Taano ta Dapat na Magsabi nin Totoo?

SA EDAD na 18, si Manfred sinasanay kaidto sa opisina. * Iinareglo kan kompanya na pinagtatrabawohan nia na sia asin an nagkapirang iba pang sinasanay paeskuelahon sa sarong bokasyonal na kolehio nin duwang aldaw kada semana. Sarong aldaw an klase pinapuli nin mas amay kisa sa iskedyul. Segun sa reglamento kan kompanya, an mga sinasanay dapat na bumalik sa trabaho sa natatadang kabtang kan aldaw. Imbes, sinda gabos nagpasiramsiram, apuera ki Manfred, na nagbalik sa pinagtatrabawohan. Nagkanorongod man na nag-abot an ehekutibo kan kompanya na may autoridad sa mga sinasanay. Kan maheling nia si Manfred, naghapot sia: “Taano ta dai ka nagklase ngonyan? Asin haen an ibang mga sinasanay?” Paano maninigong sumimbag si Manfred?

Tipikal an alanganon na kamugtakan ni Manfred. Maninigo daw niang sabihon an totoo, o maninigo daw niang tahoban an saiyang mga kaklase? An pagtao nin totoong simbag mangangahulogan nin pagkapahamak kan iba asin ikakauyam sia huli kaiyan. Puede man daw na magputik sa siring kaiyan na mga kamugtakan? Kun kamo an nasa siring na situwasyon, ano daw an gigibohon nindo? Babalikan niato si Manfred aroatyan, alagad estudyaran nguna niato kun ano an kalabot kun kita kaipuhan na magdesisyon kun baga kita mataram nin totoo o dai.

Totoo Asin Bakong Totoo—Sarong Pundamental na Pagkakatumang

Sa kapinonan kan kasaysayan nin katawohan, an gabos na bagay nakabasar sa katotoohan. Mayo nin pagbiribid nin mga katunayan, mayo nin pagdoktor o pagmisrepresentar sa katotoohan. Si Jehova, an Kaglalang, iyo an “Dios nin katotoohan.” An saiyang tataramon katotoohan; dai sia makakapagputik, asin kinokondenar nia an pagputik asin mga putikon.—Salmo 31:5; Juan 17:17; Tito 1:2.

Kun siring kaiyan, saen naggikan an pagkadaing katotoohan? Itinao ni Jesu-Cristo an masasarigan na simbag kan sabihan nia an relihiosong mga nagkokontra sa saiya, na naghihingoang gadanon sia: “Gikan kamo sa saindong ama na Diablo, asin boot nindo na gibohon an mga mawot kan saindong ama. An sarong iyan sarong paragadan kan sia pumoon, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.” (Juan 8:44) Siempre, si Jesus nagtataram manongod sa pangyayari duman sa hardin nin Eden kan sutsutan ni Satanas an enot na tawong mag-agom na makisuway sa Dios asin sa siring nag-ani  kan resultang kasalan asin kagadanan.—Genesis 3:1-5; Roma 5:12.

An mga tataramon ni Jesus malinaw na nagpapamidbid ki Satanas bilang “an ama kan kaputikan,” an pinaggikanan nin pagputik asin nin pagkadaing katotoohan. Si Satanas iyo pa man giraray an pangenot na parasuportar nin pagkadaing katotoohan asin, sa katunayan, iyo an “naglalagalag kan bilog na ineerokan na daga.” Sia an pangenot na responsable sa danyos na ibinunga sa mga tawo ngonyan kan lakop na pagputik.—Kapahayagan 12:9.

An pundamental na pagkakatumang kan totoo asin bakong totoo, na pinonan ni Satanas na Diablo, dai pa man giraray makontrol an paglakop ngonyan. Naiimpluwensiahan kaiyan an gabos na kabtang kan sosyedad nin tawo asin naaapektaran kaiyan an gabos na indibiduwal. An paagi nin pamumuhay nin saro nagbubugtak sa saiya sa arin man na lado kan isyung iyan. An mga nasa lado nin Dios ibinabasar an saindang pamumuhay sa katotoohan kan Tataramon nin Dios, an Biblia. An siisay man na dai nagsusunod sa dalan kan katotoohan nahuhulog, nin tuyo o dai tinutuyo, sa kamot ni Satanas huli ta “an bilog na kinaban namumugtak sa kapangyarihan kan saro na marigsok.”—1 Juan 5:19; Mateo 7:13, 14.

Taano ta Igwa nin Tendensia na Magputik?

An bagay na “an bilog na kinaban” namumugtak sa kapangyarihan ni Satanas nagsasabi sato kun taano ta dakol na tawo an nagpuputik. Alagad tibaad maghapot kita, ‘Taano ta ginigibo iyan ni Satanas, “an ama kan kaputikan”?’ Aram ni Satanas na si Jehova an lehitimong Soberano kan gabos na linalang Nia, pati kan enot na tawong mag-agom. Pero, minawot ni Satanas na mapasaiya an halangkawon asin nasosolong posisyon na ini, sarong bagay na dian mayo sia nin deretso. Huli sa kahanaban asin maimot na ambisyon, nagpakana sia tanganing agawon an posisyon ni Jehova. Tanganing makamit ini, si Satanas naggamit nin mga kaputikan asin pandadaya.—1 Timoteo 3:6.

Kumusta man ngonyan? Bako daw na maoyon kamo na an kahanaban asin maimot na ambisyon iyo pa man giraray an pinakamotibo na nagtutulod sa dakol na tawo na magputik? An mahanab na mga negosyo, marigsok na politika, asin falsong relihion pano nin panloloko, kaputikan, pandodoktor, asin pandadaya. Taano? Bako daw na sa parate huli ta an mga tawo itinutulod nin kahanaban asin ambisyon na umasenso o yumaman, magkaigwa nin poder, o posisyon na dian mayo sinda nin deretso? An sarong madonong na namamahala, si Hadeng Salomon kan suanoy na Israel, nagpatanid: “An naghuhumaring yumaman dai magdadanay na inosente.” (Talinhaga 28:20) Asin si apostol Pablo nagsurat: “An pagkamoot sa kuarta gamot nin gabos na klase nin nakakadanyar na bagay.” (1 Timoteo 6:10) Segurado na masasabi man iyan kun manongod sa ngana-nganang pagmawot sa poder o posisyon.

An saro pang dahelan nin pagputik iyo an takot—takot sa mga resulta o sa tibaad iisipon nin iba kun sabihon an totoo. Natural sanang mawoton nin mga tawo na sinda magustohan o akoon nin iba. Minsan siring, an pagmawot na ini puedeng magpahiro sa sainda na biribidon an katotoohan, dawa dikit sana, tanganing tahoban an mga pagkukulang, tanganing itago an bakong paborableng mga detalye, o tangani sanang magkaigwa nin marahay na impresyon. Tamang-tama, si Salomon nagsurat: “An pagtakig sa mga tawo sarong siod, alagad an nagtitiwala ki Jehova iingatan.”—Talinhaga 29:25.

Kaimbodan sa Dios nin Katotoohan

Ano an sinabi ni Manfred kan hagadan sia kan ehekutibo kan kompanya na magtao nin paliwanag? Sinabi ni Manfred an totoo. Sia nagsabi: “Amay po kaming pinapuli ngonyan na aldaw kan maestro, kaya nagtrabaho ako. Kun para sa iba, dai ako makakataram para sa sainda. Puede po gayod nindo sindang hapoton nin personal.”

Puede kutanang nagtao si Manfred nin tuso asin mapandayang simbag, na sa siring mapangyari sa saiya na masunoan kan ibang mga sinasanay. Alagad igwa sia nin marahay na mga dahelan na magdanay na maimbod sa katotoohan. Si Manfred saro sa Mga Saksi ni Jehova. Huli sa saiyang pagkaonesto napagdanay nia an saiyang malinig na konsensia.  Nakua man nia an tiwala kan saiyang among. Bilang kabtang kan saiyang pagsasanay, si Manfred iinasignar sa departamento nin mga alahas, na sa parate dai dian tinotogotan na magtrabaho an mga sinasanay. Pakalihis nin mga 15 taon kan si Manfred ilinangkaw sa sarong posisyon na may paninimbagan sa kompanya, an iyo man sanang ehekutibo nag-apod sa telepono tanganing pelisitaron sia asin tanganing sambiton an pangyayaring ini na nagpapaheling nin integridad sa katotoohan.

Huling si Jehova an Dios nin katotoohan, an siisay man na nagmamawot na magkaigwa nin dayupot na relasyon sa saiya dapat na ‘haleon an kaputikan’ asin “magtaram nin katotoohan.” An sarong lingkod nin Dios dapat na mamoot sa katotoohan. “An maimbod na saksi saro na dai magpuputik,” an isinurat kan madonong na tawo. Pero, ano an kaputikan?—Efeso 4:25; Talinhaga 14:5.

Ano an Kaputikan?

An gabos na kaputikan daing katotoohan, alagad bakong gabos na daing katotoohan kaputikan. Taano ta bako? Tinatawan nin kahulogan nin sarong diksionaryo an kaputikan bilang “sarong deklarasyon dapit sa sarong bagay na aram o pinapaniwalaan kan nagtataram na bakong totoo sa intension na mandaya.” Iyo, kaiba sa pagputik an intension na mandaya nin sarong tawo. Huli kaini, an dai tinutuyong pagtaram nin bakong totoo—arog baga nin dai tuyong pagtao sa iba nin salang impormasyon o kabilangan—bakong kapareho nin pagputik.

Dugang pa, kaipuhan niatong konsideraron kun baga an tawong naghahagad nin impormasyon igwa nin deretso sa kompletong simbag. Halimbawa, ipamugtak ta baga na si Manfred hinapot kan iyo man sanang mga hapot nin sarong ehekutibo nin ibang kompanya. Obligado daw si Manfred na sabihon sa saiya an gabos na bagay? Dai nanggad. Huling an ehekutibo mayo nin deretso sa siring na impormasyon, si Manfred dai obligadong itao iyan. Siempre, dawa sa kamugtakan na ini, sala man giraray na sia magputik.

Anong halimbawa an itinao ni Jesu-Cristo mapadapit digdi? Sa sarong pangyayari, si Jesus nakikipag-olay sa nagkapirang daing pagtubod na nagpaheling nin interes sa saiyang mga plano sa pagbaklay. “Maghale ka digdi asin paduman ka sa Judea,” an irinekomendar ninda sa saiya. Ano an simbag ni Jesus? “Tumukad kamo pasiring sa kapiestahan [sa Jerusalem]; dai pa ako matukad pasiring sa kapiestahan na ini, huli ta an sakong itinalaan na panahon dai pa lubos na minaabot.” Dai nahaloy pakatapos kaiyan, si Jesus nagbaklay pasiring sa Jerusalem para sa kapiestahan. Taano ta siring kaiyan an isinimbag nia? Mayo sinda nin deretso na maaraman an eksaktong mga detalye kun haen sia. Kaya minsan ngani si Jesus dai nagtaram nin bakong totoo, an itinao nia sa sainda bakong kompletong simbag tanganing malimitaran an posibleng danyos na puede nindang gibohon sa saiya o sa saiyang mga parasunod. Bako ining kaputikan, huling si apostol Pedro nagsurat manongod ki Cristo: “Dai sia nakaginibo nin kasalan, ni nakua man sa saiyang ngoso an kadayaan.”—Juan 7:1-13; 1 Pedro 2:22.

Kumusta man si Pedro mismo? Kan bangging inarestar si Jesus, bako daw na si Pedro tolong beses na nagputik asin nagdehar na midbid nia si Jesus? Iyo, si Pedro nagpadaog sa takot sa tawo asin nagputik. Alagad sia tolos-tolos na “nagtangis nin mapait”  asin nagsolsol, asin pinatawad an saiyang kasalan. Dugang pa, nakanood sia sa saiyang sala. Pakalihis nin nagkapirang aldaw, nagtaram sia sa publiko manongod ki Jesus asin marigon na nagsayumang umontok kan patakoton kan mga autoridad na Judio sa Jerusalem. Daing duwa-duwa na an temporaryong pagkasala asin marikas na pakabawi ni Pedro siertong makakaparigon sa sato gabos, na puedeng madaling mabigla sa panahon nin kaluyahan asin mapasala sa tataramon o gibo.—Mateo 26:69-75; Gibo 4:18-20; 5:27-32; Santiago 3:2.

An Katotoohan Maeestablisar Sagkod Lamang

“An ngabil nin katotoohan an marigon na maeestablisar sagkod lamang, alagad an dila nin kaputikan magigin siring sana kalawig nin sarong segundo,” an paliwanag kan Talinhaga 12:19. Iyo, karakteristiko kan pagtaram nin totoo an pagigin durable asin permanente. Asin an relasyon nin mga tawo mas marigon asin nakakakontento kun an mga tawo komitido sa pagtaram nin totoo asin minagawe kaoyon kaiyan. Tunay nanggad, an pagsabi nin totoo nagbubunga nin ensegidang mga balos. Kaiba digdi an malinig na konsensia, marahay na reputasyon, asin marigon na relasyon nin mag-agom, sa laog nin pamilya, sa tahaw nin magkakatood, asin dawa sa negosyo.

Sa ibong na lado, an kaputikan dai naghahaloy. An dila na nagtataram nin kaputikan tibaad makadaya sa halipot na panahon, alagad an daing katotoohan dai magdadanay nin panhaloyan. Dugang pa, si Jehova, an Dios nin katotoohan, nagtalaan nin panahon kun sagkod noarin nia totogotan an pagkadaing katotoohan asin an mga nagpapalakop nin mga kaputikan. An Biblia nanunuga na paparaon ni Jehova an impluwensia ni Satanas na Diablo, an ama kan kaputikan, na naglalagalag kan bilog na ineerokan na daga. Sa dai mahahaloy, tataposon ni Jehova an gabos na kaputikan asin putikon.—Kapahayagan 21:8.

Kanigoan na kaginhawahan kun sa katapustapusi “an ngabil nin katotoohan” marigon nang maeestablisar sagkod lamang!

[Nota sa Ibaba]

[Blurb sa pahina 5]

An kahanaban asin maimot na ambisyon iyo an mga motibo na nagtutulod sa dakol na tawo na magputik

[Blurb sa pahina 6]

An gabos na kaputikan daing katotoohan, alagad bakong gabos na daing katotoohan kaputikan

[Ritrato sa pahina 6]

Ano an manonodan niato sa pagdehar ni Pedro ki Cristo?

[Ritrato sa pahina 7]

An pagtaram nin totoo nagbubunga nin marigon asin nakakakontentong relasyon