“Dapat na Maggayagaya Ka Sana”

“Seselebraron [mo] an kapiestahan ki Jehova . . . , asin dapat na maggayagaya ka sana.”—DEUTERONOMIO 16:15.

1. (a) Anong mga isyu an ibinangon ni Satanas? (b) Ano an ihinula ni Jehova pagkatapos na magrebelde si Adan asin Eva?

KAN sutsutan ni Satanas si Adan asin Eva na magrebelde tumang sa saindang Kaglalang, nagbangon sia nin duwang mahalagang marhay na isyu. Enot, kinuestion nia an pagigin makatotoohan ni Jehova asin an pagigin tama kan saiyang paagi nin pamamahala. Ikaduwa, ipinasentido ni Satanas na an mga tawo maglilingkod sa Dios huli sana sa sadiring interes. An ikaduwang isyu malinaw na nasambitan kan panahon ni Job. (Genesis 3:1-6; Job 1:9, 10; 2:4, 5) Minsan siring, naghiro tolos si Jehova tanganing asikasohon an situwasyon. Dawa kan si Adan asin Eva yaon pa sa hardin nin Eden, ihinula ni Jehova kun paano Nia reresolberan an mga isyu. Ihinula nia an pagdatong kan “banhi” na, pagkatapos na lugadon an saiyang bool, malugad sa payo ni Satanas na ikakagadan kaini.—Genesis 3:15.

2. Anong liwanag an pinasirang ni Jehova sa kun paano nia ootobon an propesiya na nakasurat sa Genesis 3:15?

² Sa paglihis nin panahon, nagpasirang si Jehova nin nag-oorog na liwanag sa propesiyang iyan, sa siring ipinapaheling an kasiertohan kan kaotoban kaini sa huri. Halimbawa, sinabi nin Dios ki Abraham na an “banhi” malataw sa saiyang mga gikan. (Genesis 22:15-18) An makoapo ni Abraham na si Jacob nagin ama kan 12 tribo nin Israel. Kan 1513 B.C.E., kan an mga tribong idto magin sarong nasyon, itinao sa sainda ni Jehova an kodigo nin ley na kaiba an manlaenlaen na taonan na mga kapiestahan. Sinabi ni apostol Pablo na an mga kapiestahan na idto “anino kan mga bagay na madatong.” (Colosas 2:16, 17; Hebreo 10:1) Igwa iyan nin mga patanaw sa ngapit kan pagkaotob kan katuyohan ni Jehova para sa Banhi. An pagselebrar sa mga kapiestahan na idto nagtao nin dakulang kagayagayahan sa Israel. An halipot na pag-estudyar sa mga iyan mapakosog kan satong pagtubod sa pagkamasasarigan kan mga panuga ni Jehova.

Paglataw kan Banhi

3. Siisay an ipinanugang Banhi, asin paano linugad an saiyang bool?

³ Labing 4,000 na taon pagkatapos na sabihon an enot na propesiya ni Jehova, an ipinanugang Banhi naglataw. Si Jesus iyan. (Galacia 3:16) Bilang sangkap na tawo, pinapagdanay ni Jesus an saiyang integridad sagkod sa kagadanan asin sa siring pinatunayan nia na putik an mga akusasyon ni Satanas. Dugang pa, mantang daing kasalan si Jesus, an saiyang kagadanan sarong atang na may dakulang halaga. Paagi kaiyan, nagtao si Jesus nin kaligtasan sa kasalan asin kagadanan para sa maimbod na mga gikan ni Adan asin Eva. An kagadanan ni Jesus sa hariging pasakitan iyo an ‘paglugad sa bool’ kan ipinanugang Banhi.—Hebreo 9:11-14.

4. Paano ipinanganino an atang ni Jesus?

⁴ Si Jesus nagadan kan Nisan 14, 33 C.E. * Sa Israel, an Nisan 14 iyo an magayagayang aldaw kan selebrasyon kan Paskua. Kada taon sa aldaw na iyan, an mga pamilya iribang nagkakarakan na kaibahan sa kinakakan ninda an sadang pa asin daing kaninan na kordero. Sa paaging ini, ginigirumdom ninda an nagin kabtang kan dugo nin kordero sa pagkaligtas kan mga panganay na Israelita kan gadanon kan anghel nin kagadanan an mga panganay kan mga Egipcio kan Nisan 14, 1513 B.C.E. (Exodo 12:1-14) An ipinanganino kan kordero kan Paskua iyo si Jesus, na manongod sa saiya nagsabi si apostol Pablo: “Si Cristo na satuyang paskua iinatang na.” (1 Corinto 5:7) Kapareho kan dugo nin kordero kan Paskua, an pinabolos na dugo ni Jesus nagtatao nin kaligtasan para sa dakol.—Juan 3:16, 36.

 ‘An Enot na Bunga kan mga Gadan’

5, 6. (a) Kasuarin binuhay liwat si Jesus, asin paano ipinanganino sa Ley an pangyayaring iyan? (b) Paano pinagin posible kan pagkabuhay liwat ni Jesus an kaotoban kan Genesis 3:15?

⁵ Sa ikatolong aldaw, si Jesus binuhay liwat tanganing ipresentar sa saiyang Ama an halaga kan saiyang atang. (Hebreo 9:24) An saiyang pagkabuhay liwat ipinanganino durante nin saro pang kapiestahan. An aldaw na kasunod kan Nisan 14 iyo an kapinonan kan Kapiestahan kan Tinapay na Mayo nin Lebadura. Sa sunod na aldaw, Nisan 16, dinadara kan mga Israelita an goygoy kan enot na mga bunga kan aning sebada, an kaenot-enoteng ani sa Israel, tanganing itabyon kan saserdote ki Jehova. (Levitico 23:6-14) Angay nanggad na kan taon 33 C.E., kan mismong aldaw na iyan, inolang ni Jehova an madahas na mga paghihingoa ni Satanas na pasilensiohon sagkod lamang an saiyang “maimbod asin totoong saksi”! Kan Nisan 16, 33 C.E., binuhay liwat ni Jehova si Jesus hale sa mga gadan pasiring sa inmortal na espiritung buhay.—Kapahayagan 3:14; 1 Pedro 3:18.

⁶ Si Jesus nagin “an enot na bunga kan mga natorog sa kagadanan.” (1 Corinto 15:20) Bakong arog kan mga binuhay liwat bago kaiyan, si Jesus dai na nagadan giraray. Imbes, nagsakat sia sa langit sa too ni Jehova, kun saen sia naghalat sagkod na sia patukawon bilang Hade kan langitnon na Kahadean ni Jehova. (Salmo 110:1; Gibo 2:32, 33; Hebreo 10:12, 13) Poon kan sia patukawon bilang Hade, si Jesus nasa kamugtakan na ngonyan na permanenteng lugadon sa payo an dakulang kaiwal, si Satanas, asin laglagon an banhi kaini.—Kapahayagan 11:15, 18; 20:1-3, 10.

Dugang Pang mga Miembro kan Banhi ni Abraham

7. Ano an Kapiestahan nin mga Semana?

⁷ Si Jesus iyo an Banhi na ipinanuga sa Eden asin paagi sa saiya ‘lalaglagon ni Jehova an mga gibo kan Diablo.’ (1 Juan 3:8) Minsan siring, kan magtaram si Jehova ki Abraham, ipinarisa Nia na an “banhi” ni Abraham magigin bako sanang sarong tawo. Iyan magigin “siring kan mga bitoon sa kalangitan asin siring kan mga baybay sa baybayon.” (Genesis 22:17) An paglataw kan iba pang miembro kan “banhi” ipinanganino nin saro pang magayagayang kapiestahan. Singkuentang aldaw pakatapos kan Nisan 16, sineselebrar kan Israel an Kapiestahan nin mga Semana. An Ley manongod digdi nagsasabi: “Sagkod sa aldaw na kasunod kan ikapitong sabbath kamo mabilang, singkuentang aldaw, asin kaipuhan kamong dumolot nin bagong dolot na harina ki Jehova. Hale sa saindong mga erokan magdara kamo nin duwang tinapay bilang dolot na itinabyon. Iyan maninigong duwang kasampuloan nin sarong efa nin pinong harina. An mga iyan maninigong ihorno na may lebadura, bilang enot na hinog na mga bunga para ki Jehova.” *—Levitico 23:16, 17, 20.

8. Ano an pambihirang nangyari kan Pentecostes 33 C.E.?

⁸ Kan si Jesus yaon sa daga, an Kapiestahan nin mga Semana midbid bilang Pentecostes (hale sa Griegong tataramon na nangangahulogan nin “ikasingkuenta”). Kan Pentecostes 33 C.E., an orog na dakulang Halangkaw na Saserdote, an binuhay liwat na si Jesu-Cristo, ibinubo an banal na espiritu sa sadit na grupo nin 120 disipulo na nagkakatiripon sa Jerusalem. Sa siring, an mga disipulong idto nagin linahidan na mga aki nin  Dios asin tugang ni Jesu-Cristo. (Roma 8:15-17) Sinda nagin sarong bagong nasyon, an “Israel nin Dios.” (Galacia 6:16) Hale sa sadit na kabilangan, an nasyon na iyan sa katapustapusi magigin 144,000.—Kapahayagan 7:1-4.

9, 10. Paano ipinanganino durante kan Pentecostes an kongregasyon kan linahidan na mga Kristiano?

⁹ An kongregasyon kan linahidan na mga Kristiano ipinanganino kan duwang may lebadurang tinapay na itinatabyon sa atubangan ni Jehova kada Pentecostes. An pagigin may lebadura kan mga tinapay nagpapaheling na an linahidan na mga Kristiano may lebadura pa kan minanang kasalan. Minsan siring, makakadolok sinda ki Jehova basado sa atang na pantubos ni Jesus. (Roma 5:1, 2) Taano ta duwang tinapay? Posibleng nagtotokdo iyan sa bagay na an linahidan na mga aki nin Dios kukuanon pag-abot nin panahon hale sa duwang grupo—enot hale sa propiong mga Judio asin sa huri hale sa mga Hentil.—Galacia 3:26-29; Efeso 2:13-18.

¹⁰ An duwang tinapay na idinodolot sa Pentecostes hale sa enot na mga bunga kan inaning trigo. Sa kaparehong paagi, an pinaniaki nin espiritung mga Kristianong idto inaapod na “sarong klase nin enot na mga bunga kan saiyang mga linalang.” (Santiago 1:18) Sinda an enot na napatawad sa saindang mga kasalan basado sa pinabolos na dugo ni Jesus, asin pinagin posible kaiyan na sinda matawan nin inmortal na buhay sa kalangitan, kun saen sinda mamamahala kaiba ni Jesus sa saiyang Kahadean. (1 Corinto 15:53; Filipos 3:20, 21; Kapahayagan 20:6) Sa kamugtakan na iyan, sa dai na mahahaloy ‘papastoran ninda an mga nasyon paagi sa sogkod na batbat’ asin maheheling ninda an ‘pagronot ki Satanas sa irarom kan saindang mga bitis.’ (Kapahayagan 2:26, 27; Roma 16:20) Si apostol Juan nagsabi: “An mga ini iyo an padagos na nagsusunod sa Kordero saen man sia magduman. An mga ini binakal hale sa katawohan bilang enot na mga bunga sa Dios asin sa Kordero.”—Kapahayagan 14:4.

Sarong Aldaw na Nagdodoon nin Pagkaligtas

11, 12. (a) Ano an nangyayari sa Aldaw nin Pagbayad sa Kasalan? (b) Anong mga pakinabang an inako kan Israel gikan sa mga atang na toro asin mga kanding?

¹¹ Sa ikasampulong aldaw nin Etanim (sa huri inapod na Tisri), * an Israel nagselebrar nin sarong kapiestahan na nagserbing anino kun paano iaaplikar an mga pakinabang kan atang na pantubos ni Jesus. Sa aldaw na iyan nagtitiripon an bilog na  nasyon para sa Aldaw nin Pagbayad sa Kasalan tanganing ikadolot an mga atang para sa sainda sa pagtakop kan saindang mga kasalan.—Levitico 16:29, 30.

¹² Sa Aldaw nin Pagbayad sa Kasalan, binubuno kan halangkaw na saserdote an sarong torilyo, asin sa Kabanalbanale, ipinapatakpatak nia an ibang dugo kaiyan nin pitong beses sa atubangan kan takop kan Kaban, na sa siring na paagi simbolikong idinodolot an dugo sa atubangan ni Jehova. An dolot na iyan para sa mga kasalan kan halangkaw na saserdote asin kan “saiyang harong,” kan mga katabang na saserdote asin kan mga Levita. Dangan kukuanon kan halangkaw na saserdote an duwang kanding. An saro bubunoon nia bilang dolot manongod sa kasalan “para sa banwaan.” An ibang dugo man kaiyan iwiwirik sa atubangan kan takop kan Kaban sa Kabanalbanale. Pagkatapos, idodoon kan halangkaw na saserdote an saiyang mga kamot sa payo kan ikaduwang kanding asin itutuga an mga sala kan mga aki ni Israel. Dangan gigiyahan nia an kanding pasiring sa kaawagan tanganing sa simbolikong paagi darahon kaiyan parayo an mga kasalan kan nasyon.—Levitico 16:3-16, 21, 22.

13. Paano ipinanganino kan mga pangyayari sa Aldaw nin Pagbayad sa Kasalan an papel ni Jesus?

¹³ Arog kan ipinapanganino kan mga ginigibong idto, ginagamit kan dakulang Halangkaw na Saserdote, si Jesus, an merito kan sadiri niang dugo tanganing magtao nin kapatawadan sa mga kasalan. Enot, an halaga kan saiyang dugo iinaaplikar sa “espirituwal na harong” kan 144,000 na linahidan na Kristiano, na nagpapangyari sa mga ini na ikapahayag na matanos asin magkamit nin malinig na kamugtakan sa atubangan ni Jehova. (1 Pedro 2:5; 1 Corinto 6:11) Ipinapanganino ini kan pag-atang nin toro. Sa siring, nabubuksan an dalan tanganing akoon ninda an saindang langitnon na mana. Ikaduwa, an halaga kan dugo ni Jesus iinaaplikar para sa minilyon na iba pa na nagtutubod ki Cristo, siring kan ipinapaheling kan pag-atang nin kanding. An mga ini bebendisyonan nin buhay na daing katapusan digdi sa daga, an pamana na iwinara ni Adan asin Eva. (Salmo 37:10, 11) Basado sa pinabolos niang dugo, dinadara ni Jesus parayo an mga kasalan nin katawohan, kun paanong sa simbolikong paagi dinara kan buhay na kanding an mga kasalan kan Israel sa kaawagan.—Isaias 53:4, 5.

Paggayagaya sa Atubangan ni Jehova

14, 15. Ano an nangyayari durante kan Kapiestahan nin mga Payag-Payag, asin ano an ipinapagirumdom kaini sa mga Israelita?

¹⁴ Pagkatapos kan Aldaw nin Pagbayad sa Kasalan, sineselebrar kan mga Israelita an Kapiestahan nin mga Payag-Payag, an pinakamagayagayang kapiestahan kan Judiong taon. (Levitico 23:34-43) An kapiestahan na iyan ginigibo poon sa ika-15  sagkod sa ika-21 kan Etanim asin natatapos paagi sa solemneng pagtiripon sa ika-22 kan bulan. Iyan an katapusan kan pagtipon kan mga inani asin sarong panahon nin pagpasalamat para sa abundang karahayan nin Dios. Sa dahelan na iyan, pinagbotan ni Jehova an mga nagseselebrar: “Bebendisyonan ka ni Jehova na saimong Dios sa gabos mong ani asin sa gabos na gibo kan saimong kamot, asin dapat na maggayagaya ka sana.” (Deuteronomio 16:15) Kanigoan kaogmang panahon nanggad iyan!

¹⁵ Durante kan kapiestahan na iyan, an mga Israelita nag-eerok sa mga payag-payag sa laog nin pitong aldaw. Sa siring, ipinapagirumdom sa sainda na dati sindang nag-erok sa mga payag-payag sa kaawagan. An kapiestahan nagtao sa sainda nin bastanteng oportunidad na horophoropon an sa amang pagmakolog ni Jehova. (Deuteronomio 8:15, 16) Asin mantang an gabos, pareho an mayaman asin dukha, nag-eerok sa mga payag-payag na magkakapareho, ipinapagirumdom sa mga Israelita na may koneksion sa kapiestahan, sinda gabos magkakapantay.—Nehemias 8:14-16.

16. Ano an ipinanganino kan Kapiestahan nin mga Payag-Payag?

¹⁶ An Kapiestahan nin mga Payag-Payag sarong kapiestahan nin pag-ani, sarong magayagayang selebrasyon nin pagtipon, asin ipinapanganino kaiyan an magayagayang pagtipon kan mga nagtutubod ki Jesu-Cristo. An pagtipon nagpoon kan Pentecostes 33 C.E., kan an 120 disipulo ni Jesus linahidan na magin kabtang kan “banal na kabilogan na grupo nin mga saserdote.” Kun paano na an mga Israelita nag-erok sa mga payag-payag sa laog nin pira sanang aldaw, naaaraman kan mga linahidan na sinda “nakikiistar nin temporaryo” sana sa bakong diosnon na kinaban na ini. An saindang paglaom langitnon. (1 Pedro 2:5, 11) An pagtipon na iyan sa linahidan na mga Kristiano matatapos durante kan “huring mga aldaw” na ini, kun an ultimong mga miembro kan 144,000 matipon na.—2 Timoteo 3:1.

17, 18. (a) Ano an nagpaparisa na apuera sa linahidan na mga Kristiano, may iba pang makikinabang sa atang ni Jesus? (b) Sairisay ngonyan an nakikinabang sa antitipikong Kapiestahan nin mga Payag-Payag, asin noarin makakaabot sa kulminasyon kaiyan an magayagayang kapiestahan na iyan?

¹⁷ Mahalagang mangnohon na durante kan suanoy  na kapiestahan na ini, 70 toro an iinaatang. (Bilang 29:12-34) An kabilangan na 70 nagrerepresentar sa 7 na minultiplikar nin 10, mga numero na sa Biblia nagrerepresentar sa langitnon asin daganon na pagkasangkap. Huli kaini, an atang ni Jesus magtataong pakinabang sa mga maimbod hale sa gabos na 70 pamilya nin katawohan na naggikan ki Noe. (Genesis 10:1-29) Kaoyon kaiyan, an pagtipon sa satong panahon huminiwas tanganing ikaiba an mga indibiduwal hale sa gabos na nasyon na nagtutubod ki Jesus asin igwa kan paglaom na mabuhay sa paraisong daga.

¹⁸ Naheling ni apostol Juan paagi sa bisyon an pagtipon na ini sa presenteng aldaw. Enot nadangog nia an pag-anunsiar kan pagtatak sa huring mga miembro kan 144,000. Dangan naheling nia “an sarong dakulang kadaklan, na dai nin siisay man na makakabilang,” na nagtitindog sa atubangan ni Jehova asin ni Jesus, na may “mga sanga nin palma sa saindang mga kamot.” An mga ini “nagluwas sa dakulang kahorasaan” pasiring sa bagong kinaban. Sinda man ngonyan nakikiistar nin temporaryo sana sa daan na sistemang ini nin mga bagay, asin inaantisipar ninda na may kompiansa an panahon na “an Kordero . . . magpapastor sa sainda, asin magiya sa sainda sa mga burabod kan tubig nin buhay.” Sa panahon na iyan, “papahidon nin Dios an gabos na luha sa saindang mga mata.” (Kapahayagan 7:1-10, 14-17) An antitipikong Kapiestahan nin mga Payag-Payag makakaabot sa kulminasyon kaiyan pagkatapos kan Sangribong Taon na Paghade ni Cristo kun sinda kaiba kan maimbod na mga binuhay liwat tawan na nin buhay na daing katapusan.—Kapahayagan 20:5.

19. Paano kita nakikinabang sa pag-estudyar kan mga kapiestahan na sinelebrar sa Israel?

¹⁹ Kita man ‘makakapaggayagaya sana’ mantang hinohorophorop niato an kahulogan kan suanoy na Judiong mga kapiestahan. Nakakapukaw sa boot na isipon na si Jehova nagtao nin mga patanaw sa ngapit kun paano maootob an saiyang propesiya na itinao kaidto sa Eden, asin nakakaogmang maheling na nangyayari nin tangga-tangga an aktuwal na kaotoban kaiyan. Ngonyan, naaaraman niato na naglataw na an Banhi asin na sia linugad na sa bool. Ngonyan saro na siang langitnon na Hade. Dugang pa, an kadaklan kan 144,000 pinatunayan na an saindang kaimbodan sagkod sa kagadanan. Ano an kaipuhan pang gibohon? Gurano na kaharani an lubos na kaotoban kan propesiya? Totokaron ini sa sunod na artikulo.

[Mga Nota sa Ibaba]

Ikakapaliwanag daw Nindo?

• Ano an ipinanganino kan kordero kan Paskua?

• Anong pagtipon an ipinanganino kan Kapiestahan nin Pentecostes?

• Anong mga kabtang kan Aldaw nin Pagbayad sa Kasalan an nagtotokdo sa paagi na iinaaplikar an pantubos na atang ni Jesus?

• Sa anong paagi ipinapanganino kan Kapiestahan nin mga Payag-Payag an pagtipon sa mga Kristiano?

[Mga Hapot Para sa Pag-adal]

[Tsart sa pahina 22, 23]

(Para sa aktuwal na format, hilingon an publikasyon)

Pangyayari: Nagserbing Anino kan:

Paskua Nisan 14 Pagbuno kan Pag-atang ki Jesus

kordero kan Paskua

Kapiestahan kan Nisan 15 Sabbath

Tinapay na Mayo

nin Lebadura Nisan 16 Pagdolot kan sebada Pagbuhay liwat ki Jesus

(Nisan 15-21)

↑

50 aldaw

↓

Kapiestahan nin Pagdolot ka Pagpresentar ni

mga Semana Sivan 6 duwang tinapay Jesus ki Jehova

(Pentecostes) kan saiyang linahidan

na mga tugang

Aldaw nin Tisri 10 Pagdolot nin Pagtao ni Jesus

Pagbayad sa Kasalan sarong toro asin kan halaga

duwang kanding kan saiyang dugo

para sa bilog

na katawohan

Kapiestahan nin Tisri 15-21 Magayagayang Pagtipon kan

mga Payag-Payag pag-erok kan linahidan asin

(Pagtipon, mga mga Israelita sa “dakulang kadaklan”

Tabernakulo) mga payag-payag

asin paggayagaya

sa pag-ani, pagdolot

kan 70 toro

[Mga Ritrato sa pahina 21]

Kapareho kan dugo nin kordero kan Paskua, an pinabolos na dugo ni Jesus nagtatao nin kaligtasan sa dakol

[Mga Ritrato sa pahina 22]

An enot na mga bunga kan inaning sebada na iinatang kan Nisan 16 nagserbing anino kan pagkabuhay liwat ni Jesus

[Mga Ritrato sa pahina 23]

An duwang tinapay na idinolot kan Pentecostes nagserbing anino kan kongregasyon nin linahidan na mga Kristiano

[Mga Ritrato sa pahina 24]

An Kapiestahan nin mga Payag-Payag nagserbing anino kan magayagayang pagtipon sa mga linahidan asin sa “dakulang kadaklan” hale sa gabos na nasyon