Kun sa Pasil, Iyo, Alagad Tama daw Iyan?

KAN Setyembre 2005, bilog na pusong inaprobaran kan Iglesia nin Inglaterra an pagluwas kan The 100-Minute Bible. Dinisenyo tanganing mabasa sa laog nin 100 minutos, pinalipot kan bagong bersion na iyan an Hebreong Kasuratan sa 17 kabtang na tigsararong pahina asin an Griegong Kasuratan sa 33 na kabtang na tigsararong pahina, na sa siring linalaktawan, arog kan pagkasabi nin sarong kritiko, an gabos na “nakakasawa na parte.” Pasil basahon iyan, iyo, alagad tama daw iyan?

Apuera sa dai paggamit kan ngaran nin Dios, an Jehova, maririparo kan seryosong mga estudyante sa Biblia an dakol na iba pang diperensia. (Salmo 83:18) Halimbawa, an kabtang 1 nagsasabi na “linalang [nin Dios] an langit asin daga sa peryodo nin anom na aldaw.” Minsan siring, an sinasabi sana kan Genesis 1:1: “Sa kapinonan linalang nin Dios an kalangitan asin an daga.” Pakatapos kaiyan, ilinaladawan kan orihinal na pagkasaysay an dugang pang mga gibo nin paglalang may koneksion sa daga, na naglawig nin anom na “aldaw,” o mga peryodo nin panahon. Dangan, sinusumaryo kan Genesis 2:4 an bilog na peryodo nin paglalang, na inaapod iyan na an “aldaw na ginibo ni Jehova Dios an daga asin an langit.”

Segun sa The 100-Minute Bible, si Job, na sarong tawong may integridad, inatake nin “saro sa mga lingkod [nin Dios], si Satanas, . . . na an paninimbagan iyo na magserbing paraakusar kan katawohan.” Naheheling daw nindo an diperensia digdi? An terminong “Satanas” nangangahulogan nin “Paratumang.” Imbes na sarong lingkod nin Dios, si Satanas, sa katunayan, an pangenot na kaiwal nin Dios asin an naggibo kan sadiri nia bilang paraakusar kan katawohan.—Kapahayagan 12:7-10.

Kumusta man an kabtang na Kristianong Griegong Kasuratan kan The 100-Minute Bible? Sa parabola manongod sa mga karnero asin kanding, an bagong bersion nagsasabi na pinapaboran ni Jesus an mga nagtatabang sa “siisay man, gurano man kabakong mahalaga,” mantang an sinabi talaga ni Jesus binebendisyonan nia an mga naggigibo nin marahay sa mga parasunod nia na nagsusunod sa saiyang halimbawa—an saiyang “mga tugang.” (Mateo 25:40) An sinopsis kan Kapahayagan nagsasabi sa mga nagbabasa kaiyan na an “Roma, an dakulang Babilonya, biyong lalaglagon.” Minsan siring, aram kan mga estudyante sa Biblia na sa orihinal na mga isinurat mayo nin nagsusuportar sa siring na sinasabi manongod sa “Dakulang Babilonya.”—Kapahayagan 17:15–18:24.

Para sa mga naghihingoang mamidbid an satong Kaglalang asin masabotan an saiyang katuyohan, mayo nin ikakasalihid sa kompletong Biblia. Totoo, labi pa sa 100 minutos an kaipuhan tanganing mabasa an Biblia, alagad an paggibo kaiyan nagbubunga nin dai masokol na mga balos. (Juan 17:3) Logod na akoon nindo an gibohon na ini na nagkakaipo nin dakulang paghihingoa asin anihon nindo mismo an mga balos.—2 Timoteo 3:16, 17.