Maogmang Maghalat ki Jehova

NAPROBARAN na daw nindong kumakan nin hilaw na prutas? Daing duwa-duwa na dai nindo nagustohan an namit kaiyan. An prutas nagkakaipo nin panahon tanganing mahinog, asin seguradong bawi an paghalat na mangyari iyan. May iba pang mga kamugtakan na kapakipakinabang an paghalat. “Marahay na an saro maghalat, na dai ngani naggigirong, para sa pagliligtas ni Jehova,” an sabi kan Biblia. (Lamentacion 3:26; Tito 2:13) Sa anong mga paagi na an mga Kristiano kaipuhan na maghalat ki Jehova? Paano kita makikinabang sa paghalat sa saiya?

Paghalat sa Dios—Ano an Kalabot Dian?

Bilang mga Kristiano, “hinahalat [niato] asin pinapagdadanay na harani sa isip an presensia kan aldaw ni Jehova.” Inaantisipar niato an pakaginhawa kun papangyarihon na nia an “kalaglagan kan bakong diosnon na mga tawo.” (2 Pedro 3:7, 12) Si Jehova mismo gustong-gustong taposon an gabos na karompotan, alagad nagpupugol sia tanganing an kaligtasan kan mga Kristiano mangyari sa paagi na magpapamuraway sa saiyang ngaran. An Biblia nagsasabi: “An Dios, minsan ngani boot nang ipaheling an saiyang grabeng kaanggotan asin ipamidbid an saiyang kapangyarihan, nagtogot na may dakulang pakatios sa mga lalagan nin grabeng kaanggotan na ginibong angay sa kalaglagan, tanganing ipaaram nia an kayamanan kan saiyang kamurawayan sa mga lalagan nin pagkaherak.” (Roma 9:22, 23) Arog kan ginibo nia kan panahon ni Noe, aram ni Jehova an tamang panahon tanganing iligtas an banwaan nia ngonyan. (1 Pedro 3:20) Sa siring, kalabot sa paghalat sa Dios an paghalat sa saiyang panahon na humiro.

Mantang hinahalat niato an aldaw ni Jehova, kun beses tibaad madesganar kitang maheling na orog pang nagraraot an moral na pamantayan kan kinaban sa palibot niato. Kun arog kaiyan an namamatean niato, marahay na horophoropon an mga tataramon kan propeta nin Dios na si Miqueas, na nagsurat: “An maimbod nawara na sa daga, asin mayo na nin matanos sa tahaw nin katawohan.” Dangan idinugang nia: “Kun para sa sako, ki Jehova ako padagos na maghahalat. Mapaheling ako nin mapaghalat na aktitud sa Dios nin sakong kaligtasan.” (Miqueas 7:2, 7) Ano an “mapaghalat na aktitud” na maninigo niatong kultibaron? Mantang an paghalat parateng nakakapanluya sa boot, paano kita makakanompong nin kagayagayahan mantang naghahalat sa Dios?

Maogma Mantang Naghahalat

Makakanood kita ki Jehova manongod sa tamang aktitud. Dai sia noarin man nagpondo sa pagigin “maogmang Dios.” (1 Timoteo 1:11) Maogma sia mantang sia naghahalat huling padagos siang nagtatrabaho tanganing otobon an saiyang katuyohan na an mga tawo na namomoot sa saiya darahon sa pagkasangkap, na iyo an katuyohan nia para sa mga tawo kan lalangon nia sinda. (Roma 5:12; 6:23) Sa saiyang mga gibo, naheheling nia an marahay na mga resulta—minilyon na tawo an naakit sa tunay na pagsamba. Si Jesus nagsabi: “An sakong Ama sagkod ngonyan padagos na naggigibo, asin ako padagos na naggigibo.” (Juan 5:17) An paggibo nin mga bagay para sa iba mahalagang marhay sa pagigin maogma. (Gibo 20:35) Kaagid kaiyan, an tunay na mga Kristiano dai naghahalat na mayong ginigibo. Imbes, padagos sindang nagtatrabaho tanganing tabangan an iba na maaraman an katuyohan nin Dios para sa katawohan.

An maimbod na mga tawo pirmeng kontento na omawon an Dios mantang hinahalat an saiyang panahon na humiro. Kuanon niatong halimbawa si salmistang David. Si David pinaglamag kan saiyang hade, pinasaloiban kan dayupot na kaibaiba, asin trinaydor kan saiyang aki. Sa kada saro kan mga  pangyayaring ini, magigin maogma daw si David mantang hinahalat niang umabot an pakaginhawa sa itinalaan na panahon ni Jehova? An Salmo 71, na minalataw na isinurat ni David, nagsasabi: “Kun para sa sako, ako danay na maghahalat, asin dudugangan ko an gabos na pag-omaw sa saimo. An sakong ngoso magsasaysay kan saimong katanosan, sa bilog na aldaw kan saimong pagliligtas.” (Salmo 71:14, 15) Imbes na maghalat sa pagkadesganar, si David nagpahayag nin kagayagayahan huling sibot sia sa pag-omaw ki Jehova asin sa pagpakosog sa iba sa tunay na pagsamba.—Salmo 71:23.

An paghalat ki Jehova bakong nakakapongot na siring kan paghalat sa naatrasong bus. Iyan mas arog sa magayagayang paghalat nin mga magurang mantang an saindang aki nagtatalubo pasiring sa pagigin nasa edad na na puede nindang ipag-orgolyo. An mga taon na iyan pano nin aktibidad—pagsasanay, pagtotokdo, asin pagdidisiplina—an gabos sa katuyohan na makamtan an minamawot na resulta. Kaagid kaiyan, kita na naghahalat ki Jehova nakakanompong nin kaogmahan sa pagtabang sa iba na maparani sa Dios. Mawot man niato na makamit an pag-oyon nin Dios asin, sa katapustapusi, an kaligtasan.

Dai Nawawaran nin Paglaom

Ipinaparisa kan paghalat ki Jehova an padagos na pagkamoot asin paglilingkod sa saiya na dai nawawaran nin paglaom. Puedeng magin masakit ini. Dakol sa mga lingkod nin Dios ngonyan an nag-iistar sa mga komunidad na tinutuyatuya kan mga tawo an siisay man na namumuhay basado sa pagtubod sa mga panuga nin Dios. Pero, estudyare an halimbawa kan maimbod na mga Israelita na pinagdanay na buhay an saindang paglaom durante kan 70 taon na pagkadistiero sa Babilonya. Ano an nakatabang sa sainda na magibo iyan? Daing duwa-duwa, nagpakosog sa sainda an pagbasa kan mga salmo. An sarong nakakaparigon sa boot na salmo na posibleng isinurat kan panahon na idto nagsasabi: “Sa saiyang tataramon naghahalat ako. An sakong kalag naghahalat ki Jehova labi pa sa paghalat nin mga bantay sa aga, na nagbabantay para sa aga. Padagos logod na maghalat an Israel ki Jehova.”—Salmo 130:5-7.

An mga Judio na pinagdanay na buhay an saindang paglaom paagi sa pagbasa asin pagtaram manongod kaiyan binalosan kan sa katapustapusi madaog an Babilonya kan mga nananakyada. Rinibong maimbod na Judio an tolos-tolos na nagpasiring sa Jerusalem. May labot sa panahon na iyan, nasusurat: “Kan ibalik ni Jehova an mga nabihag nin Sion, . . . an satong ngoso napano nin pagngisi.” (Salmo 126:1, 2) An mga Judiong idto dai uminontok, kundi nagpadagos sinda sa pagpakosog kan saindang pagtubod. Asin nungka sindang uminontok sa pag-awit nin pag-omaw ki Jehova.

Sa kaparehong paagi, an tunay na mga Kristiano na naghahalat sa Dios durante kan “pagtatapos kan sistema nin mga bagay” danay na naghihingoa na papagdanayon na buhay an saindang pagtubod. Pinag-aadalan ninda an Tataramon nin Dios, nagpaparinigonan nin boot, asin padagos na inoomaw si Jehova paagi sa paghuhulit kan maogmang bareta kan saiyang Kahadean.—Mateo 24:3, 14.

Paghalat Tanganing Makinabang sa Disiplina

An propeta nin Dios na si Jeremias nagsurat: “Marahay na an saro maghalat, na dai ngani naggigirong, para sa pagliligtas ni Jehova.” (Lamentacion 3:26) An boot sabihon ni Jeremias iyo na marahay para sa banwaan nin Dios na dai magreklamo manongod sa paagi nin pagdisiplina ni Jehova sa sainda kan togotan nia na malaglag an Jerusalem.  Imbes, maninigo sindang makinabang sa eksperyensia paagi sa paghorophorop sa saindang kasumbikalan asin sa pangangaipo nindang bagohon an saindang aktitud.—Lamentacion 3:40, 42.

An pagkamit niato nin pakinabang sa disiplina ni Jehova puedeng iagid sa paagi nin pagpahinog sa sarong prutas. May labot sa disiplina hale sa Dios, an Biblia nagsasabi: “Duman sa mga napatuod kaiyan iyan nagbubunga nin toninong na bunga, arin na baga, an katanosan.” (Hebreo 12:11) Kun paanong an prutas nagkakaipo nin panahon tanganing mahinog, kaipuhan man an panahon tanganing bagohon niato an satong mga aktitud bilang paghimate sa pagsasanay na itinatao nin Dios. Halimbawa, kun huli sa salang gawe-gawe niato nawara an sarong pribilehio niato sa kongregasyon, an pagigin andam niatong maghalat sa Dios maolang sa sato na madesganar asin sumuko. Sa siring kaiyan na mga kamugtakan, nakakaparigon sa boot an ipinasabong na mga tataramon ni David: ‘An mapairarom sa kaanggotan nin Dios madali sana, an mapairarom sa saiyang marahay na boot bilog na pagkabuhay. Sa banggi tibaad yaon an pagtangis, alagad sa aga yaon an kagayagayahan.’ (Salmo 30:5) Kun kukultibaron niato an mapaghalat na aktitud asin iaaplikar an konseho na inaako niato hale sa Tataramon asin organisasyon nin Dios, maabot an satong panahon para sa “kagayagayahan.”

An Pagtalubo sa Pagkamaygurang Nagkakaipo nin Panahon

Kun kamo hoben pa o bago pa sanang mabautismohan, tibaad gustong-gusto nindong magkaigwa nin nagkapirang paninimbagan sa Kristianong kongregasyon. Alagad kaipuhan an panahon na mapatalubo an kinakaipuhan na espirituwal na pagkamaygurang tanganing isaabaga an siring na mga paninimbagan. Kun siring, aprobetsaran an saindong enot na mga taon tanganing tumalubo bilang espirituwal na tawo. Halimbawa, an pagkahoben angay na panahon tanganing basahon an bilog na Biblia, pataluboon an Kristianong mga kualidad, asin manodan an teknika sa paggibo nin mga disipulo. (Eclesiastes 12:1) Kun mapakumbaba nindong ipinapaheling an mapaghalat na aktitud, maabot an panahon ni Jehova para sa saindo tanganing magkaigwa kamo nin dugang pang paninimbagan.

An paggibo nin disipulo nagkakaipo man nin pasensia. Kun paanong an paraoma kaipuhan na padagos na magbaribi sagkod na pataluboon nin Dios an banhi, arog man kaiyan an paggibo nin mga disipulo. (1 Corinto 3:7; Santiago 5:7) An pagkultibar nin pagtubod asin pag-apresyar para ki Jehova sa puso nin iba nagkakaipo nin mga bulan o mga taon pa ngani nin mapasensiang pag-adal sa Biblia. Kalabot sa paghalat ki Jehova an paghihingoa, dawa kun sa enot, an mga inaadalan sa Biblia dai minahiro susog sa nanonodan ninda. Kun sinda minsan paano nagpapaheling nin kadikit na pag-apresyar, tibaad iyan tanda na naghihimate sinda sa espiritu ni Jehova. Paagi sa pagpasensia, tibaad magkaigwa kamo nin kagayagayahan na maheling na pinapatalubo ni Jehova an saindong inaadalan sa Biblia na magin disipulo ni Cristo.—Mateo 28:20.

Pagpahayag nin Pagkamoot Paagi sa Paghalat

Bilang halimbawa kun paanong an paghalat puedeng magin kapahayagan nin pagkamoot asin kompiansa, estudyare an kamugtakan nin sarong may edad nang lola na nag-iistar sa desiertong rehion kan Andes, sa Amerika del Sur. Sia asin an saro pang espirituwal na tugang na babae an solamenteng Saksi ni Jehova sa saindang baryo. Naiimahinar daw nindo kun gurano sinda kagalagang naghahalat para sa pagsongko kan mga kapwa Kristiano? Sarong beses, nalagalag an nagbibiaheng paraataman kan ini pasiring sa saindang lugar para sa enot na pagsongko sa sainda. Kinaipuhan kaining susogon liwat an inagihan nia kaya naatraso sia nin nagkapirang oras. Lampas nang marhay an kamatangaan kan sa katapustapusi matanaw nia sa harayo an baryo. Huling mayo nin elektrisidad sa lugar na iyan, nagngalas siang makaheling nin liwanag. Kanigoan an kaogmahan nia kan sa katapustapusi nag-abot sia sa entrada kan baryo asin naheling na an liwanag gikan sa lamparang de lana na iinitaas kan lolang iyan! Segurado an lola na maabot sia, kaya naghahalat ini.

May kaagid na pagpasensia, maogma kitang naghahalat ki Jehova. Segurado kita na ootobon nia an saiyang mga panuga. Asin kapareho kan nagbibiaheng paraataman na iyan, inaapresyar niato an mga mamomoton na naghahalat sa sato. Kun siring, bakong makangangalas na inaapresyar nin Dios an mga naghahalat sa saiya. An Biblia nagsasabi: “Ikinakawili ni Jehova an . . . mga naghahalat sa saiyang mamomoton na kabootan.”—Salmo 147:11.

[Ritrato sa pahina 18]

An mga tawong sibot sa pag-omaw sa Dios nakakanompong nin kagayagayahan sa paghalat ki Jehova