Si Samuel Nagpalakop sa Tunay na Pagsamba

SINAGWE nin sarong propeta an mga kapagtubod na naghahagad na magkaigwa nin tawong hade asin sinadol nia sinda na kuyogon an Dios. Tanganing patunayan an saiyang autoridad, naghagad sia ki Jehova nin sarong tanda sa porma nin bagyo. Haros mayo nin mga bagyong maoranon sa Israel sa panahon na ini kan taon, an mga aldaw nin pag-ani nin trigo. Pero, an Dios nagpaabot nin mga daguldol asin oran. Bilang resulta, an banwaan nagkaigwa nin dakulang takot ki Jehova asin sa saiyang representante, si Samuel.—1 Samuel 12:11-19.

Si Samuel na propeta parasurat man. An saiyang historikong salaysay na pano nin aksion may lawig na mga 330 taon asin kaiba an pambihirang mga gibo kan mga Hokom kan Israel. Halimbawa, an totoong nangyari sa buhay ni Samson, an pinakamakosog na tawong nabuhay kasuarin man, nagin tema kan mga berso asin opera siring man kan iba pang mga pasale sa entablado asin sine. (Hokom, kapitulo 13–16) Si Samuel nagsurat man manongod ki Rut asin sa saiyang panugangan na babae, si Noemi, na parehong balo asin pobre. An tunay na estoryang ini na may maogmang katapusan interesante man na marhay.—Rut, kapitulo 1–4.

Anong mga leksion an manonodan niato sa mga isinurat ni Samuel asin sa saiyang buhay? Paano nia pinalakop an tunay na pagsamba?

An Enot Niang mga Taon

An ama ni Samuel, si Elcana, sarong parasamba ki Jehova asin mamomoton na agom na lalaki. An agom ni Elcana na si Ana sarong makosog sa espirituwal na babae. Sa harong ni Jehova sa Silo, an baog nang si Ana odok na namibi, na nanunuga: “O Jehova nin mga hukbo, kun saimong mamasdan nanggad an kasakitan kan saimong oripon na babae asin girumdomon nanggad ako, asin dai mo lilingawan an saimong oripon na babae asin tawan nanggad an saimong oripon na babae nin sarong aking lalaki, itatao ko sia ki Jehova sa gabos na aldaw kan saiyang buhay, asin mayo nin labaha na maagi sa saiyang payo.” (1 Samuel 1:1-11) Nangangahulogan ini na an aki itatagama para sa paglilingkod ki Jehova.

Si Ana namibi nin silensio. “Mga ngabil sana nia an nagkikibigkibig,” an sabi kan salaysay. An Halangkaw na Saserdoteng si Eli salang naghona na sia burat asin sinaway nia ini. Minsan siring, magalang na ipinaliwanag ni Ana an saiyang situwasyon, asin si Eli nagsabi: “Lakaw sa katoninongan, asin itao logod kan Dios nin Israel an saimong pakimaherak na hinagad mo sa saiya.” Itinao iyan ni Jehova, huling an salaysay nagpapadagos: “Nangyari na pakaagi nin sarong taon nagbados si Ana asin nangaki nin sarong aking lalaki asin nginaranan nia ining Samuel, huling, sabi nia, ‘hinagad ko sia ki Jehova.’”—1 Samuel 1:12-20.

Si Samuel pinadakula sa “disiplina asin pagtatanos nin isip ni Jehova.” (Efeso 6:4) Pagkabutas ki Samuel, dinara sia ni Ana sa harong nin Dios sa Silo asin iprinesentar sia sa Halangkaw na Saserdoteng si Eli. Sa saiyang pangangataman, an aki “nagin sarong ministro ni Jehova.” An dakulang kagayagayahan ni Ana ipinahayag sa saiyang nakakapahirong mga tataramon nin pagpasalamat na kan huri isinurat mismo ni Samuel.—1 Samuel 2:1-11.

Kun kamo sarong magurang, ineenkaminar daw nindo an saindong mga aki na lumaog sa sarong karera nin paglilingkod ki Jehova? An pagpalakop kan tunay na pagsamba iyo an pinakamarahay na paagi na magagamit nin sarong indibiduwal an saiyang kosog.

Si Samuel nakaadaptar na marhay sa buhay sa santuaryo. Sia “nagpadagos na duminakula kaiba ni Jehova” asin nagin “orog na kawiliwili sa pagheling ni Jehova sagkod nin mga tawo.” Ipinaheling nia an diosnon na mga kualidad kaya napamahal sia sa iba.—1 Samuel 2:21, 26.

Dai iyan masasabi dapit sa daing kamanungdanan na mga aking lalaki ni Eli, si Ofni asin Fineas, na ‘dai minidbid si Jehova.’ Sinda naggibo nin seksuwal na inmoralidad asin kinua ninda para sa sainda man sana an pinakamarahay na mga kabtang kan mga atang na dinadara kan banwaan sa santuaryo. Isinugo na nin Dios an sarong propeta na  mapaisi kan padusa na aasahan ni Eli, na kaiba an kagadanan kan saiyang duwang aking lalaki. (1 Samuel 2:12, 15-17, 22-25, 27, 30-34) Gagamiton ni Jehova si Samuel tanganing ipaabot an saro pang mensahe nin paghokom.

Si Samuel Naglingkod Bilang Propeta

Sinabihan nin Dios si Samuel: “Sabihan mo [si Eli] na hohokoman ko an saiyang kamag-anakan sagkod sa panahon na daing talaan huli sa sala na naiisihan nia, huli ta an saiyang mga aki naglalanghad sa Dios, asin dai nia sinda sinaway.” Iyan bakong madaling ipaabot na mensahe, asin nag-insistir si Eli na dai ihilom ni Samuel an ano man sa saiya. Kaya isinaysay ni Samuel an gabos na sinabi ni Jehova. Iyan nangaipo nin kosog nin boot!—1 Samuel 3:10-18.

Mantang si Samuel nagigin maygurang, naaraman kan bilog na Israel na sia propeta nin Dios. (1 Samuel 3:19, 20) An paghokom na ihinula ni Samuel nagpoon kan an Israel nag-agi nin grabeng kadaogan sa mga Filisteo. Si Ofni asin Fineas nagadan sa ralaban, asin kinua kan mga Filisteo an kaban kan tipan ni Jehova. Kan maaraman an pagkagadan kan saiyang mga aki asin an pagkawara kan Kaban, si Eli napukan na patihaya sa saiyang tukawan, nabari an saiyang liog, asin nagadan.—1 Samuel 4:1-18.

Pakalihis nin 20 taon, sinadol ni Samuel an mga Israelita na bayaan an falsong pagsamba. Sinda naghimate paagi sa paghale kan saindang mga idolo, pag-ayuno, asin pagbuyboy kan saindang mga kasalan. Si Samuel namibi asin nagpresentar nin dolot na tinotong para sa sainda. An resulta? Kan sumalakay an mga Filisteo, rinibaraw sinda nin Dios, asin kan an mga Israelita naman an suminalakay biyong nadaog an mga kaiwal. Huli sa bendisyon ni Jehova, ruminahay na marhay an kamugtakan kan mga Israelita, asin nabawi ninda an teritoryo na inagaw sa sainda kan mga Filisteo.—1 Samuel 7:3-14.

Tunay nanggad na pinalakop ni Samuel an tunay na pagsamba. Halimbawa, sinegurado nia na an nagkapira sa mga samsam sa ralaban gamiton sa pagmantener kan tabernakulo. Sia nagtabang sa pag-organisar kan mga selebrasyon nin Paskua asin kan paglilingkod kan mga Levitang bantay sa tata. (1 Cronica 9:22; 26:27, 28; 2 Cronica 35:18) Gikan sa saiyang harong sa Rama, si Samuel nagbabaklay taon-taon tanganing maghokom sa manlaenlaen na siudad. Sia nagkaigwa nin reputasyon na onesto asin mayong ipinapaorog. Huling si Samuel iginagalang kan banwaan, natabangan nia sinda sa espirituwal. (1 Samuel 7:15-17; 9:6-14; 12:2-5) An saiyang pagkaonesto asin espirituwalidad daing duda na nakamotibar sa dakol na arogon an saiyang halimbawa. An pamumuhay daw ni Samuel igwa kan siring na epekto sa saindo?

An Israel Naghagad na Magkaigwa nin Hade

Sa saiyang pagkagurang, ninombrahan ni Samuel an saiyang mga aki, si Joel asin Abias, bilang mga hokom. Sinda “dai naglakaw sa saiyang mga dalan, kundi sinda may inklinasyon na sumunod sa bakong makatanosan na ganansia asin nag-aako nin soborno patin binibiribid an paghokom.” An saindang paggawe nagin dahelan na an kamagurangan na lalaki sa Israel maghagad na magkaigwa nin hade. (1 Samuel 8:1-5) Dai ini nagustohan ni Samuel. Minsan siring, kan sia mamibi manongod dian, si Jehova nagsabi: “Bakong ika an isinikwal ninda, kundi ako an isinikwal ninda sa pagigin hade sa sainda.” (1 Samuel 8:6, 7) Sinabihan nin Dios si Samuel na itao an hinahagad kan banwaan asin patanidan sinda na sa irarom nin monarkiya mawawara sa sainda an nagkapirang katalingkasan. Kan mag-insistir an banwaan, iinareglo ni Jehova na lahidan ni Samuel si Saul bilang hade.—1 Samuel 8:6-22; 9:15-17; 10:1.

Sinuportaran ni Samuel an areglong ini sa ibong kan saiyang mga pagduda. Pakatapos nin  sarong kapangganahan kan Israel tumang sa mga Amonita, tinipon nia an banwaan sa Gilgal tanganing kompirmaron an pagkahade ni Saul. (1 Samuel 10:17-24; 11:11-15) Rinepaso ni Samuel an kasaysayan kan Israel asin sinadol an hade saka an banwaan na kuyogon si Jehova. Sinimbag nin Dios an pamibi ni Samuel paagi sa mayo sa panahon na nagkikikilat asin nagdadaguldol na bagyo na nasambitan sa enotan. An bagyong iyan nagin dahelan na admitiron kan banwaan an saindang sala sa pagsikwal ki Jehova. Kan hagadon ninda ki Samuel na ipamibi sinda, sia nagsimbag: “Dai ko lamang pepensaron, na ako magkasala ki Jehova paagi sa pag-ontok sa pagpamibi para sa saindo; asin dapat ko kamong tokdoan sa marahay asin tamang dalan.” Kanigoan na halimbawa nin maimbod na pagkamoot para ki Jehova asin sa saiyang banwaan! (1 Samuel 12:6-24) Kamo daw siring kaiyan kaandam na suportaran an teokratikong mga areglo asin mamibi para sa mga kapagtubod?

An Enot na Duwang Tawong Hade kan Israel

Si Saul sarong tawong hababa an boot asin inooyonan nin Dios. (1 Samuel 9:21; 11:6) Pero pag-abot nin panahon, dai nia inintindi an paggiya nin Dios. Halimbawa, sinagwe sia ni Samuel huli sa daing pasensiang pagdolot nin atang imbes na maghalat, siring kan ipinagboot sa saiya. (1 Samuel 13:10-14) Kan suwayan na dai ginadan ni Saul an Amalequitang si Hadeng Agag, sinabihan sia ni Samuel: “Pinasing ngonyan sa saimo ni Jehova an makahadeng pamamahala sa Israel, asin itatao nia nanggad iyan sa saimong kapwa na marahay kisa saimo.” Si Samuel mismo an guminadan ki Agag asin naghale na nagmomondo para ki Saul.—1 Samuel 15:1-35.

Sa kahurihurihi sinabi ni Jehova ki Samuel: “Sagkod noarin ka magmomondo para ki Saul, mantang isinikwal ko na sia sa pamamahala bilang hade sa Israel?” Sa puntong iyan, isinobol ni Jehova si Samuel pasiring sa Betlehem tanganing lahidan an aki ni Jese bilang hade. Saro-sarong kinonsiderar ni Samuel an mga aking lalaki ni Jese sagkod na itao ni Jehova an Saiyang pag-oyon na lahidan si David, an pinakanguhod. Kan aldaw na idto, si Samuel nakanood nin sarong mahalagang leksion: “An pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.”—1 Samuel 16:1-13.

Huling an kasumbikalan ni Saul nakakolog sa boot ni Samuel, siertong ikinamondo kaining marhay kan si Saul maongis ki David na may intension na gadanon ini! Sa ibong kan siring na mga pagbalo, si Samuel nagdanay na aktibo sa saiyang pagkagurang asin naggibo kan makakaya nia sa paglilingkod ki Jehova.—1 Samuel 19:18-20.

An Pamana ni Samuel

Kan magadan si Samuel, ipinagmondo kan Israel an mapakumbaba asin makosog an boot na propetang ini na nakaimpluwensia sa buhay nin dakol. (1 Samuel 25:1) Si Samuel bakong sangkap, asin kun beses napasala an saiyang paghusgar. Minsan siring, sa ibong kan saiyang mga limitasyon, nagtao si Samuel nin eksklusibong debosyon ki Jehova asin daing kapagalan na naglingkod tanganing tabangan an iba na gibohon man iyan.

Kadakol nang nabago poon kan panahon ni Samuel, alagad an rekord kan saiyang buhay igwa nin mahahalagang leksion para sa sato. Orog sa gabos, ginibo asin pinalakop ni Samuel an tunay na pagsamba ki Jehova. Iyan man daw an ginigibo nindo?

[Kahon sa pahina 16]

PENSARON AN BUHAY NI SAMUEL

• Kun paanong an mga magurang ni Samuel itinokdo sa saiya an tataramon nin Dios, padakulaon man nindo an saindong mga aki “sa disiplina asin pagtatanos nin isip ni Jehova.”—Efeso 6:4.

• Enkaminaron an saindong mga aki na magin arog ni Samuel paagi sa paggibong magin karera ninda an paglilingkod ki Jehova.

• An diosnon na mga kualidad na ipinaheling ni Samuel nagin dahelan na mapamahal sia sa iba, asin sa siring sia nagtatao nin marahay na halimbawa para sa sato.

• Ginibo ni Samuel an gabos niang makakaya tanganing palakopon an tunay na pagsamba, na maninigo man na gibohon ta.

[Ritrato sa pahina 15]

Pinalakop ni Samuel an tunay na pagsamba asin gikan sa boot na nagtao sia nin espirituwal na tabang