Ikaogma an Satong Magayon na Daga

NAHELING kan mga astronomo na an istaran kan katawohan saro sanang sadit na tuldok sa dai masokol na kahiwasan nin sarong daing sagkodan na uniberso. Mayo nin nanompongan na buhay saen man sa ibang kabtang kan pisikal na uniberso. Sa planetang Daga sana igwa nin tamang-tama na mga kamugtakan.

Dugang pa, puede niatong ikaogma an buhay sa magayon na globong ini. Nakakaogma nanggad na mamatean an init kan saldang sa sarong malipot na aldaw! Siisay sa sato an dai napupukaw an boot sa sarong pambihirang pagsirang o pagsolnop nin saldang? Siempre, an satong saldang dai sana nagtatao nin dakulang kaogmahan sa satong mga sentido. Iyan mahalagang marhay sa sato mismong pag-eksister.

Sa laog nin dai mabilang na minilyon na taon, an grabidad kan saldang pinagdanay an daga asin an iba pang planeta sa dai nababagong mga orbita. Asin, siring kan nanonodan kan mga estudyante sa eskuelahan, an bilog na sistema solar naghihiro sa orbita sa palibot kan sentro kan satong galaksiang Milky Way. Alagad sa satong galaksia an saldang saro sana sa labing 100 bilyones na bitoon na nagbibiahe nin iriba.

An galaksiang Milky Way kaiba sa sarong grupo nin mga 35 galaksia. An mas dakulang mga grupo igwa nin rinibong galaksia. An satong sistema solar posibleng marhay na daing gayo magigin estable kun iyan namugtak sa mas dakula, mahibog na grupo nin mga galaksia. Alagad, siring sa talagang kamugtakan kaiyan, pipira sanang kabtang kan uniberso “an angay para sa komplikadong buhay na siring sa sato,” an sabi ni Guillermo Gonzalez asin Jay W. Richards sa saindang librong The Privileged Planet.

An pag-eksister daw nin buhay sa planetang ini bunga nin pagkanorongod sana, an nagkanorongod sanang resulta nin sarong kabtang kan “big bang”? O igwa daw nin mas dakulang kahulogan an buhay sa magayon na planetang Daga na ini?

An dakol na tawo nakaabot sa konklusyon na an satong istaran na daga espesipikong dinisenyo tanganing suportaran an buhay. * Kaidtong dakol na siglo na an nakaagi, sarong Hebreong poeta an nag-apod nin atension sa daga asin sa kalangitan. Sia nagsurat: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo?” (Salmo 8:3, 4) An poetang ini nagtutubod na siertong igwa nin Kaglalang. Iyan daw sarong makatanosan na konklusyon sa satong sientipikong panahon?

[Nota sa Ibaba]

[Kahon/Ritrato sa pahina 3]

“Sa harayo, an Daga nagkikinang na arog nin sarong asul na mutya sa madiklom na espasyo,” an sabi kan The Illustrated Science Encyclopedia​—Amazing Planet Earth.

[Credit Line]

Globo: U.S. Fish & Wildlife Service, Washington, D.C./NASA