Itokdo Kun Ano Man Nanggad an Itinotokdo kan Biblia
Itokdo Kun Ano Man Nanggad an Itinotokdo kan Biblia
“Gumibo kamo nin mga disipulo sa mga tawo kan gabos na nasyon, . . . na tokdoan nindo sinda.”—MATEO 28:19, 20.
1. Ano an masasabi manongod sa pagigin madaling makua kan Biblia?
AN Tataramon ni Jehova, an Banal na Biblia, saro sa kaguranggurangi asin may pinakamahiwas an sirkulasyon na libro sa kinaban. An kisuerra kabtang kaiyan ikinatradusir na sa labing 2,300 na lenguahe. Labing 90 porsiento kan mga nag-iistar sa daga an makakakua kaiyan sa sadiri nindang tataramon.
2, 3. (a) Taano ta may karibarawan manongod sa mga katokdoan kan Biblia? (b) Anong mga hapot an pag-oolayan niato?
2 Minilyon na tawo an nagbabasa nin sarong kabtang kan Biblia aroaldaw. An nagkapira nabasa na nin dakol na beses an bilog na Biblia. Rinibong relihiosong grupo an naghihingako na nakabasar an saindang katokdoan sa Biblia, alagad dai sinda nagkakaoroyon sa itinotokdo kaiyan. Nakakadagdag pa sa karibarawan an grabeng dai pagkaoroyon sa tahaw nin mga magkarelihion. An iba igwa nin mga pagduda manongod sa Biblia, sa ginikanan kaiyan, asin sa halaga kaiyan. Minamansay iyan kan dakol bilang sarong sagradong libro na ginagamit sana sa seremonya sa panunumpa o sa pagsumpa na magsasabi kan totoo sa korte.
3 An totoo, yaon sa Biblia an mapuersang tataramon o mensahe nin Dios para sa katawohan. (Hebreo 4:12) Bilang Mga Saksi ni Jehova, gusto niato kun siring na manodan kan mga tawo kun ano an itinotokdo kan Biblia. Naoogma kitang marhay na gibohon an sugo na itinao ni Jesu-Cristo sa saiyang mga parasunod kan sia magsabi: “Paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda.” (Mateo 28:19, 20) Sa pampublikong ministeryo niato, nakakanompong kita nin mga tawong sadiosan an puso na ikinakapurisaw an lakop sa kinaban na karibarawan sa relihion. Gusto nindang maaraman an katotoohan manongod sa satong Kaglalang asin nagmamawot na manodan an sinasabi kan Biblia manongod sa kahulogan nin buhay. Estudyaran niato an tolong hapot na ikinakapurisaw nin dakol na tawo. Sa lambang saro kaiyan, tatawan niato nin atension an salang sinasabi kan mga namomoon sa relihion, dangan rerepasohon niato kun ano man nanggad an itinotokdo kan Biblia. An mga hapot iyo ini: (1) An Dios daw may pagmakolog sa sato? (2) Taano ta yaon kita digdi? (3) Ano an nangyayari sa sato kun kita magadan?
An Dios daw May Pagmakolog?
4, 5. Taano ta iniisip nin mga tawo na an Dios mayong pagmakolog sa sato?
4 Ponan niato sa hapot na, An Dios daw may pagmakolog sa sato? Makamomondo, iniisip nin dakol na tawo na an simbag mayo. Taano ta siring kaiyan an saindang saboot? An sarong dahelan iyo na nabubuhay sinda sa sarong kinaban na pano nin pagkaongis, guerra, asin pagsakit. ‘Kun talagang may pagmakolog an Dios,’ an pangangatanosan ninda, ‘seguradong oolangon nia na mangyari an siring na makaturotristeng mga bagay.’
5 An saro pang dahelan kun taano ta iniisip kan mga tawo na mayong pagmakolog sa sato an Dios iyo na arog kaiyan an ipinapamate sa sainda kan mga namomoon sa relihion. Ano an parateng sinasabi kan mga klerigo kun may nangyayaring trahedya? Kan an sarong babae magadanan nin duwang sadit pang aki sa aksidente sa auto, an saiyang ministro nagsabi: “Kabotan iyan nin Dios. An Dios nangangaipo nin duwa pang anghel.” Kun sinasabi iyan kan mga klerigo, an totoo ibinabasol ninda sa Dios an makaturotristeng mga bagay na nangyayari. Pero, si disipulo Santiago nagsurat: “Kun binabalo, dai nin siisay man na magsabi: ‘Binabalo ako nin Dios.’ Huli ta paagi sa marompot na mga bagay an Dios dai puedeng baloon ni binabalo man nia an siisay man.” (Santiago 1:13) Si Jehova Dios nungkang nagpapangyari nin maraot. Sa katunayan, “harayong gumawe an tunay na Dios nin may karigsokan.”—Job 34:10.
6. Siisay an nasa likod kan karigsokan asin pagsakit sa kinaban na ini?
6 Kun siring, taano ta grabe an karigsokan asin pagsakit? An sarong dahelan iyo na an katawohan sa pangkagabsan isinikwal an Dios bilang Namamahala, na habong magpasakop sa saiyang matanos na mga ley asin prinsipyo. An mga tawo daing pag-aram na sinda nagpasakop sa Kaiwal nin Dios, si Satanas, huli ta “an bilog na kinaban namumugtak sa kapangyarihan kan saro na marigsok.” (1 Juan 5:19) An pakaaram sa katotoohan na ini nagpapagin mas pasil na masabotan kun taano ta igwa nin maraot na mga situasyon. Si Satanas marompot, maongison, mapandaya, asin maringis. Kaya maninigo niatong laoman na ipapabanaag kan kinaban an personalidad kan namamahala kaiyan. Bakong makangangalas na igwa nin grabeng karigsokan!
7. Ano an nagkapirang dahelan kan pagsakit na naeeksperyensiahan niato?
7 An pagkabakong sangkap nin tawo saro pang dahelan kan pagdusa na naeeksperyensiahan niato. Tendensia kan makasalan na mga tawo na makipagdaogan para sa pagdominar, asin parateng nagbubunga iyan nin mga guerra, pan-aapi, asin pagsakit. An Eclesiastes 8:9 angay na nagsasabi: “An tawo nagsakop sa tawo sa saiyang ikakaraot.” An dugang pang dahelan nin pagsakit iyo an “panahon asin pagkanorongod.” (Eclesiastes 9:11) An mga tawo parateng nakakaeksperyensia nin kalamidad huling sinda yaon sa salang lugar sa salang panahon.
8, 9. Paano niato naaaraman na si Jehova talagang may pagmakolog sa sato?
8 Nakakarangang maaraman na dai pinapangyari ni Jehova an pagsakit. Alagad talaga daw na nagmamakolog an Dios sa mga nangyayari sa satong buhay? An nakakaogmang simbag, iyo! Aram niato na nagmamakolog si Jehova huling an saiyang ipinasabong na Tataramon nagsasabi sa sato kun taano ta tinogotan nia an mga tawo na sundon an maraot na dalan. Kalabot sa mga dahelan nin Dios an duwang isyu: an saiyang soberaniya asin an integridad kan mga tawo. Huling sia an makakamhan sa gabos na Kaglalang, dai obligado si Jehova na sabihon sa sato kun taano ta tinotogotan nia an pagsakit. Pero, sinasabi nia iyan sa sato huling may pagmakolog sia sa sato.
9 Estudyare an dugang pang ebidensia na an Dios may pagmakolog sa sato. “Nakolgan an saiyang puso” kan an daga mapano nin karatan kan panahon ni Noe. (Genesis 6:5, 6) Laen na daw an pagmate nin Dios ngonyan? Bako, huli ta dai sia nagliliwat. (Malaquias 3:6) Ikinakauyam nia an inhustisya asin ikinakaongis an pakaheling sa mga tawo na nagsasakit. Itinotokdo kan Biblia na sa dai na mahahaloy hahaleon nin Dios an gabos na danyos na nagin resulta kan pamamahala nin tawo asin kan impluwensia kan Diablo. Bako daw na nakakakombensir na ebidensia iyan na an Dios may pagmakolog sa sato?
10. Ano an namamatean ni Jehova manongod sa pagsakit nin tawo?
10 An mga namomoon sa relihion minimisrepresentar an Dios kun sinasabi ninda na an mga trahedyang naeeksperyensiahan niato kabotan nia. Sa kabaliktaran, mawot ni Jehova na taposon an pagsakit nin tawo. “Sia may pagmakolog sa saindo,” an sabi kan 1 Pedro 5:7. Iyan man nanggad an itinotokdo kan Biblia!
Taano ta Yaon Kita Digdi?
11. Ano an parateng sinasabi kan mga relihion sa kinaban manongod sa buhay nin tawo digdi sa daga?
11 Estudyaran niato ngonyan an ikaduwang hapot na iniisip-isip nin dakol, Taano ta yaon kita digdi? An mga relihion sa kinaban parateng nagsisimbag na an tawo temporaryo sana digdi sa daga. Ibinibilang ninda an satong globo na saro sanang pondohan, o tangga, pasiring sa buhay sa ibang lugar. Salang itinotokdo nin nagkapirang klerigo na sa maabot na panahon lalaglagon nin Dios an planetang ini. Bilang resulta kan siring na katokdoan, inisip nin dakol na tawo na mas marahay pang lubos-luboson na ninda an saindang buhay mientras na magigibo pa ninda iyan huling kagadanan man sana an naghahalat sa sainda. Ano man nanggad an itinotokdo kan Biblia manongod sa kun taano ta yaon kita digdi?
12-14. Ano an itinotokdo kan Biblia mapadapit sa katuyohan nin Dios para sa daga asin sa katawohan?
12 An Dios igwa nin makangangalas na katuyohan para sa daga asin sa katawohan. ‘Dai Nia linalang an daga na dai nin kapakanan’ kundi ‘hinaman iyan tanganing pag-istaran.’ (Isaias 45:18) Dugang pa, “pinatindog [ni Jehova] an daga sa mga pasisikadan kaiyan; dai iyan matatanyog sagkod sa panahon na daing talaan, o sagkod lamang.” (Salmo 104:5) An pakaaram sa mga bagay na ini manongod sa katuyohan nin Dios para sa daga asin sa katawohan makakatabang sa sato na masabotan kun taano ta yaon kita digdi.
13 Ipinapaheling kan Genesis kapitulo 1 asin 2 na tinawan nin maingat na atension ni Jehova an pag-andam sa daga tanganing istaran nin tawo. Sa katapusan kan peryodo nin paglalang may koneksion sa satong globo, an gabos “marahayon.” (Genesis 1:31) Ibinugtak nin Dios an enot na lalaki asin babae, si Adan asin Eva, sa magayon na hardin nin Eden asin tinawan sinda nin abundang masiram na kakanon. Sinabihan an enot na mag-agom: “Pangagbunga asin pangagdakol kamo asin panoa nindo an daga patin sakopa nindo iyan.” Kaipuhan nindang magkaigwa nin sangkap na mga aki, pahiwason sa bilog na daga an mga sagkodan kan saindang istaran na tatamnan, asin mamomoton na sakopon an mga hayop.—Genesis 1:26-28.
14 Katuyohan ni Jehova na an sangkap na pamilya nin tawo mag-erok sa daga sagkod lamang. An Tataramon nin Dios nagsasabi: “An mga matanos mismo makakasadiri kan daga, asin sinda mag-eerok dian sagkod lamang.” (Salmo 37:29) Iyo, linalang an katawohan tanganing mabuhay na daing katapusan sa Paraiso digdi sa daga. Iyan an katuyohan nin Dios, asin iyan man nanggad an itinotokdo kan Biblia!
Ano an Nangyayari sa Sato Pagkagadan?
15. Ano an itinotokdo kan kadaklan na relihion sa kinaban manongod sa nangyayari sa sato kun kita magadan?
15 Pag-olayan niato ngonyan an ikatolong hapot na ikinakapurisaw nin dakol: Ano an nangyayari sa sato kun kita magadan? Itinotokdo kan kadaklan na relihion sa kinaban na igwa nin sarong bagay sa laog nin tawo na padagos na nabubuhay pagkagadan kan hawak. May nagkapirang grupo nin relihion na naniniwala pa man giraray sa ideya na pinapadusahan nin Dios an mga marigsok paagi sa daing sagkod na pagpasakit sa sainda sa nagkakalayong impierno. Alagad iyan daw an katotoohan? Ano man nanggad an itinotokdo kan Biblia manongod sa kagadanan?
16, 17. Oyon sa Biblia, ano an kamugtakan kan mga gadan?
16 An Tataramon nin Dios nagsasabi: “An mga buhay nakakaaram na sinda magagadan; alagad kun dapit sa mga gadan, mayo man lamang sinda nin pakaaram, ni may bayad pa man sinda.” Mantang an mga gadan ‘mayo man lamang nin pakaaram,’ dai sinda nakakadangog, nakakaheling, nakakapagtaram, nakakamate, o nakakapag-isip. Dai na sinda naggaganar nin ano man na bayad. Paano man nanggad ninda iyan magigibo? Dai sinda makakagibo nin ano man! Dugang pa, “an saindang pagkamoot asin an saindang pagkaongis patin an saindang pangimon nawara na,” huling dai sinda makakapaheling nin ano man na emosyon.—Eclesiastes 9:5, 6, 10.
17 Simple asin malinaw an sinasabi kan Biblia sa bagay na ini—an mga gadan dai nagpapadagos na mabuhay sa sarong lugar. Mayo nin ano man na minaluwas sa satong hawak sa kagadanan asin nagdadanay na buhay tangani na mamundag liwat sa ibang hawak, arog kan sinasabi kan mga naniniwala sa reenkarnasyon. Ikakailustrar niato iyan nin arog kaini: An satong buhay siring sa laad nin sarong kandila. Kun an laad maparong, dai iyan nagduduman sa kun saen. Nawawara na sana iyan.
18. Kun maaraman nin inaadalan sa Biblia na an mga gadan mayo nang pakaaram, anong mga konklusyon an magigibo nia?
18 Isip-isipon nindo an implikasyon kan sarong simple alagad mapuersang katotoohan na iyan. Kun maaraman nin inaadalan sa Biblia na an mga gadan mayo nang pakaaram, siertong madali siang makakapagkonklusyon na gurano man an tibaad paghinanakit kan gadan niang mga apoon kan sinda nabubuhay pa, an mga ini dai makakapanribok sa saiya. Siertong masasabotan man nia tolos na an saiyang nagadan na mga namomotan dai na makakadangog, makakaheling, makakapagtaram, makakamate, o makakapag-isip. Kun siring, dai ninda puedeng maeksperyensiahan an dai makayang kapungawan sa purgatoryo o an pagdusa sa lugar nin pagpasakit sa kalayo. Minsan siring, an Biblia nagtotokdo na bubuhayon liwat an mga gadan na nasa memorya nin Dios. Kanigoan kamakangangalas na paglaom!—Juan 5:28, 29.
Sarong Bagong Libro na Magagamit Niato
19, 20. Bilang mga Kristiano, ano an satong paninimbagan, asin anong pantabang sa pag-adal kan Biblia an espesyalmenteng dinisenyo tanganing magamit niato sa satong ministeryo?
19 Inestudyaran niato an tolo sanang hapot na iniisip-isip kan dakol na tawo. Sa lambang saro kaiyan, an itinotokdo kan Biblia malinaw asin deretso sa punto. Kanigoan na kagayagayahan na sabihon an mga katotoohan na iyan sa mga gustong makaaram kan itinotokdo kan Biblia! Alagad igwa nin dakol pang ibang mahahalagang hapot na an mga sadiosan an puso nangangaipo nin nakakakontentong simbag. Bilang mga Kristiano, may paninimbagan kita na tabangan sindang makua an simbag sa mga hapot na iyan.
20 Sarong angat an magtokdo nin katotoohan sa Kasuratan sa paagi na malinaw asin nakakapukaw sa puso. Tanganing tabangan kita na mapangganahan an angat na iyan, “an maimbod asin mapagmansay na oripon” nag-andam nin sarong libro na espesyalmenteng dinisenyo tanganing magamit niato sa satong Kristianong ministeryo. (Mateo 24:45-47) An 224-pahinas na librong ini may titulong Ano Man Nanggad an Itinotokdo kan Biblia?
21, 22. Ano an nagkapirang pambihirang kabtang kan librong Ano Man Nanggad an Itinotokdo kan Biblia?
21 Ilinuwas sa 2005/06 na “Diosnon na Pagkuyog” na mga Pandistritong Kombension kan Mga Saksi ni Jehova, an librong ini igwa nin manlaenlaen na pambihirang mga kabtang. Halimbawa, igwa nin limang pahinang introduksion na nakakatabang na marhay sa pagpopoon nin mga pag-adal sa Biblia. Posibleng marhay na mapapasilan kamong ipakipag-olay an mga retrato asin teksto na yaon sa introduksion. Puede man nindong gamiton an sarong kabtang kaini tanganing ipaheling sa mga inaadalan sa Biblia kun paano hahanapon an mga kapitulo asin bersikulo sa Biblia.
22 Simple asin malinaw an estilo nin pagkasurat kan librong ini. Ginibo an paghihingoa na aboton an puso kan inaadalan sa Biblia paagi sa paglabot sa saiya noarin man posible. An kada kapitulo igwa nin nagkapirang pambukas na hapot asin sarong kahon sa poro na may titulong “Kun Ano an Itinotokdo kan Biblia.” Yaon sa kahon an sono sa Kasuratan na mga simbag sa pambukas na mga hapot. An marahayon na mga retrato asin kapsion saka an nasusurat na mga ilustrasyon sa publikasyon na ini makakatabang sa inaadalan sa Biblia na masabotan an bagong mga ideya. Dawa ngani an pangenot na kabtang kan libro pinagdanay na medyo simple, igwa nin apendise na mataong lugar sa saindo na pensaron nin mas hararom an 14 mahalagang tema kun kaipuhan kan inaadalan sa Biblia an dagdag na impormasyon.
23. Ano an itinaong mga suhestion mapadapit sa paggamit kan librong Itinotokdo kan Biblia sa mga inaadalan sa Biblia?
23 An librong Itinotokdo kan Biblia dinisenyo tanganing tabangan kita na tokdoan an mga tawo na manlaenlaen an naabot na edukasyon asin manlaenlaen an relihion. Kun an sarong inaadalan sa Biblia mayo nin ano man na kaaraman sa Biblia, tibaad mangaipo nin sobra sa sarong sesyon nin pag-adal tanganing matapos an sarong kapitulo. Dai paghidaleon an pag-adal, kundi pagmaigotan na aboton an puso kan inaadalan sa Biblia. Kun dai nia nasasabotan an sarong ilustrasyon na ginamit sa libro, ipaliwanag iyan o gumamit nin ibang ilustrasyon. Mag-andam na marhay, gibohon an saindong pinakamakakaya na gamiton nin epektibo an libro, asin mamibi para sa tabang nin Dios tanganing ‘magamit nindo an tataramon kan katotoohan sa tamang paagi.’—2 Timoteo 2:15.
Magin Mapagpasalamat sa Saindong Pribilehio na Daing Kaagid sa Halaga
24, 25. Tinawan ni Jehova an saiyang banwaan nin anong mga pribilehio na daing kaagid sa halaga?
24 Tinawan ni Jehova an saiyang banwaan nin mga pribilehio na daing kaagid sa halaga. Saiyang pinangyari na maaraman niato an katotoohan manongod sa saiya. Nungka niatong ipasipara sana an pribilehiong iyan! Total, itinago nin Dios an saiyang mga katuyohan sa mga maabhaw asin ihinayag iyan sa mga mapakumbaba. Mapadapit digdi, si Jesus nagsabi: “Hayag takang inoomaw, Ama, Kagurangnan kan langit asin daga, huli ta itinago mo an mga bagay na ini sa mga madonong asin may inadalan asin ipinahayag mo iyan sa mga aking sadit.” (Mateo 11:25) Sarong pambihirang onra an mapabilang sa mga mapakumbaba na naglilingkod sa Unibersal na Soberano, si Jehova.
25 Tinawan man kita nin Dios nin pribilehio na tokdoan an iba manongod sa saiya. Girumdomon na minisrepresentar sia kan mga nagtokdo nin mga kaputikan manongod sa saiya. Huli kaini, dakol na tawo an nagkaigwa nin biyong salang impresyon manongod ki Jehova, na naghohona na sia mayong pagmakolog asin matagas an puso. Kamo daw andam, iyo, galaga pa ngani, na itanos an salang pakasabot na iyan? Gusto daw nindo na an mga tawong sadiosan an puso sa gabos na lugar makaaram kan katotoohan manongod sa Dios? Kun siring, ipaheling nanggad an saindong diosnon na pagkuyog paagi sa maigot na paghuhulit asin pagtotokdo sa iba kan sinasabi kan Kasuratan manongod sa mahalagang marhay na mga tema. An mga naghahanap kan katotoohan kaipuhan na makaaram kun ano man nanggad an itinotokdo kan Biblia.
Ano an Isisimbag Nindo?
• Paano niato naaaraman na may pagmakolog sa sato an Dios?
• Taano ta yaon kita digdi sa daga?
• Ano an nangyayari sa sato kun kita magadan?
• Anong mga kabtang kan librong Itinotokdo kan Biblia an espesyalmenteng inaapresyar nindo?
[Mga Hapot Para sa Pag-adal]
[Mga Ritrato sa pahina 22]
Itinotokdo kan Biblia na matatapos an pagsakit
[Credit Lines]
Sa toong itaas, aking babae: © Bruno Morandi/age fotostock; sa wala, babae: AP Photo/Gemunu Amarasinghe; sa ibaba sa too, mga dulag: © Sven Torfinn/Panos Pictures
[Ritrato sa pahina 23]
An mga matanos mabubuhay sagkod lamang sa Paraiso