Sarong Halimbawa nin Pagkaonesto

SI Nelma, na nagtatrabaho sa sarong parlor sa Cruzeiro do Sul, Brazil, napaatubang sa sarong pagbalo sa saiyang Kristianong integridad kasuarin pa sana. Kan binaha an saiyang lugar, si Nelma nakaresibi nin nagkapirang idinonar na gubing hale sa saro kan saiyang mga kliente. Mantang sinasarosaro niang helingon an mga gubing, nakakua sia nin kuarta na katumbas nin $1,000 (E.U.) sa mga bulsa nin nagkapirang pantalon.

An kuartang nakua ni Nelma katumbas nin mga pitong bulan na sueldo nia, asin talagang kaipuhan nia iyan. An saiya mismong harong naraot kan baha, asin an kadaklan na rogaring kan saiyang ama asin mga tugang nawara. Paagi sa kuartang iyan, matatapos niang ipahirahay an saiyang harong asin may matatada pa tanganing tabangan an saiyang mga paryente. Minsan siring, dai itinogot kan konsensia ni Nelma na sinanay sa Biblia na sadirihon nia an kuarta.—Hebreo 13:18.

Kan suminunod na amay na aga, nagpasiring sia sa saiyang pinagtatrabawohan bago pumoon an regular na oras sa trabaho asin kinontak an negosyanteng babae na nagdonar kan mga gubing. Pinasalamatan sia ni Nelma sa mga gubing alagad nagsabi pa na dai nia puedeng sadirihon an kuartang nakua nia sa laog kaiyan. Labi-labi an kagayagayahan kan babae na maresibi an kuarta. Itinagama nia idto na pambayad sa saiyang mga empleyado. “An pagkaonesto sarong bagay na bihira mong manompongan,” an sabi kan negosyanteng babae.

Tunay nanggad, an nagkapira tibaad magsaboot na an pagigin onesto mayo nin espesyal na merito. Pero, an pagkaonesto sarong kualidad na pinapahalagahan na marhay kan mga nagmamaigot na paogmahon an tunay na Dios, si Jehova. (Efeso 4:25, 28) “Dai ako mapapatorog sa banggi kun bako iyan an ginibo ko,” an sabi ni Nelma.