Ano an Manonodan Nindo sa mga Aki?

“NAG-IINAKI ka na naman!” Kun kita an sinabihan kaiyan, posibleng marhay na makokolgan an satong boot. Minsan ngani sinda nakakawiling marhay, malinaw na an saradit na aki daing pagkamaygurang, kabatidan, asin kadonongan na sa pangkagabsan konektado sa pagigin may edad na.—Job 12:12.

Minsan siring, sa sarong okasyon sinabihan ni Jesus an saiyang mga disipulo: “Totoong ako nagsasabi sa saindo, Kun dai kamo magbakle asin magin siring sa saradang na aki, dai kamo sa ano man na paagi makakalaog sa kahadean kan kalangitan.” (Mateo 18:3) Ano an boot sabihon ni Jesus? Anong mga kualidad an yaon sa saradang na aki na maninigong arogon nin mga nasa edad na?

Pagkultibar nin Arog-Aking Kapakumbabaan

Estudyare an situwasyon na nagin dahelan kan mga sinabi ni Jesus. Pagkaabot sa Capernaum pakatapos nin halawig na pagbaklay, hinapot ni Jesus an saiyang mga disipulo: “Ano an saindong pinagdidiskutiran sa dalan?” Nagdanay na daing girong an napasupog na mga disipulo, huli ta nagdiriskutiran sinda manongod sa kun siisay sa sainda an mas dakula. Sa katapustapusi, nagkaigwa sinda nin kosog nin boot na hapoton si Jesus: “Siisay man nanggad an pinakadakula sa kahadean kan kalangitan?”—Marcos 9:33, 34; Mateo 18:1.

Garo baga nakakabigla na pakatapos na makaibanan si Jesus sa laog nin haros tolong taon, an mga disipulo madiriskutiran manongod sa posisyon o ranggo. Minsan siring, sinda pinadakula sa Judiong relihion, na nagtatao nin dakulang importansia sa siring na mga bagay. Minalataw na an relihiosong kamugtakan na ini, kaiba an pagkabakong sangkap nin tawo, nakaimpluwensia sa kaisipan kan mga disipulo.

 Si Jesus nagtukaw, pinarani sa saiya an mga disipulo, asin nagsabi: “Kun an siisay man boot na maenot, kaipuhan na sia mahuri sa gabos asin surugoon nin gabos.” (Marcos 9:35) Posibleng namungnan sinda huli sa mga tataramon na ini. An pangangatanosan ni Jesus biyong kabaliktaran kan ideya kan mga Judio dapit sa kadakulaan! Dangan inapod ni Jesus an sarong sadit na aki sa kataed nia. Mapagpadangat na kinukugos an aki, idinoon nia an saiyang punto: “Totoong ako nagsasabi sa saindo, Kun dai kamo magbakle asin magin siring sa saradang na aki, dai kamo sa ano man na paagi makakalaog sa kahadean kan kalangitan. Kun siring, an siisay man na magpakumbaba arog kan sadang na aking ini iyo an pinakadakula sa kahadean kan kalangitan.”—Mateo 18:3, 4.

Kanigoan kamapuersang praktikal na leksion sa kapakumbabaan! Imahinaron an eksena. An sarong grupo nin darakula na saka seryosong mga lalaki na nasa edad na nakapalibot sa sarong sadang na aki, na an mga ini nakaturuhok sa aki. Kanigoan kamasusupgon asin kamapagtiwala kan aki! Mayo nanggad nin pakikiribal asin maraot na mawot! Kanigoan kamapagpasakop asin kadaing kaabhawan! Iyo, an sadit na aki magayonon na ilinaladawan an diosnon na kualidad nin kapakumbabaan.

Malinaw an punto ni Jesus. Kita gabos dapat na magkultibar nin arog-aking kapakumbabaan kun gusto niatong magmana kan Kahadean nin Dios. Sa garo pamilyang areglo ni Jehova, mayo nin lugar an may pakipagdaogan na iriwal o pagigin orgolyoso. (Galacia 5:26) Sa katunayan, enot sa gabos, ini an mismong mga ugale na nagin dahelan kan pagrebelde ni Satanas na Diablo sa Dios. Bakong makangangalas na ikinakaongis iyan ni Jehova!—Talinhaga 8:13.

An tunay na mga Kristiano naghihingoang maglingkod, bakong magkapot nin kapangyarihan. Gurano man kadai nakakaogma kan gibohon o gurano man kahamak kan pinaglilingkodan, an tunay na kapakumbabaan nagpapahiro sa sato na maglingkod sa iba. An siring na mapakumbabang paglilingkod nagbubunga nin nagsosopay na mga balos. Si Jesus nagsasabi: “An siisay man na umako sa saro kan saradang na aking ini huli sa ngaran ko, minaako sa sako; asin an siisay man na umako sa sako, minaako, bako sanang sa sako, kundi pati sa saiya na nagsugo sa sako.” (Marcos 9:37) An pagkultibar nin buka an palad, mapakumbaba, arog-aking espiritu nagpapangyaring makasumaro niato an pinakahalangkaw na Personahe sa uniberso asin an saiyang Aki. (Juan 17:20, 21; 1 Pedro 5:5) Mag-aani kita  kan kaogmahan na ibinubunga nin pagtao. (Gibo 20:35) Asin igwa kita kan satispaksion na makakontribwir sa katoninongan asin pagkasararo na risang-risa sa tahaw kan banwaan nin Dios.—Efeso 4:1-3.

Madaling Tokdoan Asin Mapagtiwala

Sunod, itinatampok ni Jesus an saro pang leksion na manonodan sa mga aki kan mga nasa edad na: “An siisay man na dai mag-ako sa kahadean nin Dios na arog sa sarong sadang na aki dai nanggad makakalaog dian.” (Marcos 10:15) An mga aki bako sanang mapakumbaba; sinda madaling tokdoan. “Sinasagom ninda an impormasyon na siring sa mga espongha,” an sabi nin sarong ina.

Sa siring, tanganing magmana kan Kahadean nin Dios, dapat niatong akoon asin kuyogon an mensahe kan Kahadean. (1 Tesalonica 2:13) Arog nin bagong mamundag na mga omboy, dapat “magkaigwa [kita] nin paghidaw sa daing halong gatas kan tataramon, tanganing paagi kaiyan magtalubo [kita] sa kaligtasan.” (1 Pedro 2:2) Kumusta kun an sarong katokdoan sa Biblia garo baga masakit saboton? “An mga aki padagos na naghahapot nin ‘Taano?’ sagkod na makua ninda an nakakakontentong simbag sa saindang mga hapot,” an sabi nin saro na nagtatrabaho sa pag-ataman nin aki. Marahay na arogon niato an saindang halimbawa. Kaya padagos na mag-adal. Makipag-olay sa eksperyensiadong mga Kristiano. Humagad nin kadonongan ki Jehova. (Santiago 1:5) Daing duwa-duwa, an saindong mapagngayongayong pagkadesidido babalosan pag-abot nin panahon.—Mateo 7:7-11.

Pero, tibaad mag-isip an nagkapira, ‘Bako daw na madaling madaya an mga tawong madaling tokdoan?’ Bako man kun igwa sinda nin masasarigan na paggiya. Halimbawa, an mga aki natural na nag-aasa sa paggiya kan saindang mga magurang. “Pinapatunayan nin mga magurang na sinda mapagtitiwalaan paagi sa pagprotehir sa asin pagtao kan mga pangangaipo kan saindang mga aki sa aroaldaw,” an sabi nin sarong ama. Daing duwa-duwa na igwa kita nin kaparehong mga dahelan na magtiwala sa satong langitnon na Ama, si Jehova. (Santiago 1:17; 1 Juan 4:9, 10) Si Jehova nagtatao sa sato nin seguradong paggiya paagi sa saiyang nasusurat na Tataramon. Rinaranga asin sinusuportaran kita kan saiyang banal na espiritu asin organisasyon. (Mateo 24:45-47; Juan 14:26) An pag-aprobetsar sa mga probisyon na ini magpapadanay sa sato na ligtas sa espirituwal na kapahamakan.—Salmo 91:1-16.

An pagkultibar nin arog-aking pagtitiwala sa Dios nagtatao man sa sato nin katoninongan nin isip. An sarong nag-espesyalisar sa Biblia nagsasabi: “Kun  kita mga aki pa minapoon kitang magbiahe na mayong pamasahe, asin dai niato aram kun paano kita makakaabot sa satong padudumanan, pero dai noarin man minalaog sa satong isip an pagduda na ligtas kitang dadarahon duman kan satong mga magurang.” Igwa daw kita nin kaparehong pagtitiwala ki Jehova mantang kita garo nagbibiahe sa buhay?—Isaias 41:10.

An lubos na pagtitiwala sa Dios nagtatabang sa sato na likayan an mga aktitud asin hiro-hiro na puedeng magsapeligro kan satong espirituwalidad. Imbes, igwa kita nin lubos na kompiansa sa mga tataramon ni Jesus na aram kan satong langitnon na Ama an satong mga ginigibo asin na sagkod na ineenot niato an Kahadean asin an katanosan nin Dios, aatamanon kita nin Dios. Tatabangan kita kaini na labanan an sugot na magkonsentrar sa materyal na mga bagay na isinasakripisyo na an espirituwal na mga paninimbagan.—Mateo 6:19-34.

“Mga Omboy Kun Dapit sa Karatan”

Minsan ngani namundag na bakong sangkap, an saradit na aki nakakaginhawa an kadalisayan nin puso asin isip. Sa dahelan na ini, an Biblia nagsasadol sa mga Kristiano: “Magin kamong mga omboy kun dapit sa karatan.”—1 Corinto 14:20.

Estudyare an singko anyos na si Monique, na ogmahon na nagsabi sa saiyang ina: “An bagong amiga ko po na si Sarah kurong an buhok na arog ko!” Dai nasambitan an laen na kolor kan kublit asin etnikong pinaghalean ni Sarah. An sarong magurang nagsasabi: “An saradit na aki dai impluwensiado nin kolor nin kublit. Mayo sinda nin ideya manongod sa rasa o daing binabasaran na pagkaanggot.” Sa bagay na ini, magayonon na ipinapabanaag kan mga aki an punto de vista kan satong imparsial na Dios, na namomoot sa mga tawo kan gabos na nasyon.—Gibo 10:34, 35.

An mga aki igwa man nin pambihirang kakayahan na magpatawad. An sarong magurang nagsasabi: “Kun an aking si Jack asin Levi nag-iiwal, sinasabihan mi sinda na maghagad nin dispensasyon, asin aroatyan maogma na naman sindang nagkakawat. Dai sinda nagtatanom nin raot nin boot, nagkukulibat kan nakaagi, o nagtatao nin kondisyon bago magpatawad. Basta nagpapadagos sana an saindang pagkakatood.” Marahayon nanggad na halimbawa na dapat arogon kan mga nasa edad na!—Colosas 3:13.

Dugang pa, rinerekonoser tolos kan saradit na aki an pag-eksister nin Dios. (Hebreo 11:6) An saindang natural na pagkaprangka sa parate nagpapahiro sa sainda na pusoan na magpatotoo sa iba. (2 Hade 5:2, 3) An saindang simple, odok sa pusong mga pamibi puedeng makapahiro sa mga may pinakamatagas na puso. Asin kun sinusugotan, puede sindang magpaheling nin pambihirang kakosogan sa moral. Kanigoan kamahal na mga balaog an saradit na aki!—Salmo 127:3, 4.

Ikinabalik an Dating Kagayonan

Tibaad isipon nindo, ‘Posible daw para sa mga nasa edad na na mabawi an magayon na mga kualidad na konektado sa pagkaaki?’ An simple asin nakakapakosog liwat sa boot na simbag iyo! Daing duwa-duwa na an pagboot ni Jesus na “magin siring sa saradang na aki” nagpapatunay na posible iyan.—Mateo 18:3.

Sa pag-ilustrar: An sarong grupo na an trabaho ibalik sa dati an gibo nin arte tibaad pakarhayon an sarong obra maestra na daing kaagid sa halaga. Sa paggibo kaiyan, hinahale ninda an natipon na mga ati asin ikinokorehir an nakaaging bakong episienteng mga pagprobar na pagbabalik sa dati. Pakatapos nin awad-awad na mapasensiang paghihingoa kan mga nagpapakarhay, an orihinal na buhay na buhay na mga kolor asin natural na gayon kan gibo nin arte nahahayag sa pagheling kan gabos. Kaagid kaiyan, paagi sa daing ontok na paghihingoa, tabang kan banal na espiritu ni Jehova, asin mamomoton na suporta kan Kristianong kongregasyon, puede niatong ibalik sa dati an magayon na mga kualidad na natural na tuminalubo kan kita aki pa.—Efeso 5:1.

[Ritrato sa pahina 9]

An mga aki natural na mapakumbaba

[Ritrato sa pahina 10]

An sadang na mga aki mayo nin daing binabasaran na pagkaanggot, asin madali sindang magpatawad saka maglingaw