Si Jehova Sarong Mapag-apresyar na Dios
Si Jehova Sarong Mapag-apresyar na Dios
“An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”—HEBREO 6:10.
1. Paano ipinaheling ni Jehova an pag-apresyar nia sa Moabitang si Rut?
INAAPRESYAR na marhay ni Jehova an mga paghihingoa kan mga sinserong nagmamaigot na gibohon an saiyang kabotan, asin abunda niang binabalosan sinda. (Hebreo 11:6) An maimbod na tawong si Booz pamilyar sa magayon na aspektong ini kan personalidad nin Dios, huli ta nagsabi sia sa Moabitang si Rut, na mamomoton na inasikaso an panugangan kaining babae: “Balosan logod ni Jehova an saimong ginigibo, asin magdatong logod saimo an sangkap na tangdan hale ki Jehova.” (Rut 2:12) Si Rut daw binendisyonan nin Dios? Iyo nanggad! Sa katunayan, an estorya nia isinurat sa Biblia! Apuera kaini, naagom sia ni Booz asin nagin apoon ni Hadeng David sagkod ni Jesu-Cristo. (Rut 4:13, 17; Mateo 1:5, 6, 16) An halimbawang iyan saro sana sa dakol na halimbawa sa Biblia na nagpapaheling kan pag-apresyar ni Jehova sa saiyang mga lingkod.
2, 3. (a) Ano an pambihira sa mga kapahayagan ni Jehova nin pag-apresyar? (b) Taano ta kaya ni Jehova na magpahayag nin tunay na pag-apresyar? Iilustrar.
2 Ibibilang ni Jehova na kabikoan sa saiya kun dai nia ipapaheling an pag-apresyar. An Hebreo 6:10 nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.” An pambihira sa mga tataramon na ini iyo na ipinapaheling nin Dios an pag-apresyar sa debotong mga tawo dawa ngani sinda nagkakasala asin nagkukulang sa saiyang kamurawayan.—Roma 3:23.
3 Huli sa pagkabakong sangkap niato, tibaad isipon ta na bakong mahalaga asin dai maninigo sa bendisyon nin Dios an satong mga gibo nin diosnon na debosyon. Pero, lubos na nasasabotan ni Jehova an satong mga motibo asin kamugtakan, asin talagang pinapahalagahan nia an bilog na kalag na paglilingkod niato. (Mateo 22:37) Sa pag-ilustrar: Naheling nin sarong ina an sarong regalo—sarong baratong kuintas—sa saiyang lamesa. An regalo puede niang mansayon na daing halaga asin ipagilid iyan. Minsan siring, sinasabi kan kaibang kard na an regalo hale sa saiyang sadit na aking babae, na ginastos an gabos kaining natipon tanganing bakalon iyan. Nabago ngonyan an pagmansay kan ina sa regalo. Tibaad nagluluhang kinugos nia an saiyang aki asin ipinahayag an saiyang odok sa pusong pag-apresyar.
4, 5. Paano inarog ni Jesus si Jehova sa pagpaheling nin pag-apresyar?
4 Huling lubos na nakakaaram sa satong mga motibo asin limitasyon, inaapresyar ni Jehova kun itinatao niato sa saiya an pinakamakakaya niato, baga man iyan sadit o dakula. Mapadapit digdi, si Jesus sarong sangkap na ladawan kan saiyang Ama. Girumdomon an pagkasaysay kan Biblia manongod sa duwang marabilis kan balo. “Kan [si Jesus] nagheheling naheling nia an mga mayaman na naghuhulog kan saindang mga regalo sa kaha. Dangan naheling nia an sarong dukhang babaeng balo na naghulog duman nin duwang saradit na sinsilyo na kadikiton an halaga, asin sia nagsabi: ‘Sa katotoohan sinasabi ko sa saindo, An babaeng balong ini, minsan ngani dukha, naghulog nin labi kisa kan ihinulog ninda gabos. Huli ta an gabos na ini naghulog nin mga regalo gikan sa saindang kalabihan, alagad an babaeng ini naghulog gikan sa saiyang kadaihan kan gabos niang pagbuhay.’”—Lucas 21:1-4.
5 Iyo, huling naaaraman an kamugtakan kan babae—na ini balo asin dukha—nasabotan ni Jesus an tunay na halaga kan regalo kaini, asin inapresyar nia iyan na marhay. Totoo man iyan ki Jehova. (Juan 14:9) Bako daw na nakakaparigon sa boot na maaraman na ano man an saindong mga kamugtakan, puede nindong kamtan an pag-oyon kan satong mapag-apresyar na Dios asin kan saiyang Aki?
Binalosan ni Jehova an Matatakton sa Dios na Etiope
6, 7. Taano ta asin paano ipinaheling ni Jehova an saiyang pag-apresyar ki Ebed-melec?
6 An bagay na ipinapaheling ni Jehova an saiyang pag-apresyar sa mga naggigibo kan saiyang kabotan paorootrong ipinapaheling sa Kasuratan. Estudyare an pagtratar nia sa matatakton sa Dios na Etiope na si Ebed-melec, sarong katemporanyo ni Jeremias asin sarong surugoon sa pamilya kan bakong maimbod na si Hadeng Zedequias kan Juda. Naaraman ni Ebed-melec na an mga prinsipe kan Juda salang sinahotan si propeta Jeremias nin sedisyon asin iinapon sia sa sarong bobon, tanganing duman magadan huli sa gutom. (Jeremias 38:1-7) Naaaraman na ikinakaongis na marhay si Jeremias huli sa mensahe na ihinuhulit nia, isinapeligro ni Ebed-melec an mismong buhay nia asin nakiolay sa hade. May kosog nin boot, an Etiope nagtaram: “O kagurangnan kong hade, an mga lalaking ini naggibo nin maraot sa gabos na ginibo ninda ki Jeremias na propeta, na iinapon ninda sa bobon, tanganing magadan sia sa namumugtakan nia huli sa gutom.” Sa pagboot kan hade, nag-iba si Ebed-melec nin 30 lalaki asin isinalbar an propeta nin Dios.—Jeremias 38:8-13.
7 Naheling ni Jehova na si Ebed-melec huminirong may pagtubod, na nakatabang sa saiya na daogon an ano man na takot na posibleng namatean nia. Sa siring, ipinaheling ni Jehova an saiyang pag-apresyar asin sinabihan si Ebed-melec paagi ki Jeremias: “Uya patototoohan ko an sakuyang mga tataramon sa siudad na ini sa kapahamakan asin bakong sa karahayan . . . Asin ililigtas taka sa aldaw na iyan, . . . asin dai ka itatao sa kamot kan mga tawo na kinakatakotan mo. Huli ta totoong gayo na ililigtas taka . . . ; asin siertong makakamtan mo an saimong kalag bilang sinamsaman, huli ta ika nanarig sa sakuya.” (Jeremias 39:16-18) Iyo, ilinigtas ni Jehova si Ebed-melec, saka si Jeremias, sa marigsok na mga prinsipe kan Juda asin kan huri sa mga Babilonyo, na naglaglag sa Jerusalem. “Binabantayan [ni Jehova] an mga kalag kan saiyang mga maimbod; sa kamot kan mga tampalasan iliniligtas nia sinda,” an sabi kan Salmo 97:10.
“An Saimong Ama na Nagheheling sa Hilom Mabalos sa Saimo”
8, 9. Arog kan ipinaheling ni Jesus, anong klaseng mga pamibi an inaapresyar ni Jehova?
8 An saro pang ebidensia na inaapresyar asin pinapahalagahan ni Jehova an satong mga kapahayagan nin diosnon na debosyon maheheling sa sinasabi kan Biblia manongod sa pamibi. “An pamibi kan mga matanos kawilihan sa [Dios],” an sabi kan madonong na tawo. (Talinhaga 15:8) Kan panahon ni Jesus dakol na namomoon sa relihion an namimibi sa publiko, bakong huli sa tunay na debosyon, kundi huli sa kamawotan na pahangaon an mga tawo. “Nakakamtan na ninda an bilog na balos sa sainda,” an sabi ni Jesus. “Minsan siring . . . , kun ika namimibi,” an instruksion nia sa saiyang mga parasunod, “lumaog ka sa saimong kuarto asin, pakapintoa kan saimong tata, mamibi ka sa saimong Ama na nasa hilom; dangan an saimong Ama na nagheheling sa hilom mabalos sa saimo.”—Mateo 6:5, 6.
9 Siempre, dai kinokondenar ni Jesus an pampublikong pamibi, huli ta sia mismo namibi sa publiko sa nagkapirang okasyon. (Lucas 9:16) Inaapresyar na marhay ni Jehova kun namimibi kita sa saiya hale sa sinserong puso, na dai iniisip na pahangaon an iba. Sa katunayan, an satong pribadong mga pamibi marahay na tanda kan rarom kan satong pagkamoot sa Dios asin kan satong pagtitiwala sa saiya. Huli kaini, bakong makangangalas na parateng naghahanap si Jesus nin pribadong mga lugar tanganing mamibi. Sarong beses, ginibo nia ini nin “amay pagkaaga, mantang madiklom pa.” Sa saro pang pangyayari, “solo siang nagtukad sa bukid tanganing mamibi.” Asin bago pilion an 12 apostol nia, si Jesus magdamlag na namibi nin solo.—Marcos 1:35; Mateo 14:23; Lucas 6:12, 13.
10. Kun an satong mga pamibi nagpapabanaag nin sinseridad asin rarom nin boot, sa ano kita makakasierto?
10 Imahinaron kun gurano kaatento na seguradong naghinanyog si Jehova sa odok sa pusong mga kapahayagan kan saiyang Aki! Sa katunayan, kun beses namimibi si Jesus na “may makosog na mga pagtangis asin luha, asin sia dinangog na may pabor huli sa saiyang diosnon na takot.” (Hebreo 5:7; Lucas 22:41-44) Kun an satong mga pamibi nagpapabanaag kan siring na sinseridad asin rarom nin boot, makakasierto kita na atento asin mapag-apresyar na naghihinanyog an satong langitnon na Ama. Iyo, “si Jehova harani sa gabos . . . na nag-aarang sa saiya na may kaimbodan.”—Salmo 145:18.
11. Ano an saboot ni Jehova manongod sa ginigibo niato sa pribado?
11 Kun inaapresyar ni Jehova an pamimibi niato sa saiya sa hilom, segurado man na inaapresyar nanggad nia kun kinukuyog niato sia sa hilom! Iyo, naaaraman ni Jehova an mga ginigibo niato sa pribado. (1 Pedro 3:12) Sa katunayan, an pagigin maimbod asin makinuyog niato kun kita nagsosolo sarong marahay na tanda na igwa kita nin “kompletong puso” ki Jehova, puso na may dalisay na motibo asin marigon sa kun ano an tama. (1 Cronica 28:9) Magpapagayagaya nanggad sa puso ni Jehova an siring na paggawe!—Talinhaga 27:11; 1 Juan 3:22.
12, 13. Paano niato maiingatan an satong isip asin puso asin magin arog kan maimbod na disipulong si Natanael?
12 Bilang resulta, an maimbod na mga Kristiano naglilikay sa sekretong mga kasalan na nakakaraot sa isip asin puso, arog kan pagdalan nin pornograpiya asin kadahasan. Minsan ngani an nagkapirang kasalan puedeng itago sa mga tawo, narerealisar niato na “an gabos na bagay huba asin bukas sa mga mata kaidtong satong papaninimbagan.” (Hebreo 4:13; Lucas 8:17) Paagi sa pagmamaigot na likayan an mga bagay na ikinakaanggot ni Jehova, napapagdanay niato an malinig na konsensia asin naoogma kitang marhay sa pakaaram na yaon sa sato an pag-oyon nin Dios. Iyo, daing duwa-duwa na talagang inaapresyar ni Jehova an tawo “na naglalakaw na daing sala asin naggigibo nin katanosan asin nagtataram kan katotoohan sa saiyang puso.”—Salmo 15:1, 2.
13 Pero, paano niato maiingatan an satong isip asin puso sa sarong kinaban na sagom sa karatan? (Talinhaga 4:23; Efeso 2:2) Apuera sa lubos na pag-aprobetsar sa gabos na espirituwal na probisyon, kaipuhan na gibohon niato an gabos na paghihingoa na isikwal an maraot asin gibohon an marahay, na tolos na minahiro tanganing an salang mga kamawotan dai mangidam asin mangaki nin kasalan. (Santiago 1:14, 15) Isipon kun gurano kamo kaogma kun sabihon ni Jesus manongod sa saindo an kapareho kan sinabi nia manongod ki Natanael: “Uya, sarong [tawo] na sa saiya mayo nin pandadaya.” (Juan 1:47) Si Natanael, na inaapod man na Bartolome, nagkapribilehio kan huri na magin saro sa 12 apostol ni Jesus.—Marcos 3:16-19.
“Maheherakon Asin Maimbod na Halangkaw na Saserdote”
14. Ano an reaksion ni Jesus sa ginibo ni Maria en komparasyon sa reaksion kan iba?
14 Huling ‘ladawan kan dai naheheling na Dios,’ si Jehova, pirmeng sangkap na inaarog ni Jesus an saiyang Ama sa pagpaheling nin pag-apresyar sa mga naglilingkod sa Dios gikan sa malinig na puso. (Colosas 1:15) Halimbawa, limang aldaw bago itao an saiyang buhay, si Jesus asin an nagkapira sa saiyang mga disipulo nagin bisita sa harong ni Simon na taga Betania. Durante kan banggi, si Maria, an tugang ni Lazaro asin Marta, “nagkua nin sarong librang ungguento, tunay na nardo, mamahalon na marhay” (nagkakantidad nin mga sarong taon na tangdan), asin ibinubo iyan sa payo asin mga bitis ni Jesus. (Juan 12:3) “Tadaw ta sinasayang ini?” an sabi kan nagkapira. Minsan siring, hineling ni Jesus an ginibo ni Maria sa laen na marhay na anggulo. Minansay nia iyan bilang akto nin dakulang pagigin buka an palad asin na may hararom na kahulogan huli sa madali na niang kagadanan asin lobong. Huli kaini, imbes na tuyawon si Maria, tinawan sia nin onra ni Jesus. “Saen man ihulit an maogmang baretang ini sa bilog na kinaban,” sia nagsabi, “an ginibo kan babaeng ini masasabihan man bilang paggirumdom sa saiya.”—Mateo 26:6-13.
15, 16. Paano kita nakikinabang sa pamumuhay asin paglilingkod ni Jesus sa Dios bilang tawo?
15 Kanigoan an pribilehio niato na magkaigwa kan siring na mapag-apresyar na persona arog ni Jesus bilang Poon niato! Sa katunayan, an buhay ni Jesus bilang tawo nag-andam sa saiya para sa gibohon na itinagama ni Jehova sa saiya—an paglilingkod bilang Halangkaw na Saserdote asin Hade, enot para sa kongregasyon kan mga linahidan dangan para sa kinaban.—Colosas 1:13; Hebreo 7:26; Kapahayagan 11:15.
16 Bago magdigdi sa daga, si Jesus may odok nang interes asin espesyal na pagkaogma para sa katawohan. (Talinhaga 8:31) Paagi sa pamumuhay bilang tawo, naapresyar nia nin mas lubos an mga pagbalo na inaagihan niato sa satong paglilingkod sa Dios. “[Si Jesus] kinaipuhan na magin kabaing kan saiyang ‘mga tugang’ sa gabos na bagay,” an isinurat ni apostol Pablo, “tangani na sia magin maheherakon asin maimbod na halangkaw na saserdote . . . Huli ta mantang sia mismo nagtios kaidtong binabalo, sia makakasurog sa mga binabalo.” Si Jesus “makakapakidamay sa satong mga kaluyahan” huling sia “nabalo na sa gabos na bagay arog niato, alagad dai nin kasalan.”—Hebreo 2:17, 18; 4:15, 16.
17, 18. (a) Ano an ihinahayag kan mga surat sa pitong kongregasyon sa Asia Minor manongod sa rarom kan pag-apresyar ni Jesus? (b) Sa ano inaandam an linahidan na mga Kristiano?
17 An uminorog na pag-apresyar ni Jesus sa mga kasakitan kan saiyang mga parasunod nagin risang-risa pagkatapos na buhayon sia liwat. Estudyare an saiyang mga surat sa pitong kongregasyon sa Asia Minor, na isinurat ni apostol Juan. Sa kongregasyon sa Smirna, nagsabi si Jesus: “Aram ko an saimong kahorasaan asin kadukhaan.” Digdi, garo man sana sinasabi ni Jesus, ‘Lubos kong nasasabotan an saimong mga problema; talagang naaaraman ko an saimong inaagihan.’ Dangan, may pagmalasakit sagkod autoridad na ibinunga kan mismong pagsakit nia sagkod sa mismong kagadanan, idinugang ni Jesus: “Magmaimbod ka dawa sagkod sa kagadanan, asin ta itatao ko sa saimo an korona nin buhay.”—Kapahayagan 2:8-10.
18 An mga surat sa pitong kongregasyon pano nin mga kapahayagan na nagpapabanaag kan lubos na pakaaram ni Jesus sa mga kadepisilan kan saiyang mga disipulo asin kan tunay na pag-apresyar nia sa saindang buhay na may integridad. (Kapahayagan 2:1–3:22) Tandaan na an mga kinakaolay ni Jesus linahidan na mga Kristiano na may paglaom na mamahala kaiba nia sa langit. Kapareho kan saindang Kagurangnan, inaandam sinda para sa saindang halangkawon na katongdan na tumabang na ipaabot na may lubos na pagmalasakit an mga pakinabang kan atang na pantubos ni Cristo para sa naghehelang na katawohan.—Kapahayagan 5:9, 10; 22:1-5.
19, 20. Paano ipinapaheling kan mga minakompuesto sa “dakulang kadaklan” an pag-apresyar ninda ki Jehova asin sa saiyang Aki?
19 Siempre, an pagkamoot ni Jesus sa saiyang linahidan na mga parasunod ipinapaheling man sa maimbod niang “ibang mga karnero,” na minilyon kaiyan an minakompuesto na ngonyan sa may esperansang mapabilang sa “dakulang kadaklan . . . hale sa gabos na nasyon,” na makakaligtas sa nagdadangadang na “dakulang kahorasaan.” (Juan 10:16; Kapahayagan 7:9, 14) An mga ini nagbuburunyog sa kampi ni Jesus huli sa pag-apresyar sa saiyang atang na pantubos asin sa saindang paglaom na buhay na daing katapusan. Paano ninda ipinapaheling an saindang pag-apresyar? Ginigibo ninda iyan paagi sa ‘pagtao sa Dios nin sagradong paglilingkod aldaw asin banggi.’—Kapahayagan 7:15-17.
20 An pambilog na kinaban na report para sa 2006 na taon nin paglilingkod, na yaon sa pahina 27 sagkod 30, nagtatao nin malinaw na ebidensia na an maimbod na mga ministrong ini talagang nagtatao ki Jehova nin “sagradong paglilingkod aldaw asin banggi.” Sa katunayan, durante kan sarong taon na iyan, sinda, kaiba an medyo sadit nang natatadang grupo kan linahidan na mga Kristiano, nagdusay nin total na 1,333,966,199 oras sa pampublikong ministeryo—na katumbas nin labi nanggad sa 150,000 na taon!
Padagos na Ipaheling an Pag-apresyar!
21, 22. (a) Mapadapit sa pagpaheling nin pag-apresyar, taano ta dapat na nangorognang magmaan an mga Kristiano ngonyan? (b) Ano an eestudyaran sa masunod na artikulo?
21 Sa pagtratar sa bakong sangkap na mga tawo, ipinaheling ni Jehova asin kan saiyang Aki an rarom nin pag-apresyar na talagang makosogon. Pero makamomondo, an mayoriya kan mga tawo dai iniisip an Dios, imbes, nagkokonsentrar sinda sa sadiri nindang mga kapurisawan. Ilinaladawan an mga tawo na nabubuhay sa “huring mga aldaw,” si Pablo nagsurat: “An mga tawo magigin biyong sadiri sana an iniintindi, mahanab sa kuarta . . . Sinda magigin biyong daing utang na boot.” (2 Timoteo 3:1-5, Phillips) An mga siring kabaliktaran nanggad sa tunay na mga Kristiano, na paagi sa odok sa pusong pamibi, andam na pagkuyog, asin bilog na kalag na paglilingkod ipinapaheling an saindang pag-apresyar sa gabos na ginibo sa sainda nin Dios!—Salmo 62:8; Marcos 12:30; 1 Juan 5:3.
22 Sa masunod na artikulo, rerepasohon niato an nagkapira sa dakol na espirituwal na probisyon na mamomoton na itinatao sa sato ni Jehova. Mantang hinohorophorop niato an ‘marahay na mga balaog’ na ini, an sato logod na pag-apresyar orog pang rumarom.—Santiago 1:17.
Ano an Isisimbag Nindo?
• Paano ipinaheling ni Jehova na saro siang mapag-apresyar na Dios?
• Kun nasa pribado, paano niato mapapagayagaya an puso ni Jehova?
• Sa anong mga paagi ipinaheling ni Jesus an pag-apresyar?
• Paanong an pamumuhay bilang tawo nakatabang ki Jesus na magin mapagmalasakit asin mapag-apresyar na namamahala?
[Mga Hapot Para sa Pag-adal]
[Ritrato sa pahina 17]
Kun paanong gustong-gusto nin sarong magurang an simpleng kapahayagan kan saiyang aki, inaapresyar ni Jehova kun itinatao niato sa saiya an pinakamakakaya niato