Pagsabi nin Totoo​—Dapat daw na Laoman Sana Iyan sa Iba?

“NAUUYAM ako sa mga kaputikan, asin nauuyam akong pagputikan!” an kagsing nin 16 anyos na daragita. An kadaklan sa sato arog man kaiyan an saboot. Gusto niatong isipon na totoo an impormasyon na itinatao sa sato—baga man berbal o nasusurat. Alagad sinasabi daw niato an totoo kun kita nagtatao nin impormasyon sa iba?

Sa sarong surbey na ginibo sa Alemania, an dakulang mayoriya kan mga hinapot sa surbey nagsaboot na “puedeng itogot an pagputik sa sadit na mga isyu tanganing protehiran an sadiri o protehiran an iba sa peligro, iyo, kaipuhan pa ngani tanganing magin marahay an pag-iribanan nin mga tawo.” Asin an sarong peryodista nagsurat: “An pagsabi nin totoo asin daing iba kundi nin totoo sa gabos na panahon sarong nobleng pamantayan alagad nakakasawa.”

Bako daw na tibaad gusto niato na an iba magtaram nin totoo pero nagsasaboot kita mismo na kun beses may marahay kitang dahelan na dai magtaram nin totoo? Mahalaga daw kun baga kita nagsasabi nin totoo o dai? Ano an mga resulta nin pagtaram nin bakong totoo?

An Danyos na Ibinubunga kan Pagsabi nin Bakong Totoo

Estudyare an danyos na puedeng ibunga kan pagsabi nin bakong totoo. An kaputikan nagbubunga nin pagdeskompiar sa pag-oltanan nin mga mag-agom asin sa tahaw nin mga miembro kan pamilya. An daing basehan na tsismis puedeng makaraot sa reputasyon nin sarong tawo. An pandadaya kan mga empleyado nagpapalangkaw sa gastos kan negosyo asin nagreresulta sa mas mahal na mga produkto. An putik na mga deklarasyon sa pagbubuhis hinahabonan an mga gobyerno kan kinakaipuhan na ganansia na gagamiton sa pagtao nin mga serbisyo sa publiko. An inimbentong mga impormasyon na itinatao kan mga parasiyasat nakakaraot sa saindang may paglaom na umasensong mga karera asin nakakamantsa sa reputasyon kan iginagalang na mga institusyon. Dahel sa madayang mga pakana sa biglang pagyaman, an gabos na natipon kan madaling malokong mga kapitalista nauubos o mas grabe pa ngani an resulta. Bakong makangangalas na sinasabi sa sato kan Biblia na kabilang sa mga bagay na makauuyam nin makuri ki Jehova Dios an “putikon na dila” asin “putikon na saksi na nagtataram nin mga kaputikan”!—Talinhaga 6:16-19.

An lakop na pagputik puedeng makadanyar sa mga indibiduwal sagkod sa sosyedad sa pangkagabsan. Pipira sana an makikidiskutir sa bagay na iyan. Kun siring, taano an mga tawo ta tuyong nagsasabi nin bakong totoo? Asin an gabos daw na pagsabi nin bakong totoo kapareho nin pagputik? Eestudyaran niato an simbag sa mga ini asin sa iba pang mga hapot sa sunod na artikulo.

[Ritrato sa pahina 3]

An kaputikan nagbubunga nin pagdeskompiar sa pag-oltanan nin mga mag-agom