‘Papangyayarihon ni Jehova na Magibo an Hustisya’

“Dai daw papangyayarihon nin Dios na magibo an hustisya para sa saiyang mga pinili na nag-aagrangay sa saiya aldaw asin banggi?”—LUCAS 18:7.

1. Sairisay an gikanan nin pagparigon sa boot para sa saindo, asin taano?

SA BILOG na kinaban, ikinakaogma kan Mga Saksi ni Jehova na makaibanan an Kristianong mga tugang na lalaki asin babae na dakol na taon nang maimbod na naglilingkod ki Jehova. Midbid mo daw personalmente an nagkapira sa mga namomotan na ini? Tibaad nagigirumdoman nindo an sarong may edad nang tugang na babae, na nabautismohan dakol nang taon an nakaagi asin bihirang magpalta sa pagtiripon sa Kingdom Hall. O tibaad iniisip nindo an sarong gurang nang tugang na lalaki na maimbod na sinusuportaran serosemana an mga aktibidad sa ministeryo sa langtad kan kongregasyon asin dakol na dekada nang ginigibo nia iyan. Totoo, inisip kan dakol sa mga maimbod na ini na ngonyan, nangyari na kuta an Armagedon. Pero, an katotoohan na nag-eeksister pa an daing hustisyang kinaban na ini dai nagpaluya sa saindang kompiansa sa mga panuga ni Jehova ni nagpaluya sa saindang determinasyon na ‘magtagal sagkod sa katapusan.’ (Mateo 24:13) An rarom kan pagtubod na ipinaheling kan siring na maimbod na mga lingkod ni Jehova talagang gikanan nin pagparigon sa boot para sa bilog na kongregasyon.—Salmo 147:11.

2. Anong situwasyon an ikinakamondo niato?

² Minsan siring, kun beses tibaad kabaliktaran an naoobserbaran niato. May mga Saksi na dakol na taon nang nakikikabtang sa ministeryo, alagad sa pag-agi nin panahon nagluya an saindang pagtubod ki Jehova, asin dai na sinda nakikiasosyar sa Kristianong kongregasyon. Namomondo kita na an dating mga kaibaiba niato nagbaya ki Jehova, asin odok sa puso an kamawotan niato na padagos na tabangan an lambang “nawarang karnero” na bumalik sa aripompon. (Salmo 119:176; Roma 15:1) Dawa siring, an magkabaliktad na resultang ini—na an nagkapira nagdadanay na maimbod mantang an iba nawawaran nin pagtubod—nagbabangon nin mga hapot. Ano an nagpapangyari sa kadakol na Saksi na mapagdanay an saindang pagtubod sa mga panuga ni Jehova mantang an iba nawawaran kaiyan? Ano an personalmenteng magigibo niato tanganing seguradohon na nagdadanay na marigon an satong kombiksion na “an dakulang aldaw ni Jehova” nagdadangadang na? (Sofonias 1:14) Estudyaran niato an sarong ilustrasyon na manonompongan sa Ebanghelyo ni Lucas.

Sarong Patanid Para sa mga Nabubuhay “Kun Dumatong Na an Aki nin Tawo”

3. Sairisay an espesyalmenteng makikinabang sa ilustrasyon dapit sa babaeng balo asin hokom, asin taano?

³ Sa Lucas kapitulo 18, manonompongan niato an ilustrasyon ni Jesus mapadapit sa sarong babaeng balo asin sarong hokom. Kaagid iyan kan ilustrasyon manongod sa mapamirit na kag-istimar, na tinokar niato sa sinundan na artikulo. (Lucas 11:5-13) Minsan siring, an konteksto kan halipot na kabtang kan Biblia na nagsasaysay kan ilustrasyon dapit sa babaeng balo asin hokom nagpapaheling na espesyalmenteng minaaplikar ini sa mga nabubuhay “kun dumatong na an Aki nin tawo” na may kapangyarihan sa Kahadean, na an peryodo nin panahon kaiyan nagpoon kan 1914.—Lucas 18:8. *

4. Ano an tinokar ni Jesus bago nia isaysay an ilustrasyon na manonompongan sa Lucas kapitulo 18?

⁴ Bago itao an ilustrasyon, sinabi ni Jesus na an ebidensia kan saiyang presensia na may kapangyarihan sa Kahadean magigin risang marhay siring sa “kikilat” na “minaliwanag paghale sa sarong  kabtang sa sirong nin langit sagkod sa saro pang kabtang sa sirong nin langit.” (Lucas 17:24; 21:10, 29-33) Minsan siring, an kadaklan na tawo na nabubuhay sa “panahon kan katapusan” dai magtatao nin atension sa malinaw na ebidensiang iyan. (Daniel 12:4) Taano ta dai? Huli sa iyo man sanang dahelan na an mga tawo kan panahon ni Noe asin ni Lot dai nag-intindi sa mga patanid ni Jehova. Kan mga panahon na idto, an mga tawo ‘nagkakarakan, nag-iirinom, nagbabarakal, nagpapabarakal, nagtataranom, asin nagtotorogdok sagkod sa aldaw na sinda linaglag.’ (Lucas 17:26-29) Nagadan sinda huli ta inubos ninda an saindang panahon sa ordinaryong mga aktibidad na idto kaya dai sinda nakapagtao nin atension sa kabotan nin Dios. (Mateo 24:39) Ngonyan, an mga tawo sa pangkagabsan bangkag man sa pang-aroaldaw na mga aktibidad kaya dai na ninda naheheling an ebidensia na harani na an katapusan kan bakong diosnon na kinaban na ini.—Lucas 17:30.

5. (a) Kiisay ipinanongod ni Jesus an sarong patanid, asin taano? (b) Ano an dahelan na nawara kan nagkapira an saindang pagtubod?

⁵ Malinaw nanggad, nahahadit si Jesus na an saiya man na mga parasunod malingling sa kinaban ni Satanas, sagkod sa punto na tibaad sinda “bumalik sa mga bagay na nawalat.” (Lucas 17:22, 31) Asin, sa katunayan, nangyari ini sa nagkapirang Kristiano. Sa laog nin dakol na taon hinidaw kan mga iyan an aldaw na tataposon ni Jehova an marigsok na kinaban na ini. Minsan siring, kan an Armagedon dai mangyari sa panahon na linalaoman ninda, pinanluyahan sinda nin boot. Luminuya an saindang kompiansa sa kaharanihan kan aldaw nin paghokom ni Jehova. Luminuya sinda sa ministeryo asin luway-luway na napalabot na marhay sa ordinaryong mga aktibidad sa buhay kaya dikit na sanang panahon an natada para sa espirituwal na mga bagay. (Lucas 8:11, 13, 14) Pag-abot nin panahon, sinda ‘nagbalik sa mga bagay na nawalat’—makamomondo nanggad!

An Pangangaipo na “Danay na Mamibi”

6-8. (a) Isaysay an ilustrasyon dapit sa babaeng balo asin hokom. (b) Paano iinaplikar ni Jesus an ilustrasyon na ini?

⁶ Ano an puede niatong gibohon tanganing seguradohon na dai lumuya an satong marigon na kompiansa sa kaotoban kan mga panuga ni Jehova? (Hebreo 3:14) Tinawan ni Jesus nin atension an hapot na iyan pakatapos tolos na patanidan nia an mga disipulo na dai bumalik sa marigsok na kinaban ni Satanas.

⁷ Ibinareta ni Lucas na si Jesus “nagsabi sa sainda nin sarong ilustrasyon mapadapit sa pangangaipo ninda na danay na mamibi asin dai manluya.” Si Jesus nagsabi: “Sa sarong siudad igwa nin sarong hokom na mayong takot sa Dios asin mayong paggalang sa tawo. Alagad ta igwa nin sarong babaeng balo sa siudad na idto asin ini daing ontok sa pagdolok sa saiya, na sinasabi, ‘Siertoha na ako magkamit nin hustisya sa sakong kaasunto.’ Bueno, sa kadikit na panahon habo nia, alagad pagkatapos sinabi nia sa saiyang sadiri, ‘Minsan ngani dai ako natatakot sa Dios o naggagalang sa tawo, ano man an nangyari, huli sa padagos na panriribok sa sako kan balong babaeng ini, sisiertohon ko na sia magkamit nin hustisya, tangani na dai na sia magparadigdi asin pagparapurisawon ako nin biyo.’”

⁸ Pagkatapos na isaysay ini, itinao si Jesus an aplikasyon:  “Dangoga nindo an isinabi kan hokom, minsan ngani bakong matanos! Sierto nanggad, kun siring, dai daw papangyayarihon nin Dios na magibo an hustisya para sa saiyang mga pinili na nag-aagrangay sa saiya aldaw asin banggi, minsan ngani sia matinios sa sainda? Sinasabi ko sa saindo, Saiyang papangyayarihon na marikas na magibo an hustisya sa sainda. Minsan siring, kun dumatong na an Aki nin tawo, talaga daw na makukua nia an pagtubod sa daga?”—Lucas 18:1-8.

“Siertoha na Ako Magkamit nin Hustisya”

9. Anong tema an lataw na marhay sa ilustrasyon dapit sa babaeng balo asin hokom?

⁹ Lataw na marhay an pinakatema kan buhay na marhay na ilustrasyon na ini. Nasambitan iyan kan duwang personahe sa ilustrasyon saka ni Jesus. An babaeng balo nakimaherak: “Siertoha na ako magkamit nin hustisya.” An hokom nagsabi: “Sisiertohon ko na sia magkamit nin hustisya.” Si Jesus naghapot: “Dai daw papangyayarihon nin Dios na magibo an hustisya?” Asin manongod ki Jehova, sinabi ni Jesus: “Saiyang papangyayarihon na marikas na magibo an hustisya sa sainda.” (Lucas 18:3, 5, 7, 8) Noarin partikularmenteng ‘papangyayarihon nin Dios na magibo an hustisya’?

10. (a) Kasuarin itinao an maninigong hustisya kan enot na siglo? (b) Noarin asin paano gigibohon an hustisya para sa mga lingkod nin Dios ngonyan?

¹⁰ Kan enot na siglo, an “mga aldaw nin pagtao nin maninigong hustisya” (o, “mga aldaw nin pamamalos,” Kingdom Interlinear) nag-abot kan 70 C.E. kan laglagon an Jerusalem asin an templo kaiyan. (Lucas 21:22) Para sa banwaan nin Dios ngonyan, an hustisya gigibohon sa “dakulang aldaw ni Jehova.” (Sofonias 1:14; Mateo 24:21) Sa panahon na iyan, ‘babalosan ni Jehova nin kahorasaan an mga nagtatao nin kahorasaan’ sa saiyang banwaan ‘kun paano na si Jesu-Cristo mamamalos sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.’—2 Tesalonica 1:6-8; Roma 12:19.

11. Sa anong paagi na maabot nin “marikas” an hustisya?

¹¹ Pero, paano niato maninigong saboton an pag-asegurar ni Jesus na “marikas” na papangyayarihon ni Jehova na magibo an hustisya? Ipinapaheling kan Tataramon nin Dios na ‘minsan ngani matinios si Jehova,’ gigibohon nia tolos an hustisya kun nasa tama nang panahon. (Lucas 18:7, 8; 2 Pedro 3:9, 10) Kan panahon ni Noe, kan umabot an Baha, an mga marigsok nalaglag tolos-tolos. Siring man, kan panahon ni Lot, kan mag-oran nin kalayo hale sa langit, nalaglag an mga marigsok. Si Jesus nagsabi: “Siring man an mangyayari sa aldaw na iyan na ihahayag an Aki nin tawo.” (Lucas 17:27-30) Sa giraray, an mga marigsok maagi nin “biglang pagkalaglag.” (1 Tesalonica 5:2, 3) Tunay nanggad, lubos kitang makakapagkompiar na dai totogotan ni Jehova an kinaban ni Satanas na maglawig pa nin sarong aldaw sa hinahagad kan hustisya.

‘Saiyang Papangyayarihon na Magibo an Hustisya’

12, 13. (a) Paano nagtotokdo nin leksion an ilustrasyon ni Jesus dapit sa babaeng balo asin hokom? (b) Taano ta makakasierto kita na dadangogon ni Jehova an satong mga pamibi asin papangyayarihon na magibo an hustisya?

¹² An ilustrasyon ni Jesus dapit sa babaeng balo asin hokom nagtatampok nin iba pang importanteng mga katotoohan. Sa pag-aplikar kan ilustrasyon, si Jesus nagsabi: “Dangoga nindo an isinabi kan hokom, minsan ngani bakong matanos! Sierto nanggad, kun siring, dai daw papangyayarihon nin Dios na magibo an hustisya para sa saiyang mga pinili?” Siempre, dai ikinokomparar ni Jesus si Jehova sa hokom na garo baga sinasabi na siring man kaiyan an magigin pagtratar nin Dios sa mga may pagtubod. Imbes, tinokdoan ni Jesus an saiyang mga parasunod nin sarong leksion manongod ki Jehova paagi sa pagtampok sa pagkakalaen kan hokom na iyan asin nin Dios. Ano an nagkapirang paagi na sinda magkalaen?

¹³ An hokom sa ilustrasyon ni Jesus “bakong matanos,” mantang “an Dios sarong matanos na Hokom.” (Salmo 7:11; 33:5) An hokom mayo man lamang nin interes sa babaeng balo bilang sarong tawo, alagad si Jehova interesado sa lambang indibiduwal. (2 Cronica 6:29, 30) An hokom habong tabangan an babaeng balo, alagad si Jehova gusto—iyo, galaga—na tabangan an mga naglilingkod sa Saiya. (Isaias 30:18, 19) Ano an leksion? Kun an bakong matanos na hokom naghinanyog sa mga kahagadan kan babaeng balo asin tinawan ini nin hustisya, gurano pa daw na dai dadangogon ni  Jehova an mga pamibi kan saiyang banwaan asin papangyayarihon nanggad na magibo an hustisya para sa sainda!—Talinhaga 15:29.

14. Taano ta dai kita maninigong mawaran nin pagtubod sa pag-abot kan aldaw nin paghokom nin Dios?

¹⁴ Kun siring, an mga nawawaran nin pagtubod sa pag-abot kan aldaw nin paghokom nin Dios nakakakomiter nin magabat na sala. Taano? Paagi sa pagbaya sa saindang marigon na pagtubod na harani na “an dakulang aldaw ni Jehova,” garo man sana kinukuestion ninda kun baga mapagtitiwalaan si Jehova na maimbod niang ootobon an saiyang mga panuga. Alagad mayo nin siisay man na puedeng may katanosan na magkuestion sa kaimbodan nin Dios. (Job 9:12) An balidong hapot iyo an, Kita daw personalmenteng magdadanay na maimbod? Asin iyan an mismong ibinangon ni Jesus sa pagtatapos kan ilustrasyon manongod sa babaeng balo asin hokom.

“Talaga daw na Makukua Nia an Pagtubod na Ini sa Daga?”

15. (a) Anong hapot an iinatubang ni Jesus, asin taano? (b) Ano an maninigo niatong ihapot sa satong sadiri?

¹⁵ Iinatubang ni Jesus an nakakapukaw nin interes na hapot: “Kun dumatong na an Aki nin tawo, talaga daw na makukua nia an pagtubod na ini sa daga?” (Lucas 18:8, nota sa ibaba) An pananaram na “an pagtubod na ini” nagpaparisa na an boot sabihon ni Jesus, bakong pagtubod sa pangkagabsan, kundi sarong partikular na klase nin pagtubod—pagtubod na kapareho kan sa babaeng balo. Dai sinimbag ni Jesus an saiyang hapot. Ibinangon nia iyan tanganing an saiyang mga disipulo mag-isip manongod sa kualidad kan sainda mismong pagtubod. Iyan daw luway-luway na nagluluya, kaya namemeligro na sindang bumalik sa mga bagay na nawalat ninda? O igwa daw sinda kan klase nin pagtubod na arog kan ipinaheling kan babaeng balo? Ngonyan, maninigo man niatong hapoton an satong sadiri, ‘Anong klaseng pagtubod an naheheling kan “Aki nin tawo” sa sakong puso?’

16. Anong klaseng pagtubod igwa an babaeng balo?

¹⁶ Tangani kitang mapabilang sa mga maako kan hustisya ni Jehova, kaipuhan na arogon niato an ginibo kan babaeng balong idto. Anong klaseng pagtubod igwa sia? Ipinaheling nia an saiyang pagtubod paagi sa may pamimirit na “pagdolok sa [hokom], na sinasabi, ‘Siertoha na ako magkamit nin hustisya.’” An babaeng balong iyan nagpumirit tanganing umako nin hustisya sa sarong bakong matanos na tawo. Kaagid kaiyan, an mga lingkod nin Dios ngonyan makakapagkompiar na aakoon ninda an hustisya ni Jehova—dawa kun mas maghaloy iyan kisa linalaoman ninda. Dugang pa, ipinapaheling ninda an saindang kompiansa sa mga panuga nin Dios paagi sa mapamirit na mga pamibi—iyo, ‘paagi sa pag-agrangay ki Jehova aldaw asin banggi.’ (Lucas 18:7) Sa katunayan, kun an sarong Kristiano mapondo sa pagpamibi na logod magibo an hustisya, ipapaheling nia na nawaran na sia nin kompiansa na si Jehova mahiro para sa saiyang mga lingkod.

17. Ano an mga dahelan niato na magmaigot sa pamimibi asin papagdanayon an satong pagtubod sa seguradong pag-abot kan aldaw nin paghokom ni Jehova?

¹⁷ Ipinapaheling sa sato kan partikular na mga kamugtakan kan babaeng balong iyan na igwa kita nin dugang pang mga dahelan na magmaigot sa pamimibi. Estudyare an nagkapirang kalaenan kan saiyang kamugtakan asin kan sa sato. An babaeng balo daing ontok sa pagdolok sa hokom dawa ngani mayo nin siisay man na nag-eenkaminar sa saiya na gibohon iyan, alagad an Tataramon nin Dios nagtatao sa sato nin dakol na pag-enkaminar na kita ‘magmaigot sa pamimibi.’ (Roma 12:12) An babaeng balo mayo nin pag-asegurar na itatao an saiyang mga kahagadan, alagad inaasegurar kita ni Jehova na magigibo an hustisya. Paagi sa saiyang propeta, si Jehova nagsabi: “Dawa pa iyan maatraso, padagos iyan na halaton; huli ta iyan daing salto na maootob. Dai iyan mahuhuri.” (Habacuc 2:3;  Salmo 97:10) An babaeng balo mayo nin paratabang na makikimaherak para sa saiya tanganing magin mas mapuersa an saiyang kahagadan. Alagad igwa kita nin makapangyarihan na paratabang, si Jesus, “na yaon sa too nin Dios, na nakikimaherak man para sa sato.” (Roma 8:34; Hebreo 7:25) Huli kaini, kun an babaeng balo, sa ibong kan saiyang depisil na situwasyon, daing ontok na nakimaherak sa hokom sa paglaom na magigibo an hustisya, gurano pa daw na dai niato papagdanayon an satong pagtubod sa seguradong pag-abot kan aldaw nin paghokom ni Jehova!

18. Paano an pamibi mapakosog sa satong pagtubod asin matabang sa sato na akoon an hustisya?

¹⁸ An ilustrasyon dapit sa babaeng balo nagtotokdo sa sato na magkakonektadong marhay an pamibi asin an pagtubod asin na an satong mapamirit na mga pamibi puedeng makaolang sa mga impluwensia na puedeng magpaluya sa satong pagtubod. Siempre, dai ini nangangahulogan na an paheling sanang pamimibi sarong solusyon sa pagkawara nin pagtubod. (Mateo 6:7, 8) Kun kita napapahiro na mamibi huling narerealisar niato na lubos kitang nagsasarig sa Dios, sa siring an pamibi nagrarani sato sa Dios asin nagpapakosog sa satong pagtubod. Asin mantang an pagtubod kahagadan para sa kaligtasan, bakong makangangalas na naheling ni Jesus an pangangaipo na parigonon an boot kan saiyang mga disipulo na “danay na mamibi asin dai manluya”! (Lucas 18:1; 2 Tesalonica 3:13) Totoo, an pag-abot kan “dakulang aldaw ni Jehova” dai nakadepende sa satong mga pamibi—iyan maabot ipamibi man niato iyan o dai. Alagad kun baga kita personalmenteng maako nin hustisya asin makakaligtas sa ralaban nin Dios o dai nakadepende nanggad sa satong pagtubod asin sa padagos niatong pagigin mapagngayongayo.

19. Paano niato pinapatunayan na marigon kitang nagtutubod na “papangyayarihon nin Dios na magibo an hustisya”?

¹⁹ Siring kan magigirumdoman niato, si Jesus naghapot: “Kun dumatong na an Aki nin tawo, talaga daw na makukua nia an pagtubod na ini sa daga?” Ano an simbag sa nakakapukaw nin interes na hapot nia? Abaang ogma niato na paagi sa saindang mga pamibi, pagpapasensia, asin pagmamaigot, minilyon na maimbod na lingkod ni Jehova sa bilog na daga ngonyan an nagpapatunay na igwa nanggad sinda kan pagtubod na ini! Sa siring, masisimbag nin iyo an hapot ni Jesus. Iyo, sa ibong kan mga inhustisya na ipinapamate sa sato ngonyan kan kinaban ni Satanas, marigon kitang nagtutubod na “papangyayarihon nin Dios na magibo an hustisya para sa saiyang mga pinili.”

[Nota sa Ibaba]

Nagigirumdoman daw Nindo?

• Ano an dahelan na an nagkapirang Kristiano nawaran nin pagtubod?

• Taano ta puede kitang magkaigwa nin marigon na pagtubod sa pag-abot kan aldaw nin paghokom ni Jehova?

• Ano an mga dahelan niato na magmaigot sa pamimibi?

• Paano makakatabang sa sato an mapamirit na pamibi na dai niato mawara an satong pagtubod?

[Mga Hapot Para sa Pag-adal]

[Ritrato sa pahina 26]

Ano an itinatampok kan ilustrasyon dapit sa babaeng balo asin hokom?

[Mga Ritrato sa pahina 29]

Minilyon ngonyan an marigon na nagtutubod na “papangyayarihon nin Dios na magibo an hustisya”