An “Enot na Pagkabuhay Liwat”​—Nangyayari Na Ngonyan!

“An mga nagadan na kasaro ni Cristo enot na maburuhat.”—1 TESALONICA 4:16.

1, 2. (a) Ano an paglaom para sa mga nagadan? (b) Ano an basehan kan saindong pagtubod sa pagkabuhay liwat? (Helingon an nota sa ibaba.)

“AN MGA buhay nakakaaram na sinda magagadan.” Poon pa kan magkasala si Adan, nagin totoo na iyan. Sa bilog na kasaysayan, naaaraman kan lambang namundag na sia magagadan sa kahurihurihi, asin dakol an nag-iisip-isip: ‘Ano an masunod? Ano an kamugtakan kan mga gadan?’ An Biblia nagsisimbag: “Kun dapit sa mga gadan, mayo man lamang sinda nin pakaaram.”—Eclesiastes 9:5.

² Kun siring, igwa daw nin ano man na paglaom para sa mga nagadan? Igwa. Sa katunayan, kaipuhan na may paglaom para sa mga gadan tangani na maotob an orihinal na katuyohan nin Dios para sa katawohan. Sa nag-aging mga siglo, an maimbod na mga lingkod nin Dios nagtutubod sa panuga ni Jehova manongod sa Banhi na iyo an malaglag ki Satanas asin mahale kan danyos na ginibo kaini.  (Genesis 3:15) An kadaklan sa sainda nagadan na. Tangani na maheling ninda an kaotoban kan panugang iyan asin kan iba pang ipinanuga ni Jehova, kaipuhan sindang buhayon hale sa mga gadan. (Hebreo 11:13) Posible daw an siring na bagay? Iyo nanggad. Si apostol Pablo nagsabi: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Binuhay liwat kaidto ni Pablo an sarong hoben na lalaki na an ngaran Eutico, na nahulog hale sa bintana kan ikatolong eskalon asin “gadan na kan buhaton.” Ini an ultimo sa siyam na pagkabuhay liwat na nakasurat sa Biblia.—Gibo 20:7-12. *

3. Anong karangahan an personalmenteng nakua nindo sa mga tataramon ni Jesus na nakasurat sa Juan 5:28, 29, asin taano?

³ An siyam na pagkabuhay liwat na idto nagtatao nin basehan tanganing magtubod sa mga tataramon ni Pablo. Nagpapakosog iyan kan satong kompiansa sa pag-asegurar ni Jesus: ‘An oras maabot na an gabos na nasa mga lolobngan na girumdoman makakadangog kan tingog ni Jesus asin maruluwas.’ (Juan 5:28, 29) Nakakaogma nanggad na mga tataramon! Asin nakakaranga nanggad para sa minilyon na an mga namomotan natorog na sa kagadanan!

4, 5. Anong laen-laen na pagkabuhay liwat an nasasambitan sa Biblia, asin arin an totokaron sa artikulong ini?

⁴ An mayoriya kan mga bubuhayon liwat mabubuhay giraray sa sarong daga na ginibong matoninong sakop kan Kahadean nin Dios. (Salmo 37:10, 11, 29; Isaias 11:6-9; 35:5, 6; 65:21-23) Minsan siring, may mangyayaring iba pang mga pagkabuhay liwat bago kaiyan. Enot, si Jesu-Cristo kaipuhan na buhayon liwat tanganing ipresentar sa Dios an halaga kan saiyang atang para sa sato. Si Jesus nagadan asin binuhay liwat kan 33 C.E.

⁵ Sunod, an linahidan na mga miembro kan “Israel nin Dios” kaipuhan na makiayon sa Kagurangnan na Jesu-Cristo sa langitnon na kamurawayan, na duman sinda “danay na makakaibanan kan Kagurangnan.” (Galacia 6:16; 1 Tesalonica 4:17) An pangyayaring iyan inaapod na “mas amay na pagkabuhay liwat” o “enot na pagkabuhay liwat.” (Filipos 3:10, 11; Kapahayagan 20:6) Kun an pagkabuhay liwat na iyan matapos  na, iyan na an panahon para sa minilyon tanganing buhayon liwat digdi sa daga na may esperansang magkamit nin buhay na daing katapusan sa Paraiso. Huli kaini, baga man an satong paglaom langitnon o daganon, igwa kita nin makosog na interes sa “enot na pagkabuhay liwat.” Anong klaseng pagkabuhay liwat iyan? Noarin daw iyan nangyayari?

“Sa Anong Klaseng Hawak?”

6, 7. (a) Bago makaduman sa langit an linahidan na mga Kristiano, ano an dapat na mangyari? (b) Sa anong klaseng hawak sinda bubuhayon liwat?

⁶ Sa saiyang enot na surat sa mga taga Corinto, nagbangon si Pablo nin sarong hapot manongod sa enot na pagkabuhay liwat: “Paano bubuhayon liwat an mga gadan? Iyo, sa anong klaseng hawak sinda matunga?” Dangan sinimbag nia an hapot: “An saimong isinasabwag dai binubuhay sagkod na dai nguna iyan magadan . . . alagad iyan tinatawan nin Dios nin hawak siring sa naooyonan nia . . . An kamurawayan kan langitnon na mga hawak sarong klase, asin an sa daganon na mga hawak laen man na klase.”—1 Corinto 15:35-40.

⁷ Ipinapaheling kan mga tataramon ni Pablo na an mga Kristiano na linahidan nin banal na espiritu dapat na magadan bago ninda akoon an saindang langitnon na balos. Sa pagkagadan ninda, an saindang daganon na hawak minabalik sa kabokabo. (Genesis 3:19) Sa itinalaan na panahon nin Dios, binubuhay liwat sinda na may klase nin hawak na angay para sa buhay sa kalangitan. (1 Juan 3:2) Tinatawan man sinda nin Dios nin inmortalidad. Bako iyan na bagay na nasa sainda na poon sa pagkamundag, na garo baga hinangosan sinda nin inmortal daang kalag. “Ining mortal kaipuhan na magsulot nin inmortalidad,” an sabi ni Pablo. An inmortalidad balaog hale sa Dios, na ‘isinusulot’ kan mga may kabtang sa enot na pagkabuhay liwat.—1 Corinto 15:50, 53; Genesis 2:7; 2 Corinto 5:1, 2, 8.

8. Paano niato naaaraman na dai pinipili nin Dios an 144,000 hale sa mga miembro nin laen-laen na relihion?

⁸ An 144,000 sana an may kabtang sa enot na pagkabuhay liwat. Pinonan sindang pilion ni Jehova kan Pentecostes 33 C.E., dai nahaloy pakatapos na buhayon nia liwat si Jesus. Gabos sinda igwa ‘sa saindang angog nin nakasurat na ngaran ni Jesus asin ngaran kan saiyang Ama.’ (Kapahayagan 14:1, 3) Huli kaini, dai sinda pinipili hale sa dakol na laen-laen na relihion. Gabos parasunod ni Cristo, asin gabos may pag-orgolyong nagdadara kan ngaran kan Ama—si Jehova. Pagbinuhay sinda liwat, nag-aako sinda nin asignasyon na trabaho sa kalangitan. Talagang nakakapukaw sa boot ninda an oportunidad na paglingkodan an Dios sa siring na direktang paagi.

Nangyayari Na Ngonyan?

9. Paano kita tinatabangan kan Kapahayagan 12:7 asin 17:14 na makalkulo kun noarin an pagpoon kan enot na pagkabuhay liwat?

⁹ Noarin nangyayari an enot na pagkabuhay liwat? May makosog na ebidensia na nangyayari na iyan ngonyan. Halimbawa, pagkompararon nindo an duwang kapitulo kan Kapahayagan. Enot, helinga an Kapahayagan kapitulo 12. Dian mababasa niato na an bago pa sanang patukawon sa trono na si Jesu-Cristo, kaiba an saiyang banal na mga anghel, nakipaglaban ki Satanas asin sa saiyang mga demonyo. (Kapahayagan 12:7-9) Arog kan parateng sinasabi kan magasin na ini, an ralaban na iyan nagpoon kan 1914. * Pero, mangnohon na mayo sa linahidan na mga parasunod ni Cristo an sinasabing kaiba ni Jesus sa langitnon na guerrang iyan. Ngonyan helinga an kapitulo 17 kan Kapahayagan. Mababasa niato dian na pakalaglaga sa “Dakulang Babilonya,” dadaogon kan Kordero an mga nasyon. Dangan sinasabi pa kaiyan: “Siring man, idtong mga inapod asin pinili patin maimbod kaiba nia mandadaog man.” (Kapahayagan 17:5, 14) An mga “inapod asin pinili patin maimbod” kaipuhan na binuhay na liwat tangani na makaibanan sinda ni Jesus para sa pangultimong pagdaog sa kinaban ni Satanas. Kun siring, rasonable nanggad na an mga linahidan na nagadan bago kan Armagedon buhayon liwat ano man na panahon sa pag-oltanan kan 1914 asin Armagedon.

10, 11. (a) Sairisay an 24 kamagurangan, asin ano an ihinayag ki Juan kan saro sa sainda? (b) Ano an puedeng ikonklusyon niato basado digdi?

¹⁰ Masasabi daw niato nin mas eksakto kun noarin an pagpoon kan enot na pagkabuhay liwat? Manonompongan an sarong interesanteng giya sa  Kapahayagan 7:9-15, na dian ilinaladawan ni apostol Juan an saiyang bisyon manongod sa “sarong dakulang kadaklan, na dai nin siisay man na makakabilang.” Saro sa 24 kamagurangan an naghayag ki Juan kun sairisay an dakulang kadaklan na iyan, asin an kamagurangan na ini nagrerepresentar sa 144,000 na kaibang mga paramana ni Cristo sa saindang langitnon na kamurawayan. * (Lucas 22:28-30; Kapahayagan 4:4) Si Juan mismo igwa nin langitnon na paglaom; alagad huling saro pa siang tawo digdi sa daga kan magtaram sa saiya an magurang, sa bisyon si Juan siertong nagrerepresentar sa mga linahidan digdi sa daga na dai pa nag-aako kan saindang langitnon na balos.

¹¹ Kun siring, ano an puede niatong ikonklusyon basado sa bagay na saro sa 24 kamagurangan an nagsabi ki Juan kun sairisay an dakulang kadaklan? Minalataw na an mga binuhay liwat sa grupo kan 24 kamagurangan puedeng kalabot sa pagkomunikar kan mga katotoohan nin Dios ngonyan. Taano ta importante iyan? Huli ta an tamang pakamidbid sa dakulang kadaklan ihinayag sa linahidan na mga lingkod ni Dios digdi sa daga kan 1935. Kun saro sa 24 kamagurangan an ginamit sa pagpaabot kan mahalagang katotoohan na iyan, kaipuhan na sia binuhay na liwat sa langit kan 1935 kun bakong bago pa kaiyan. Ipinaparisa kaiyan na an enot na pagkabuhay liwat nagpoon kaidtong pag-oltanan kan 1914 asin 1935. Puede daw kitang magin mas eksakto pa?

12. Ipaliwanag kun taano an tigsoli nin 1918 ta puedeng mansayon bilang posibleng panahon kan pagpoon kan enot na pagkabuhay liwat.

¹² Sa puntong ini, tibaad makatabang an pag-estudyar sa puedeng sabihon na pagkakaagid sa Biblia. Si Jesu-Cristo linahidan bilang an magigin Hade sa Kahadean nin Dios kan tigrakdag nin 29 C.E. Pakalihis nin tolo may kabangang taon, kan tigsoli nin 33 C.E., binuhay sia liwat bilang sarong makakamhan na espiritung persona. Kun siring, puede daw na ipangatanosan na huling si Jesus pinatukaw sa trono kan tigrakdag nin 1914, an pagkabuhay liwat kan saiyang maimbod na linahidan na mga parasunod nagpoon pakalihis nin tolo may kabangang taon, kan tigsoli nin 1918? Iyan sarong interesanteng posibilidad. Minsan ngani dai ini direktang makokompirmar sa Biblia, iyan bako man na sarongat sa iba pang mga teksto na nagpaparisa na an enot na pagkabuhay liwat nangyari dai nahaloy pagkapoon kan presensia ni Cristo.

13. Sa anong paagi na an 1 Tesalonica 4:15-17 nagsusuherir na an enot na pagkabuhay liwat nagpoon sa kapinonan kan presensia ni Cristo?

¹³ Halimbawa, si Pablo nagsurat: “Kita na nabubuhay sagkod sa presensia kan Kagurangnan [bakong sagkod sa katapusan kan saiyang presensia] dai sa ano man na paagi maeenot sa mga natorog sa kagadanan; huli ta an Kagurangnan mismo mahilig hale sa langit na may tingog na nagboboot, may tingog nin arkanghel asin may trumpeta nin Dios, asin an mga nagadan na kasaro ni Cristo enot na maburuhat. Pagkatapos kita na buhay pa na nawawalat, kaibanan ninda, aagawon sa mga panganoron tanganing sabaton an Kagurangnan sa aire; asin sa siring na paagi kita danay na makakaibanan kan Kagurangnan.” (1 Tesalonica 4:15-17) Kun siring, an linahidan na mga Kristiano na nagadan bago kan presensia ni Cristo mas enot na binuhay liwat sa langitnon na buhay kisa sa mga nabubuhay pa sa panahon kan presensia ni Cristo. Nangangahulogan ini na an enot na pagkabuhay liwat siertong nagpoon sa kapinonan kan presensia ni Cristo, asin nagpapadagos iyan “sa panahon kan saiyang presensia.” (1 Corinto 15:23) Imbes na mangyari nin sarabay, an enot na pagkabuhay liwat nangyayari sa laog nin sarong peryodo nin panahon.

“Sarong Halabang Gubing na Puti an Itinao sa Lambang Saro sa Sainda”

14. (a) Noarin an kaotoban kan mga bisyon na nakasurat sa Kapahayagan kapitulo 6? (b) Ano an ilinaladawan sa Kapahayagan 6:9?

¹⁴ Estudyare man an ebidensia na yaon sa Kapahayagan kapitulo 6. Maheheling dian si Jesus na nangangabayo bilang nandadaog na Hade. (Kapahayagan 6:2) Kalabot an mga nasyon sa dakulaon na ralaban. (Kapahayagan 6:4) Igwa nin lakop na tiggutom. (Kapahayagan 6:5, 6) An nakakagadan na mga damat nagtataong danyos sa katawohan. (Kapahayagan 6:8) An gabos na pangyayaring ini na sinabi sa propesiya malinaw na kaoyon kan mga kamugtakan sa kinaban poon kan 1914. Alagad may saro pang pangyayari. Dinadara an satong atension  sa sarong altar nin atang. Yaon sa pamitisan kaiyan “an kalag kan mga ginadan huli sa tataramon nin Dios asin huli sa gibong pagpapatotoo ninda kaidto.” (Kapahayagan 6:9) Huling “an kalag [o, buhay] kan laman yaon sa dugo,” an talagang irinerepresentar kan nasa pamitisan kan altar iyo an dugo kan maimbod na mga lingkod ni Jesus na ginaradan huli sa saindang pusoan asin maigot na paghuhulit.—Levitico 17:11.

15, 16. Ipaliwanag kun taano ta an mga tataramon sa Kapahayagan 6:10, 11 nanonongod sa enot na pagkabuhay liwat.

¹⁵ Kapareho kan dugo kan matanos na si Abel, an dugo kan mga Kristianong martir na ini nagkukurahaw para sa hustisya. (Genesis 4:10) “Sinda nagkururahaw sa makosog na tingog, na sinasabi: ‘Sagkod noarin, Soberanong Kagurangnan na banal asin totoo, na dai ka maghohokom asin dai mo ipapamalos an samong dugo sa mga nag-eerok sa daga?’” Ano an sunod na pangyayari? “Sarong halabang gubing na puti an itinao sa lambang saro sa sainda; asin sinabihan sinda na magpahingalo pa nin kadikit na panahon, sagkod na makompleto man an kabilangan kan saindang mga kapwa oripon asin kan saindang mga tugang na madali nang gadanon siring man sa sainda.”—Kapahayagan 6:10, 11.

¹⁶ An haralabang gubing na puti daw na ini itinao sa dakol na dugo na nasa pamitisan nin sarong altar? Siempre dai! An haralabang gubing itinao sa mga indibiduwal na an dugo garo man sana pinabolos sa altar. Isinakripisyo ninda an saindang buhay sa ngaran ni Jesus asin sinda ngonyan binuhay na liwat bilang mga espiritu. Paano niato naaaraman iyan? Sa enotan kan libro nin Kapahayagan, mababasa niato: “An makadaog gugubingan sa siring na paagi nin puting pan-ibabaw na mga gubing; asin dai ko nanggad paparaon an saiyang ngaran sa libro nin buhay.” Girumdomon man na an 24 kamagurangan “may sulot na puting pan-ibabaw na mga gubing, asin sa saindang payo may mga koronang bulawan.” (Kapahayagan 3:5; 4:4) Kaya pagkatapos na an guerra, tiggutom, asin peste magpoon na mandestroso sa daga, an mga miembro kan 144,000 na garadan na, na irinerepresentar kan dugo na nasa pamitisan kan altar, binuhay na liwat sa langitnon na buhay asin nakasulot na nin simbolikong halabang gubing na puti.

17. Sa anong sentido kaipuhan na “magpahingalo” an mga nag-ako kan haralabang gubing na puti?

¹⁷ An mga bagong buhayon liwat kaipuhan na “magpahingalo.” Kaipuhan na mapasensia nindang halaton an aldaw nin pamamalos nin Dios. Kaipuhan pang patunayan kan saindang “mga kapwa oripon,” an linahidan na mga Kristiano na nasa daga pa, an saindang integridad sa irarom nin pagbalo. Kun mag-abot na an panahon para sa paghokom nin Dios, an ‘pagpahingalo’ matatapos na. (Kapahayagan 7:3) Sa panahon na iyan, an mga binuhay liwat makikikabtang sa Kagurangnan na Jesu-Cristo sa paglaglag sa mga marigsok, kaiba an mga nagpabolos kan dugo nin inosenteng mga Kristiano.—2 Tesalonica 1:7-10.

 Kun Ano an Kahulogan Kaiyan Para sa Sato

18, 19. (a) Sa anong mga dahelan na makakakonklusyon kamo na nangyayari na ngonyan an enot na pagkabuhay liwat? (b) Ano an namamatean nindo huli sa saindong pakasabot sa enot na pagkabuhay liwat?

¹⁸ Dai ihinahayag kan Tataramon nin Dios an eksaktong petsa para sa enot na pagkabuhay liwat, alagad talagang ihinahayag kaiyan na nangyayari iyan sa laog nin sarong peryodo nin panahon, durante kan presensia ni Cristo. An enot na bubuhayon liwat iyo an linahidan na mga Kristiano na nagadan bago magpoon an presensia ni Cristo. Mantang nagpapadagos an presensia ni Cristo, an linahidan na mga Kristiano na maimbod na nakatapos kan saindang daganon na buhay naliliwat “sa sarong pagpirok nin mata” asin nagigin makapangyarihan na espiritung mga linalang. (1 Corinto 15:52) An gabos daw na linahidan mag-aako kan saindang langitnon na balos bago kan guerra sa Armagedon? Dai niato aram. Minsan siring, naaaraman nanggad niato na sa itinalaan na panahon nin Dios, an gabos kan 144,000 maheheling na nagtitindog sa langitnon na Bukid nin Sion.

¹⁹ Naaaraman man niato na an mayoriya kan 144,000 kasaro na ni Cristo. Nagkapira na sana an yaon pa sa daga. Kanigoan kamapuersang indikasyon na an panahon para sa paghokom nin Dios marikas nang nagdadangadang! Dai na mahahaloy, an bilog na sistema nin kinaban ni Satanas lalaglagon. Si Satanas mismo ihuhulog sa bungaw. Dangan, puede nang pumoon an pangkagabsan na pagbuhay liwat, asin basado sa atang na pantubos ni Jesus, an maimbod na mga tawo puede nang darahon sa pagkasangkap na kapareho kan nawara ni Adan. An propesiya ni Jehova na nakasurat sa Genesis 3:15 makangangalas nang maootob. Kanigoan kadakulang pribilehio na mabuhay sa mga panahon na ini!

[Mga Nota sa Ibaba]

Ikakapaliwanag daw Nindo?

Paano nakakatabang sa sato an minasunod na mga teksto na mabatid kun noarin an “enot na pagkabuhay liwat”?

• Kapahayagan 12:7; 17:14

• Kapahayagan 7:13, 14

• 1 Corinto 15:23; 1 Tesalonica 4:15-17

• Kapahayagan 6:2, 9-11

[Mga Hapot Para sa Pag-adal]

[Mga Ritrato sa pahina 26]

Anong mga pagkabuhay liwat an mangyayari bago buhayon liwat hale sa mga gadan an katawohan sa pangkagabsan?

[Ritrato sa pahina 29]

Sa anong paagi na tinawan nin halabang gubing na puti an mga natotorog sa kagadanan?