Nungkang Pumondo sa Pagtalubo sa saindong Pag-apresyar
Nungkang Pumondo sa Pagtalubo sa saindong Pag-apresyar
“Kanigoan kamahalagang marhay kan saimong mga kaisipan! O Dios, gurano kadakol kan bilog na kabilangan kaiyan!”—SALMO 139:17.
1, 2. Taano ta maninigo niatong apresyaron an Tataramon nin Dios, asin paano ipinahayag kan salmista an saiyang apresasyon?
SARO idtong nakakabigla na pakadiskobre. Mantang isinasagibo an paghirahay sa templo ni Jehova sa Jerusalem, nanompongan kan Halangkaw na Saserdoteng si Hilcias “an libro kan ley ni Jehova paagi sa kamot ni Moises,” na daing duwa-duwa na orihinal na kopya na natapos kaidtong mga 800 na taon na an nakaagi! Naiimahinar daw nindo an seguradong namatean kan matatakton sa Dios na si Hadeng Josias kan an librong iyan ibugtak sa atubangan nia? Sa katunayan, pinahalagahan niang marhay iyan asin tolos-tolos na ipinabasa iyan nin makosog ki Safan, an sekretaryo.—2 Cronica 34:14-18.
2 Ngonyan, binilyon na an makakabasa sa Tataramon nin Dios nin kompleto o kabtang sana. Alagad huli daw kaiyan nagigin bako nang gayong mahalaga an Kasuratan? Siempre dai! Total, yaon dian an mismong kaisipan kan Makakamhan sa Gabos, na isinurat para sa kapakinabangan niato. (2 Timoteo 3:16) Ipinapahayag an saiyang saboot manongod sa Tataramon nin Dios, an salmistang si David nagsurat: “Kaya, abaa kamahalagang marhay para sa sako kan saimong mga kaisipan! O Dios, abaa kadakol kan bilog na kabilangan kaiyan!”—Salmo 139:17.
3. Ano an nagpapaheling na si David sarong tawo na may hararom na espirituwal na pakasabot?
3 Dai noarin man luminuya an pag-apresyar ni David ki Jehova, sa saiyang Tataramon, asin sa saiyang areglo para sa tunay na pagsamba. An dakol na magagayon na salmo na kinomponer ni David nagpapahayag kan saiyang saboot. Halimbawa, sa Salmo 27:4, sia nagsurat: “Sarong bagay an hinagad ko ki Jehova—iyan an sakong hahalaton, na ako makapag-erok sa harong ni Jehova sa gabos na aldaw kan sakong buhay, tanganing maheling an pagigin nakakagayagaya ni Jehova asin tanganing masdan na may pagpahalaga an saiyang templo.” Sa orihinal na Hebreo, an pananaram na “tanganing masdan na may pagpahalaga” nangangahulogan na maghaloy sa paghorophorop, pakasiyasaton, mansayon na may kawilihan, dakulang kaogmahan, paghanga. Malinaw nanggad, si David sarong tawo na may hararom na espirituwal na pakasabot na talagang nag-aapresyar sa espirituwal na mga probisyon ni Jehova asin ikinakaogma an lambang kabtang kan espirituwal na katotoohan na ihinayag nin Dios. An saiyang halimbawa nin pag-apresyar maninigong arogon.—Salmo 19:7-11.
Apresyaron an Pribilehio na Maaraman an Katotoohan sa Biblia
4. Ano an nagpangyari ki Jesus na ‘maggayagaya nin labi-labi sa banal na espiritu’?
4 An pagkaigwa nin pakarorop sa Tataramon nin Dios dai nakadepende sa intelihensia o kinabanon na edukasyon, na may tendensiang magpatalubo nin pagigin orgolyoso. Imbes, depende iyan sa dai na kutana maninigong kabootan ni Jehova, na itinatao nia sa mapakumbaba, sadiosan an puso na mga tawo na nakakamate kan saindang espirituwal na pangangaipo. (Mateo 5:3; 1 Juan 5:20) Kan horophoropon ni Jesus an bagay na may mga bakong sangkap na tawo na isinurat an saindang ngaran sa langit, “sia naggayagaya nin labi-labi sa banal na espiritu asin nagsabi: ‘Hayag takang inoomaw, Ama, Kagurangnan kan langit asin daga, huli ta maingat mong itinago an mga bagay na ini sa mga madonong asin intelektuwal, asin ihinayag iyan sa mga omboy.’”—Lucas 10:17-21.
5. Taano ta dai dapat baliwalaon kan mga disipulo ni Jesus an mga katotoohan manongod sa Kahadean na ihinayag sa sainda?
5 Pagkatapos na sambiton an odok sa pusong pamibing iyan, kinaolay ni Jesus an saiyang mga disipulo asin nagsabi: “Maogma an mga mata na nakakaheling sa mga bagay na saindong naheheling. Huli ta ako nagsasabi saindo, Dakol na propeta asin hade an nagmawot na maheling an mga bagay na saindong naheheling alagad dai naheling an mga iyan, asin na madangog an mga bagay na saindong nadadangog alagad dai nadangog an mga iyan.” Iyo, inenkaminar ni Jesus an maimbod niang mga parasunod na dai baliwalaon an mahalagang marhay na mga katotoohan manongod sa Kahadean na ihinayag sa sainda. An mga katotoohan na ini dai ihinayag sa mas naenot na mga kapag-arakian nin mga lingkod nin Dios, asin siertong dai iyan ibinuyagyag sa “mga madonong asin intelektuwal” kan panahon ni Jesus!—Lucas 10:23, 24.
6, 7. (a) Ano an mga dahelan niato na magin mapag-apresyar sa katotoohan gikan sa Dios? (b) Anong pagkakalaen an naheheling ngonyan sa pag-oltanan kan tunay asin falsong relihion?
6 Sa panahon niato, igwa kita nin orog pa nganing mga dahelan na magin mapag-apresyar sa katotoohan gikan sa Dios, huling paagi sa “maimbod asin mapagmansay na oripon” tinawan ni Jehova an saiyang banwaan nin orog pang hararom na pakarorop sa saiyang Tataramon. (Mateo 24:45; Daniel 12:10) May labot sa panahon kan katapusan, si propeta Daniel nagsurat: “Dakol an magririlibot, asin an tunay na kaaraman magigin abunda.” (Daniel 12:4) Dai daw kamo minaoyon na ngonyan ‘nagin abunda’ an kaaraman manongod sa Dios asin na an mga lingkod ni Jehova basog sa espirituwal?
7 Kanigoan na pagkakalaen an naheheling niato sa pag-oltanan kan espirituwal na abundansia sa banwaan nin Dios asin kan relihiosong karibarawan sa Dakulang Babilonya! Bilang resulta, dakol na desganado o nababalde sa falsong relihion an minaiba sa tunay na pagsamba. Sinda mga arog-karnero na ‘habong makadamay sa [Dakulang Babilonya] sa saiyang mga kasalan’ o “magkaigwa nin parte sa saiyang mga damat.” Iniimbitaran ni Jehova asin kan saiyang mga lingkod an gabos na iyan na lumaog sa tunay na Kristianong kongregasyon.—Kapahayagan 18:2-4; 22:17.
An mga Mapag-apresyar Nagbuburunyog sa Dios
8, 9. Paano naootob ngonyan an mga tataramon sa Haggeo 2:7?
8 May labot sa saiyang espirituwal na harong nin pagsamba, si Jehova naghula: “Yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.” (Haggeo 2:7) An makangangalas na propesiyang ini nagkaigwa nin kaotoban kan panahon ni Haggeo kan itogdok liwat kan ibinalik na natatada kan banwaan nin Dios an templo sa Jerusalem. Ngonyan, an mga tataramon ni Haggeo nagkakaigwa nin orog pang kaotoban kun dapit sa dakulang espirituwal na templo ni Jehova.
9 Minilyon an nagbuburunyog na sa piguratibong templo tanganing sambahon an Dios “sa espiritu asin katotoohan,” asin kada taon ginatos na ribo kan “kawiliwiling mga bagay kan gabos na nasyon” an padagos na nagraralaog. (Juan 4:23, 24) Halimbawa, an pambilog na kinaban na report para sa 2006 na taon nin paglilingkod nagpapaheling na 248,327 an nabautismohan bilang simbolo kan saindang pagdusay ki Jehova. Nangangahulogan iyan nin promedyong 680 bagohan aroaldaw! An saindang pagkamoot sa katotoohan asin an saindang kamawotan na paglingkodan si Jehova bilang mga parabalangibog kan Kahadean nagpapatunay na talagang dinagka sinda nin Dios.—Juan 6:44, 65.
10, 11. Isaysay an sarong eksperyensia na nagpapaheling kun paano nagpoon na apresyaron kan mga tawo an katotoohan sa Biblia.
10 Dakol sa mga sadiosan an pusong ini an naakit sa katotoohan huling nabatid ninda an “kalaenan kan matanos asin marigsok, kan naglilingkod sa Dios asin kan dai naglingkod sa saiya.” (Malaquias 3:18) Estudyare an eksperyensia ni Wayne asin Virginia, sarong mag-agom na kabilang sa iglesia Protestante alagad may dakol na hapot na dai nasisimbag. Ikinakaongis ninda an guerra asin nariribaraw patin napupurisaw kun naheheling ninda an klero na nagbebendisyon sa mga soldados asin mga armas. Mantang nagkakaedad na an mag-agom, namamatean ninda na dai sinda iniintindi kan iba sa iglesia, dawa ngani dakol nang taon na nagtotokdo si Virginia sa pan-Domingong eskuelahan sa relihion. “Mayo nin nagbibisita sa samo o nagpapaheling nin interes sa espirituwal na kamugtakan niamo,” an sabi ninda. “An iglesia interesado sana sa samong kuarta. Desganado na kami.” Orog pa ngani sindang nadesganar kan magin mapagkonsinte an paninindogan kan iglesia ninda manongod sa homoseksuwalidad.
11 Mientras tanto, an makoapong babae ni Wayne asin Virginia dangan an saindang aking babae nagin mga Saksi ni Jehova. Minsan ngani sa primero ikinaanggot ini ni Wayne asin Virginia, sa huri nagbago an saindang isip asin nag-ako nin pag-adal sa Biblia. “Sa laog sana nin tolong bulan,” an sabi ni Wayne, “mas dakol an nanodan niamo sa Biblia kisa sa nanodan niamo sa nakaaging 70 taon! Nungka niamong naaraman na Jehova an ngaran nin Dios, asin mayo kaming aram manongod sa Kahadean asin sa Paraisong daga.” Dai naghaloy, an sinserong mag-agom na ini nagpoon nang mag-atender sa Kristianong mga pagtiripon asin makikabtang sa ministeryo. “Boot niamong isabi sa gabos an manongod sa katotoohan,” an sabi ni Virginia. Parehong labi nang 80, nabautismohan sinda kan 2005. “Nanompongan niamo an tunay na grupo nin mga Kristiano na talagang inaako kami,” an sabi ninda.
Apresyaron an Pagigin “Nasangkapan Para sa Gabos na Marahay na Gibo”
12. Ano an pirmeng itinatao ni Jehova sa saiyang mga lingkod, asin ano an dapat niatong gibohon tanganing makinabang dian?
12 Si Jehova pirmeng nagtatabang sa saiyang mga lingkod na gibohon an saiyang kabotan. Halimbawa, nag-ako si Noe nin malinaw, espesipikong mga instruksion kun paano itotogdok an arka—sarong proyekto na kinakaipuhan na eksakto an pagkagibo sa kaenot-enote pa sana! Asin talagang arog kaiyan an nangyari. Taano? Huli ta “ginibo ni Noe an segun sa gabos na ipinagboot sa saiya nin Dios. Siring nanggad an ginibo nia.” (Genesis 6:14-22) Ngonyan man, lubos na sinasangkapan ni Jehova an saiyang mga lingkod tanganing gibohon an saiyang kabotan. Siempre, an pangenot niatong gibohon iyo an ihulit an maogmang bareta kan naestablisar nang Kahadean nin Dios asin tabangan an mga maninigo na magin mga disipulo ni Jesu-Cristo. Asin siring kan nagin totoo ki Noe, an satong kapangganahan nakadepende sa pagkuyog. Dapat na makinuyog niatong sunodon an itinataong pagdirehir ni Jehova paagi sa saiyang Tataramon asin sa saiyang organisasyon.—Mateo 24:14; 28:19, 20.
13. Sa anong mga paagi kita tinatawan ni Jehova nin pagsasanay?
13 Tanganing mahaman an gibohon na iyan, dapat na manodan niatong ‘gamiton sa tamang paagi’ an pangenot na kasangkapan niato—an Tataramon nin Dios—na “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.” (2 Timoteo 2:15; 3:16, 17) Arog kan enot na siglo, si Jehova nagtatao sa sato nin mahalagang pagsasanay paagi sa Kristianong kongregasyon. Ngonyan, sa 99,770 kongregasyon sa bilog na kinaban, an Teokratikong Paadalan sa Pagmiministro asin Pagtiripon sa Paglilingkod isinasagibo serosemana tanganing tabangan kita sa ministeryo. Ipinapaheling daw nindo an saindong pag-apresyar sa mahahalagang pagtiripon na ini paagi sa regular na pag-atender asin pag-aplikar kan mga bagay na saindong nanonodan?—Hebreo 10:24, 25.
14. Paano ipinapaheling kan mga lingkod ni Jehova an saindang pag-apresyar sa pribilehio nin paglilingkod sa Dios? (Iiba an mga komento basado sa tsart sa pahina 27-30.)
14 Paagi sa paghihingoa ninda sa ministeryo, minilyon sa banwaan nin Dios sa bilog na kinaban an nagpapaheling kan saindang pag-apresyar sa pagsasanay na inaako ninda. Halimbawa, durante kan 2006 na taon nin paglilingkod, 6,741,444 parahayag kan Kahadean an naggamit nin total na 1,333,966,199 oras sa gabos na kabtang kan gibohon, na kaiba an pagkondukta nin 6,286,618 pag-adal sa Biblia. Nagkapira sana ini sa nakakaparigon sa boot na mga detalye na yaon sa pambilog na kinaban na report. Iniimbitaran niamo kamo na siyasaton nin maingat an report na ini asin kumua nin pamparigon sa boot hale dian, kun paanong an enot na siglong mga tugang niato daing duwa-duwa na nagkua nin dakulang pamparigon sa boot hale sa mga report manongod sa paghiwas kan paghuhulit kaidtong panahon ninda.—Gibo 1:15; 2:5-11, 41, 47; 4:4; 6:7.
15. Taano ta mayo nin siisay man na maninigong manluya an boot manongod sa saiyang bilog na kalag na paglilingkod ki Jehova?
15 An makosogon na kurahaw nin pag-omaw na nakakaabot sa Dios kada taon nagpapabanaag kan hararom na pag-apresyar kan mga lingkod ni Jehova para sa pribilehio na mamidbid si Jehova asin magpatotoo dapit sa saiya. (Isaias 43:10) Totoo, an atang nin pag-omaw na itinatao kan nagkapira sa satong gurang na, may helang, o maluya an hawak na mga tugang na lalaki asin babae puedeng ikomparar sa duwang marabilis kan babaeng balo. Alagad dai niato paglingawan na talagang inaapresyar ni Jehova asin kan saiyang Aki an gabos na naglilingkod sa Dios nin bilog na kalag, mantang ginigibo ninda an gabos na magigibo ninda.—Lucas 21:1-4; Galacia 6:4.
16. Anong mga kasangkapan sa pagtotokdo an itinao nin Dios kan nakaagi pa sanang mga panahon?
16 Apuera sa pagsasanay sa sato para sa ministeryo, sinasangkapan kita ni Jehova, paagi sa saiyang organisasyon, nin ekselenteng mga kasangkapan sa pagtotokdo. Kan nakaagi pa sanang mga dekada, kaiba digdi an mga librong An Katotoohan na Minagiya Pasiring sa Buhay na Daing Sagkod, Puwede Kamong Mabuhay Sagkod Lamang sa Paraiso Digdi sa Daga, Kaaraman na Minagiya Pasiring sa Buhay na Daing Katapusan asin, sa presente, an Ano Man Nanggad an Itinotokdo kan Biblia? An mga tunay na nag-aapresyar sa mga probisyon na ini epektibong ginagamit iyan sa ministeryo.
Epektibong Gamiton an Librong Itinotokdo kan Biblia
17, 18. (a) Arin na mga kabtang kan librong Itinotokdo kan Biblia an gusto nindong itampok sa saindong ministeryo? (b) Ano an ikinomento nin sarong paraataman sa sirkito manongod sa librong Itinotokdo kan Biblia?
17 Igwa nin 19 kapitulo, detalyadong apendise, asin malinaw, simpleng pananaram, an librong Ano Man Nanggad an Itinotokdo kan Biblia? nagigin nanggad bendisyon sa ministeryo. Halimbawa, tinotokar kan kapitulo 12 an temang “Pamumuhay sa Paagi na Nakakapaogma sa Dios.” Ipinapaliwanag kaini sa inaadalan sa Biblia kun paano sia magigin katood nin Dios, sarong bagay na nungka nganing inisip o hinona nin dakol na posible palan. (Santiago 2:23) Ano an reaksion sa pantabang na ini sa pag-adal sa Biblia?
18 Ibinabareta nin sarong paraataman sa sirkito sa Australia na an librong Itinotokdo kan Biblia “ensegidang nakakaakit, na tolos-tolos na nakakaenganyar sa mga kagharong na makipag-olay.” Idinugang pa nia na an libro pasil na marhay na gamiton kaya “nagtao iyan sa dakol na parahayag kan Kahadean nin bagong kompiansa asin kagayagayahan sa ministeryo. Bakong makangangalas na inaapod kan nagkapira an libro na Tipak na Bulawan!”
19-21. Magsaysay nin nagkapirang eksperyensia na itinatampok an halaga kan librong Itinotokdo kan Biblia.
19 “Seguradong isinugo kamo nin Dios,” an sabi nin sarong babae sa Guyana sa sarong payunir na nasa pinto nia. An babae asin an saiyang duwang aking sadang binayaan pa sana kan saiyang kasaroan. Binuklat kan payunir an librong Itinotokdo kan Biblia sa kapitulo 1 asin binasa nin makosog an parapo 11, sa irarom kan subtemang “Ano an Saboot nin Dios Manongod sa mga Inhustisya na Inaatubang Niato?” “An mga punto nakapahirong marhay sa saiya,” an sabi kan payunir. “Sa katunayan, kinaipuhan niang tumindog, magpasiring sa likod kan saiyang puesto sa negosyo, asin maghibi nin buelo.” Inako kan babaeng ini an alok na regular na mag-adal sa Biblia kaiba an sarong tugang na babae na taga duman asin padagos siang nag-ooswag.
20 Si Jose, na taga España, nagadanan nin agom huli sa aksidente sa auto. Naghanap sia nin karangahan paagi sa droga, asin nagkonsulta man sia sa mga sikologo. Minsan siring, dai masimbag kan mga sikologo an hapot na nakakapurisaw na marhay ki Jose: “Taano ta tinogotan nin Dios na magadan an sakong agom?” Sarong aldaw nakamidbid ni Jose si Francesc, na katrabaho nia sa kompanya. Isinuherir ni Francesc na pag-olayan ninda an kapitulo 11 kan librong Itinotokdo kan Biblia, na may temang “Taano ta Tinotogotan nin Dios an Pagdusa?” An sono sa Kasuratan na paliwanag asin an ilustrasyon dapit sa sarong maestro asin sarong estudyante nakatudok na marhay sa boot ni Jose. Nagpoon na siang mag-adal nin odok, nag-atender nin pansirkitong asamblea, asin ngonyan nag-aatender sa mga pagtiripon sa lokal na Kingdom Hall.
21 Si Roman, sarong 40 anyos na negosyante sa Polandia, may paggalang na sa Tataramon nin Dios kaidto pa. Alagad huling sibot siang marhay sa saiyang trabaho, limitado sana an inoswag nia sa pag-adal nia sa Biblia. Minsan siring, nag-atender sia sa sarong pandistritong kombension asin nag-ako nin kopya kan librong Itinotokdo kan Biblia. Pakatapos kaiyan, ginibo nia an risang-risang pagbago. “Paagi sa librong ini,” an sabi nia, “an gabos na pundamental na katokdoan kan Biblia garo nagsurusurumpay tanganing makabilog nin sarong kompletong ladawan, arog nin sarong jigsaw puzzle.” Si Roman regular nang nag-aadal ngonyan sa Biblia asin marahay an pag-oswag.
Padagos na Tumalubo sa Pag-apresyar
22, 23. Paano niato padagos na ikakapaheling an satong pag-apresyar para sa paglaom na ibinugtak sa atubangan niato?
22 Siring kan ipinaliwanag sa nakakapukaw sa boot na “Harani Na an Kaligtasan!” na mga Pandistritong Kombension, hinihimuyawot kan tunay na mga Kristiano an “daing katapusan na kaligtasan” na ipinanuga nin Dios asin pinagin posible kan pinabolos na dugo ni Jesu-Cristo. An pinakamarahay na paagi na ipaheling an satong odok sa pusong pag-apresyar para sa mahalagang marhay na paglaom na ini iyo an pagpapadagos na malinig “sa gadan na mga gibo tangani kitang makatao nin sagradong paglilingkod sa nabubuhay na Dios.”—Hebreo 9:12, 14.
23 Iyo, talagang sarong milagro na an labing anom na milyon na parabalangibog kan Kahadean maimbod na nagpapadagos sa paglilingkod sa Dios sa panahon nin pinakamakosog na pan-iimpluwensia na panigoan an sadiri. Ebidensia man iyan na odok na inaapresyar kan mga lingkod ni Jehova an onra nin paglilingkod sa Dios, sa pakaaram na an saindang “pagpapagal bakong sayang sana may koneksion sa Kagurangnan.” Logod na an pag-apresyar na iyan nungkang pumondo sa pagtalubo!—1 Corinto 15:58; Salmo 110:3.
Ano an Isisimbag Nindo?
• Ano an itinotokdo sa sato kan salmista manongod sa pag-apresyar sa Dios asin sa espirituwal na mga probisyon nia?
• Paano naootob ngonyan an mga tataramon sa Haggeo 2:7?
• Paano sinasangkapan ni Jehova an saiyang mga lingkod tanganing epektibong makapaglingkod sa saiya?
• Ano an magigibo nindo tanganing ipaheling an saindong pag-apresyar sa karahayan ni Jehova?
[Mga Hapot Para sa Pag-adal]
[Tsart sa pahina 27-30]
REPORT KAN 2006 NA TAON NIN PAGLILINGKOD KAN MGA SAKSI NI JEHOVA SA BILOG NA KINABAN
(Hilingon an publikasyon)
[Mga Ritrato sa pahina 25]
Kita lubos na sinasangkapan ni Jehova tanganing gibohon an saiyang kabotan