Kun Paano Mamimidbid an Tunay na Pagsamba

AN KADAKLAN na relihion naghihingako na hale sa Dios an itinotokdo ninda. Kun siring, marahay na himateon niato an mga tataramon kan apostol ni Jesus na si Juan, na nagsurat: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon tangani na maheling kun baga iyan gikan sa Dios, huli ta dakol na falsong propeta an nagruluwas sa kinaban.” (1 Juan 4:1) Paano niato mababalo an sarong bagay tanganing maheling kun iyan hale sa Dios?

An gabos na bagay na hale sa Dios nagpapabanaag kan saiyang personalidad, nangorogna kan saiyang nangingibabaw na kualidad, an pagkamoot. Halimbawa, an satong pamarong, na nagpapangyaring ikaogma niato an hamot nin mga masitas na pambolong, burak, o tinapay na bagong haon sa horno, sarong kapahayagan kan pagkamoot nin Dios. An satong kakayahan na maheling an pagsolnop nin saldang, sarong kulagbaw, o an huyom nin sarong sadang na aki nagpapabanaag kan pagkamoot nin Dios sa sato. Totoo man iyan kun manongod sa satong kakayahan na madangog an magayon na musika, bura nin sarong gamgam, o an tingog nin sarong namomotan. Dawa an satong naturalesa bilang tawo, minsan ngani bakong sangkap, nagpapabanaag kan pagkamoot nin Dios. Iyan an dahelan kun taano ta parate niatong naeeksperyensiahan an katotoohan kan mga tataramon ni Jesus: “Igwang orog na kaogmahan sa pagtao kisa pag-ako.” (Gibo 20:35) Ikinakaogma niatong magpahayag nin pagkamoot huli ta kita ginibo “sa ladawan nin Dios.” (Genesis 1:27) Minsan ngani si Jehova igwa nin dakol na iba pang kualidad, an pagkamoot iyo an pinakalataw na aspekto kan saiyang personalidad.

An kasuratan na hale sa Dios maninigong magpabanaag kan saiyang pagkamoot. An mga relihion sa kinaban igwa nin dakol na suanoy na kasuratan. Naaabot daw kan siring na kasuratan an kahagadan mapadapit sa pagpabanaag kan pagkamoot nin Dios?

An totoo iyo na an kadaklan na suanoy na relihiosong kasuratan kakadikit kan ipinapaliwanag manongod sa kun gurano kita kanamomotan nin Dios o kun paano niato mamomotan an Dios. Sa siring, minilyon na tawo an mayong inaakong simbag kun sinda naghahapot, “Taano ta naheheling niato an prueba kan pagkamoot nin Dios sa mga linalang mantang nagpapadagos an pagsakit asin karompotan?” Sa ibong na lado, an Biblia iyo an solamenteng suanoy na relihiosong kasuratan na lubos na nagpapaliwanag kan pagkamoot nin Dios. Tinotokdoan man kita kaiyan kun paano isasagibo an pagkamoot.

An Libro na Manongod sa Pagkamoot

An Tataramon nin Dios, an Biblia, naghahayag ki Jehova bilang “an Dios nin pagkamoot.” (2 Corinto 13:11) Ilinaladawan kan Biblia kun paanong pinahiro si Jehova nin pagkamoot na magtao sa enot na mga tawo nin buhay na talingkas sa helang asin kagadanan. Alagad an pagrebelde tumang sa autoridad nin Dios nagbunga nin pagdusa sa katawohan. (Deuteronomio 32:4, 5; Roma 5:12) Si Jehova naghiro tanganing ibalik an nawara. An Tataramon nin Dios nagsasabi: “An Dios namoot na gayo sa kinaban na itinao nia an saiyang  Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) An Banal na Kasuratan nagtao nin orog pang liwanag sa pagkamoot nin Dios kan iladawan kaiyan kun paanong an Dios nagtao nin sarong sangkap na gobyerno sa kamot ni Jesus tanganing ibalik an katoninongan sa makinuyog na katawohan.—Daniel 7:13, 14; 2 Pedro 3:13.

Sinusumaryo kan Biblia an katongdan kan tawo sa mga tataramon na ini: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakakalabi sa gabos asin enot na togon. An ikaduwa, na arog kaiyan, iyo ini, ‘Kamotan mo an saimong kapwa nin siring sa saimo man sana.’ Sa duwang togon na ini nasasarig an bilog na Ley.” (Mateo 22:37-40) An Biblia nagsasabi na iyan ipinasabong nin Dios. Huling maliwanag nanggad na ipinapabanaag kaiyan an saiyang personalidad, makakasierto kita na iyan hale sa “Dios nin pagkamoot.”—2 Timoteo 3:16.

Paagi sa pag-aplikar kan sarong pamantayan na ini, mamimidbid niato kun arin na suanoy na kasuratan an tunay na hale sa Dios. Pagkamoot man an nagpapamidbid sa tunay na mga parasamba, huling inaarog ninda an Dios sa pagpaheling nin pagkamoot.

Kun Paano Mamimidbid an Banwaan na Namomoot sa Dios

An mga talagang namomoot sa Dios risang-risa, partikularmente ngonyan na kita nabubuhay sa inaapod kan Biblia na “mga huring aldaw.” Paorog nang paorog na an mga tawo nagigin “mga mamomoton sa sainda man sana, mga mamomoton sa kuarta, . . . mga mamomoton sa kasingawan imbes na mga mamomoton sa Dios.”—2 Timoteo 3:1-4.

Paano nindo mamimidbid an mga tawo na namomoot sa Dios? An Biblia nagsasabi: “Ini iyo an boot sabihon kan pagkamoot sa Dios, na kuyogon niato an saiyang mga togon.” (1 Juan 5:3) An pagkamoot sa Dios nagpapahiro sa mga tawo na igalang an moral na mga pamantayan kan Biblia. Halimbawa, an Tataramon nin Dios may mga ley manongod sa sekso asin pag-agoman. Tinotogotan sana an seksuwal na relasyon sa laog nin pag-agoman, asin an pag-agoman dapat na permanente. (Mateo 19:9; Hebreo 13:4) Kan an sarong babae sa España na nag-adal nin teolohiya mag-atender sa sarong pagtiripon na dian an mga Saksi ni Jehova maigot na nag-aadal kan moral na mga ley sa Biblia, sia nagkomento: “Nagpuli ako na naparigon an boot, bako sanang huli sa nagtatao nin kaliwanagan na mga pahayag na sono sa Kasuratan kundi siring man huli sa pagkasararo sa tahaw kan mga tawong ini, sa saindang halangkaw na moral, asin sa saindang marahayon na gawe-gawe.”

Apuera sa pagkamoot ninda sa Dios, an tunay na mga Kristiano madaling mamimidbid paagi sa pagpaheling ninda nin pagkamoot sa saindang kapwa. An pinakamahalagang gibohon ninda iyo an pagsabi sa iba kan manongod sa solamenteng paglaom kan katawohan, an Kahadean nin Dios. (Mateo 24:14) Mayo nin ano man na mas makakatao nin nagdadanay na mga pakinabang sa saindang kapwa kisa sa pagtabang sa sainda na magkamit nin kaaraman manongod sa Dios. (Juan 17:3) Ipinapaheling man kan tunay na mga Kristiano an saindang pagkamoot sa iba pang mga paagi. Nagtatao sinda nin praktikal na tabang sa mga nagsasakit. Halimbawa, kan an sarong linog magbunga nin kalamidad sa Italia, an sarong lokal na peryodiko nagreport na an mga Saksi ni Jehova “naghiro sa praktikal na paagi, na nagtatao nin tabang sa mga nagsasakit, na dai iniisip kun ano an relihion ninda.”

Apuera sa pagkamoot sa Dios asin kapwa, an tunay na mga Kristiano nagkakaminorootmootan. Si Jesus nagsabi: “Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.”—Juan 13:34, 35.

Risang-risa daw an kalaenan kan pagkaminorootmootan kan tunay na mga Kristiano? Siring kaiyan an saboot nin sarong katabang sa harong na an ngaran Ema. Nagtatrabaho sia sa La Paz, Bolivia, na duman an etnikong mga pagkakalaen sa parate isinisiblag an mayaman sa dukha. Sia nagsabi: “Sa kaenot-enote kong pagduman sa pagtiripon kan mga Saksi ni Jehova, naheling ko an sarong posturadong lalaki na nakatukaw asin nakikipag-olay sa sarong babae na tubong taga duman. Dai pa ako noarin man nakaheling nin siring kaiyan. Kan mismong oras na idto, aram kong ini na talaga an banwaan nin Dios.” Kaagid kaiyan, an sarong hoben na babaeng Brasileño na an ngaran Miriam nagsabi: “Dai ko aram kun paano magin maogma, minsan pa ngani sa laog kan sakong pamilya. Sa tahaw kan  mga Saksi ni Jehova ko naheling sa kaenot-enote an pagkamoot na ipinapaheling sa gibo.” Sa Estados Unidos, an direktor nin bareta para sa sarong estasyon nin telebisyon nagsurat: “Kun mamumuhay an mas dakol na tawo na siring kan saindong relihion, an nasyon na ini bako kutanang siring kan kamugtakan kaiyan ngonyan. Ako sarong parabareta na nakakaaram na an saindong organisasyon nakabase sa pagkamoot asin makosog na pagtubod sa Kaglalang.”

Hanapon an Tunay na Pagsamba

An pagkamoot sarong nagpapamidbid na karakteristiko nin tunay na pagsamba. Ibinaing ni Jesus an pakanompong sa tunay na pagsamba sa pakanompong kan tamang dalan asin pagpili na lumakaw dian. Iyo sana iyan an dalan na minagiya pasiring sa buhay na daing katapusan. Si Jesus nagsabi: “Maglaog kamo sa tatang hayakpit; huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakakua kaiyan.” (Mateo 7:13, 14) Saro sanang grupo nin tunay na mga Kristiano an may pagkasararong naglalakaw kaiba nin Dios sa dalan nin tunay na pagsamba. Kun siring, mahalaga kun arin na relihion an pilion nindo. Kun manompongan nindo an dalan na iyan asin pilion nindong lumakaw dian, nanompongan na nindo an pinakamarahay na dalan nin buhay, huli ta iyan an dalan nin pagkamoot.—Efeso 4:1-4.

Imahinara nanggad an kagayagayahan na mapapasaindo mantang kamo naglalakaw sa dalan nin tunay na pagsamba! Iyan garo paglakaw sa kaibahan nin Dios. Manonodan nindo sa Dios an kadonongan asin pagkamoot tanganing kamtan nindo an marahay na relasyon sa iba. Manonodan nindo sa saiya an manongod sa katuyohan nin buhay, asin masasabotan nindo an mga panuga nin Dios asin magkakaigwa kamo nin paglaom para sa ngapit. Dai nindo noarin man pagbabasolan na hinanap nindo an tunay na pagsamba.

[Ritrato sa pahina 5]

Sa tahaw kan suanoy na relihiosong mga kasuratan, Biblia sana an naghahayag kan pagkamoot nin Dios

[Mga Ritrato sa pahina 7]

An tunay na mga Kristiano madaling mamidbid huli ta ipinapaheling ninda sa gibo an pagkamoot