Mga Agom na Babae​—Igalang Nindo nin Hararom an Saindong Agom na Lalaki

“Magpasakop [kamong] mga agom na babae sa [saindong] agom na lalaki.”—EFESO 5:22.

1. Taano an paggalang sa agom na lalaki ta parateng masakit na gibohon?

SA DAKOL na nasyon kun nagpapakasal an magkailusyon, an nobya nanunumpa, na nanunuga na saiyang igagalang nin hararom an saiyang agom na lalaki. Minsan siring, an paagi nin pagtratar kan dakol na agom na lalaki sa saindang agom na babae igwa nin epekto kun baga an panunumpa na iyan depisil na otobon o bako. Pero, an pag-agoman igwa nin marahayon na kapinonan. An Dios nagkua nin gusok hale ki Adan, an enot na lalaki, asin ginibo an babae. Si Adan nagkagsing: “Sa katapustapusi ini tolang nin sakong mga tolang asin laman nin sakong laman.”—Genesis 2:19-23.

2. Ano an nangyari mapadapit sa mga babae asin pag-agoman sa dai pa sana nahahaloy na mga panahon?

² Sa ibong kan marahay na kapinonan na iyan, sarong mobimiento na inaapod na liberasyon nin mga babae—sarong pagprobar kan mga babae na makabutas sa pagdominar kan mga lalaki—an pinonan sa pagpopoon kan dekada nin 1960 sa Estados Unidos. Kan panahon na iyan, an proporsion kan mga nagbabaya sa saindang pamilya mga 300 na agom na lalaki sa kada 1 agom na babae. Sa katapusan kan dekada nin 1960, an proporsion nagin 100 sa kada 1. Ngonyan, minalataw na an mga babae nagraraway, nag-iinom nin inomon na de alkohol, naninigarilyo, asin minagawe nin inmoral kapareho kan mga lalaki. Mas maogma daw an mga babae huli kaini? Bako. Sa nagkapirang nasyon, mga kabanga kan mga nag-aaragom an nagdidiborsio pag-abot nin panahon. An paghihingoa daw kan nagkapirang babae na pakarhayon an kamugtakan nindang mag-agom nagparahay o nagpagrabe sa situwasyon?—2 Timoteo 3:1-5.

3. Ano an pundamental na problema na nakakaapektar sa pag-agoman?

³ Ano an pundamental na problema? Sa sarong kabtang, iyan an problema na nag-eksister poon kan si Eva sugotan kan rebeldeng anghel, “an orihinal na halas, an inaapod Diablo asin Satanas.” (Kapahayagan 12:9; 1 Timoteo 2:13, 14) Rinaot ni Satanas an itinotokdo nin Dios. Halimbawa, mapadapit sa pag-agom, pinaluwas kan Diablo na iyan labi-labi kanakakalimitar asin masakit. An propaganda na pinapalakop nia paagi sa media kan kinaban na ini—na sia an namamahala—dinisenyo tanganing paluwason na garo baga bakong makatanosan asin lihis na sa uso an mga instruksion nin Dios. (2 Corinto 4:3, 4) Minsan siring, kun sisiyasaton niato na may bukas na isip an sinasabi nin Dios mapadapit sa papel kan babae sa pag-agoman, maheheling niato kun gurano kadonong asin kapraktikal kan Tataramon nin Dios.

Patanid sa mga Nag-aagom

4, 5. (a) Taano ta marahay na magmaan kun nag-iisip nang mag-agom? (b) Ano an maninigong gibohon nin babae bago magtogot na magpakasal?

⁴ An Biblia nagtatao nin patanid. Sinasabi kaiyan na sa kinaban na ini na pinapamahalaan kan Diablo, dawa idtong mga may mapangganang pag-agoman magkakaigwa nin “kahorasaan.” Kaya minsan ngani areglo nin Dios an pag-agoman, pinapagmamaan kan Biblia an mga naglalaog dian. Sarong pinasabngan na kagsurat sa Biblia an nagsabi mapadapit sa babae na nagadanan nin agom asin sa dahelan na iyan talingkas nang magpaagom liwat: “Sia orog na maogma kun sia magdanay sa kamugtakan nia ngonyan.” Irinekomendar man ni Jesus an pagigin daing agom para sa mga “makakatao nin lugar dian.” Minsan siring, kun an siisay man magdesisyon nang mag-agom, maninigo na an agomon nia ‘nasa Kagurangnan,’ an boot sabihon, sarong nagdusay asin bautisadong parasamba nin Dios.—1 Corinto 7:28, 36-40; Mateo 19:10-12.

⁵ An dahelan kun taano ta maninigong tawan nin atension, partikularmente kan babae, an maaagom  nia iyo an patanid kan Biblia: “An babaeng may agom nagagapos nin ley sa saiyang agom na lalaki.” Solamente kun magadan ini o magkomiter nin pagsambay asin nagdiborsio an mag-agom huli kaiyan na an babae ‘talingkas na sa ley’ kan agom na lalaki. (Roma 7:2, 3) An pakamate nin pagkamoot sa enot na pagkahelingan tibaad igo na para sa nakakaogmang marhay na pagkaginustohan, alagad iyan bakong igong basehan para sa maogmang pag-agoman. Kun siring, an sarong daing agom na babae kaipuhan na hapoton an saiyang sadiri, ‘Andam daw akong lumaog sa sarong areglo na mapapasairarom ako sa ley kan lalaking ini?’ Dapat na konsideraron an hapot na ini bago mag-agom, bakong pagkatapos.

6. Anong desisyon an magigibo ngonyan kan kadaklan na babae, asin taano ta mahalagang marhay iyan?

⁶ Sa dakol na lugar ngonyan, makakapili an babae kun baga aakoon o hahaboan an alok na magpakasal. Pero, an paggibo nin madonong na pagpili tibaad iyo an pinakamasakit na ginigibo nin sarong babae, huling an saiyang kamawotan para sa posibleng kadayupotan asin pagkamoot sa pag-agoman puedeng makosog na marhay. An sarong parasurat nagsabi: “Mientras na mas gusto niatong gibohon an sarong bagay—baga man iyan pag-agom o pagtukad sa sarong partikular na bukid—mas dakula man an posibilidad na ipamugtak niato na tama an mga kamugtakan asin magtao sana nin atension sa impormasyon na nagsasabi kan mga bagay na gusto niatong madangog.” An bakong lohikong desisyon nin sarong paratukad sa bukid puedeng ikagadan nia; an bakong madonong na pagpili nin maaagom puedeng magin kapahapahamak man.

7. Anong madonong na konseho an itinao manongod sa paghanap nin maaagom?

⁷ Maninigong seryosong konsideraron nin sarong babae kun ano an magigin kalabot sa pagigin nasa irarom kan ley nin sarong lalaki na nag-aalok na pakasalan sia. Kan nakaaging mga taon, sarong hoben na babae na taga India an may kababaan nin boot na nag-admitir: “An samong mga magurang mas may edad asin mas madonong, asin bako sindang arog sa samo na mas madaling madaya. . . . Madali sanang marhay na masala ako.” Mahalaga an ikakataong tabang nin mga magurang asin nin iba pa. An sarong madonong na parakonseho halawig nang panahon na nag-eenkaminar sa mga hoben na midbidon an mga magurang kan kinukursonada nindang agomon saka maingat na obserbaran an interaksion kaini sa mga magurang asin iba pang miembro nin pamilya.

Kun Paano si Jesus Nagpaheling nin Pagpasakop

8, 9. (a) Paano minansay ni Jesus an saiyang pagpasakop sa Dios? (b) Anong pakinabang an makakamit huli sa pagpasakop?

⁸ Minsan ngani puedeng magin depisil an pagpasakop, puedeng mansayon iyan kan mga babae bilang kagalanggalang, kun paanong ginibo iyan ni Jesus. Minsan ngani an pagpasakop nia sa Dios may kalabot na pagsakit, kaiba an kagadanan sa sarong hariging pasakitan, nakanompong sia nin kagayagayahan sa pagigin mapagpasakop sa Dios. (Lucas 22:41-44; Hebreo 5:7, 8; 12:3) An mga babae puedeng magheling ki Jesus bilang halimbawa, huling an Biblia nagsasabi: ‘An payo nin babae iyo an lalaki; an payo man kan Cristo iyo an Dios.’ (1 Corinto 11:3) Minsan siring, makahulogan nanggad na bako sanang kun nag-aagom an mga babae  na sinda napapasairarom sa pagkapayo nin mga lalaki.

⁹ Ipinapaliwanag kan Biblia na an mga babae, baga man may agom o daing agom, maninigong magpasakop sa pagkapayo kan may kualipikasyon sa espirituwal na mga lalaki na nangangataman sa Kristianong kongregasyon. (1 Timoteo 2:12, 13; Hebreo 13:17) Kun sinusunod kan mga babae an instruksion nin Dios na gibohon iyan, nagtatao sinda nin halimbawa para sa mga anghel sa organisasyonal na areglo nin Dios. (1 Corinto 11:8-10) Dugang pa, paagi sa marahay na halimbawa ninda asin nakakatabang na mga suhestion, an mas may edad nang mga babaeng may agom nagtotokdo sa mas hoben na mga babae na ‘magpasakop sa agom nindang lalaki.’—Tito 2:3-5.

10. Paano si Jesus nagtao nin halimbawa sa pagpasakop?

¹⁰ Biyong naaaraman ni Jesus an halaga nin tamang pagpasakop. Sa sarong okasyon, pinagbotan nia si apostol Pedro na magbayad nin buhis sa mga autoridad na tawo para sa saindang duwa, na tinatawan pa ngani si Pedro nin kuartang pambayad sa buhis. Si Pedro nagsurat kan huri: “Dahel sa Kagurangnan magpasakop kamo sa gabos na tawong linalang.” (1 Pedro 2:13; Mateo 17:24-27) Mapadapit sa pinakapambihirang halimbawa ni Jesus nin pagpasakop, mababasa niato: “Sia nagpakadai sa sadiri asin nagpakang-oripon patin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan.”—Filipos 2:5-8.

11. Taano ta dinagka ni Pedro an mga agom na babae na magin mapagpasakop dawa sa mga agom na daing pagtubod?

¹¹ Kan dinadagka an mga Kristiano na magin mapagpasakop dawa sa maringis, bakong makatanosan na mga autoridad kan kinaban na ini, si Pedro nagpaliwanag: “Sa katotoohan, sa dalan na ini kamo inapod, huli ta minsan si Cristo nagdusa para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Pagkatapos na iladawan kun gurano nanggad kagrabe an tinios ni Jesus asin kun paano sia mapagpasakop na nagtagal, dinagka ni Pedro an mga agom na babae na an agom daing pagtubod: “Sa siring man na paagi, kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.”—1 Pedro 3:1, 2.

12. Anong mga pakinabang an nakamit huli sa pagigin mapagpasakop ni Jesus?

¹² An pagpasakop sa ibong nin pag-olog-olog asin pag-abuso tibaad mansayon bilang ebidensia nin kaluyahan. Pero, bakong arog kaiyan an pagmansay dian ni Jesus. “Kan sia pinagmumuda,” an isinurat ni Pedro, “dai sia nagbalos na magmuda. Kan sia nagsasakit, dai sia nanhuma.” (1 Pedro 2:23) An nagkapira na nakamasid sa pagsakit ni Jesus nagin mga paratubod, kisuerra sa limitadong sokol, kaiba an sarong parahabon na nasa harigi sa kataed nia asin an opisyal nin hukbo na nagheheling kan paggadan. (Mateo 27:38-44, 54; Marcos 15:39; Lucas 23:39-43) Kaagid kaiyan, ipinarisa ni Pedro na an nagkapirang agom na lalaki na daing pagtubod—dawa idtong mga mapan-abuso—magigin mga Kristiano pagkatapos na maobserbaran an pagigin mapagpasakop kan saindang agom. Naheling niato an ebidensia kaini na nangyayari ngonyan.

Kun Paano Magkakamit nin Pag-oyon an mga Agom na Babae

13, 14. Paano nagin kapakipakinabang an pagpasakop sa mga agom na lalaki na daing pagtubod?

¹³ An mga agom na babae na nagin mga paratubod nadara an saindang agom paagi sa saindang arog-Cristong gawe-gawe. Sa dai pa sana nahahaloy na pandistritong kombension kan Mga Saksi ni Jehova, sarong agom na lalaki an nagsabi manongod sa Kristianang agom nia: “Seguro nagin maringis ako sa pagtratar ko sa saiya. Pero, magalang siang marhay sa sako. Nungka nia akong minenos. Dai nia ipinirit sa sako an saiyang mga paniniwala. Inasikaso nia ako sa mamomoton na paagi. Kan magduman sia sa sarong asamblea, pinagmaigotan niang iandam nin amay an sakong mga pagkakan asin taposon an mga gibohon sa harong. An saiyang aktitud nagpoon na pumukaw kan sakong interes sa Biblia. Asin uya, Saksi na ako ngonyan!” Iyo, garo man sana sia ‘nadara minsan daing tataramon’ huli sa gawe-gawe kan saiyang agom na babae.

 ¹⁴ Siring kan idinoon ni Pedro, bako man talagang an sinasabi nin agom na babae kundi an ginigibo nia an nagbubunga nin positibong mga resulta. Ipinapaheling ini nin sarong agom na babae na nakanood kan mga katotoohan sa Biblia asin nagin determinado na mag-atender sa Kristianong mga pagtiripon. “Agnes, kun magluwas ka sa pintong iyan, dai ka na magbalik!” an kurahaw kan saiyang agom. Dai sia nagluwas “sa pintong iyan” kundi, imbes, sa ibang pinto. Sa suminunod na pagtiripon na banggi, naghuma an agom na lalaki: “Mayo na ako digdi sa pagbalik mo.” Bueno, mayo talaga sia—nawara sia sa laog nin tolong aldaw. Kan ini magbalik, maboot na naghapot an agom na babae: “Gusto mong magkakan?” Si Agnes dai noarin man natanyog sa saiyang debosyon ki Jehova. Sa kahurihurihi, nag-ako an saiyang agom nin pag-adal sa Biblia, nagdusay kan saiyang buhay sa Dios, asin sa huri naglingkod bilang sarong paraataman na igwa nin dakol na paninimbagan.

15. Anong “samno” an irinerekomendar para sa Kristianang mga agom?

¹⁵ Irinekomendar ni apostol Pedro an sarong bagay na ipinaheling kan mga agom na babae na nasambitan sa enotan, arin na baga, an “samno,” alagad bakong paagi sa pagtao nin labi-labing atension sa “pagsalapid kan buhok” o “pagsulog nin pan-ibabaw na mga gubing.” Imbes, si Pedro nagsabi: “[An saindong samno] magin an natatagong persona kan puso sa dai nalalapang gubing kan toninong asin mahoyong espiritu, na may dakulang halaga sa mga mata nin Dios.” Mababanaag an espiritung ini sa tono nin boses asin sa ugale na nakakaakit imbes na mapan-angat o depisil manigoan. Sa siring, ipinapaheling nin sarong Kristianang agom an saiyang hararom na paggalang sa saiyang agom na lalaki.—1 Pedro 3:3, 4.

Pakanood sa mga Halimbawa

16. Sa anong mga paagi marahay na halimbawa si Sara para sa Kristianang mga agom?

¹⁶ Si Pedro nagsurat: “An banal na mga babae na naglalaom sa Dios nagsamno kaidto sa sainda man sana, na nagpasakop sa saindang agom na lalaki.” (1 Pedro 3:5) Narealisar kan mga siring na an pagpaogma ki Jehova paagi sa paghimate sa saiyang hatol maresulta sa katapustapusi sa kaogmahan nin pamilya asin sa balos na buhay na daing katapusan. Nasambitan ni Pedro si Sara, an magayon na agom ni Abraham, na sinasabi na sia ‘nagkuyog ki Abraham, na inaapod siang “kagurangnan.”’ Sinuportaran ni Sara an saiyang matatakton sa Dios na agom, na idinestino nin Dios na maglingkod sa sarong harayong daga. Binayaan nia an komportableng estilo nin pamumuhay asin isinapeligro pa ngani an saiyang buhay. (Genesis 12:1, 10-13) Irinekomendar ni Pedro si Sara huli sa halimbawa kaini nin kosog nin boot, na sinasabi: “Kamo nagin saiyang mga aki, basta kamo padagos na maggibo nin marahay asin dai natatakot sa ano man na ikakahandal.”—1 Pedro 3:6.

17. Taano ta posibleng nasa isip ni Pedro si Abigail bilang sarong halimbawa para sa Kristianang mga agom?

¹⁷ Si Abigail saro pang daing takot na babae na nag-asa sa Dios, asin posible na nasa isip man sia ni  Pedro. “Marahay an diskresion” nia, alagad an saiyang agom na si Nabal “maisog asin maraot sa saiyang mga gibo.” Kan magsayuma si Nabal na tumao nin tabang ki David asin sa saiyang mga tawohan, nag-andam sinda tanganing pohoon si Nabal asin an bilog na kasararo kaini sa harong. Alagad huminiro si Abigail tanganing iligtas an saiyang kasararo sa harong. Ikinarga nia sa mga asno an mga suplay nin kakanon asin sinabat si David mantang ini asin an armadong mga tawohan kaini padangadang na. Kan maheling si David, luminugsad sia, luminaob sa pamitisan kaini, asin nakimaherak digdi na dai magpabiglabigla. Napahirong marhay an boot ni David. “Pag-omawon logod si Jehova na Dios nin Israel, na nagsugo saimo sa aldaw na ini na sabaton ako!” an sabi nia, “asin pag-omawon an saimong marahay na kaisipan.”—1 Samuel 25:2-33.

18. Kun nasusugotan nin romantikong atension nin ibang lalaki, kiisay na halimbawa an puedeng horophoropon kan mga agom na babae, asin taano?

¹⁸ An saro pang marahay na halimbawa para sa mga agom na babae iyo an hoben na babaeng Sulamita na nagdanay na maimbod sa ordinaryong pastor na digdi sia ipinanugang ipakasal. An pagkamoot nia digdi nagdanay na makosog sa ibong kan romantikong atension nin sarong mayaman na hade. Napahirong ipahayag an saiyang namamatean para sa hoben na pastor, sia nagsabi: “Ibugtak mo ako bilang tatak sa saimong puso, bilang tatak sa saimong takyag; huli ta an pagkamoot siring kakosog kan kagadanan . . . An pagkamoot dai masisigbo nin dakol na tubig, ni ikakaanod iyan nin mga salog.” (Awit ni Salomon 8:6, 7) Logod na an magin desisyon man kan gabos na nag-ako nin alok na magpakasal iyo na magdanay na maimbod sa saindang agom asin igalang sinda nin hararom.

Dugang Pang Hatol nin Dios

19, 20. (a) Sa anong dahelan na an mga agom na babae maninigong magpasakop sa saindang agom? (b) Anong marahay na halimbawa an itinao para sa mga agom na babae?

¹⁹ Ultimo, estudyare an konteksto kan pinakatemang teksto niato: “Magpasakop [kamong] mga agom na babae sa [saindong] agom na lalaki.” (Efeso 5:22) Taano ta kaipuhan an siring na pagpasakop? “Huli ta,” an sunod na bersikulo nagpapadagos, “an agom na lalaki iyo an payo kan saiyang agom na babae kun paanong si Cristo iyo man an payo kan kongregasyon.” Kun siring, sinasadol an mga agom na babae: “Kun paanong an kongregasyon nagpapasakop ki Cristo, siring man an mga agom na babae sa saindang agom na lalaki sa gabos na bagay.”—Efeso 5:23, 24, 33.

²⁰ Tanganing makuyog an pagboot na ini, an mga agom na babae kaipuhan na pag-adalan dangan arogon an halimbawa kan kongregasyon nin linahidan na mga parasunod ni Cristo. Basahon tabi nindo an 2 Corinto 11:23-28 asin paagi kaiyan manonodan nindo kun ano an tinagalan nin sarong miembro kan kongregasyon, si apostol Pablo, sa pagigin maimbod sa saiyang Payo, si Jesu-Cristo. Arog ni Pablo, an mga agom na babae saka an iba pang miembro kan kongregasyon kaipuhan na magdanay na maimbod na nagpapasakop ki Jesus. Ipinapaheling ini kan mga agom na babae paagi sa pagpasakop ninda sa saindang agom.

21. Ano an puedeng mag-enganyar sa mga agom na babae na danay na magpasakop sa saindang agom na lalaki?

²¹ Minsan ngani dakol na agom na babae ngonyan an tibaad ikinakasurang an pagigin sakop, pepensaron nin madonong na babae an mga bentaha kaiyan. Halimbawa, sa kamugtakan nin sarong agom na lalaki na daing pagtubod, an pagpapasakop sa pagkapayo nia sa gabos na bagay na bako man paglapas sa mga ley o prinsipyo nin Dios posibleng marhay na magbunga nin marahayon na balos na ‘pakaligtas nia sa saiyang agom na lalaki.’ (1 Corinto 7:13, 16) Apuera kaini, makakamate sia nin pagkakontento sa pakaaram na inooyonan ni Jehova Dios an saiyang ginigibo asin bebendisyonan sia nin igo huli sa pag-arog nia sa halimbawa kan saiyang namomotan na Aki.

Nagigirumdoman daw Nindo?

• Taano ta puedeng magin sarong angat para sa sarong agom na babae an paggalang sa saiyang agom?

• Taano ta seryosong marhay an pag-ako sa sarong alok na magpakasal?

• Paano si Jesus nagserbing halimbawa para sa mga agom na babae, asin anong mga pakinabang an puedeng ibunga kan pagsunod sa saiyang halimbawa?

[Mga Hapot Para sa Pag-adal]

[Ritrato sa pahina 19]

Taano ta seryosong marhay an pagdesisyon kun baga aakoon an sarong alok na magpakasal?

[Ritrato sa pahina 21]

Ano an manonodan kan mga agom na babae sa halimbawa kan mga karakter sa Biblia na siring ki Abigail?