Kun Paano Kamo Puedeng Magin Mapanggana
Kun Paano Kamo Puedeng Magin Mapanggana
KUN paanong nagmamakolog an mga magurang sa saindang mga aki asin mawot ninda na magin mapanggana an mga ini, an satong langitnon na Ama nagmamakolog man sa sato asin mawot nia na kita magin mapanggana. Bilang kapahayagan kan mamomoton na pagmakolog nia, dakol an sinasabi nia manongod sa pagigin mapanggana asin dai pagigin mapanggana. Sa katunayan, sa pagtaram manongod sa tawong nagtatao nin atension sa sinasabi nin Dios, an Biblia kompiadong nagsasabi: “An gabos niang ginigibo magigin mapanggana.”—Salmo 1:3.
Pero, kun siring kaiyan an kamugtakan, taano ta dai nakakamtan kan dakol an mapanggana, maogma, asin nakakakontentong buhay? An pagsiyasat na marhay sa salmong ini matao sa sato kan simbag asin mapaheling sa sato kun paano man kita puedeng magin mapanggana.
“Hatol kan mga Marigsok”
An salmista nagpapatanid manongod sa peligro nin paglakaw sa “hatol kan mga marigsok.” (Salmo 1:1) An pangenot na “marigsok” iyo si Satanas na Diablo. (Mateo 6:13) An Kasuratan nagsasabi sa sato na sia an “namamahala sa kinaban na ini” asin na “an bilog na kinaban namumugtak sa kapangyarihan kan saro na marigsok.” (Juan 16:11; 1 Juan 5:19) Sa siring, bakong makangangalas na an kadaklan sa hatol na makukua sa kinaban nagpapabanaag kan kaisipan kan marigsok na iyan.
Anong klase nin sadol an itinatao kan mga marigsok? Sa pangkagabsan, an mga marigsok daing galang sa Dios. (Salmo 10:13) An saindang hatol, na nag-iignoro sa o dai iginagalang an Dios, lakop sa gabos na lugar. Pinapalakop kan sosyedad sa presenteng panahon “an mawot kan laman asin an mawot kan mga mata asin an pagpaabaw-abaw kan kaya sa buhay.” (1 Juan 2:16) Pinapaoranan kita kan media nin materyalistikong pilosopiya na “kuanon mo an gabos na makukua mo sa buhay.” Sa bilog na kinaban, an mga kompanya naggagasto nin labing 500 bilyones dolyares (E.U.) kada taon sa mga anunsio tanganing kombensiron an mga tawo na bumakal kan mga produkto ninda—kaipuhan man iyan kan mga parabakal o dai. Asin bako sanang binago kan propagandang ini an mga ugale kan mga tawo sa pagbakal. Rinaot man kaiyan an pagmansay kan kinaban manongod sa kapangganahan.
Bilang resulta, dawa ngani an dakol igwa na kan mga bagay na pinapangarap sana kaidtong dakol nang taon an nakaagi, yaon pa man giraray sa sainda an dai napapanigoan na pagkapaha para sa dagdag pang materyal na bagay. An saboot iyo na kun mayo ka kan mga bagay na ini, dai ka magigin maogma o mapanggana. An kaisipan na ini kaputikan asin “bakong gikan sa Ama, kundi gikan sa kinaban.”—1 Juan 2:16.
Aram kan Kaglalang niato kun ano an magpapangyari sa sato na magin talagang mapanggana. An saiyang hatol napapalaen sa “hatol kan mga marigsok.” Kun siring, an paghihingoa na makamtan an bendisyon nin Dios mantang naglalakaw sa dalan kan kinaban pasiring sa kapangganahan garo pagprobar na maglakaw nin sabay sa duwang tinampo. Iyan dai nanggad magigibo. Bakong makangangalas na nagpapatanid an Biblia: “Dai kamo garo baga mag-arog sa mga pamantayan kan kinaban na ini”!—Roma 12:2, Today’s English Version.
Dai Magpaimpluwensia sa Kinaban
An kinaban na nasa irarom kan impluwensia ni Satanas naghihingoa na lumataw na interesado sa satong ikakarahay. Minsan siring, kaipuhan kitang mag-ingat. Girumdomon na may kaimotan na dinaya ni Satanas an enot na babae, si Eva, para sa saiyang sadiring intereses. Dangan ginamit nia ini tanganing impluwensiahan si Adan na magkasala. Ngonyan, ginagamit man ni Satanas an mga tawo sa pagtao kan saiyang marigsok na hatol.
Halimbawa, an hinahagad ki David, na nasambitan sa naenot na artikulo, magtrabaho nin dagdag pang oras asin parateng magbiahe huli sa trabaho. “Minahale ako nin amay na aga nin Lunes asin minapuli nin Huebes na banggi,” an sabi ni David. Huli sa paghona na an siring na mga sakripisyo kaipuhan tanganing makamtan an kinabanon na kapangganahan, sinadol si David nin sinserong mga katood, miembro kan pamilya, asin katrabaho: “Gibohon mo iyan para sa pamilya mo.” Nangatanosan sinda na pira man sanang taon na kinakaipuhan niang papagdanayon an siring na iskedyul sagkod na magin establisado na sia. Ipinaliwanag ni David: “Nangatanosan sinda na magigin mas marahay ini para sa pamilya ko ta mas dakol na kuarta an ikakapuli ko—mas magigin mapanggana ako. Minsan ngani mayo ako sa sakong pamilya, kinombensir ako kan mga katood ko na sa katunayan mas dakula an itinatao ko sa sakong pamilya.” Arog ni David, dakol an mahigos na nagtatrabaho tanganing itao sa pamilya ninda an gabos na sa paghona ninda kaipuhan kan saindang mga namomotan. Alagad nagbubunga daw nin kapangganahan an pagsunod sa arog kaining klase nin sadol? Ano talaga an kaipuhan nin sarong pamilya?
Naaraman ini ni David kan sia nasa biahe huli sa trabaho. “Kaolay ko kaidto sa telepono an sakong aki na si Angelica, na nagsabi: ‘Tatay, taano ta habo nindong magdanay digdi sa harong kaiba mi?’ Makologon idto sa boot,” an sabi ni David. An sinabi kan saiyang aki nagpakosog sa kamawotan nia na magdemitir. Nagdesisyon si David na itao sa pamilya nia an talagang kaipuhan ninda—sia.
An Pag-aplikar kan Hatol nin Dios Nagbubunga nin Kapangganahan
Paano nindo mapaglalabanan an negatibong propaganda na lakop na marhay sa kinaban na ini? Sinasabi sa sato kan salmista na an mapanggana asin maogmang tawo iyo an saro na “an saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi.”—Salmo 1:2.
Kan nombrahan nin Dios si Josue bilang lider kan nasyon nin Israel, sinabi sa saiya: “Basahon mo [an Tataramon nin Dios] nin pahinghing aldaw asin banggi.” Iyo, kaipuhan an pagbasa asin paghorophorop sa Tataramon nin Dios, alagad kaipuhan man ni Josue na ‘mag-ingat na gibohon an segun sa gabos na nasusurat dian.’ Siempre, dai kamo automatikong magigin mapanggana huli sa pagbasa kan Biblia. Kaipuhan nindong iaplikar kun ano an nabasa nindo. Sinabihan si Josue: “Paagi kaiyan gigibohon mong mapanggana an saimong dalan asin paagi kaiyan mahiro ka na may kadonongan.”—Josue 1:8.
Imahinara an sarong nakahuyom na aking saday na kulkol nin sarong mamomoton na magurang mantang magkaibanan nindang binabasa an sarong paboritong estorya. Gurano man kadakol nang beses na iyan nabasa ninda kaidto, pinakamamahal ninda an siring na mahalagang marhay na mga panahon. Siring man, para sa tawong namomoot sa Dios sarong nakakaogmang marhay na eksperyensia an pagbasa kan Biblia aroaldaw—sarong nakakaogmang panahon kaibanan kan saiyang langitnon na Ama. Paagi sa pagsunod sa hatol asin paggiya ni Jehova, an siring na tawo nagigin “siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo magigin mapanggana.”—Salmo 1:3.
An kahoy na ilinaladawan kan salmista dai basta na sana minatubo. Iyan maingat na itinanom harani sa sarong gikanan nin tubig asin inaataman kan paraoma. Sa kaagid na paagi, pinapakarhay asin ikinokorehir kan satong langitnon na Ama an satong kaisipan paagi sa hatol na yaon sa Kasuratan. Bilang resulta, kita nag-ooswag asin nagpapaluwas nin diosnon na mga bunga.
Minsan siring, “an mga marigsok bakong siring kaiyan.” Totoo, tibaad garo baga sinda nagigin mapanggana sa laog nin kadikit na panahon, alagad sa katapustapusi maraot an resulta para sa sainda. Sinda “dai makakatindog sa paghokom.” Imbes, “an dalan kan mga marigsok mapapara.”—Salmo 1:4-6.
Kaya dai nindo pagtogotan na maimpluwensiahan kan kinaban an saindong mga pasohan asin pamantayan sa buhay. Minsan ngani kamo tibaad may talento asin igwa kan potensial na makamtan an kapangganahan sa kinaban na ini, magin maingat kun paano nindo ginagamit an saindong talento o kun paano nindo iyan ipinapagamit sa kinaban. An daing ibubunga, materyalistikong mga pinag-aaabot puedeng magin dahelan na an sarong tawo ‘maalang.’ Sa ibong na lado, an pagkaigwa nin marahay na relasyon sa Dios nagbubunga nin tunay na kapangganahan asin kaogmahan.
Kun Paano Kamo Puedeng Magin Mapanggana
Taano ta kun sinusunod nin sarong tawo an hatol nin Dios, an gabos niang ginigibo magigin mapanggana? An salmista dai nagtataram manongod sa kapangganahan sa kinaban na ini. An kapangganahan nin diosnon na tawo konektado sa paggibo nia kan kabotan nin Dios—asin an kabotan nin Dios pirmeng mapanggana. Helingon niato kun paano kamo puedeng magin mapanggana huli sa pag-aplikar kan mga prinsipyo sa Biblia.
Pamilya: An Kasuratan nagsasadol sa mga agom na lalaki na “mamoot sa saindang agom na babae siring sa saindang sadiring hawak,” asin sinasabihan an Kristianang agom na “magkaigwa nin hararom na paggalang sa saiyang agom.” (Efeso 5:28, 33) Ineenkaminar an mga magurang na magtagama nin panahon kaiba an saindang mga aki, makingisihan sa sainda, asin tokdoan sinda manongod sa importanteng mga bagay sa buhay. (Deuteronomio 6:6, 7; Eclesiastes 3:4) An Tataramon nin Dios naghahatol man sa mga magurang: “Dai nindo pagpaanggoton an saindong mga aki.” Kun iinaaplikar an hatol na ini, mas pasil sa mga aki na ‘magin makinuyog sa saindang mga magurang’ asin ‘tawan nin onra an saindang ama asin an saindang ina.’ (Efeso 6:1-4) An pagsunod sa hatol na ini nin Dios puedeng magbunga nin sarong mapangganang buhay pampamilya.
Mga Katood: An kadaklan na tawo gusto nin mga katood. Igwa kita nin mental asin emosyonal na kakayahan na mamoot asin mamotan. Sinabihan ni Jesus an saiyang mga parasunod na maninigo sindang “magkaminorootmootan.” (Juan 13:34, 35) Sa tahaw ninda, nakakanompong kita nin mga katood na puede niatong mamotan asin pagtiwalaan—dawa kan mga kaisipan asin pagmate na nasa kairairaromi kan satong boot. (Talinhaga 18:24) Orog sa gabos, paagi sa pag-aplikar kan mga prinsipyo sa Biblia, kita puedeng ‘rumani sa Dios’ asin, arog ni Abraham, apodon pa ngani na “katood ni Jehova.”—Santiago 2:23; 4:8.
Katuyohan sa Buhay: Imbes na magkaigwa nin daing direksion na pag-eksister sa aroaldaw, an mga tunay na mapanggana may kahulogan asin katuyohan an buhay. An saindang buhay dai nakabasar sa daing kasegurohan na mga kamugtakan kan sistemang ini nin mga bagay. An saindang mga pasohan nagbubunga nin tunay asin nagdadanay na pagkakontento, mantang iyan nakasentro sa mismong katuyohan nin buhay. Ano an nakakatao sa saro nin katuyohan sa buhay? “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13.
Paglaom: Nagkakaigwa man kita nin paglaom sa ngapit kun Katood niato an Dios. Sinadol ni apostol Pablo an mga Kristiano na “ibugtak an saindang paglaom, bakong sa kayamanan na bakong segurado, kundi sa Dios.” Sa paaging ini, sinda ‘magririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.’ (1 Timoteo 6:17-19) An tunay na buhay na ini mangyayari sa dai na mahahaloy kun an Paraiso ibalik na kan langitnon na Kahadean nin Dios sa dagang ini.—Lucas 23:43.
Dawa kun iinaaplikar nindo an mga prinsipyo sa Biblia, bako kamong libre sa mga problema, alagad malilikayan nindo an kadaklan sa mga kakologan sa boot asin kamondoan na itinatao kan mga marigsok sa saindang sadiri. Nanodan ni David, na nasambitan sa kapinonan, asin kan minilyon na arog nia an halaga nin pag-aplikar kan mga prinsipyo sa Biblia sa saindang buhay. Pakahanap nin trabaho na may angay na iskedyul, si David nagsabi: “Nagpapasalamat ako para sa relasyon ko sa sakong agom asin mga aki saka sa pribilehio na mapaglingkodan si Jehova Dios bilang magurang sa kongregasyon.” Bakong makangangalas na sinasabi kan salmo manongod sa tawong nagtatao nin atension sa hatol nin Dios: “An gabos niang ginigibo magigin mapanggana”!
[Tsart sa pahina 6]
LIMANG LAKDANG PASIRING SA KAPANGGANAHAN
1 Dai magpaimpluwensia sa mga pamantayan sa buhay kan kinaban na ini.
2 Basahon asin horophoropon an Tataramon nin Dios aroaldaw.
3 Iaplikar an hatol kan Biblia sa saindong buhay.
4 Makikatood sa Dios.
5 Matakot sa tunay na Dios, asin otobon an saiyang mga togon.
[Mga Ritrato sa pahina 7]
Sinusunod daw nindo an mga lakdang pasiring sa kapangganahan?