Mga Hapot Hale sa mga Parabasa

Ano an pagtatak na nasambitan sa Kapahayagan 7:3?

An Kapahayagan 7:1-3 nagsasabi: “Nakaheling ako nin apat na anghel na nagtitindog sa apat na kanto kan daga, na pinupugolan an apat na doros kan daga, tanganing mayo nin doros na maghuyop sa daga o sa dagat o sa arin man na kahoy. Asin nakaheling ako nin saro pang anghel na nag-iitaas hale sa sirangan, na may pantatak kan Dios na buhay; asin sia nagkurahaw sa makosog na tingog sa apat na anghel na tinogotan na mandanyar sa daga asin sa dagat, na an sabi: ‘Dai nindo pagdanyaran an daga o an dagat o an mga kahoy, sagkod na matatakan niamo an mga oripon kan satong Dios sa saindang angog.’”

Kun butasan na an “apat na doros,” an magigin resulta iyo an “dakulang kahorasaan,” an paglaglag sa falsong relihion asin sa gabos na iba pang kabtang kan marigsok na kinaban na ini. (Kapahayagan 7:14) “An mga oripon kan satong Dios” iyo an linahidan na mga tugang ni Cristo digdi sa daga. (1 Pedro 2:9, 16) Huli kaini, ipinapaheling kan propesiyang ini na an pagtatak sa mga tugang ni Cristo magigin kompleto na pagpoon kan dakulang kahorasaan. Minsan siring, ipinapaheling kan ibang teksto sa Biblia na may naenot na pagtatak sa mga linahidan. Kun siring, kun beses, may sinasabi kitang enot na pagtatak asin pangultimong pagtatak. Ano an pagkakalaen kan duwang iyan?

Estudyaran niato an kahulogan kan terminong ‘tinatakan.’ Kan suanoy na mga panahon, an pantatak instrumento na ginagamit tanganing tatakan an sarong dokumento. An termino puedeng nanonongod man sa tatak mismo. Kan mga panahon na idto, parateng binubugtakan nin tatak an sarong dokumento o iba pang mga bagay tanganing ipaheling an pagigin tunay o kun siisay an kagsadiri.—1 Hade 21:8; Job 14:17.

 Ikinomparar ni Pablo an banal na espiritu sa sarong tatak kan sabihon nia: “Sia na minagarantiya na kamo asin kami sadiri ni Cristo asin sia na naglahid sa sato iyo an Dios. Sia nagbugtak man kan saiyang tatak sa sato asin nagtao sa sato kan garantiya para sa maabot, arin na baga, an espiritu, sa satong puso.” (2 Corinto 1:21, 22) Huli kaini, linahidan ni Jehova an mga Kristianong ini kan saiyang banal na espiritu tanganing ipaheling na sadiri nia sinda.

Minsan siring, may duwang kabtang an pagtatak sa mga linahidan. An enot na pagtatak laen man sa pangultimong pagtatak (1) sa katuyohan asin (2) sa panahon. An enot na pagtatak ginigibo para sa pagpili nin sarong bagong miembro na idinadagdag sa kabilangan kan linahidan na mga Kristiano. An pagtatak sa pangultimong sentido ginigibo para sa pagkompirmar na an pinili asin tinatakan na indibiduwal na ini lubos na nagpaheling kan saiyang kaimbodan. Dangan sana, sa pangultimong pagtatak, magigin permanente an paglaag kan tatak ‘sa angog’ kan linahidan, na depinidong mapamidbid sa saiya bilang probado asin maimbod na “oripon kan satong Dios.” An pagtatak na nasambitan sa Kapahayagan kapitulo 7 nanonongod sa pangultimong kabtang na ini kan pagtatak.—Kapahayagan 7:3.

May koneksion sa panahon kan enot na pagtatak, si apostol Pablo nagsurat sa linahidan na mga Kristiano: “Kamo man naglaom sa saiya pakadangog nindo sa tataramon nin katotoohan, an maogmang bareta manongod sa saindong kaligtasan. Paagi man sa saiya, pagkatubod nindo, kamo tinatakan kan ipinanugang banal na espiritu.” (Efeso 1:13, 14) Sa dakol na kamugtakan, an rekord sa Biblia nagpapaheling na an mga Kristiano kan enot na siglo tinatakan nanggad dai nahaloy pakadangog ninda kan maogmang bareta asin pagkatubod ninda ki Cristo. (Gibo 8:15-17; 10:44) An siring na pagtatak nagpaheling kan pag-oyon nin Dios sa sainda. Minsan siring, dai iyan nagpaheling kan pangultimong pag-oyon nin Dios. Taano ta dai?

Sinabi ni Pablo na an linahidan na mga Kristiano “tinatakan . . . para sa aldaw nin pagbutas.” (Efeso 4:30) Ipinaparisa kaini na may kalabot na paglihis nin panahon, na sa parate dakol na taon, pakatapos kan enot na pagtatak. An mga linahidan kaipuhan na magdanay na maimbod poon sa aldaw na tatakan sinda nin banal na espiritu sagkod sa ‘aldaw na sinda butasan’ hale sa saindang hawak na laman—an boot sabihon, sagkod na sinda magadan. (Roma 8:23; Filipos 1:23; 2 Pedro 1:10) Kun siring, sa mismong katapusan sana kan buhay ni Pablo na sia nakapagsabi: “Natapos ko an paorumbasan, naingatan ko an pagtubod. Poon ngonyan igwa na nin nakatagama para sa sako na korona nin katanosan.” (2 Timoteo 4:6-8) Dugang pa, si Jesus nagsabi sa sarong kongregasyon nin linahidan na mga Kristiano: “Magmaimbod ka dawa sagkod sa kagadanan, asin ta itatao ko sa saimo an korona nin buhay.”—Kapahayagan 2:10; 17:14.

An terminong “korona” nagtatao nin dugang pang patotoo na may malihis na panahon poon sa enot na pagtatak sagkod sa pangultimong pagtatak. Taano man? Kan suanoy na mga panahon, nagin kostumbre na itao an korona sa paradalagan na nanggana sa paorumbasan. Tanganing mag-ako kan korona, an kaipuhan niang gibohon bako sana an paglaog sa paorumbasan. Kaipuhan niang dumalagan sagkod sa katapusan. Kaagid kaiyan, solamente kun an linahidan na mga Kristiano magmamaigot sagkod sa katapusan kan saindang buhay—poon sa enot na pagtatak sagkod sa pangultimong pagtatak—na sinda kokoronahan nin inmortal na buhay sa langit.—Mateo 10:22; Santiago 1:12.

Noarin aakoon kan natatada sa linahidan na mga Kristiano na nag-ako na kan enot na pagtatak an pangultimong pagtatak sa sainda? An siisay man na buhay pa digdi sa daga tatatakan “sa saindang angog” bago kan pagpoon kan dakulang kahorasaan. Kun butasan na an apat na doros nin kahorasaan, an bilog na espirituwal na Israel pinal nang natatakan, minsan ngani may nagkapira na buhay pa sa laman asin na kaipuhan pa na matapos ninda an saindang daganon na buhay.