Sarong Sentenaryo na May Katuyohan sa Buhay

SI Elin saro sa 60 katawo sa Sweden na ilinista kasuarin pa sana na nasa 105 anyos an edad o mas gurang pa. Sia mismo 105 anyos na. Minsan ngani nakaistar sia sa sarong erokan para sa mga may edad na, an saiyang salud nagtotogot sa saiya na padagos na maglingkod bilang aktibong Saksi ni Jehova, an pinili niang pamumuhay labing 60 taon na an nakaagi.

Sa paghuhulit sa iba, sinusunod ni Elin an arogan na itinao ni apostol Pablo kan sia nakabilanggo sa sadiring harong. Hinulitan ni Pablo an gabos niang bisita. (Gibo 28:16, 30, 31) Kaagid kaiyan, inaaprobetsaran ni Elin an lambang oportunidad na makipag-olay sa mga paralinig, dentista, doktor, painador, nars, asin iba pa na nakakamidbid nia sa erokan, na ipinapaabot sa sainda an maogmang bareta na manonompongan sa Biblia. Sa panapanahon, an mga kapagtubod sa kongregasyon ni Elin inaagda pa ngani an saindang mga inaadalan sa Biblia na bisitahon sia tanganing makinabang sinda sa saiyang kaaraman asin eksperyensia.

Inaapresyar kan mga miembro kan kongregasyon ni Elin an saiyang masinggayang personalidad asin interes. An sarong kapwa Saksi nagsabi: “Igwa sia nin pambihirang abilidad na makasubaybay sa mga aktibidad kan kongregasyon. Nagigirumdoman nia an ngaran kan gabos na aki asin kan mga nagbalyo kasuarin pa sana sa kongregasyon.” Midbid man na marhay si Elin sa saiyang pagkamapag-istimar, kualidad na magpangisi, asin positibong pagmansay sa buhay.

Ano an nakakatabang ki Elin na mapagdanay an saiyang kagayagayahan asin makakonsentrar sa saiyang katuyohan sa buhay? Nagbabasa sia nin teksto sa Kasuratan kada aldaw gikan sa pulyetong Pagsiyasat sa Kasuratan Aroaldaw, na ipinublikar kan Mga Saksi ni Jehova. Sa tabang nin sarong lente, nagbabasa man sia nin sarong kabtang kan Biblia aroaldaw. Nag-aandam si Elin para sa semanal na mga pagtiripon kan Mga Saksi ni Jehova, asin minsan ngani dai na kaya kan saiyang hawak na makaatender sa mga iyan, naghihinanyog sia sa mga rekording kan mga pagtiripon na ini. An regular na pagbasa kan Biblia asin kan mga publikasyon na basado sa Biblia asin an dai pagpabaya sa Kristianong mga pagtiripon makakatabang sa sato na magkaigwa nin nakakakontento asin may katuyohan na buhay ano man an satong edad.—Salmo 1:2; Hebreo 10:24, 25.