An mga Naggradwar sa Gilead Nag-ako nin Pagtotokdo na Nakakataros sa Puso

KAN Setyembre 9, 2006, an gradwasyon kan ika-121 klase kan Paadalan sa Biblia kan Watchtower sa Gilead ginibo sa Sentro nin Edukasyon kan Watchtower sa Patterson, Nueva York. Saro idtong nakakaogmang programa.

Si Geoffrey Jackson, miembro kan Namamahalang Grupo kan Mga Saksi ni Jehova, an nagbukas kan programa paagi sa maogmang pag-ako sa 56 na naggradwar asin sa 6,366 na nagdadangog hale sa laen-laen na nasyon. Tinokar nia an Salmo 86:11, na nagsasabi: “Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang saro an sakong puso na matakot sa saimong ngaran.” Sinabi ni Tugang na Jackson an tolong bagay na idinodoon sa bersikulong iyan. Sia nagsabi: “Sa enot na sentence, iyan pagtotokdo; sa ikaduwang sentence, pag-aplikar; asin sa ikatolo, motibasyon. An tolong bagay na ini nangorognang importante sa saindo mga misyonero sa pagduman nindo sa saindong destino.” Dangan iinintrodusir nia an sunod-sunod na pahayag asin interbio na nagdodoon kan tolong bagay na ini.

Nakakaogmang mga Tataramon nin Pagtotokdo

Si William Malenfant, miembro kan mga tawohan sa opisina prinsipal, tinokar an temang “An Pinakamarahay na Buhay na Posible.” Dinara nia an atension sa halimbawa ni Maria, an tugang ni Marta. Sa sarong pangyayari kan magbisita si Jesus sa saindang harong, pinili ni Maria na tumukaw sa pamitisan ni Jesus tanganing maghinanyog sa saiya, na ibinibilang niang prioridad iyan. Sinabihan ni Jesus si Marta: “Pinili ni Maria an marahay na kabtang, asin iyan dai hahaleon sa saiya.” (Lucas 10:38-42) “Isip-isipa nanggad nindo iyan,” an sabi kan ispiker. “Sa bilog na panahon na daing sagkod magigirumdoman ni Maria na nagtukaw sia sa pamitisan ni Jesus asin naghinanyog na solo sana sia sa marahayon na espirituwal na mga katotoohan—dahel sana ta naggibo sia nin marahay na pagpili.” Pagkatapos na komendaran an mga naggradwar huli sa saindang marahay na espirituwal na mga pagpili, sia nagsabi: “An saindong mga pagpili nagdara sa saindo sa pinakamarahay na buhay na posible.”

Sunod ipinaliwanag ni Anthony Morris, miembro kan Namamahalang Grupo, an temang “Isulog Nindo an Kagurangnan na si Jesu-Cristo,” na basado sa Roma 13:14. Paano niato magigibo ini? Itinokdo ni Tugang na Morris an nota sa ibaba kan bersikulong ini sa Reference Bible, na nagsasabi: “Arogon an ugale kan Kagurangnan.” Kaya nangangahulogan ini nin pag-arog sa halimbawa asin ugale ni Jesus. “Ginibo ni Jesus na pamugtak an boot kan mga indibiduwal,” an sabi kan ispiker, “huling may sinserong interes sia sa sainda, asin namamatean ninda iyan. Dangan ipinaliwanag kan ispiker kun paano an mga estudyante nagkaigwa nin dakol na kaaraman sa saindang mga kurso sa Gilead ‘tanganing masabotan kan isip an lakbang asin laba asin langkaw patin rarom’ kan katotoohan, arog kan sinasabi sa Efeso 3:18. Alagad ipinagirumdom nia sa sainda an bersikulo 19, na padagos na nagsasabi: “Asin maaraman an pagkamoot kan Cristo na minalampas sa kaaraman.” Sinadol ni Tugang na Morris an mga estudyante: “Mantang ipinagpapadagos nindo an personal na pag-adal nindo, horophoropon kun  paano nindo maaarog an mamomoton na pagmakolog ni Cristo asin talagang ‘ikakasulog an Kagurangnan na si Jesu-Cristo.’”

Panhuring Hatol Hale sa mga Instruktor sa Gilead

An sunod na pahayag itinao kan instruktor sa Gilead na si Wallace Liverance, na an tema ibinasar sa Talinhaga 4:7. Sinabi nia na mantang an diosnon na kadonongan iyo an pinakamahalaga, dapat man na ‘magkamit kita nin pakasabot,’ na kalabot an pagsaralak nin iba-ibang impormasyon dangan hineheling kun paano magkakakonektar an mga iyan tanganing masabotan an kahulogan nin sarong bagay. Ipinaheling kan ispiker na an pagkamit nin pakasabot nagbubunga nin kagayagayahan. Halimbawa, kan panahon ni Nehemias, an mga Levita “nagpapaliwanag kan ley” asin ‘nagtatao nin kahulogan.’ Pagkatapos, an banwaan nagkaigwa nin “dakulang kagayagayahan, huli ta nasabotan ninda an mga tataramon na ipinaaram sa sainda.” (Nehemias 8:7, 8, 12) Si Tugang na Liverance nagkonklusyon: “An  kagayagayahan resulta kan pakasabot sa Tataramon nin Dios na ipinasabong kan espiritu.”

“Siisay Man Nanggad an Saindong Kaiwal?” an tema na tinokar ni Mark Noumair, saro pang instruktor sa Gilead. Sa guerra, dakol na soldados an nagagadan huli sa inaapod na friendly fire, na an boot sabihon natatamaan sinda kan mga katropa man sana ninda. “Kumusta man an espirituwal na pakikilaban niato?” an hapot nia. “Kun dai mag-iingat, puede kitang maribaraw kun siisay an tunay na kaiwal asin makologan niato an mga katropa man sana niato.” An pagkauri tibaad makaribaraw sa nagkapira. Iyan an dahelan na prinobaran ni Hadeng Saul na gadanon si David, an kapwa nia parasamba, mantang an totoo an mga Filisteo an kaiwal. (1 Samuel 18:7-9; 23:27, 28) Dangan nagpadagos an ispiker: “Paano kun naglilingkod kamo kaiba nin sarong misyonero na igwa nin dakol na abilidad na nakakalabi sa iba? Kokologan daw nindo an kapwa nindo soldados paagi sa mapagtatsar na mga komento, o matoninong nindong aakoon an katunayan na malalabihan kamo kan iba sa laen-laen na paagi? An pagpokus sa mga pagkabakong sangkap nin iba tibaad makaribaraw sana sa sato sa pagmidbid kan tunay na kaiwal niato. Labanan an tunay na kaiwal, si Satanas.”

Nakakagayagayang mga Eksperyensia Asin Nakakapagtokdong mga Interbio

An sunod na kabtang, “Gibohon Mo an Gibohon nin Sarong Paraebanghelyo,” itinao kan instruktor sa Gilead na si Lawrence Bowen asin may kaibang mga interbio asin eksperyensia. Ipinaliwanag nia na an nota sa ibaba kan 2 Timoteo 4:5 sa Reference Bible nagsasabi, gibohon mo an gibohon “nin sarong misyonero.” Idinagdag kan ispiker: “Angay nanggad ini, huling an pangenot na gibohon nin sarong misyonero na sinanay sa Gilead iyo an pagpalakop kan maogmang bareta, asin ginibo iyan kan klaseng ini saen man sinda nakakanompong nin mga tawo.” Iinakto an nagkapirang nakakaogmang marhay na eksperyensia.

An suminunod sa programa iyo an duwang kabtang na itinao ni Michael Burnett asin Scott Shoffner, parehong miembro kan pamilyang Bethel. Ininterbio ninda an mga miembro kan Komite kan Sangang Opisina sa Australia, Barbados, Korea, asin Uganda. An komento kan mga miembro kan komite naghayag kun guranong paghihingoa an ginigibo para sa pag-asikaso sa mga pangangaipo kan mga misyonero, kaiba an pagtao sainda nin tamang istaran asin pag-asikaso sa salud. Idinoon kan mga miembro kan komite na an mapangganang mga misyonero andam na makibagay sa lokal na mga kamugtakan.

Nakakaanimar Asin Nakakapahirong Konklusyon

An pangenot na diskurso kan programa iyo an pahayag na “Matakot Kamo sa Dios Asin Pamurawayon Nindo Sia,” na iinatubang ni John E. Barr, sarong haloy nang miembro kan Namamahalang Grupo. Tinokar nia an Kapahayagan 14:6, 7, na nagsasabi: “Nakaheling ako nin saro pang anghel na naglalayog sa kaitaasan, asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga, asin sa lambang nasyon asin tribo asin lenguahe patin banwaan, na nagsasabi sa makosog na tingog: ‘Matakot kamo sa Dios asin pamurawayon nindo sia, huli ta nag-abot na an oras kan saiyang paghokom.’”

Sinadol ni Tugang na Barr an mga estudyante na isapuso an tolong bagay mapadapit sa anghel na iyan. Enot, kaipuhan na ipahayag nia an daing katapusan na maogmang bareta na si Cristo namamahala na ngonyan na may lubos na autoridad sa Kahadean. An ispiker nagsabi: “Kombensido nanggad kita na an pagpatukaw sa saiya sa trono nangyari kan 1914. Kaya an nakakaogmang notisyang ini kaipuhan na ibalangibog sa bilog na daga.” Ikaduwa, sinabi kan anghel: “Matakot kamo sa Dios.” Ipinaliwanag kan ispiker na kaipuhan na tabangan kan mga naggradwar an mga inaadalan ninda sa Biblia na pataluboon an reberensia sa Dios tanganing dai makagibo nin ano man na ikinakaanggot nia. Ikatolo, an anghel nagboot: ‘Pamurawayon nindo an Dios.’ Sinadol an mga estudyante, “Nungka nindong paglingawan na naglilingkod kita para sa kamurawayan nin Dios, bakong para sa sadiri niato.” Dangan sa pagtokar sa ‘oras kan paghokom,’ sinabi ni Tugang na Barr: “Dikit na sana an panahon na natatada tanganing ipahayag an pangultimong paghokom. Dakol na nasa teritoryo niato an nangangaipo pa na makadangog kan mensahe kan maogmang bareta bago magin huri an gabos.”

Mantang an mga tataramon na ini garo nag-aaningal sa saindang talinga, an 56 na naggradwar tinawan kan saindang diploma asin isinugo sagkod sa kaporoporohi kan daga. An puso kan mga naggradwar asin kan gabos na iba pang nagdadangog napahirong marhay kan nakakamotibar na hatol na inako ninda sa nakakaogmang marhay na aldaw na iyan.

[Kahon sa pahina 17]

ESTADISTIKA KAN KLASE

Bilang nin mga nasyon na irinepresentar: 6

Bilang nin mga nasyon na inasignaran: 25

Bilang nin mga estudyante: 56

Promedyong edad: 35.1

Promedyong taon sa katotoohan: 18.3

Promedyong taon sa bilog na panahon sa ministeryo: 13.9

[Ritrato sa pahina 18]

Ika-121 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.