Kun Paano Nakanompong nin Katoninongan si Ana

ILINALANGKAW nin sarong maimbod na babae an saiyang boses sa sarong pamibi na nag-oomaw ki Jehova. Nagsasaboot sia na ibinangon sia nin Dios hale sa kabokabo, na sinasalidahan an saiyang kamondoan nin labi-labing kagayagayahan.

Ana an ngaran kan babae. Ano an dahelan kan pambihirang pagbabago sa saiyang mga saboot? Taano ta magayagaya na siang marhay ngonyan? Paano kita makikinabang sa saiyang eksperyensia? Tanganing makua an simbag sa mga hapot na ini, estudyaran niato an estorya ni Ana.

Sarong Pamilya na May Tension

Si Ana saro sa duwang agom ni Elcana, sarong Levita na nag-eerok sa teritoryo nin Efraim. (1 Samuel 1:1, 2a; 1 Cronica 6:33, 34) Minsan ngani an poligamiya bakong kabtang kan orihinal na katuyohan nin Dios para sa katawohan, tinogotan asin kinontrol iyan sa irarom kan Ley ni Moises. An pamilya ni Elcana nagsasamba ki Jehova, alagad an pag-agoman na poligamiya sa parate nagbubunga nin iriwal, siring kan ipinapaheling kan buhay pampamilya ni Elcana.

Si Ana baog, mantang si Penina, an saro pang agom ni Elcana, dakol an aki. Karibal ni Ana si Penina.—1 Samuel 1:2b.

An pagigin baog ibinibilang na katuyawan sa tahaw kan mga babaeng Israelita asin saro pa nganing tanda nin pagkadaing kuenta sa pagheling nin Dios. Alagad mayo nin nagpaparisa na an dai pangangaki ni Ana prueba kan pagdesaprobar nin Dios. Minsan siring, imbes na pagmaigotan na rangahon si Ana, ginamit ni Penina an saiyang kakayahan na mangaki tanganing ipamate sa saiyang karibal na ini miserable.

Mga Pagbaklay Pasiring sa Santuaryo ni Jehova

Sa ibong kan mga tension na ini, an pamilya ni Elcana nagbabaklay taon-taon tanganing magdolot nin atang sa santuaryo ni Jehova sa Silo. * Posibleng marhay na linalakaw an mga 60 kilometros na ini nin ida y buelta. An mga okasyon na ini siertong masakit nangorogna para ki Ana huli ta an nagkapirang kabtang kan atang para sa pakikikabtang itinatao ki Penina asin sa mga aki kaini, mantang saro sanang kabtang an nareresibi ni Ana. An siring na mga oportunidad ginagamit ni Penina tanganing uyamon si Ana, na kinokolgan an saiyang boot huli ta garo baga “sinerahan [ni Jehova] an saiyang matris.” An pasakit na ini nangyayari taon-taon, na bilang resulta, si Ana nagtatangis asin habo nang kumakan. Sa siring, an mga pagbaklay na maninigo kutanang magayagaya para sa saiya nagin mga panahon nin labi-labing kamondoan. Alagad ta si Ana nagbabaklay pa man giraray pasiring sa santuaryo ni Jehova.—1 Samuel 1:3-7.

Naheheling daw nindo kun paanong si Ana nagtao nin marahay na halimbawa para sa sato? Kun pinanluluyahan nin boot, ano an reaksion nindo? Isinusuway daw nindo an saindong sadiri asin dai na nakikiasosyar sa mga kapagtubod? Dai iyan ginibo ni Ana. Nagin nang kostumbre nia na makiiba sa mga parasamba ki Jehova. Sa ibong kan masakit na mga kamugtakan, maninigo man niatong gibohon iyan.—Salmo 26:12; 122:1; Talinhaga 18:1; Hebreo 10:24, 25.

Hiningoa ni Elcana na rangahon si Ana asin sabihon kaini an nasa boot nia. “Ana, ano ta naghihibi ka, asin ano ta dai ka minakakan, asin ano ta  nagmomondo an saimong puso?” an hapot nia. “Bako daw akong orog karahay sa saimo kisa sampulong aking lalaki?” (1 Samuel 1:8) Tibaad dai aram ni Elcana an kadaihan nin kabootan ni Penina, asin mas gusto pa ni Ana na magtios na daing girong imbes na magreklamo. Ano man an kamugtakan, an espirituwal an kaisipan na si Ana naghanap nin katoninongan paagi sa pagdolok ki Jehova paagi sa pamibi.

Si Ana Nagpromesa

An atang para sa pakikikabtang kinakakan sa santuaryo ni Jehova. Pagkahale sa komedor, si Ana namibi sa Dios. (1 Samuel 1:9, 10) “O Jehova nin mga hukbo,” an pakiolay nia, “kun saimong mamasdan nanggad an kasakitan kan saimong oripon na babae asin girumdomon nanggad ako, asin dai mo lilingawan an saimong oripon na babae asin tawan nanggad an saimong oripon na babae nin sarong aking lalaki, itatao ko sia ki Jehova sa gabos na aldaw kan saiyang buhay, asin mayo nin labaha na maagi sa saiyang payo.”—1 Samuel 1:11.

Espesipiko an pamibi ni Ana. Naghagad sia nin aking lalaki asin nagpromesa sia na idudusay ini ki Jehova bilang Nazareo sa bilog na buhay. (Bilang 6:1-5) An siring na promesa kaipuhan na oyonan kan saiyang agom, asin an aksion ni Elcana kan huri nagpapaheling na inooyonan nia an panuga kan saiyang namomotan na agom.—Bilang 30:6-8.

An paagi nin pamimibi ni Ana an nagin dahelan na isipon kan Halangkaw na Saserdoteng si Eli na burat ini. An saiyang mga ngabil nagkikibigkibig, alagad si Eli mayo nin nadadangog na mga tataramon, huling si Ana nagtataram sa saiyang puso. An saiyang pamibi partikularmenteng odok sa boot. (1 Samuel 1:12-14) Imahinara kun ano an namatean ni Ana kan tuyawon sia ni Eli, na sinasabing sia burat! Pero, may paggalang na sinimbag nia an halangkaw na saserdote. Kan marealisar ni Eli na si Ana namimibi “sa kadakolan kan [saiyang] kapurisawan asin pagkauyam,” sia nagsabi: “Itao logod kan Dios nin Israel an saimong pakimaherak.” (1 Samuel 1:15-17) Sa puntong iyan, si Ana nagpadagos sa saiyang paglakaw asin nagkakan, asin “an saiyang lalauogon bako nang hadit sa sadiring kamugtakan.”—1 Samuel 1:18.

Ano an manonodan niato sa gabos na ini? Kun namimibi kita ki Jehova manongod sa satong mga kahaditan, puede niatong ipaaram sa saiya an satong mga saboot asin an satong odok sa pusong mga kahagadan. Kun mayo na kitang magigibo tanganing resolberan an problema, maninigo niatong ipabaya an bagay sa saiyang mga kamot. Mayo nang mas marahay pang paagi kisa dian.—Talinhaga 3:5, 6.

Pakatapos na mamibi nin odok sa boot, an mga lingkod ni Jehova posibleng marhay na makaeksperyensia nin katoninongan na kaagid kan naeksperyensiahan ni Ana. Mapadapit sa pamibi, si apostol Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Kun itinatao niato ki Jehova an satong mga pagabat, dapat na togotan niato sia na asikasohon iyan. Dangan, arog ni Ana, dai na kita kaipuhan na mahadit sa satong kamugtakan.—Salmo 55:22.

Sarong Aking Lalaki na Ipinasubli ki Jehova

Itinao ngonyan nin Dios an saiyang atension ki Ana; sia nagbados asin nangaki nin sarong aking lalaki. (1 Samuel 1:19, 20) Ini saro sa pira sanang okasyon sa rekord kan Biblia na inako nin Dios an responsibilidad sa pagkamundag nin saro na magigin lingkod nia. An aki ni Elcana asin Ana na si Samuel magigin propeta ni Jehova, saro na magkakaigwa nin mahalagang kabtang sa pag-establisar kan monarkiya nin Israel.

Daing duwa-duwa na pinonan ni Ana na tokdoan si Samuel manongod ki Jehova poon sa pagkaomboy. Alagad nalingawan daw nia an ginibo niang promesa? Dai nanggad! “Pagkabutas mismo kan aki, dapat ko siang darahon, asin sia dapat na magpaheling sa atubangan ni Jehova asin mag-erok duman sagkod sa panahon na daing talaan,” an sabi nia. Kan si Samuel butason, tibaad kan sia tres anyos o medyo labi pa, dinara sia ni Ana tanganing mag-erok sa santuaryo ni Jehova, siring kan iprinomesa nia.—1 Samuel 1:21-24; 2 Cronica 31:16.

Pakatapos magdolot nin atang ki Jehova, ihinatod ni Ana asin kan saiyang agom si Samuel ki Eli. Posibleng marhay na kapot ni Ana an kamot kan saiyang sadit na aki mantang sinasabi nia ki Eli:  “Dispensara ako, kagurangnan ko! Sa buhay kan saimong kalag, kagurangnan ko, ako an babaeng nakatindog na kaiba mo sa lugar na ini tanganing mamibi ki Jehova. Mapadapit sa aking ini na namibi ako na itao logod sako ni Jehova an pakimaherak ko na hinagad ko sa saiya. Asin sa parte ko, ipinasubli ko sia ki Jehova. Sa gabos na aldaw kan saiyang pagkabuhay, sia saro na hinagad para ki Jehova.” Sa siring nagpoon an bilog na buhay na espesyal na paglilingkod ni Samuel sa Dios.—1 Samuel 1:25-28; 2:11.

Mantang minalihis an panahon, siertong dai nalilingawan ni Ana si Samuel. An Kasuratan nagsasabi: “Sarong sadit na gubing na daing takyag an ginigibo para sa saiya kan saiyang ina, asin dinadara nia ini sa saiya taon-taon kun sia minatukad kaiba kan saiyang agom tanganing mag-atang kan taonan na atang.” (1 Samuel 2:19) Seguradong padagos na ipinapamibi ni Ana si Samuel. Sa saiyang taonan na pagdalaw, daing duwa-duwa na pinaparigon nia an boot kaini na magdanay na maimbod sa pag-otob kan saiyang paglilingkod sa Dios.

Sa saro kan siring na okasyon, binendisyonan ni Eli an mga magurang ni Samuel asin nagsabi ki Elcana: “Magtao logod sa saindo si Jehova nin sarong aki hale sa agom na babaeng ini bilang karibay kan ipinasubli, na ipinasubli ki Jehova.” Kaoyon kan mga tataramon na idto, si Ana asin Elcana binendisyonan nin tolo pang aking lalaki asin duwang aking babae.—1 Samuel 2:20, 21.

Kanigoan karahay na halimbawa si Elcana asin Ana para sa Kristianong mga magurang! Dakol na ina asin ama an nagin andam na ipasubli an mga aking lalaki asin babae ki Jehova, sabi ngani, paagi sa pag-enkaminar sa sainda na pag-aaboton an sarong klase nin bilog na panahon na ministeryo na harayo sa harong. An siring na mamomoton na mga magurang maninigong tawan nin komendasyon huli sa mga sakripisyong ginigibo ninda. Asin babalosan sinda ni Jehova.

An Magayagayang Pamibi ni Ana

Kanigoan an nagin kaogmahan kan dating baog na si Ana! Bihirang irekord sa Kasuratan an mga pamibi na sinambit kan mga babae. Minsan siring, sa pangyayari ki Ana, mga duwa kaiyan an aram niato. Nasambit sa enot an saiyang mga sentimiento kan sia inuuyam asin pinapasakitan an boot, asin sa ikaduwa an magayagayang pamibi nin pagpasalamat. “An sakong puso naggagayagaya nin labi-labi ki Jehova,” an enot na sinabi ni Ana. Sia naggagayagaya na “dawa an baog nangaki,” asin inoomaw nia si Jehova bilang an ‘Nag-iitaas, Nagbabangon sa hamak hale sa kabokabo.’ Tunay nanggad, “hale sa aponan nin abo iiniitaas nia an dukha.”—1 Samuel 2:1-10.

An ipinasabong na pagkasaysay may koneksion ki Ana nagpapaheling na puede kitang makolgan kan mga pagkabakong sangkap o pang-uuyam nin iba. Pero, dai niato dapat na togotan an siring na mga pagbalo na halean kita nin kagayagayahan sa paglilingkod ki Jehova. Sia an dakulang Paradangog nin pamibi, na naghihimate sa mga pagsuriyaw kan saiyang maimbod na banwaan, na iliniligtas sinda sa makuring sakit asin tinatawan sinda nin abundang katoninongan asin iba pang mga bendisyon.—Salmo 22:23-26; 34:6-8; 65:2.

[Nota sa Ibaba]

[Ritrato sa pahina 17]

Ipinasubli ni Ana si Samuel ki Jehova