Mga Demonyo—Paano Niato Sinda Malalabanan?

“An mga anghel na dai nag-ingat kan saindang dating katongdan kundi nagbaya sa saindang sadiring tamang erokan itinagama [nin Dios] na may daing sagkod na mga gapos sa irarom nin mahibog na kadikloman para sa paghokom kan dakulang aldaw.”—JUDAS 6.

1, 2. Anong mga hapot an minabangon manongod ki Satanas na Diablo asin sa mga demonyo?

“MAGMATA kamo, magpuka kamo,” an patanid ni apostol Pedro. “An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.” (1 Pedro 5:8) May labot sa mga demonyo, si apostol Pablo nagsabi: “Habo ko na kamo makisumaro sa mga demonyo. Dai kamo puedeng uminom sa kopa ni Jehova asin sa kopa nin mga demonyo; dai kamo puedeng makikakan sa ‘lamesa ni Jehova’ asin sa lamesa nin mga demonyo.”—1 Corinto 10:20, 21.

² Pero, siisay si Satanas na Diablo asin an mga demonyo? Paano asin kasuarin sinda nag-eksister? Linalang daw sinda nin Dios? Gurano kamapuersa kan saindang impluwensia sa mga tawo? Ano an pandepensa niato, kun igwa man, tumang sa sainda?

Paano Nag-eksister si Satanas Asin an mga Demonyo?

3. Paano nagin Satanas na Diablo an sarong anghel nin Dios?

³ Sa kapinonan kan kasaysayan nin tawo, kan magpoon an katawohan sa hardin nin Eden, sarong anghel nin Dios an nagin rebelde. Taano? Huling dai sia naninigoan sa saiyang papel sa langitnon na areglo ni Jehova. Kan lalangon si Adan asin Eva, naheling nia an oportunidad na agawon an pagkuyog asin pagsamba ninda sa tunay na Dios. Paagi sa pagrebelde sa Dios asin sa pagsutsut sa enot na tawong mag-agom na magkasala, an anghel na ini ginibo an saiyang sadiri na Satanas na Diablo. Pag-abot nin panahon, an ibang anghel uminiba sa saiyang pagrebelde. Paano?—Genesis 3:1-6; Roma 5:12; Kapahayagan 12:9.

4. Ano an ginibo kan nagkapirang rebeldeng anghel bago an Baha kan panahon ni Noe?

⁴ An ipinasabong na Kasuratan nagsasabi sa sato na kaidtong bago an dakulang Baha kan panahon ni Noe, an nagkapirang anghel nagpoon na magkaigwa nin pambihirang interes sa mga babae sa daga. Para sa salang katuyohan, “an [langitnon na] mga aki kan tunay na Dios nagpoon na makamangno sa mga aking babae nin mga tawo, na sinda magagayon,” an sabi kan Biblia, “asin nagkua sinda nin mga agom na babae para sa saindang sadiri, arin na baga, an gabos nindang mapili.” An pagsasarong ini bakong natural,  asin nangaki sinda nin mestisong mga aki na inapod na Nefilim. (Genesis 6:2-4) Sa siring, an espiritung mga linalang na nakisuway sa Dios uminiba sa pagrebelde ni Satanas tumang ki Jehova.

5. Ano an nangyari sa mga rebelde kan ipaabot ni Jehova an paglaglag paagi sa dakulang Baha?

⁵ Kan ipaabot ni Jehova an baha sa katawohan, nagadan an mga Nefilim asin an mga tawong ina ninda. An rebeldeng mga anghel napiritan na hubadon an saindang hawak na tawo asin magbalik sa rona nin mga espiritu. Minsan siring, dai na sinda makakabalik sa “saindang dating katongdan” sa kaibanan nin Dios. Imbes, dinara sinda sa “mahibog na [espirituwal na] kadikloman,” na inaapod na Tartaro.—Judas 6; 2 Pedro 2:4.

6. Paano dinadaya kan mga demonyo an mga tawo?

⁶ Poon kan mawara kan marigsok na mga anghel an “saindang dating katongdan,” sinda nagin nang kairibang demonyo ni Satanas asin nagin parasuportar sa marompot niang mga gibo. Poon kaidto, mayo na nin kapangyarihan an mga demonyo na magmateryalisar sa hawak nin tawo. Minsan siring, puede nindang sutsutan an mga lalaki asin babae na gumibo nin manlaenlaen na porma nin salang paggamit sa sekso. An mga demonyo aktibo man na dinadaya an katawohan paagi sa espiritismo, na puedeng kalabot an mga bagay na arog kan orasyon sa mahika, vodu, asin patagolainan. (Deuteronomio 18:10-13; 2 Cronica 33:6) An kaaabtan kan marigsok na mga anghel kapareho kan sa Diablo—daing sagkod na pagkapara. (Mateo 25:41; Kapahayagan 20:10) Pero, mientras tanto, kaipuhan niatong marigon na manindogan asin labanan sinda. Madonong na estudyaran niato kun gurano kamakapangyarihan si Satanas asin kun paano niato mapangganang malalabanan sia asin an saiyang mga demonyo.

Gurano Kamakapangyarihan si Satanas?

7. May anong kapangyarihan si Satanas sa kinaban?

⁷ Pinakaraot ni Satanas si Jehova sa bilog na kasaysayan. (Talinhaga 27:11) Asin naimpluwensiahan nia an dakulang kabtang kan katawohan. “An bilog na kinaban namumugtak sa kapangyarihan kan saro na marigsok,” an sabi kan 1 Juan 5:19. Iyan an dahelan kaya puedeng tentaran kan Diablo si Jesus paagi sa pag-alok sa saiya kan autoridad asin kamurawayan kan “gabos na kahadean kan ineerokan na daga.” (Lucas 4:5-7) May labot ki Satanas, si apostol Pablo nagsabi: “Kun, ngonyan, an maogmang bareta na samong ipinapahayag sa katunayan natatahoban, iyan natatahoban sa mga mapapahamak, na dian sa sainda binuta kan dios kan sistemang ini nin mga bagay an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.” (2 Corinto 4:3, 4) Si Satanas “sarong putikon asin iyo an ama kan kaputikan” alagad pinapaluwas nia na sia sarong “anghel nin liwanag.” (Juan 8:44; 2 Corinto 11:14) Igwa sia kan kapangyarihan asin kan kinakaipuhan na mga paagi tanganing butahon an isip kan mga namomoon sa kinaban asin kan mga nasasakopan ninda. Paagi sa propaganda asin relihiosong mga osipon patin kaputikan, nadaya nia an katawohan.

8. Ano an ipinaparisa kan Biblia mapadapit sa impluwensia ni Satanas?

⁸ Risang-risa an kapangyarihan asin impluwensia ni Satanas kan panahon ni propeta Daniel, mga limang siglo bago an satong Komun na Kapanahonan. Kan si Jehova magsugo nin anghel tanganing magdara kan mensahe nin pagparigon sa boot ki Daniel, an anghel napaatubang sa pagtumang kan espiritung “prinsipe kan kahadean nin Persia.” An maimbod na anghel pinugolan sa laog nin 21 aldaw sagkod na mag-abot si “Miguel, saro sa pangenot na mga prinsipe,” tanganing tabangan sia. An iyo man sanang pagkasaysay nagtataram man manongod sa demonyo na “prinsipe nin Grecia.” (Daniel 10:12, 13, 20) Asin sa Kapahayagan 13:1, 2, ipinapamidbid si Satanas bilang an “dragon” na nagtao sa politikal na mabangis na hayop kan ‘kapangyarihan kaiyan asin kan trono kaiyan patin dakulang autoridad.’

9. Tumang kiisay nakikipaglaban an mga Kristiano?

⁹ Bakong makangangalas na si apostol Pablo nagsurat: “Kita nakikipaggumolan, bakong tumang sa dugo asin laman, kundi tumang sa mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa marigsok na mga puersang espiritu sa langitnon na mga lugar.” (Efeso 6:12) Dawa ngonyan, dai naheheling an mga puersa nin mga demonyo na nasa irarom kan kontrol  ni Satanas na Diablo, na nan-iimpluwensia sa namamahalang mga tawo asin sa katawohan sa pangkagabsan, na nagtutulod sa sainda na gumibo nin dai ikaladawan na paglaglag sa sarong rasa, terorismo, asin paggadan. Siyasaton niato ngonyan kun paano niato mapangganang malalabanan an makapangyarihan na mga puersang espiritung ini.

Ano an Pandepensa Niato?

10, 11. Paano niato malalabanan si Satanas asin an saiyang marigsok na mga anghel?

¹⁰ Dai niato malalabanan si Satanas asin an saiyang marigsok na mga anghel sa sadiring kosog sana niato, baga man sa pisikal o sa mental. Si Pablo may hatol sa sato: “Padagos kamong magkaigwa nin puersa sa Kagurangnan asin sa kapangyarihan kan saiyang kosog.” Kaipuhan niatong dumolok sa Dios para sa proteksion. Idinugang ni Pablo: “Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana kan Diablo . . . Gamita nindo an bilog na pangalasag hale sa Dios, tanganing makapanumang kamo sa marigsok na aldaw asin, pakagiboha nindo nin lubos kan gabos na bagay, marigon na makapanindogan.”—Efeso 6:10, 11, 13.

¹¹ Duwang beses na sinadol ni Pablo an mga kapwa nia Kristiano na isulog “an bilog na pangalasag hale sa Dios.” An terminong “bilog” nagpaparisa na an pagigin paramas sana bakong igo tanganing malabanan an mga pag-atake nin mga demonyo. Kaya, ano an mahalagang marhay na mga kabtang kan espirituwal na pangalasag na kinakaipuhan na marhay kan mga Kristiano ngonyan tanganing malabanan an mga demonyo?

“Manindogan Kamo nin Marigon”—Paano?

12. Paano ikakahagkos nin mga Kristiano sa saindang habayan an katotoohan?

¹² Si Pablo nagpaliwanag: “Kun siring, marigon kamong manindogan, na an saindong habayan nahahagkosan nin katotoohan, asin sulot an takop sa daghan na katanosan.” (Efeso 6:14) An duwang pangalasag na nasambitan digdi nanonongod sa hagkos asin takop sa daghan. Kaipuhan na papagdanayon nin sarong soldados na higot an saiyang hagkos tanganing maprotehiran an saiyang habayan (piad, singit, asin ibabang parte kan tulak) asin tanganing makaya an gabat kan saiyang espada. Kaagid kaiyan, an katotoohan sa Biblia kaipuhan na higot na nakahagkos sa sato, sabi ngani, tanganing makapamuhay kita kaoyon kaiyan. Igwa daw kita nin iskedyul sa aroaldaw na pagbasa sa Biblia? Kalabot daw an bilog na pamilya? Igwa daw kita nin rutina na pag-olayan an teksto kan aldaw bilang sarong pamilya? Dugang pa, nakakasabay daw kita sa mga paliwanag sa mga publikasyon na itinatao kan “maimbod asin mapagmansay na oripon”? (Mateo 24:45) Kun iyo, pinagmamaigotan niatong iaplikar an hatol ni Pablo. Igwa man kita nin mga video asin DVD na makakapagtao nin sono sa Kasuratan na paggiya. An higot na pangangapot sa katotoohan makakatabang sa sato na gumibo nin madonong na mga desisyon asin makakaprotehir sa sato na dai maglakaw sa salang dalan.

13. Paano niato mapoprotehiran an satong piguratibong puso?

¹³ An literal na takop sa daghan nagpoprotehir sa daghan, puso, asin iba pang mahalagang marhay na mga organo kan soldados. Mapoprotehiran nin Kristiano an saiyang piguratibong puso—an klase nin pagkatawo nia sa laog—paagi sa pagkultibar nin pagkamoot para sa katanosan nin Dios asin paagi sa pagsunod sa matanos na mga pamantayan ni Jehova. An piguratibong takop sa daghan nagpoprotehir sa sato na dai pagpaluyahon an puersa kan Tataramon nin Dios. Mientras na ‘ikinakaongis niato an maraot, asin namomotan an marahay,’  pinupugolan niato an satong mga bitis “sa gabos na maraot na dana.”—Amos 5:15; Salmo 119:101.

14. Ano an kahulogan kan ‘pagsapin sa satong mga bitis kan kasangkapan kan maogmang bareta nin katoninongan’?

¹⁴ An mga bitis kan mga soldados na Romano parateng nasasapinan na marhay para sa halawig na mga pagmartsa nin ginatos na kilometro sa mga tinampo nin Roma na nagsasarangasanga sa bilog na imperyo. Ano an kahulogan para sa mga Kristiano kan ekspresyon na mga ‘bitis na nasasapinan kan kasangkapan kan maogmang bareta nin katoninongan’? (Efeso 6:15) Iyan nangangahulogan na preparado kita na humiro. Andam kitang isabi an maogmang bareta kan Kahadean nin Dios sa lambang angay na okasyon. (Roma 10:13-15) An pagigin aktibo niato sa Kristianong ministeryo sarong proteksion tumang sa mga “pakana,” o “mga katusohan” ni Satanas.—Efeso 6:11; nota sa ibaba.

15. (a) Ano an nagpapaheling na mahalagang marhay an dakulang kalasag nin pagtubod? (b) Anong mga “naglalaad na busog” an puedeng magkaigwa nin nakakadanyar na epekto sa satong pagtubod?

¹⁵ “Orog sa gabos,” an pagpadagos ni Pablo, “gamiton an dakulang kalasag nin pagtubod, na huli kaiyan masisigbo nindo an gabos na naglalaad na busog kan marigsok.” (Efeso 6:16) An sadol na gamiton an dakulang kalasag nin pagtubod iinintrodusir paagi sa ekspresyon na “orog sa gabos,” na nagpaparisa na an kabtang na ini kan pangalasag mahalagang marhay. Dapat na dai magkulang an satong pagtubod. Siring sa dakulang nagpoprotehir na kalasag, pinoprotehiran kita kan satong pagtubod sa mga “naglalaad na busog” ni Satanas. Ano an tibaad irinerepresentar kaini ngonyan? Iyan puedeng makolog na pan-iinsulto, kaputikan, mga tataramon na bakong gabos totoo na ipinapalakop kan mga kaiwal asin apostata sa pagprobar na paluyahon an satong pagtubod. An mga “busog” na ini puede man na mga sugot na magin  materyalistiko, na nagpapangyari sa sato na magin sibot sa pagbakal nin dakol na bagay asin pagtentar pa ngani sa sato na makikompetensia sa mga nahulog sa mapagpasikat na estilo nin pamumuhay. Tibaad ginamit ninda an saindang kuarta sa mas dakula asin mas magayon na mga harong asin lunadan o ipinaghahambog an saindang mamahalon na alahas asin an pinakabagong mga moda nin gubing. Ano man an ginigibo nin iba, dapat na igwa kita nin pagtubod na may igong kosog tanganing pasikoon an mga “naglalaad na busog” na ini. Paano niato mapapatalubo asin mapagdadanay an makosog na pagtubod?—1 Pedro 3:3-5; 1 Juan 2:15-17.

16. Ano an makakatabang sa sato na makapatalubo nin makosog na pagtubod?

¹⁶ Makakarani kita sa Dios paagi sa regular na personal na pag-adal kan Biblia asin paagi sa odok na pamimibi. Puede kitang magngayongayo ki Jehova para sa makosog na pagtubod dangan suportaran an satong mga pamibi kan kinakaipuhan na mga gibo. Halimbawa, kita daw maingat na nag-aandam para sa semanal na Pag-adal sa Torrengbantayan sa katuyohan na makapagpartisipar? Magigin makosog an satong pagtubod kun pag-aadalan niato an Biblia asin an mga publikasyon na basado sa Biblia.—Hebreo 10:38, 39; 11:6.

17. Paano niato ‘maaako an takop sa payo na kaligtasan’?

¹⁷ Tinapos ni Pablo an saiyang deskripsion kan espirituwal na pangalasag paagi sa hatol na: “Akoa nindo an takop sa payo na kaligtasan, asin an espada kan espiritu, arin na baga, an tataramon nin Dios.” (Efeso 6:17) An takop sa payo nagpoprotehir sa payo asin hotok kan soldados, an sentro nin paggibo nin desisyon. Kaagid kaiyan, an satong Kristianong paglaom nagpoprotehir sa satong mga pag-isip. (1 Tesalonica 5:8) Imbes na panoon an satong isip nin kinabanon na mga pasohan asin materyalistikong mga kamawotan, maninigong ipokus niato an satong kaisipan sa satong paglaom na tao nin Dios, siring kan ginibo ni Jesus.—Hebreo 12:2.

18. Taano ta dai niato maninigong pabayaan an satong programa nin regular na pagbasa sa Biblia?

¹⁸ An satong pangultimong proteksion tumang sa impluwensia ni Satanas asin kan mga demonyo nia iyo an tataramon, o mensahe nin Dios, na nakarekord sa Biblia. Saro pa ining dahelan kun taano ta dai niato maninigong pabayaan an satong programa nin regular na pagbasa sa Biblia. An lubos na kaaraman sa Tataramon nin Dios nagpoprotehir sa sato sa mga kaputikan ni Satanas asin propaganda nin mga demonyo saka sa may kapaitan nin boot na mga sinasabi nin mga apostata.

“Padagos Kamong Mamibi sa Gabos na Panahon”

19, 20. (a) Ano an naghahalat ki Satanas asin sa saiyang mga demonyo? (b) Ano an makakapakosog sa sato sa espirituwal?

¹⁹ Harani na an pagpara ki Satanas, sa saiyang mga demonyo, asin sa marigsok na kinaban. Aram ni Satanas na “halipot na sana an saiyang panahon.” Grabe an saiyang kaanggotan asin nakikiguerra sia sa mga “nagkukuyog sa mga togon nin Dios asin igwa kan gibohon na pagpatotoo ki Jesus.” (Kapahayagan 12:12, 17) Mahalagang marhay na labanan niato si Satanas asin an saiyang mga demonyo.

²⁰ Makakapagpasalamat nanggad kita para sa konseho na isulog an bilog na pangalasag hale sa Dios! Tinatapos ni Pablo an saiyang pagtokar sa espirituwal na pangalasag paagi sa hatol na ini: “Kaiba an gabos na porma nin pamibi asin pagngayongayo padagos kamong mamibi sa gabos na panahon sa espiritu. Asin sa katuyohan na iyan danay na magpuka sa bilog na panahon asin may pagngayongayo para sa gabos na banal.” (Efeso 6:18) An pamibi makakapakosog sa sato sa espirituwal asin makakatabang sa sato na magdanay na listo. Isapuso niato an mga tataramon ni Pablo asin padagos na mamibi, huling makakatabang ini sa sato na labanan si Satanas asin an saiyang mga demonyo.

Ano an Nanodan Nindo?

• Paano nag-eksister si Satanas asin an saiyang mga demonyo?

• Gurano kamakapangyarihan an Diablo?

• Ano an pandepensa niato tumang ki Satanas asin sa saiyang mga demonyo?

• Paano niato ikakasulog an bilog na pangalasag hale sa Dios?

[Mga Hapot Para sa Pag-adal]

[Mga Ritrato sa pahina 26]

“An mga aki kan tunay na Dios nagpoon na makamangno sa mga aking babae nin mga tawo”

[Ritrato sa pahina 28]

Mangangaranan daw nindo an anom na sangkap kan satong espirituwal na pangalasag?

[Mga Ritrato sa pahina 29]

Paanong an pakikikabtang sa mga aktibidad na ini sarong pandepensa tumang ki Satanas asin sa saiyang mga demonyo?