An Pagdatong ni Cristo​—Maninigo daw Niatong Katakotan Iyan?

ANO an minalaog sa isip nindo kun nasasambitan an pagdatong ni Jesu-Cristo? Minamansay daw nindo iyan na sarong pangyayari na mangangahulogan nin kalaglagan, kagabaan, asin padusa sa katawohan? O linalaoman daw nindo na tataposon kaiyan an gabos niatong problema? An pagdatong daw ni Cristo sarong bagay na dapat katakotan? O maninigo daw na antisiparon niato iyan?

May labot sa pagdatong ni Cristo, an Biblia nagsasabi: “Uya! Sia madatong kaiba kan mga panganoron, asin an gabos na mata makakaheling sa saiya, . . . asin tutumbokon kan gabos na tribo sa daga an saindang sadiri sa pagmondo huli sa saiya.” (Kapahayagan 1:7) An pagdatong na ini nanonongod sa pagpaheling ni Jesus sa ngapit tanganing balosan an mga matanos asin padusahan an mga marigsok.

Imbes na katakotan iyan, inantisipar ni apostol Juan an pagdatong ni Cristo. Pagkatapos na akoon an kapahayagan manongod sa pagdatong na ini asin manongod sa kun ano an magigin kahulogan kaiyan para sa daga, si Juan odok sa boot na namibi: “Madia na, Kagurangnan na Jesus.” (Kapahayagan 22:20) Alagad taano ta ‘tinutumbok kan gabos na tribo sa daga an saindang sadiri sa pagmondo huli sa saiya’? Sa anong paagi sia maheheling kan “gabos na mata”? Ano an gigibohon kan pagdatong ni Cristo? Paano an pagtubod dian magigin kapakipakinabang para sa sato ngonyan? Sisimbagon kan minasunod na artikulo an mga hapot na ini.