Mahalaga daw Kun Arin na Relihion an Pilion Nindo?

AN KADAKLAN sa sato gusto nin dakol na mapagpipilian kun kita namamakal. Kun an sadan igwa nin laen-laen na prutas asin gulay, makakapili kita kan pinakagusto niato asin kan marahay para sa satong pamilya. Kun an sarong tindahan nin gubing may itinitindang dakol na estilo asin kolor na abot-kaya an presyo, makakapili kita kan pinakabagay sa sato. An nagkapira sa pagpili na ginigibo niato sa buhay mga kapahayagan sana kan satong gusto bilang indibiduwal. Pero, an ibang pagpili niato nakakaapektar sa satong ikakarahay, halimbawa, an satong pagpili nin masustansiang kakanon o madonong na mga katood. Kaya, kumusta man an manongod sa satong pagpili nin relihion? An paagi daw kan satong pagsamba maninigo na kapahayagan sana kan satong personal na gusto? O iyan daw sarong bagay na may dakulang epekto sa satong ikakarahay?

Kadakol na laen-laen na relihion an mapagpipilian. Ginagarantiyahan kan dakol na nasyon ngonyan an relihiosong katalingkasan, asin an mga tawo paorog nang paorog na dai nag-aalangan na bayaan an relihion kan saindang mga magurang. Ipinapaheling kan sarong surbey sa Estados Unidos na 80 porsiento kan mga Amerikano an “naniniwala na labi sa sarong relihion an puedeng magin dalan pasiring sa kaligtasan.” Segun sa surbey man sanang iyan, “saro sa kada limang ininterbio an nagsabi na sia nagbago nin relihion kan nasa edad na.” Ihinayag nin sarong surbey sa Brazil na haros un kuarto kan gabos na taga Brazil an nagbago kan saindang relihion.

Kan nakaagi, maigot na pinagdedebatehan kan mga tawo an mga doktrina na nagpapamidbid sa kalaenan kan sarong relihion sa iba. Ngonyan an popular na punto de vista iyo na, ‘Bakong mahalaga kun arin na relihion an pilion nindo.’ Alagad iyo daw? Puede daw na makaapektar sa saindo an pinili nindong relihion?

Kun paanong an mga namamakal na may marahay na paghusgar naghahapot manongod sa ginikanan kan mga produktong itinitinda, madonong man kamo kun ihahapot nindo, ‘Paano nagpoon an gabos na manlaenlaen na relihion na ini, asin taano?’ An Biblia nagtatao kan mga simbag.

 Paano Nagpoon an mga Relihion?

Sa suanoy na Israel, si Hadeng Jeroboam nagpoon nin sarong bagong relihion haros sangribong taon bago nagdigdi sa daga si Jesus. Si Jeroboam an enot na hade kan independienteng amihanan na kahadean nin Israel. Napaatubang sia sa depisil na situwasyon na kun paano nia mapapasunod sa saiya an banwaan. “An hade nakipagkonsulta asin naggibo nin duwang bulawan na ogbon na baka asin nagsabi sa banwaan: ‘Masakit na marhay para sa saindo na tumukad pasiring sa Jerusalem. Uya an saimong Dios, O Israel.’” (1 Hade 12:28) Malinaw nanggad na gusto kan hade na gamiton an relihion tanganing makua an kaimbodan kan banwaan parayo sa Jerusalem, na duman sinda dating nagsasamba. An relihion na pinonan ni Jeroboam nagpadagos sa laog nin dakol na siglo asin nagresulta sa pagkapahamak nin minilyon kan sa katapustapusi papanimbagon nin Dios an apostatang nasyon na iyan nin Israel. An relihion ni Jeroboam sarong pakana tanganing magkamit nin politikal na bentaha. An nagkapirang relihion nin Estado na nagpapadagos sagkod sa panahon na ini nagpoon na arog man kaiyan bilang paghihingoa na pakosogon an politikal na kapangyarihan.

Ihinayag ni apostol Pablo an saro pang motibo nin mga tawo sa pagpoon nin sarong bagong relihion kan sabihon nia: “Aram ko na pakahale ko an mapan-aping mga lobo malaog dian sa tahaw nindo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:29, 30) An orgolyosong mga namomoon sa parate nagpopoon nin relihiosong mga mobimiento tanganing darahon an atension sa saindang sadiri. An mga iglesia na may kaputikan na naghihingakong sinda mga Kristiano nagkakabaranga sa kadakol na paksion.

Siisay an Gustong Paogmahon kan mga Relihion?

An pagpaonra sa gusto kan dakol na tawo tibaad magpahiro sa nagkapira na magpoon nin sarong bagong relihion. Halimbawa, an magasin na Economist nagreport manongod sa darakula daang iglesia sa Estados Unidos. An artikulo nagsasabi na an mga iglesiang ini nagdadakula huli ta an mga iyan “nakabasar sa kaparehong prinsipyo na ginagamit kan gabos na mapangganang negosyo: an pagpaorog sa gusto kan mga parokyano.” An nagkapira itinatampok an “nakakaaling na mga serbisyo na may kaibang mga video, drama asin modernong musika.” An nagkapirang namomoon sa relihion sa mga iglesiang ini naghihingako na tinotokdoan ninda an saindang mga miembro na magin “mayaman, marahay an salud asin daing problema.” Minsan ngani an siring na mga iglesia kinikritikar huli sa pagigin nasa industriya nin aling-alingan o “industriya na pagtabang sa sadiri,” an sabi kan iyo man sanang reperensia, “pinapaonrahan sana ninda an gusto kan mga miembro.” An report nagtatapos: “An pagsasaro kan negosyo asin relihion nagin mapangganang marhay.”

Minsan ngani an ibang relihion tibaad daing gayo risa na garo negosyo, an mga iglesia na “nagpapaonra sa gusto kan mga miembro” nagpapagirumdom sa sato kan patanid na itinao ni Pablo. Isinurat nia: “Madatong an panahon na dai na sinda matagal sa ikakarahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan, mantang sinda makiling sa falsong mga estorya.”—2 Timoteo 4:3, 4.

Huling an dakol na relihion namukna huli sa pagmawot nin politikal na kapangyarihan, prestihio, asin pag-ako kan dakol na tawo imbes na huli sa pagmawot na paogmahon an Dios, bakong makangangalas na an relihion napapalabot sa karatan na arog baga nin pagmaltrato sa aki, pandadaya, guerra, o terorismo. Sa parate nanggad, an relihion sarong panloloko. Paano nindo malilikayan na madaya?

[Blurb sa pahina 4]

An dakol na relihion namukna huli sa pagmawot nin politikal na kapangyarihan, prestihio, asin pag-ako kan dakol na tawo imbes na huli sa pagmawot na paogmahon an Dios