Estorya nin Buhay

Naghahalat sa Sarong Kahadean na “Bakong Kabtang kan Kinaban na Ini”

Isinaysay ni Nikolai Gutsulyak

Sa laog nin 41 aldaw asin banggi, namugtak ako sa tahaw nin sarong rebelyon sa bilanggoan. Bigla na sana, ako napabungkaras hale sa pagkatorog huli sa putok nin kanyon. May mga tangke asin soldados na nagdagasa palaog sa kampong bilanggoan, na inaatake an mga preso. Namemeligro an sakong buhay.

PAANO ako namugtak sa situwasyon na ini? Togoti nindo akong magpaliwanag. Nangyari ini kan 1954. Kan panahon na idto, ako 30 anyos. Arog kan dakol na Saksi ni Jehova na namumuhay sakop kan rehimen na Sobyet, ako ikinarsel huli sa pagdanay na neutral sa politikal na mga isyu asin huli sa pagsabi sa iba manongod sa Kahadean nin Dios. An samong grupo nin mga Saksing ibinilanggo kompuesto nin 46 na lalaki asin 34 babae. Ibinilanggo kami sa sarong kampong bilanggoan na harani sa baryo nin Kengir sa sentral na Kazakhstan. Duman kami namuhay sa tahaw kan rinibong iba pang preso.

Si Joseph Stalin, an namamayo sa Unyon Sobyet, nagadan kan sinundan na taon. An dakol na preso naglaom na an bagong rehimen sa Moscow tibaad maghinanyog sa saindang mga reklamo manongod sa masakit na kamugtakan sa bilanggoan. An pagkadiskontento kan mga preso sa kahurihurihi nagbunga nin hayag na pagrebelde sa bilanggoan. Durante kan suminunod na komprontasyon, kaming mga Saksi kinaipuhan na liwanagon an samong paninindogan sa purisaw na mga rebelde asin kinaipuhan mi man na ipaliwanag an samong paninindogan sa mga guardiang militar. Kaipuhan an pagtubod sa Dios tanganing kami makapanindogan sa neutral na posisyon na iyan.

 Rebelyon!

Kan Mayo 16 nagpoon an pagrebelde sa laog kan kampong bilanggoan. Pakalihis nin duwang aldaw, labing 3,200 na preso an nagsayumang magtrabaho, na naghahagad nin mas marahay na mga kamugtakan sa kampo asin na itao an mga deretso kan politikal na mga preso. Marikason an mga pangyayari. Enot pinuersa kan mga rebelde na lumuwas sa kampo an mga guardia. Dangan rinalabot ninda an nakapalibot na kudal. Dangan ginaraba ninda an lanob na nagsusuhay sa mga kuarto kan mga lalaki asin mga babae, na nagresulta sa sarong kuartel na iribang erokan kan mga preso. Sa suminunod na mga aldaw na nagin emosyonal na marhay, an nagkapirang preso nag-aragom pa ngani, na an mga seremonya sa kasal pinangenotan nin mga padi na preso man. Sa tolong seksion kan kampo na pinangyarihan kan rebelyon, an kadaklan sa 14,000 na preso nakikabtang sa pagrebelde.

An mga rebelde nag-organisar nin mga komite sa kampo na makikipagnegosyar sa militar. Minsan siring, tolos na nagkaigwa nin diriskutiran sa tahaw kan mga miembro kan komite, asin an kampo sa katapustapusi napasa kontrol kan pinakapanatikong mga indibiduwal. Orog pang nagin agresibo an kamugtakan. An mga namomoon sa mga rebelde nag-organisar nin departamento sa seguridad, departamento militar, asin departamento sa propaganda tanganing papagdanayon an “areglo.” An mga namomoon naggamit nin laudispiker na nakatakod sa mga palo sa palibot kan kampo tanganing ibrodkast an malaad na mga mensahe, na pinapagdanay na makosogon an espiritu nin pagrebelde. Inolang kan mga rebelde an iba na minadulag, pinadusahan an mga nagkokontra sa sainda, asin nagsabing andam sindang gadanon an siisay man na dai ninda naooyonan. May mga huringhuding na ginaradan na an nagkapirang preso.

Huling inaantisipar kan mga rebelde an pagsalakay kan militar, maingat sindang nag-andam tanganing idepensa an saindang sadiri. Tanganing seguradohon na pinakadakol na preso sagkod sa mapupuede an masangkapan sa pagdepensa kan kampo, an mga namomoon nagboot sa gabos na preso na magkaigwa nin armas para sa saindang sadiri. Tanganing gibohon iyan, kinua kan mga preso an mga rehas na batbat sa mga bintana asin naggibo nin mga kutsilyo asin iba pang mga armas na gibo sa metal. Nakakua pa ngani sinda nin mga badil asin bomba.

Inimpluwensiahan na Umayon

Kan panahon na idto, duwang rebelde an nagdolok sa sako. Iinabot sa sako kan saro an sarong bagong tais na kutsilyo. “Kuanon mo ini!” an pagmando nia. “Kakaipuhanon mo iyan para sa proteksion.” Silensio akong namibi ki Jehova na tabangan akong magdanay na kalmado. Nagsimbag ako: “Kristiano ako, saro sa Mga Saksi ni Jehova. An ibang mga Saksi asin ako nabibilanggo digdi huli ta kami nakikipaglaban, bakong tumang sa mga tawo, kundi tumang sa dai naheheling na mga puersang espiritu. An samong mga armas tumang sa sainda iyo an samong pagtubod asin an samong paglaom sa Kahadean nin Dios.”—Efeso 6:12.

Sa pagkabigla ko, an lalaki nagtango tanganing ipaheling na nasasabotan nia iyan.  Minsan siring, an saro pa sinuntok ako nin makosog. Dangan naghale na sinda. An mga rebelde nagpabarobalyo sa mga kuartel, na nagpoprobar na piriton an mga Saksi na umayon sa rebelyon. Alagad nagsayuma an gabos niamong Kristianong mga tugang na lalaki asin babae.

An neutral na paninindogan kan mga Saksi ni Jehova pinag-olayan sa sarong miting kan komite kan mga rebelde. “An mga miembro kan gabos na relihion—mga Pentecostal, Adventista, Baptista, asin gabos na iba pa—nakikiayon sa rebelyon. Mga Saksi ni Jehova sana an nagsayuma,” an sabi ninda. “Ano an gigibohon niato sa sainda?” May nagsuherir na iapon sa horno kan bilanggoan an sarong Saksi tanganing patakoton kami. Alagad an sarong dating opisyal sa militar, sarong preso na iginagalang kan iba, nagtindog asin nagsabi: “Bakong madonong iyan. Maninigo niatong ibugtak sinda gabos sa sarong kuartel sa gilid kan kampo, na kataed kan trangka. Sa paaging iyan, kun sakyadahon kita kan hukbo na may mga tangke, an mga Saksi an enot na maliligis. Asin bako kita an magigin may sala sa paggadan sa sainda.” Inako kan iba an saiyang suhestion.

Ibinugtak sa Peligrosong Posisyon

Dai nahaloy, an mga preso naglakaw sa palibot kan kampo na nagkukurahaw, “Mga Saksi ni Jehova, lumuwas kamo!” Dangan kami gabos na 80 pinaduman sa sarong kuartel na nasa gilid kan kampo. Ginuyod ninda an mga higdaan paluwas sa kuartel tanganing humiwas sa laog asin pinagbotan kami na lumaog. An kuartel na iyan an nagin bilanggoan niamo sa laog kan bilanggoan.

Tanganing magin pribado, an mga Kristiana sa samong grupo pinagtaragpi an mga tela, asin ginamit mi iyan tanganing pagsuwayon an kuartel sa duwang kabtang—an saro para sa mga lalaki asin an saro pa para sa mga babae. (Kan huri, idrinowing nin sarong Saksi sa Rusya an kuartel na ini, na ipinapaheling sa ibaba.) Mantang namumuhay sa piot na kuartel na idto, parate kaming namimibi nin iriba, na odok na hinahagad ki Jehova na tawan kami nin kadonongan asin “puersa na labi sa ordinaryo.”—2 Corinto 4:7.

Sa bilog na panahon na iyan, kami namumugtak sa peligro sa pag-oltanan kan mga rebelde asin kan hukbong Sobyet. Mayong nakakaaram sa samo kun ano an sunod na gigibohon kan man-ibong-ibong  na lado. “Dai kamo magparabanabana,” an sadol nin sarong maedad na asin maimbod na Kristianong tugang. “Dai kita papabayaan ni Jehova.”

An samong namomotan na mga tugang na Kristiana—hoben sagkod gurang—nagpaheling nin pambihirang pakatagal. An saro mga 80 anyos asin nangangaipo nin dagdag na tabang. An iba may helang asin nangangaipo nin medikal na pag-asikaso. Sa bilog na panahon na iyan, an mga pinto kan kuartel dapat na magdanay na bukas tanganing dayaday kaming masubaybayan kan mga rebelde. Kun banggi, minalaog sa samong kuartel an armadong mga preso. Kun beses nadadangog mi sindang nagsasabi, “Nagtotorog an Kahadean nin Dios.” Durante kan aldaw, kun tinotogotan ninda kaming magduman sa komedor kan kampo, pirme kaming magkairibanan asin namimibi na protehiran kami ni Jehova sa madahas na mga tawo.

Sa kuartel, naghihingoa kaming suportaran sa espirituwal an lambang saro. Halimbawa, sa parate an sarong tugang na lalaki nagtatao nin sarong salaysay hale sa Biblia, na igo sana an kosog nin boses tanganing madangog mi. Dangan iinaaplikar nia an salaysay sa samong kamugtakan. An sarong may edad nang tugang na lalaki espesyalmenteng gustong magtaram manongod sa hukbo ni Gedeon. “Sa ngaran ni Jehova, 300 na lalaki na may kapot na mga instrumento sa pagtugtog an nakipaglaban tumang sa 135,000 na armadong soldados,” an ipinagirumdom nia sa samo. “An gabos sa 300 nagbuelta na dai naano.” (Hokom 7:16, 22; 8:10) Ini asin an iba pang mga halimbawa sa Biblia nagtao sa samo nin espirituwal na kosog. Dai pa sana nahahaloy poon kan ako magin Saksi kan panahon na idto, alagad an pakaheling sa makosog na pagtubod kan mas eksperyensiadong mga tugang na lalaki asin babae nagparigon na marhay sa sakong boot. Namatean ko na si Jehova talagang kaibahan mi.

Nagpoon an Ralaban

Luminihis an mga semana, asin nag-oorog kaidto an tension sa kampo. Nagin mas mainit an negosasyon sa pag-oltanan kan mga rebelde asin kan mga autoridad. Nag-insistir an mga namomoon na rebelde na magpadara nin representante an gobyerno sentral kan Moscow tanganing makipag-olay sa sainda. An mga autoridad naghagad na sumuko an mga rebelde, butasan an saindang mga armas, asin bumalik sa trabaho. An man-ibong-ibong na lado nagsayumang makikompromiso. Kan panahon na idto, an kampo pinalibotan kan mga puersa militar na andam na sumalakay dian sa oras na umako kan enot na pagboot. An mga rebelde andam na man na lumaban, na nagbugtak nin mga barikada asin nagtipon nin mga armas. An gabos naghahalat sa ultimong labanan sa pag-oltanan kan hukbo asin kan mga preso ano man na oras.

Kan Hunyo 26 napagmata kami huli sa nakakabungog na mga putok nin kanyon. Linigis kan mga tangke an kudal asin nagdagasa an mga ini palaog sa kampo. Sinundan iyan kan sunod-sunod na pagdaguso kan mga soldados na nagpapaarak-asak nin mga masinggan. An mga preso—mga lalaki asin babae—nagdaraguso parani sa nagdadangadang na mga tangke, na nagkukururahaw nin “Hurrah!” asin nagdadaraklag nin mga gapo, mga bomba na sadiring gibo, asin ano man na bagay na makapotan ninda. Nagkaigwa nin grabeng ralaban, asin kaming mga Saksi naipit sa tahaw. Paano sisimbagon ni Jehova an samong pamibi para sa tabang?

 Bigla na sana, nagdaralagan palaog sa samong kuartel an mga soldados. “Magruluwas kamo, kamong mga banal!” an kurahaw ninda. “Dali, lumuwas kamo sa kudal!” Pinagbotan kan opisyal na namamahala an mga soldados na dai kami pagbadilon kundi ibanan kami asin protehiran kami. Mientras na nagpapadagos an ralaban, nagturukaw kami sa madoot na kapatagan sa luwas sana kan kampo. Sa laog nin apat na oras nadadangog mi an mga purutokan, baradilan, pag-agrangay, asin pag-agrotong hale sa laog kan kampo. Dangan, nagin silensio an gabos. Kan huri, sa liwanag kan kaagahan, naheling mi na dinadara kan mga soldados an mga gadan paluwas sa kampo. Naaraman mi na ginatos an nalugadan o nagadan.

Pagtaodtaod kan aldaw na idto, nagdolok sa samo an sarong opisyal na kamidbid ko. “Bueno, Nikolai,” an hapot nia na may pag-orgolyo, “siisay an nagligtas sa saindo? Kami o si Jehova?” Sinserong pinasalamatan niamo sia huli sa pagligtas sa samong buhay, na idinadagdag, “Nagtutubod kami na pinahiro kamo kan samong makakamhan sa gabos na Dios, si Jehova, na iligtas kami, kun paanong pinahiro nia an iba tanganing iligtas an saiyang mga lingkod kan mga panahon kan Biblia.”—Esdras 1:1, 2.

Ipinaliwanag sa samo kan iyo man sanang opisyal kun paano kami namidbid kan mga soldados asin kun paano ninda naaraman kun haen kami. Sinabi nia na durante kan saro sa mga negosasyon sa pag-oltanan kan militar asin mga rebelde, inakusar kan militar an mga rebelde na ginagadan ninda an mga preso na dai nagsusuportar sa sainda. Bilang depensa, an mga rebelde nagsimbag na an mga Saksi ni Jehova dai nagpartisipar sa rebelyon alagad dai ginadan. Imbes, bilang padusa, an gabos na Saksi ibinilanggo sa sarong kuartel. Tinandaan kan mga opisyal kan militar an sinabing iyan.

Kami Marigon na Nanindogan Para sa Kahadean

Nasambitan kan midbid na marhay na autor na Ruso na si Aleksandr Solzhenitsyn sa saiyang librong The Gulag Archipelago an rebelyon sa bilanggoan na naeksperyensiahan niamo. May koneksion sa pangyayaring iyan, nagsurat sia na an pagrebelde nagpoon huli ta, siring kan sabi nia, “gusto niamo nin katalingkasan, siempre, . . . alagad siisay an makakatao kaiyan sa samo?” Bilang mga Saksi ni Jehova sa iyo man sanang kampong bilanggoan, hinihimuyawot mi man an katalingkasan. Minsan siring, bako sanang katalingkasan sa bilanggoan kundi katalingkasan na ikakatao sana kan Kahadean nin Dios. Mantang nasa bilanggoan, aram niamo na kaipuhan mi an kosog na hale sa Dios tanganing marigon na makapanindogan sa lado kan saiyang Kahadean. Asin si Jehova nagtao sa samo kan gabos na kaipuhan niamo. Tinawan nia kami nin kapangganahan na dai naggagamit nin mga kutsilyo o granada.—2 Corinto 10:3.

“An sakong kahadean bakong kabtang kan kinaban na ini,” an sabi ni Jesu-Cristo ki Pilato. “Kun an sakong kahadean kabtang kan kinaban na ini, nakipaglaban kutana an sakuyang mga lingkod.” (Juan 18:36) Kun siring, bilang mga parasunod ni Cristo, dai kami nakikabtang sa politikal na pakipagtusayan. Naoogma kami na durante asin pakatapos kan rebelyon, an samong kaimbodan sa Kahadean nin Dios nagin risang-risa sa iba. Mapadapit sa samong gawe-gawe durante kan panahon na idto, si Solzhenitsyn nagsurat: “An mga Saksi ni Jehova dai nag-alangan na estriktong otobon an saindang mga susundon asin nagsayumang magtogdok nin mga kuta o magguardia.”

Labing 50 taon na an nakaagi poon kan maribok na mga pangyayaring idto. Minsan siring, parate kong ginigirumdom an mga panahon na idto na may pagpasalamat huli ta nakanood ako nin nagdadanay na mga leksion, siring baga kan paghalat ki Jehova asin pagtitiwala nin lubos sa saiyang makakamhan na takyag. Iyo, siring kan dakol na iba pang mahal na mga Saksi sa dating Unyon Sobyet, naeksperyensiahan ko na si Jehova talagang nagtatao nin katalingkasan, proteksion, asin kaligtasan sa mga naghahalat sa sarong Kahadean na “bakong kabtang kan kinaban na ini.”

[Mga Ritrato sa pahina 8, 9]

An kampo nin puersahan na pagtrabaho sa Kazakhstan na dian kami nabilanggo

[Ritrato sa pahina 10]

Drowing kan kuartel kan mga Saksi, lugar na para sa mga babae

[Ritrato sa pahina 11]

Kaiba an Kristianong mga tugang kan kami binutasan