni Jesus. Apuera sa ipinaisi kan mga anghel sa napangalas na mga pastor, an langitnon na mga mensahero nagtao ki Maria asin sa saiyang agom na si Jose nin mga kapahayagan na ipinasabong nin Dios manongod sa bagong mamundag na si Jesus. An pag-estudyar sa mga mensaheng ini magpapangyari sa sato na magkaigwa nin mas mahiwas na pagmansay sa pagkamundag ni Jesus asin masabotan an tunay na kahulogan sa likod kan panuga kan mga anghel na katoninongan sa mga tawo.

Bago kan pagkamundag ni Jesus, bago ngani si Maria magbados, ini binisita nin sarong anghel na ipinamidbid kan Biblia na Gabriel. “Marahay na aldaw, ika na pinakapaorog, si Jehova nasa saimo” an pataratara kan anghel. Siring kan tibaad maiimahinar nindo, ikinapurisaw na marhay ini ni Maria asin tibaad medyo natakot sia. Ano an puedeng magin kahulogan nin siring na pataratara?

Ipinaliwanag ni Gabriel: “Uya! ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus. An sarong ini magigin dakula asin aapodon na Aki kan Kaharohalangkawe; asin itatao sa saiya ni Jehova Dios an trono ni David na saiyang ama, asin sia mamamahala bilang hade sa kamag-anakan ni Jacob sagkod lamang, asin dai magkakaigwa nin katapusan an saiyang kahadean.” Naghapot si Maria kun paano ini mangyayari, mantang sia, na sarong birhen, dai pa nakidorog sa lalaki. Nagsimbag si Gabriel na an aki ipapangidam paagi sa banal na espiritu nin Dios. Bako ining ordinaryong aki.—Lucas 1:28-35.

Sarong Ihinulang Hade

An mga tataramon ni Gabriel siertong nakatabang ki Maria na mabatid na an aking lalaki na saiyang ipagbabados iyo an tema nin suanoy na mga propesiya. Huli sa paghahayag na itatao ni Jehova sa aki ni Maria “an trono ni David na saiyang ama,” maiisip nia—asin sa katunayan kan siisay man na Judio na pamilyar sa Kasuratan—an ipinanuga nin Dios ki Hadeng David nin Israel.

Paagi ki propeta Natan, sinabihan ni Jehova si David: “An saimong kamag-anakan asin an saimong kahadean sierto nanggad na magigin marigon sagkod sa panahon na daing talaan sa atubangan mo; an saimo mismong trono magigin saro na masarig sagkod sa panahon na daing talaan.” (2 Samuel 7:4, 16) Si Jehova nagtaram mapadapit ki David: “Papatindogon ko nanggad an saiyang banhi sagkod lamang asin an saiyang trono siring kan mga aldaw nin langit. An saiyang banhi magdadanay sagkod sa panahon na daing talaan, asin an saiyang trono siring sa aldaw sa atubangan ko.” (Salmo 89:20, 29, 35, 36) Sa siring, bakong pagkanorongod na si Maria saka si Jose naggikan sa pamilya ni David.

Bako sana ini an mga propesiya sa Hebreong Kasuratan mapadapit sa magigin hade na aki ni David. Si Maria pamilyar na man sa propesiya ni Isaias: “Namundag sa sato an sarong aki, may itinao sa sato na sarong aking lalaki; asin an sa prinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan. An kadakolan kan sa prinsipeng pamamahala asin an katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing susteniran iyan paagi sa hustisya asin paagi  sa katanosan, poon ngonyan asin sagkod sa panahon na daing talaan. An mismong kaigotan ni Jehova nin mga hukbo an magibo kaini.”—Isaias 9:6, 7.

Kun siring, an ipinaisi ni Gabriel ki Maria bako sanang milagrosong pagkamundag nin sarong omboy na lalaki. An saiyang aki iyo an magmamana kan pagkahade ni Hadeng David—an permanente asin daing katapusan na magmamana kan itinalaga nin Dios na Kahadean. An mga propesiya ni Gabriel may labot sa magigin papel ni Jesus sa ngapit igwa nin hararom na kahulogan para sa sato gabos.

Kan maaraman ni Jose na bados an saiyang magigin agom, nagdesisyon sia na taposon an saindang pagkatratong pakasal. Aram nia na bako saiya an aki huling dai sia noarin man nagkaigwa nin seksuwal na relasyon sa saiyang katrato. Maiimahinar nindo kun gurano kadepisil para ki Jose na paniwalaan an paliwanag ni Maria manongod sa saiyang pagbados. An pagkasaysay sa Ebanghelyo nagbareta: “An anghel ni Jehova nagpaheling sa saiya sa sarong pangatorogan, na nagsasabi: ‘Jose, aking lalaki ni David, dai ka matakot na ipuli si Maria na saimong agom na babae, huli ta an pinapangyaring ipangidam nia paagi sa banal na espiritu. Sia mangangaki nin sarong lalaki, asin kaipuhan na apodon mo an saiyang ngaran na Jesus, huling ililigtas nia an saiyang banwaan sa saindang mga kasalan.’”—Mateo 1:20, 21.

Mayong sinasabi an Biblia kun sagkod saen nasabotan ni Jose kun paano ‘ililigtas kan aki an saiyang banwaan sa saindang mga kasalan.’ Pero, supisyente na an mensaheng ini tanganing aseguraron si Jose na an magigin ina mayo nin ano man na salang ginibo. Ginibo nia an idinirehir kan anghel asin ipinuli si Maria, sarong akto na katumbas nin kasal.

Sa tabang kan impormasyon na manonompongan sa iba pang kabtang kan Kasuratan, masasabotan niato kun ano an boot sabihon kan anghel. Sa kapinonan kan kasaysayan nin tawo, kinuestion nin sarong rebeldeng anghel an soberaniya ni Jehova. Ipinapaheling kan Hebreong Kasuratan na hiningako kan rebeldeng ini, kabilang sa iba pang bagay, na bakong makatanosan an paagi nin pamamahala nin Dios asin na mayo nin tawo na magdadanay na may integridad ki Jehova kun mapaatubang sa pagbalo. (Genesis 3:2-5; Job 1:6-12) Saro na si Adan sa dai nagdanay na may integridad. Bilang  resulta kan saiyang kasalan, an gabos na tawo nagmana nin kasalan, asin an resulta kan kasalan na iyan iyo an kagadanan. (Roma 5:12; 6:23) Minsan siring, si Jesus namundag na mayong kasalan huling an pangingidam sa saiya bakong paagi sa tawong ama. Paagi sa gikan sa boot na pagtao bilang pantubos kan saiyang sangkap na buhay bilang tawo na eksaktong katimbang kan winara ni Adan, ikakaligtas ni Jesus an mga tawo sa saindang mga kasalan asin ikakatao sa sainda an esperansang mabuhay na daing katapusan.—1 Timoteo 2:3-6; Tito 3:6, 7; 1 Juan 2:25.

Durante kan saiyang ministeryo sa daga, itinao ni Jesus an panamit sa magigin kahulogan kan paghale sa mga epekto nin kasalan. Pinatalingkas nia an mga tawo sa gabos na klase nin pisikal na kamatean asin nagbuhay liwat pa ngani nin mga gadan. (Mateo 4:23; Juan 11:1-44) An mga milagrong idto patanaw kan gigibohon nia sa ngapit. Sinabi mismo ni Jesus: “An oras maabot na an gabos na nasa mga lolobngan na girumdoman makakadangog kan [sakong] tingog asin maruluwas.”—Juan 5:28, 29.

Ipinapaliwanag kan panugang iyan na pagkabuhay liwat sa ngapit kun taano an pagkamundag—asin nangorogna ngani an kagadanan—ni Jesus ta pinakaimportante sa sato. Isinugo nin Dios an saiyang Aki sa kinaban “tanganing ikaligtas an kinaban paagi sa saiya,” an sabi kan Juan 3:17. An marahayon na baretang ini nagpapagirumdom sa sato kan ibinalangibog sa mga pastor na nagbabantay sa mga aripompon ninda kan bangging namundag si Jesus.

“Maogmang Bareta nin Dakulang Kagayagayahan”

Tunay nanggad na “maogmang bareta nin dakulang kagayagayahan” para sa katawohan kan ipaisi kan mga anghel an pagkamundag nin “sarong Paraligtas, na iyo si Cristo na Kagurangnan.” (Lucas 2:10, 11) An aking ini an magigin Mesiyas, an dakulang Propeta asin Namamahala na haloy nang hinahalat kan banwaan nin Dios. (Deuteronomio 18:18; Miqueas 5:2) An saiyang buhay asin kagadanan sa daga magkakaigwa nin mahalagang kabtang sa pagbindikar kan unibersal na soberaniya ni Jehova, kaya an mga anghel makakasabi: “Kamurawayan sa Dios sa kaitaasan.”—Lucas 2:14.

Ipinaheling ni Jesus, na inaapod kan Biblia na “huring Adan,” na posible para sa sarong tawo na magin maimbod ki Jehova dawa sa irarom nin pinakagrabeng pagbalo. (1 Corinto 15:45) Sa siring, pinatunayan nia na si Satanas sarong marigsok na putikon. Ini an dahelan nin kagayagayahan sa langit kan maimbod na mga anghel.

Pero, balikan niato an hapot na, “Igwa daw nin ano man na realistikong paglaom na maootob an ibinalangibog kan mga anghel kan bangging namundag si Jesus?” An simbag iyo nanggad! An katoninongan sarong mahalagang marhay na kamugtakan sa pag-otob kan katuyohan nin Dios para sa daga, na kaiba an pagbabalik kan paraisong mga kamugtakan. Kun iyan maotob na sa bilog na daga, an gabos na tawo mamomotibar nin pagkamoot asin kaimbodan. Huli kaini, an pagkaotob kan katuyohan ni Jehova nangangahulogan man kan paghale kan gabos na paglaban sa saiyang soberaniya. Bako ining marahay na bareta para sa siisay man na kampi ki Satanas sa paghihingako na maraot an mga pamantayan ni Jehova. Para sa sainda, iyan mangangahulogan nin kalaglagan.—Salmo 37:11; Talinhaga 2:21, 22.

Mangnohon tabi na an mga anghel dai nagsabi sa mga pastor nin katoninongan asin marahay na boot sa gabos na tawo. Imbes, an ipinaisi ninda “katoninongan sa mga tawo na igwa nin marahay na boot.” Sa ibang pagtaram, sa mga inooyonan nin Dios asin igwa kan saiyang marahay na boot. An mga nagpapahayag nin tunay na pagtubod ki Jehova nagigin maimbod na mga parasunod asin paraarog ni Jesus. An siring na mga lalaki asin babae andam na magpaheling nin pagkabuka nin palad asin pagsabot sa iba, bako sanang pirang aldaw kada taon, kundi aroaldaw.

Kristianong Espiritu sa Bilog na Taon?

An puersa kan maogmang bareta na ihinulit ni Jesus nakaapektar sa buhay kan dai mabilang na indibiduwal. Dakol an nagsunod sa Kristianong mga prinsipyo sa lambang aspekto kan saindang buhay. An mga tawo na kaidto sadiri sana nanggad an iniintindi nagpoon nang maghapot kun ano daw kutana an ginibo ni Jesus kun sia an namugtak sa saindang situwasyon. An nagkapira na isinentro an saindang buhay sa mga rogaring asin kasingawan rinekonoser na an importansia kan espirituwal na mga pamantayan sa buhay asin kan pagsabi kaini sa saindang kapwa. An mga tawo na naggigibo kaini naghihingoa na ipaheling an pagkabuka nin palad asin kabootan sa bilog na taon.  Bako daw na iyan an aasahan nindo sa tunay na mga Kristiano?

Kun an gabos na sinserong indibiduwal mapondo nguna tanganing pag-isipan an importansia asin kahulogan kan mensahe nin katoninongan kan mga anghel asin magawe kaoyon kan mga pinag-iisipan na iyan, an kinaban seguradong magigin mas marahay nanggad na lugar.

An mga propesiya na konektado sa pagkamundag ni Jesus nag-aasegurar sa mga may marahay na boot nin Dios na puedeng mapasainda an tunay na katoninongan sagkod lamang. Bako daw na iyan an mawot nindo? Makakasierto kita na seguradong maootob an mamuraway na propetikong paisi nin katoninongan kan mga anghel kan mamundag si Jesus. Imbes na magin daing kahulogan na mga tataramon sa Kapaskohan, an katoninongan siertong mangyayari na daing katapusan.

[Mga Ritrato sa pahina 7]

An Kristianong espiritu puede asin maninigong ipaheling sa bilog na taon