Mga Hapot Hale sa mga Parabasa

Ano an “guerra kan . . . Dios na Makakamhan sa Gabos” sa Har–Magedon, asin ano an kaaabtan kaiyan?—Kapahayagan 16:14, 16.

Sa simpleng pagtaram, an guerra kan Har–Magedon iyo an maabot na lakop sa dagang ralaban na dian lalaglagon kan ninombrahan ni Jehova na Hade, si Jesu-Cristo, an mga kaiwal nin Dios. Ipinapaliwanag kan Biblia na an mga kaiwal na ini, an “mga hade kan bilog na ineerokan na daga,” pinapahiro kan “mga tataramon na ipinasabong nin mga demonyo” asin tinitiripon “sa guerra kan dakulang aldaw nin Dios na Makakamhan sa Gabos . . . sa lugar na sa Hebreo inaapod Har–Magedon.”—Kapahayagan 16:14, 16.

An lugar na pagtitiriponan kan naggeguerrang mga lado bakong literal. An ngaran na Har–Magedon, na trinadusir na “Armagedon” sa nagkapirang traduksion kan Biblia, nangangahulogan na “Bukid nin Megido.” (Kapahayagan 16:16, nota sa ibaba) Mayo kasuarin man nin bukid na inapod sa ngaran na iyan. Apuera kaiyan, “an mga hade kan daga patin an saindang mga hukbo” dai puedeng magtiripon nin literal sa sarong lugar. (Kapahayagan 19:19) Imbes, an “lugar” nanonongod sa kamugtakan o situwasyon na pasiring dian ginigiyahan an politikal na mga namamahala kan daga asin an mga parasuportar sa sainda—sarong kamugtakan nin pagtumang ki Jehova asin sa “mga hukbo na yaon sa langit” na nasa irarom kan sa militar na autoridad kan “Hade nin mga hade asin Kagurangnan nin mga kagurangnan,” si Jesu-Cristo.—Kapahayagan 19:14, 16.

Makahulogan nanggad, an terminong “Har–Magedon” konektado sa suanoy na siudad nin Megido sa Israel. Estratehikong makukua sa sirangan kan Bukid nin Carmelo, dinominar kan Megido an mayor na mga ruta nin negosyo asin militar kan panahon na idto. Lugar man iyan nin desididong mga ralaban. Halimbawa, paagi sa “gilid kan katubigan nin Megido” na dinaog kan Israelitang si Hokom Barac an sarong makosog na hukbong Cananeo na pinapangenotan ni Heneral Sisara. (Hokom 4:12-24; 5:19, 20) Sa palibot man kaiyan, dinaog ni Hokom Gedeon an mga Midianita. (Hokom 7:1-22) Paagi sa pagkonektar kan Megido sa nagdadangadang na guerra, inaasegurar kita kan Biblia na an Dios, paagi sa saiyang Aki, biyong dadaogon an gabos na nagkokontrang puersa.

Ano an kaaabtan kaiyan? An guerra kan Har–Magedon an mahale kan gabos na karatan asin karigsokan sa daga. Bubuksan kaiyan an dalan para sa pinakamamuraway na panahon sa bilog na kasaysayan nin tawo. (Kapahayagan 21:1-4) Sa irarom kan mamomoton na pangangataman kan Kahadean nin Dios, an daga liliwaton na magin sarong paraiso na dian an mga matanos mabubuhay sagkod lamang.—Salmo 37:29.