Tabangan an Iba na Kuyogon an Itinotokdo kan Biblia

“Kun manongod sa mga yaon sa marahay na daga, sinda an mga, pakadangog kan tataramon na igwa nin marahay asin matanos na puso, nag-iingat kaiyan asin nagbubunga na may pakatagal.”—LUCAS 8:15.

1, 2. (a) Sa anong katuyohan dinisenyo an librong Ano Man Nanggad an Itinotokdo kan Biblia? (b) Sa nakaagi pa sanang mga taon, paano binendisyonan ni Jehova an mga paghihingoa kan saiyang banwaan na gumibo nin mga disipulo?

“AN LIBRO talagang ekselente. Gustong-gusto iyan kan mga inaadalan ko sa Biblia. Gustong-gusto ko iyan. Pinapagin posible kan librong ini na makapoon nin mga pag-adal sa Biblia sa mga tawo sa may pinto mismo ninda.” Iyan an sabi nin sarong bilog na panahon na ministrong payunir kan Mga Saksi ni Jehova may labot sa librong Ano Man Nanggad an Itinotokdo kan Biblia? * Nagtataram manongod sa iyo man sanang publikasyon, an sarong may edad nang parabalangibog kan Kahadean nagsabi: “Nagkaigwa ako nin pribilehio na tabangan an dakol na tawo na mamidbid si Jehova sa laog nin 50 taon nin pagigin aktibo ko sa ministeryo. Alagad masasabi ko, pambihira an publikasyon na ini para sa pag-adal. An nakakaanimar na mga retrato asin ilustrasyon nakakaogmang marhay.” Iyan daw an saboot nindo manongod sa librong Itinotokdo kan Biblia? An pantabang na ini sa pag-adal kan Biblia dinisenyo tanganing tabangan kamong otobon an pagboot ni Jesus: “Kun siring, paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.”—Mateo 28:19, 20.

² Daing duda, naggagayagaya an puso ni Jehova mantang naheheling nia an mga 6.6 milyones kan saiyang mga Saksi na gikan sa boot na nagkukuyog sa pagboot ni Jesus na gumibo nin mga disipulo. (Talinhaga 27:11) Malinaw na binebendisyonan ni Jehova an saindang mga paghihingoa. Halimbawa, durante kan 2005, ikinahulit an maogmang bareta sa 235 kadagaan asin, sa promedyo, labing 6,061,500 na pag-adal sa Biblia an ginibo. Bilang resulta, dakol na tawo an ‘nakadangog kan tataramon nin Dios asin nag-ako kaiyan, bakong siring sa mga tataramon nin tawo, kundi, siring sa iyo man nanggad, siring sa tataramon nin Dios.’ (1 Tesalonica 2:13) Sa nakalihis na duwang taon, labing kabangang milyon na bagong disipulo an iinoyon an saindang buhay sa mga pamantayan ni Jehova asin nagdusay kan saindang sadiri sa Dios.

3. Anong mga hapot mapadapit sa paggamit kan librong Itinotokdo kan Biblia an sisiyasaton sa artikulong ini?

³ Naeksperyensiahan daw nindo kasuarin pa sana an kagayagayahan nin pagkondukta nin pag-adal sa Biblia sa sarong tawo? Sa bilog na kinaban, igwa pa nin mga indibiduwal na may “marahay asin matanos na puso” na pakadangog kan tataramon nin Dios ‘mag-iingat kaiyan asin magbubunga na may pakatagal.’ (Lucas 8:11-15) Pag-olayan niato kun paano nindo magagamit an librong Itinotokdo kan Biblia sa paggibo nin disipulo. Sisiyasaton sa pagtokar niato an tolong hapot: (1) Paano kamo makakapoon nin pag-adal sa Biblia? (2) Anong mga paagi nin pagtotokdo  an pinakaepektibo? (3) Paano nindo matatabangan an sarong tawo na magin bako sanang sarong inaadalan sa Biblia kundi saro man na paratokdo kan nasusurat na Tataramon nin Dios, an Biblia?

Kun Paano Kamo Makakapoon nin Pag-adal sa Biblia

4. Taano an nagkapira ta tibaad mag-alangan na mag-adal kan Biblia, asin paano nindo sinda matatabangan na mahale an saindang pag-alangan?

⁴ Kun papabalyohon kamo sa sarong mahiwas na sapa paagi sa saro sanang lukso, tibaad sayumahan nindo an suhestion. Alagad kun may mga gapong tongtongan na ibinugtak sa tamang lagwat pabalyo sa sapa, posibleng marhay na mas gugustohon nindong probaran na bumalyo. Kaagid kaiyan, an sarong sibot na tawo tibaad mag-alangan na mag-adal kan Biblia. Tibaad isipon kan kagharong na grabeng panahon asin paghihingoa an kaipuhan tanganing pag-adalan iyan. Paano nindo sia matatabangan na mahale an saiyang pag-alangan? Paagi sa paggibo nin sunod-sunod na haralipot asin nakakapagtokdong pag-orolay, magagamit nindo an librong Itinotokdo kan Biblia tanganing motibaron an sarong tawo na regular na pag-adalan an Tataramon nin Dios. Kun nag-aandam kamong marhay, an kada pagdalaw liwat sa tawong iyan magigin siring sa gapong tongtongan pasiring sa pakikikatood nia ki Jehova.

5. Taano ta kaipuhan nindong basahon an librong Itinotokdo kan Biblia?

⁵ Minsan siring, bago nindo matabangan an iba na makinabang sa librong Itinotokdo kan Biblia, kaipuhan nindong magin biyong pamilyar dian. Nabasa na daw nindo an bilog na libro? Sarong mag-agom an nagdara kan publikasyon sa saindang pagbakasyon asin pinonan na basahon iyan mantang nagrerelaks sa baybayon. Kan magdolok sa sainda an sarong taga duman na babae na may mga paninda para sa mga turista, nariparo kaini an titulong Ano Man Nanggad an Itinotokdo kan Biblia? Sinabi kaini sa mag-agom na pirang oras pa sana an nakaagi, ipinamibi nia an mismong hapot na iyan, na hinahagad sa Dios an simbag. Maogmang tinawan kan mag-agom nin kopya kan libro an babae. Kamo daw ‘nagbakal na nin panahon’ tanganing basahon an publikasyon na ini, na posibleng sa ikaduwang beses, mantang naghahalat sa sarong katagbuan o nagpapahingalo sa trabaho o sa eskuelahan? (Efeso 5:15, 16) Kun iyo, magigin pamilyar kamo sa pantabang na ini sa pag-adal kan Biblia asin tibaad makagibo man nin mga oportunidad na ipakipag-olay sa iba an laog kaiyan.

6, 7. Paano nindo magagamit an librong Itinotokdo kan Biblia tanganing makapoon nin mga pag-adal sa Biblia?

⁶ Kun iinaalok an libro sa pampublikong ministeryo, gamiton nin epektibo an mga retrato, teksto, asin hapot sa pahina 4, 5, asin 6. Halimbawa, puede nindong ponan an orolay paagi sa paghapot, “Sa gabos na problema na inaatubang nin katawohan ngonyan, ano sa paghona nindo an masasarigan na gikanan nin paggiya?” Pagkatapos na hinanyogon nin maingat an simbag kan tawo, basahon an 2 Timoteo 3:16, 17, asin ipaliwanag na an Biblia nagtatao nin tunay na solusyon sa mga problema nin katawohan. Dangan, darahon an atension kan kagharong sa pahina 4 asin 5, asin maghapot: “Sa mga kamugtakan na ipinapaheling sa mga pahinang ini, arin an ikinakapurisaw nindong marhay?” Kun an kagharong magsambit nin saro, pakapotan sa saiya an libro mantang binabasa nindo sa saindong Biblia an kaibang teksto. Sunod, basahon an pahina 6, asin hapoton an kagharong, “Sa anom na hapot na nasambitan sa ibaba kan pahinang ini, arin  an gusto nindong masimbag?” Kun an kagharong magpili nin saro, ipaheling sa saiya an kapitulo na nagsisimbag sa hapot na iyan, iwalat an libro sa saiya, asin gumibo nin depinidong mga areglo na magbalik liwat asin ipakipag-olay an hapot na iyan.

⁷ An pag-atubang na sinabi pa sana malawig nin mga limang minuto. Minsan siring, sa pira sanang minutong iyan, maaaraman na nindo kun ano an ikinakapurisaw kan kagharong, makakabasa asin makakapaliwanag na kamo nin duwang teksto, asin makakabugtak na kamo nin basehan para sa pagdalaw liwat. An halipot nindong pakikipag-olay sa kagharong posibleng marhay na iyo an pinakanakakapakosog asin pinakanakakaranga nang eksperyensia nia sa halawig na panahon. Bilang resulta, dawa an tawong sibot posibleng marhay na aantisiparon an pira pang minuto na pakikipag-olay sa saindo mantang tinatabangan nindo sia na gibohon an sunod na lakdang nia na makalakaw sa “dalan na pasiring sa buhay.” (Mateo 7:14) Pag-abot nin panahon, mantang nagtatalubo an interes kan kagharong, maninigong palawigon an pag-adal. Magigibo ini paagi sa pag-alok na tumukaw asin mag-adal sa laog nin mas halawig na itinalaan na oras.

Mga Paagi nin Pagtotokdo na Pinakaepektibo

8, 9. (a) Paano nindo aandamon an inaadalan nindo sa Biblia na mapangganahan an mga balakid asin pagbalo na posibleng marhay na mapaatubang sa saiya? (b) Saen makukua an dai nasosolong materyales sa pagtogdok nin makosog na pagtubod?

⁸ Kun an saro magpoon nang kumuyog sa itinotokdo kan Biblia, posibleng mapaatubang sia sa mga balakid na makakaolang sa pag-oswag nia. Si apostol Pablo nagsabi: “An gabos na nagmamawot na mamuhay na may diosnon na debosyon kaibahan ni Cristo Jesus pepersegiron man.” (2 Timoteo 3:12) Ikinomparar ni Pablo an mga pagbalong ini sa kalayo na puedeng lumaglag sa maluyang klaseng materyales sa pagtogdok alagad dai kayang lumaglag sa materyales na arog kan bulawan, plata, asin mahal na marhay na gapo. (1 Corinto 3:10-13; 1 Pedro 1:6, 7) Tanganing tabangan an saindong inaadalan sa Biblia na pataluboon an mga kualidad na kinakaipuhan tanganing makatagal sa mga pagbalo na posibleng atubangon nia, kaipuhan na tabangan nindo sia paagi sa pagtogdok nin dai nasosolong materyales.

⁹ Iinaagid kan salmista “an mga tataramon ni Jehova” sa “plata na dinalisay sa horno kan daga, na pinalinaw nin makapitong beses.” (Salmo 12:6) Tunay nanggad, yaon sa Biblia an gabos na mahalagang marhay na materyales na magagamit sa pagtogdok nin makosog na pagtubod. (Salmo 19:7-11; Talinhaga 2:1-6) Asin ipinapaheling sa saindo kan librong Itinotokdo kan Biblia kun paano magigin epektibo sa paggamit kan Kasuratan.

10. Paano nindo ikakasentro sa Biblia an atension kan inaadalan sa Biblia?

¹⁰ Durante kan pag-adal, isentro an atension kan inaadalan sa Biblia sa mga tekstong yaon sa kada kapitulong pinag-oolayan. Gumamit nin mga hapot tanganing tabangan an inaadalan sa Biblia na masabotan an importanteng marhay na mga teksto sa Biblia asin personalmenteng ikaaplikar an mga iyan. Mag-ingat na dai pagsabihon sa saiya kun ano an dapat niang gibohon. Imbes, arogon an halimbawa ni Jesus. Kan maghapot sa saiya an sarong tawo na tatao sa Ley, si Jesus nagsimbag: “Ano an nasusurat sa Ley? Ano an nababasa mo?” An lalaki nagsimbag hale sa Kasuratan, asin tinabangan sia ni Jesus na masabotan kun paano iaaplikar an prinsipyo sa saiyang sadiri. Paagi sa paggamit nin ilustrasyon, tinabangan man ni Jesus an lalaki na masabotan kun paano maninigong makaapekto sa saiya an katokdoan na iyan. (Lucas 10:25-37) An librong Itinotokdo kan Biblia kadakol nin simpleng ilustrasyon na magagamit nindo tanganing tabangan an inaadalan sa Biblia na iaplikar sa saiyang sadiri an mga prinsipyo sa Kasuratan.

11. Gurano kadakol an maninigong pag-adalan nindo sa kada sesyon nin pag-adal?

¹¹ An librong Itinotokdo kan Biblia naggagamit nin simple asin direktang pananaram tanganing ipaliwanag an Tataramon nin Dios, kun paanong ipinahayag ni Jesus an komplikadong mga ideya sa simpleng pananaram. (Mateo 7:28, 29) Arogon an saiyang halimbawa. Ipahayag an impormasyon sa simple, malinaw, asin tamang paagi. Dai maghidale sa pinag-aadalan. Imbes, an mga kamugtakan asin an abilidad kan inaadalan sa Biblia an madeterminar kun pirang parapo an saindong pag-oolayan sa kada sesyon nin pag-adal. Aram ni Jesus an mga limitasyon kan saiyang mga disipulo asin dai nia sinda pinagabatan nin dakol na impormasyon na labi kisa kinakaipuhan ninda sa panahon na idto.—Juan 16:12.

12. Paano maninigong gamiton an apendise?

¹² An librong Itinotokdo kan Biblia igwa nin apendise na may 14 topiko. Basado sa mga pangangaipo kan inaadalan sa Biblia, kamo bilang saiyang paratokdo an maninigong makadeterminar kun paano  gagamiton sa pinakamarahay na paagi an materyales na ini. Halimbawa, kun nadedepisilan an inaadalan sa Biblia na saboton an pinag-oolayan o may mga hapot sa espesipikong mga tema huli sa dating mga paniniwala, tibaad igo nang darahon an saiyang atension sa angay na kabtang kan apendise asin sia na mismo an paestudyaron nindo kan temang iyan. Sa ibong na lado, an mga pangangaipo kan inaadalan sa Biblia tibaad iyo an magsabi na kamo an magpaliwanag kaiyan sa saiya. An apendise igwa nin mahalagang marhay na mga tema sa Kasuratan, siring kan “‘Kalag’ Asin ‘Espiritu’—Ano Man Nanggad an Kahulogan kan mga Terminong Ini?” asin “Pag-aram Kun Siisay an ‘Dakulang Babilonya.’” Tibaad gusto nindong ipakipag-olay an mga topikong ini sa saindong inaadalan sa Biblia. Mantang mayong itinaong mga hapot sa mga temang tinotokar sa apendise, kaipuhan nindong magin pamilyar sa impormasyon tanganing makagibo kamo nin makahulogan na mga hapot.

13. Ano an papel kan pamibi sa pagpakosog sa pagtubod?

¹³ “Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan,” an sabi kan Salmo 127:1. Kun siring, mantang nag-aandam kamo sa pagkondukta nin pag-adal sa Biblia, mamibi para sa tabang ni Jehova. Ipabanaag sa saindong mga pamibi sa pagpopoon asin pagtatapos kan kada pag-adal an saindong mamomoton na relasyon ki Jehova. Enkaminaron an inaadalan sa Biblia na mamibi ki Jehova para sa kadonongan na masabotan an Saiyang Tataramon asin kosog na iaplikar an hatol kaiyan. (Santiago 1:5) Kun gigibohon nia iyan, an inaadalan sa Biblia mapapakosog na tagalan an mga pagbalo asin magpapadagos na magin makosog sa pagtubod.

Tabangan an mga Inaadalan sa Biblia na Magin mga Paratokdo

14. Anong pag-oswag an kaipuhan na gibohon kan mga inaadalan sa Biblia?

¹⁴ Tanganing makuyog kan mga inaadalan niato sa Biblia “an gabos na bagay” na ipinagboot ni Jesus sa saiyang mga disipulo, kaipuhan nindang umoswag hale sa pagigin mga estudyante kan Tataramon nin Dios pasiring sa pagigin mga paratokdo kaiyan. (Mateo 28:19, 20; Gibo 1:6-8) Ano an magigibo nindo tanganing tabangan an sarong inaadalan sa Biblia na gibohon an arog kaiyan na espirituwal na pag-oswag?

15. Taano ta maninigo nindong enkaminaron an inaadalan nindo sa Biblia na mag-atender sa Kristianong mga pagtiripon?

¹⁵ Sa enot na pag-adal mismo, imbitaran an inaadalan sa Biblia na umiba sa saindo sa pag-atender sa mga pagtiripon kan kongregasyon. Ipaliwanag sa saiya na sa mga pagtiripon kamo nag-aako kan saindong pagsasanay bilang paratokdo kan Tataramon nin Dios. Sa laog nin dakol na semana, gumamit nin pirang minuto sa katapusan kan kada pag-adal sa Biblia tanganing iladawan an programa nin espirituwal na instruksion na inaako nindo sa manlaenlaen na pagtiripon asin asamblea. Entusiastikong magtaram manongod sa mga pakinabang na nakukua nindo sa mga okasyon na ini. (Hebreo 10:24, 25) Kun an inaadalan sa Biblia pumoon nang umatender nin regular sa mga pagtiripon, posibleng marhay na sia magigin paratokdo kan Tataramon nin Dios.

16, 17. Ano an nagkapirang pasohan na puedeng gibohon asin aboton nin sarong inaadalan sa Biblia?

¹⁶ Tabangan an inaadalan sa Biblia na maggibo nin mga pasohan na puede niang aboton. Halimbawa, enkaminaron siang sabihon an saiyang nanonodan sa sarong katood o paryente. Siring man, isuherir na gibohon niang pasohan an pagbasa sa bilog na Biblia. Kun tatabangan nindo siang gibohon asin papagdanayon an kaugalean nin regular na pagbasa sa Biblia, an ugaleng ini mataong pakinabang sa saiya sa halawig na panahon pakatapos na sia mabautismohan. Dugang pa, taano ta dai isuherir sa inaadalan sa Biblia na gibohon na pasohan an pagtuom nin kisuerra  sarong teksto sa Biblia na minasimbag sa sarong pangenot na hapot sa kada kapitulo kan librong Itinotokdo kan Biblia? Sa paggibo kaiyan, sia magigin “sarong trabahador na mayo nin maninigong ikasupog, na ginagamit an tataramon kan katotoohan sa tamang paagi.”—2 Timoteo 2:15.

¹⁷ Imbes na tokdoan an inaadalan sa Biblia na otrohon sana an mga teksto o itao an pinakasumaryo kan sinasabi kaini, enkaminaron siang ipaliwanag an pertinenteng mga bersikulo sa Biblia mantang itinatao nia an simbag sa mga naghahagad sa saiya nin pangangatanosan para sa saiyang pagtubod. Puedeng makatabang an haralipot na pagpraktis, na kamo an nag-aakto na sarong paryente o sarong katrabaho na naghahagad sa saiya na ipaliwanag an saiyang mga tinutubod. Sa pagsimbag kan inaadalan sa Biblia, ipaheling sa saiya kun paano masimbag na may “mahoyong boot asin hararom na paggalang.”—1 Pedro 3:15.

18. Kun an inaadalan sa Biblia makualipikar na bilang dai pa bautisadong parahayag, anong dagdag na tabang an ikakatao nindo sa saiya?

¹⁸ Pag-abot nin panahon, an inaadalan sa Biblia tibaad makualipikar nang makikabtang sa ministeryo sa langtad. Idoon na sarong pribilehio an togotan na makikabtang sa gibohon na ini. (2 Corinto 4:1, 7) Kun madeterminaran na kan kamagurangan na kualipikado na an inaadalan sa Biblia bilang dai pa bautisadong parahayag, tabangan siang mag-andam nin sarong simpleng pag-atubang dangan ibanan sia sa paglilingkod sa langtad. Padagos siang ibanan nin regular sa manlaenlaen na aspekto kan pampublikong ministeryo, asin tokdoan sia kun paano mag-aandam asin magsasagibo nin epektibong mga pagdalaw liwat. An saindo mismong marahay na halimbawa magigin sarong positibong impluwensia.—Lucas 6:40.

‘Iligtas Mo an Saimo Man Sana Sagkod Idtong Naghihinanyog sa Saimo’

19, 20. Ano an maninigong magin pasohan niato, asin taano?

¹⁹ Daing duda, nagkakaipo nin dakulang pagmamaigot an pagtabang sa sarong tawo na makaabot sa “tamang kaaraman sa katotoohan.” (1 Timoteo 2:4) Minsan siring, pipira sanang kagayagayahan sa buhay an ikakakomparar sa kaogmahan nin pagtabang sa sarong tawo na kuyogon an itinotokdo kan Biblia. (1 Tesalonica 2:19, 20) Tunay nanggad, igwa kita nin marahayon nanggad na pribilehio na magin “mga kapwa trabahador nin Dios” sa pambilog na kinaban na pagtotokdong ini!—1 Corinto 3:9.

²⁰ Paagi ki Jesu-Cristo asin sa makapangyarihan na mga anghel, papaninimbagon ni Jehova sa dai na mahahaloy an ‘mga dai nakakamidbid sa Dios asin mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:6-8) Dakol na buhay an namemeligro. Magigibo daw nindo na magin pasohan nindo an pagkondukta nin kisuerra sarong pag-adal sa Biblia sa librong Ano Man Nanggad an Itinotokdo kan Biblia? Mantang nakikikabtang kamo sa gibohon na ini, igwa kamo kan oportunidad na ‘iligtas an saimo man sana sagkod idtong naghihinanyog sa saimo.’ (1 Timoteo 4:16) Ngonyan orog kisa kasuarin man, importanteng marhay na tabangan niato an iba na kuyogon an itinotokdo kan Biblia.

[Nota sa Ibaba]

Ano an Nanodan Nindo?

• Sa anong katuyohan dinisenyo an librong Itinotokdo kan Biblia?

• Paano kamo makakapoon nin mga pag-adal sa Biblia na ginagamit an librong Itinotokdo kan Biblia?

• Anong mga paagi nin pagtotokdo an pinakaepektibo?

• Paano nindo matatabangan an inaadalan sa Biblia na magin paratokdo kan Tataramon nin Dios?

[Mga Hapot Para sa Pag-adal]

[Ritrato sa pahina 26]

Epektibo daw nindong ginagamit an librong ini?

[Ritrato sa pahina 27]

An halipot na pag-orolay puedeng magin pan-abre gana sa sarong tawo na kumua nin kaaraman sa Biblia

[Ritrato sa pahina 29]

Ano an magigibo nindo tanganing isentro sa Biblia an atension kan inaadalan sa Biblia?

[Ritrato sa pahina 30]

Tabangan an inaadalan sa Biblia na umoswag