Puede daw Nindong Pahiwason an Pagkamoot?

AN KADENA na nagtitindi sa angkla nin barko kaipuhan na makaya an grabeng puersa tangani na dai ianod an barko. Minsan siring, posible sana ini kun segurado asin mapuersa an mga kawing kan kadena. Ta kun dai mapapatod an kadena.

Pareho kaiyan an kamugtakan kan Kristianong kongregasyon. Tanganing magin makosog asin maoswag an kongregasyon, an indibiduwal na mga miembro kaipuhan na borogkos sa pagkasararo. Ano an nagbobogkos sa sainda? An pagkamoot, na iyo an pinakamakosog na puersa para sa pagkasararo. Bakong makangangalas na sinabihan ni Jesu-Cristo an saiyang mga disipulo: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.” Tunay nanggad, an tunay na mga Kristiano igwa kan klase nin pagkaminorootmootan na lampas pa sa basta pagkakatood asin paggalang sa lambang saro. Pinapatalubo ninda an mapagsakripisyong pagkamoot.—Juan 13:34, 35.

Pag-apresyar sa Satong mga Kapagtubod

Dakol na kongregasyon an kompuesto nin mga tawo na laen-laen an edad, rasa, nasyonalidad, kultura, lenguahe, asin sosyal na pinaghalean. An lambang miembro igwa kan sadiri niang mga gusto asin dai gusto, mga linalaoman asin kinakatakotan, asin sa parate an lambang saro igwa nin personal asin magabat na pinapasan—tibaad maluyang salud o kadaihan nin seguridad sa pinansial. An pagkalaenlaen na ini tibaad magpadepisil sa Kristianong pagkasararo. Kun siring, ano an makakatabang sa sato na pahiwason an pagkamoot asin magdanay na nagkakasararo sa ibong kan kadepisilan na iyan? An tunay na pag-apresyar sa gabos na miembro kan kongregasyon makakatabang sa sato na pararomon an pagkamoot niato sa lambang saro.

Pero, ano an boot sabihon kan pag-apresyar sa sarong tawo? Oyon sa The New Shorter Oxford English Dictionary, an tataramon na “apresyar” nangangahulogan na “magin makatanosan o mapagrisa sa; rasonableng halangkaw na pagheling; midbidon bilang mahalaga o marahayon; magin mapagpasalamat sa.” Kun inaapresyar niato an satong mga kapagtubod, mapagrisa kita sa saindang mga pangangaipo, halangkaw an pagheling niato sa sainda, minimidbid niato an saindang karahayan, asin nagpapasalamat kita na uminiba sinda sa sato sa pagsamba. Bilang resulta, orog niato sindang mamomotan na marhay. An halipot na pag-estudyar sa isinurat ni apostol Pablo sa mga Kristiano sa Corinto kan enot na siglo makakatabang sa sato na maaraman kun paano niato ikakapaheling an Kristianong pagkamoot sa pinakalubos na paagi.

“Napipiot” an mga Taga Corinto

Isinurat ni Pablo an enot niang surat sa mga taga Corinto kan 55 C.E. asin an ikaduwa niang surat kan mayo pa nin sarong taon pakalihis kan enot. Ipinaparisa kan mga komento nia na an nagkapira sa kongregasyon nin Corinto mayo nin pag-apresyar sa saindang mga kapagtubod. Ilinadawan ni Pablo an kamugtakan na iyan sa minasunod na mga tataramon: “An samong ngoso buka sa saindo, mga taga Corinto, an samong puso huminiwas. Kamo dai napipiot sa samo, kundi kamo napipiot sa sadiri nindong mamomoton na mga kapadangatan.” (2 Corinto 6:11, 12) Ano an boot sabihon ni Pablo kan iladawan nia sinda na “napipiot”?

 An boot niang sabihon iyo na nalilimitaran sinda asin mayo nin sa pusong pagkabuka nin palad. An sarong nag-espesyalisar sa Biblia naniniwala na an pagkamoot ki Pablo kan mga taga Corinto “naolang kan depisil na mga kamugtakan huli sa daing basehan na suspetsa . . . asin nakolgan na amor propio.”

Mangnoha kun ano an itinaong hatol ni Pablo: “Sa pagbalos nin siring man sana—ako nagtataram na garo sa mga aki—humiwas man kamo.” (2 Corinto 6:13) Inenkaminar ni Pablo an mga taga Corinto na pahiwason an pagkamoot sa mga kapagtubod. Mangangahulogan ini na namomotibar sinda, bako nin pagdiskompiar asin kahayakpitan nin isip, kundi nin positibong aktitud asin pusong buka an palad.

Pagpahiwas kan Pagkamoot Ngonyan

Nakakaogma na maheling kun paano an tunay na mga parasamba sa Dios ngonyan naghihingoang marhay na pahiwason an pagkamoot sa lambang saro. Totoo, an pagpahiwas nagkakaipo nin paghihingoa. Bako sana iyan na sarong intelektuwal na pagpraktis. An pagpahiwas naghahagad na kita gumawe nin laen sa mga tawo na dai namumuhay oyon sa mga pamantayan sa Biblia. An siring na mga tawo sa parate kakadikit an pag-apresyar sa iba. Sinda puedeng magin daing konsiderasyon, mayo nin tamang paggalang, asin mapagtuya. Kun siring, nungka niatong togotan an satong sadiri na maimpluwensiahan kan mga aktitud na ini. Magigin makamomondo nanggad kun an pagkamoot niato, arog kan mga taga Corinto, mapupurog kan mga pakamate nin pagdiskompiar! Ini puedeng mangyari kun tolos niatong naheheling an mga depekto nin sarong Kristianong tugang alagad maluway sa pagrekonoser kan saiyang marahay na mga kualidad. Iyan puede man na mangyari kun napipiot an satong kapadangatan huling iba an kultura nin sarong indibiduwal.

Sa kabaliktaran, an lingkod nin Dios na pinapahiwas an pagkamoot igwa nin tunay na pag-apresyar sa mga kapagtubod. Halangkaw an pagheling nia sa  sainda, iginagalang nia an saindang dignidad, asin mapagrisa sia sa saindang mga pangangaipo. Dawa kun igwa nin totoong rason na magreklamo, sia galaga na magpatawad asin habong magtanom nin raot nin boot. Imbes, may tiwala sia sa mga motibo kan saiyang mga kapagtubod. An sa pusong pagkabuka nin palad nagtatabang sa saiya na ipaheling an klase nin pagkamoot na nasa isip ni Jesus kan ihula nia: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.”—Juan 13:35.

Rumani Asin Magkaigwa nin Bagong mga Katood

An odok sa pusong pagkamoot mapangyari sa sato na rumani bako sana sa grupo nin mga katood niato kundi makiasosyar man sa mga kakongregasyon niato na dai niato parateng nakakaibaiba. Sairisay daw an mga tawong ini? An nagkapira sa satong Kristianong mga tugang na lalaki asin babae masusupgon o, huli sa manlaenlaen na dahelan, pipira sana an katood. Tibaad sa primero isipon niato na kakadikit kan bagay na magkakapareho kita, apuera sa pagkakapareho niato sa pagsamba. Alagad bako daw na totoo na an nagkapira sa pinakadayupot na magkakatood sa Biblia mga tawo na, sa panluwas na itsura, kakadikit kan pagkakapareho?

Halimbawa, si Rut asin Noemi magkalaen an edad, nasyonalidad saka kultura, asin pati an nagimatan na lenguahe. Dawa siring, an pagigin magkatood ninda bakong apektado kan siring na mga pagkakalaen. Si Jonatan pinadakula bilang prinsipe, asin si David bilang pastor. Dakula an diperensia ninda sa edad, alagad an pagkakatood ninda saro sa pinakadayupot na pagkakatood na nasambitan sa Banal na Kasuratan. An duwang pagkakatood na ini nagin gikanan nin kaogmahan asin espirituwal na suporta para sa mga nanonongdan.—Rut 1:16; 4:15; 1 Samuel 18:3; 2 Samuel 1:26.

Dawa ngonyan an dayupot na mga pagkakatood nangyayari sa pag-oltanan nin tunay na mga Kristiano na magkalaen an edad o biyong magkalaen an mga situwasyon sa buhay. Halimbawa, si Regina sarong nagsosolong ina na may duwang tinedyer na aki. * Sibot an iskedyul nia asin kakadikit an panahon nia sa pakikiasosyar. Si Harald asin Ute retiradong mag-agom na mayo nin mga aki. Sa panluwas, an duwang pamilyang ini garo baga kakadikit kan pagkakapareho. Alagad iinaplikar ni Harald asin Ute an hatol sa Biblia na humiwas. Naghingoa sinda na iayon si Regina asin an saiyang mga aki sa dakol na aktibidad, na iniibanan sinda sa pampublikong ministeryo asin nag-aaling-aling.

Puede daw kitang humiwas bako sanang sa regular na grupo nin satong mga katood? Taano ta dai maghingoang makiibaiba nin mas dayupot sa mga kapagtubod na iba an nasyonalidad, kultura, o edad?

Pag-asikaso sa mga Pangangaipo nin Iba

An pusong buka an palad mapahiro sa sato na magin maasikaso sa mga pangangaipo nin iba. Anong klaseng mga pangangaipo? Bueno, obserbari an mga miembro kan Kristianong kongregasyon. An mga hoben nangangaipo nin paggiya, an mga may edad na nangangaipo nin pagparigon sa boot, an nasa bilog na panahon na mga ministro nangangaipo nin komendasyon asin suporta, asin an mga kapagtubod na pinanluluyahan nin boot nangangaipo nin maghihinanyog sa sainda. An gabos igwa nin mga pangangaipo. Gusto niato na asikasohon an mga pangangaipong ini sagkod sa rasonableng mahihimo niato.

An pagpahiwas nangangahulogan man na papahelingan niato nin pagsabot an mga may partikular na mga pangangaipo. May midbid daw kamo na pabalikbalik an helang o napapaatubang sa iba pang klase nin pagbalo sa buhay? An pagpahiwas kan pagkamoot asin pagkultibar nin pusong buka an palad makakatabang sa saindo na magin mapagsabot asin mapagsuportar sa mga nangangaipo.

Huling madali nang maotob an mga propesiya sa Biblia para sa harani nang ngapit, an makosog na mga bogkos nin pagkasararo sa laog kan kongregasyon magigin mas mahalagang marhay kisa sa mga rogaring, kakayahan, o nagibo. (1 Pedro 4:7, 8) An lambang saro sa sato puedeng personal na makakontribwir sa pagpakosog kan mga bogkos nin pagkasararo sa satong sadiring kongregasyon paagi sa pagpahiwas kan pagkamoot sa satong mga kapagtubod. Makakasierto kita na bebendisyonan kita ni Jehova nin igo huli sa paghiro kaoyon kan mga tataramon kan saiyang Aki, si Jesu-Cristo, na nagsabi: “Ini an sakong togon, na kamo magkaminorootmootan siring kan pagkamoot ko sa saindo.”—Juan 15:12.

[Nota sa Ibaba]

[Blurb sa pahina 10]

An pag-apresyar sa satong mga tugang na lalaki asin babae nangangahulogan na halangkaw an pagheling niato sa sainda, iginagalang niato an saindang dignidad, asin mapagrisa kita sa saindang mga pangangaipo