Sarong Tawo na Namoot sa Buhay Asin sa mga Tawo

NATAPOS ni Daniel Sydlik, sarong haloy nang miembro kan Namamahalang Grupo kan Mga Saksi ni Jehova, an saiyang daganon na buhay kan Martes, Abril 18, 2006. Sia 87 anyos asin nakapaglingkod bilang miembro kan pamilyang Bethel sa Brooklyn, Nueva York, sa laog nin haros 60 taon.

Si Tugang na Dan, na mapagpadangat na apod saiya kan mga dayupot sa saiya, nag-abot sa Bethel kan 1946. Bago kaiyan, naglingkod sia bilang espesyal payunir sa California asin nabilanggo man nin halipot na panahon durante kan Guerra Mundial II huli sa saiyang Kristianong neutralidad. An saiyang mga eksperyensia durante kan panahon na idto malinaw na ilinadawan sa saiyang estorya nin buhay, na yaon sa The Watchtower na Hunyo 1, 1985, na may titulong “How Priceless Your Friendship, O God!”

Si Tugang na Sydlik midbid bilang tawong simple asin madaling dolokon. Kun sia nangengenot sa pan-agang pagsamba para sa pamilyang Bethel, an saiyang positibong aktitud asin pagkamoot sa buhay sa parate nababanaag sa saiyang pambukas na mga tataramon: “Marahay na kita buhay tanganing paglingkodan an tunay asin nabubuhay na Dios.” Bilang nagpapahayag sa publiko, ineenkaminar nia an iba na magkaigwa kan siring kaining punto de vista, na nagtatao nin mga pahayag na may tema na arog baga nin “Maogma an Banwaan na an Dios Iyo si Jehova,” “Pagpabanaag kan Kagayagayahan ni Jehova,” “Papagdanayon na Buhay an Laad kan Espiritu nin Dios,” asin “An Pinakamarahay Maabot Pa.”

Kan 1970, naagom ni Tugang na Sydlik si Marina Hodson, taga Inglaterra, na ilinadawan nia bilang “sarong suporta na isinugo nin Dios.” Magkaibanan sindang naglingkod ki Jehova sa laog nin labing 35 taon.

Durante kan saiyang mga taon sa Bethel, si Tugang na Sydlik naglingkod sa manlaenlaen na departamento, kaiba an imprentahan asin Departamento nin Pagsurat. Naglingkod man sia sa estasyon nin radyo na WBBR. Dangan, kan Nobyembre 1974, ninombrahan sia bilang miembro kan Namamahalang Grupo asin sa katapustapusi naglingkod bilang miembro kan Komite sa Tawohan asin Komite sa Pagsurat.

Sa laog nin labing 30 taon, an paglilingkod ni Tugang na Sydlik sa Komite sa Tawohan nagpamidbid kan saiyang hararom na pagkamoot sa mga tawo. Pinarigon nia an boot kan dakol paagi sa saiyang nag-aaningal na boses, na pirmeng dinadara an atension sa mahal na marhay na pribilehio niato na paglingkodan si Jehova. Dayaday niang idinodoon na an tunay na kaogmahan nakadepende, bakong sa panluwas na mga bagay, kundi sa satong relasyon ki Jehova asin sa satong aktitud sa buhay.

Minsan ngani hinahanaphanap na marhay kan pamilyang Bethel si Tugang na Sydlik, an saiyang halimbawa bilang indibiduwal na namomoot talaga sa buhay asin sa mga tawo padagos na magigirumdoman. Kompiado kita na sia kabilang sa mga nasambitan sa Kapahayagan 14:13: “Maogma an mga gadan na magagadan na kasaro kan Kagurangnan poon sa panahon na ini. Iyo, sabi kan espiritu, magpahingalo na sinda sa saindang mga pagpapagal, huli ta an mga bagay na saindang ginibo kaibanan ninda.”