Mga Hapot Hale sa mga Parabasa

Sa anong sentido na an paratipon nakanompong nin “saro [sanang] lalaki sa sangribo” alagad dai nakanompong nin “sarong babae sa gabos na ini”?—Eclesiastes 7:28.

Tanganing masabotan nin tama an ipinasabong na mga tataramon na ini, dapat nguna niatong masabotan kun paano minamansay nin Dios an mga babae. An Biblia nagtataram manongod ki Rut na manugang kan balong si Noemi bilang “ekselenteng babae.” (Rut 3:11) Segun sa Talinhaga 31:10, an sarong marahay na agom na babae “orog nanggad an halaga kisa mga korales.” (An American Translation) Ano, kun siring, an boot sabihon ni Hadeng Salomon kan suanoy na Israel kan sabihon nia: “Nakanompong ako . . . nin sarong tunay na lalaki sa sangribo, alagad nungka nin sarong tunay na babae”?—Moffatt.

Ipinapaheling kan konteksto na siertong lakop an hababang moral na mga pamantayan sa tahaw kan mga babae kan panahon ni Salomon. (Eclesiastes 7:26) Ini sa pangenot puedeng resulta kan impluwensia kan mga babaeng taga ibang daga na naggigibo nin pagsamba ki Baal. Dawa si Hadeng Salomon nagpadara sa pan-iimpluwensia kan dakol niang agom na taga ibang daga. “Nagkaigwa sia nin pitong gatos na agom na babae, mga prinsesa, asin tolong gatos na kasaroan,” an sabi kan Biblia, “asin an saiyang mga agom na babae luway-luway na ikiniling an saiyang puso” sa pagsamba sa falsong mga dios. (1 Hade 11:1-4) An moral na mga pamantayan kan mga lalaki bako man na marahay—bihirang may sarong matanos na lalaki sa sangribo, haros mayo na. “Iyo sana ini an sakuyang nakua,” an konklusyon ni Salomon, “na linalang na tanos kan tunay na Dios an katawohan, alagad ta sinda mismo an nagharanap nin dakol na plano.” (Eclesiastes 7:29) Sarong konklusyon ini manongod sa katawohan—an lalaki nanonongod sa rasa nin tawo, bakong an lalaki en komparasyon sa babae. Huli kaini, an mga tataramon na yaon sa Eclesiastes 7:28 maninigong mansayon bilang komento manongod sa pangkagabsan na kamugtakan sa moral kan mga tawo kan panahon ni Salomon.

Minsan siring, may saro pang posibleng kahulogan an bersikulong ini. Puede man na iyan propetiko, huling mayo noarin man nin babae na nakapagtao nin sangkap na pagkuyog ki Jehova. Alagad may sarong lalaki na siring kaiyan—si Jesu-Cristo.—Roma 5:15-17.

[Ritrato sa pahina 31]

“Sarong lalaki sa sangribo”