Uya! Makangangalas an Liwanag!

KUN naeksperyensiahan na nindong magkapkap sa kadikloman, aram nindo kun gurano kanakakapanluya sa boot iyan. Kanigoan na kaginhawahan an itinatao nin liwanag! Tibaad nakaeksperyensia na man kamo nin sarong situwasyon na ikakakomparar sa kadikloman. Tibaad nangyari ini kan garo baga dai nindo maheling an dalan paluwas sa sarong problema. Dangan luway-luway, nakaheling kamo nin liwanag—igwa nin solusyon. An pagluwas hale sa siring na kadikloman pasiring sa liwanag sarong makangangalas na eksperyensia.

Kan enot na siglo, an mga tawo sa pangkagabsan yaon sa espirituwal na kadikloman. Pinanonongdan idtong mga nagbaya kan saindang nakaaging mga paniniwala asin nag-ako kan Kristianismo, si apostol Pedro nagsurat: ‘Inapod kamo nin Dios hale sa kadikloman pasiring sa saiyang makangangalas na liwanag.’ (1 Pedro 2:9) Para sa sainda, ini siring sa pagbabago gikan sa pagigin nasa lubos na kadikloman pasiring sa liwanag. Puede man iyan na ikakomparar sa pagigin solo-solo na mayong paglaom dangan pagigin miembro nin sarong pamilyang may seguradong ngapit.—Efeso 2:1, 12.

“Binayaan Mo an Saimong Pagkamoot kan Enot”

Nanompongan kan enot na mga Kristiano an “katotoohan”—an tunay na Kristianong pagtubod. (Juan 18:37) Saindang naheling an makangangalas na liwanag nin katotoohan asin guminibo sinda nin pagbabago hale sa espirituwal na kadikloman pasiring sa liwanag. Minsan siring, sa pag-agi nin panahon, luminipot an enot na entusiasmo asin kaigotan nin nagkapirang Kristiano. Halimbawa, sa katapusan kan enot na siglo, nagkaigwa nin sarong seryosong problema sa kongregasyon sa Efeso. Sinabi kan binuhay liwat na si Jesu-Cristo kun ano an problema: “Igwa ako nin laban saimo, na binayaan mo an saimong pagkamoot kan enot. Kun siring, girumdoma kun hale saen ka nahulog, asin magsolsol ka asin giboha an mga gibo kan enot.” (Kapahayagan 2:4, 5) Kinaipuhan na palaadon liwat kan mga Kristiano sa Efeso an saindang pagkamoot sa Dios asin sa katotoohan.

Kumusta man kita? Naeksperyensiahan man niato an kagayagayahan nin pagkaheling sa liwanag, nin pagkaaram kan makangangalas na katotoohan kan Tataramon nin Dios. Namotan niato an katotoohan. Alagad an mga kadepisilan na ordinaryo sa katawohan puedeng magpaluya kan satong pagkamoot sa katotoohan. Tibaad nakadagdag pa digdi an mga problemang luminataw partikularmente sa “mga huring aldaw.” Nabubuhay kita sa sarong kinaban na yaon sa “delikadong mga panahon na masakit pakibagayan”—sarong kinaban na iniistaran nin mga tawong “mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, mga paralanghad, mga masumbikal sa mga magurang, mga daing utang na boot, mga bakong maimbod.” (2 Timoteo 3:1, 2) An saindang impluwensia puedeng magpaluya kan satong kaigotan asin magin dahelan na lumipot an satong pagkamoot ki Jehova.

Kun nawara niato an satong pagkamoot kan enot, kaipuhan niatong ‘girumdomon kun hale saen kita nahulog asin magsolsol.’ Kaipuhan kitang bumalik sa dati niatong kamugtakan sa espirituwal. Dugang pa, dapat kitang mag-ingat na dai pagtogotan na magluya an satong pag-apresyar sa katotoohan. Abaa kahalaga na papagdanayon niato gabos an positibo asin masinggayang punto de vista patin ingatan na buhay an satong pagkamoot sa Dios asin sa saiyang katotoohan!

‘An Katotoohan na Nagpapatalingkas sa Sato’

Makangangalas an liwanag kan sono sa Kasuratan na katotoohan huli ta sinisimbag kan Biblia an importanteng  mga hapot na rinibong taon nang nakakaribaraw sa katawohan. Kabilang sa mga hapot na iyan an mga ini: Taano ta yaon kita digdi? Ano an katuyohan nin buhay? Taano ta nag-eeksister an karompotan? Igwa daw nin buhay pagkagadan? Tinawan kita ni Jehova nin kaliwanagan paagi sa makangangalas na doktrinal na mga katotoohan. Bako daw na maninigo kitang magpasalamat nin odok sa boot? Nungka logod niatong bali-walaon an satong nanodan!

Sinabihan ni Jesus an saiyang mga disipulo: “Mamimidbid nindo an katotoohan, asin an katotoohan mapatalingkas sa saindo.” (Juan 8:32) Pinagin posible kan atang na pantubos ni Jesus an katalingkasan sa kasalan asin kagadanan. Alagad an mahalagang marhay na mga katotoohan na ini nagpatalingkas man sa sato gikan sa pagkadaing aram asin kadaihan nin kasegurohan sa sarong kinaban na natatakopan nin kadikloman. An may pag-apresyar na paghorophorop kan satong nanodan matabang sa sato na pakosogon an satong pagkamoot ki Jehova asin sa saiyang Tataramon.

Nagsurat si apostol Pablo sa mga Kristiano sa Tesalonica: “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa tataramon nin tawo, kundi, siring sa iyo man nanggad, siring sa tataramon nin Dios, na naghihiro man sa saindo na nagtuturubod.” (1 Tesalonica 2:13) Dinangog kan mga taga Tesalonica asin ‘inako an tataramon nin Dios na igwa nin kagayagayahan.’ Mayo na sinda “sa kadikloman.” Imbes, sinda nagin “mga aki nin liwanag.” (1 Tesalonica 1:4-7; 5:4, 5) Nanodan kan mga Kristianong idto na si Jehova an Kaglalang asin na sia makakamhan sa gabos, madonong, mamomoton, asin maheherakon. Arog kan ibang mga parasunod ni Cristo, nanodan man ninda na naggibo si Jehova nin probisyon para sa pagpara kan saindang mga kasalan paagi sa atang na pantubos kan saiyang Aki, si Jesu-Cristo.—Gibo 3:19-21.

Minsan ngani bako pa man kompleto an kaaraman kan mga taga Tesalonica manongod sa katotoohan, aram ninda kun saen hahanapon an kaaraman. Paagi sa ipinasabong na Kasuratan, an tawo nin Dios puedeng magin “lubos na may kakayahan, biyong nasangkapan para sa gabos na marahay na gibo.” (2 Timoteo 3:16, 17) Makakapagpadagos sa pag-adal an mga Kristiano sa Tesalonica, na paorootrong naeeksperyensiahan na tunay nanggad na makangangalas an liwanag gikan sa Dios. Igwa sinda nin dahelan tanganing maggayagaya sa gabos na panahon. (1 Tesalonica 5:16) Asin iyo man kita.

Liwanag sa Satong Dalan

Sinasabi an sarong dahelan kun taano ta makangangalas an liwanag, an salmista nag-awit: “An saimong tataramon ilawan sa sakong bitis, asin liwanag sa sakong dalan.” (Salmo 119:105) An paggiya nin Dios na inaako niato gikan sa Saiyang Tataramon makakatabang sa sato na magkaigwa nin tamang direksion asin nin makahulogan na buhay. Dai niato kaipuhan na magin siring sa sarong barko na inaanod nin mga alon. An pakaaram asin pag-aplikar kan katotoohan nagpoprotehir sa sato na dai ‘ianod nin mga alon asin ipadpad nin lambang doros nin katokdoan.’—Efeso 4:14.

“Dai ka magtiwala sa mga noble, ni sa aki nin daganon na tawo, na sainda mayo nin kaligtasan,” an sabi kan Biblia. Sinasabi man kaiyan: “Maogma idtong an saiyang paratabang iyo an Dios ni Jacob, na an paglaom yaon ki Jehova na saiyang Dios.” (Salmo 146:3, 5) Dugang pa, an pagsarig ki Jehova nakakatabang sato na mapangganahan an takot asin kahaditan. Nagsurat si apostol Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Tunay nanggad na makikinabang kita sa pagigin ginigiyahan kan liwanag kan Tataramon nin Dios.

 Lumiwanag Siring sa mga Ilaw sa Kinaban

Pero an saro pang dahelan kun taano ta makangangalas an liwanag gikan sa Tataramon nin Dios iyo na binubukasan kaiyan an pinto pasiring sa pinakahalangkaw na asignasyon na puedeng akoon nin mga tawo. Pinagbotan ni Jesus an saiyang mga parasunod: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako kaiba nindo sa gabos na aldaw sagkod sa pagtatapos kan sistema nin mga bagay.” Iinintrodusir nia an pagboot sa pagsabing: “An gabos na autoridad sa langit asin sa daga itinao na sa sako.”—Mateo 28:18-20.

Estudyare kun siisay an nagtatabang sa tunay na mga Kristiano sa gibohon na paghuhulit kan maogmang bareta asin pagtotokdo kan mga katotoohan sa Biblia sa mga tawo kan gabos na nasyon. Nanuga si Jesus sa saiyang mga parasunod na sia makakaibanan ninda. Tunay nanggad na saiyang tinatabangan asin sinusuportaran sinda sa saindang ministeryo mientras na saindang ‘pinapasirang an saindang liwanag’ sa paaging iyan asin paagi sa iba pang “marahay na mga gibo.” (Mateo 5:14-16) Imbuelto man an mga anghel sa gibohon na ini na pag-ebanghelyo. (Kapahayagan 14:6) Asin kumusta man si Jehova Dios? Nagsurat si apostol Pablo: “Ako an nagtanom, si Apolos an nagbaribi, alagad an Dios iyo an padagos na nagpapatubo kaiyan.” Kanigoan nanggad na pribilehio an magin kabilang sa “mga kapwa trabahador nin Dios”!—1 Corinto 3:6, 9.

Isipon man nindo kun paano binebendisyonan an satong mga paghihingoa sa inasignar nin Dios na gibohon na ini. Mayo nin ikakakomparar sa satong tao nin Dios na pribilehio na ‘magliwanag siring sa mga ilaw sa kinaban.’ Paagi sa pagpabanaag kan liwanag gikan sa Tataramon nin Dios sa satong pananaram asin gawe-gawe, makakatao kita nin tunay na tabang sa mga indibiduwal na sadiosan an puso. (Filipos 2:15) Asin makakapaggayagaya kita mientras na kita maigot na naghuhulit asin nagtotokdo, ‘huli ta an Dios bakong biko na malingawan an satong ginibo asin an pagkamoot na satong ipinaheling para sa saiyang ngaran.’—Hebreo 6:10.

‘Bumakal Ka nin Panlahid sa Mata na Ilalahid sa Saimong mga Mata’

Sa sarong mensahe para sa enot na siglong kongregasyon sa Laodicea, nagsabi si Jesus: ‘Bumakal ka sa sako nin panlahid sa mata na ilalahid sa saimong mga mata tanganing makaheling ka. An gabos na padangat ko sinasagwe ko asin dinidisiplina.’ (Kapahayagan 3:18, 19) An seguradong panremedyo sa espirituwal na pagkabuta iyo an “panlahid sa mata”—an mga katokdoan asin disiplina ni Jesus. Kun gusto niatong mapagdanay an makosog sa espirituwal na punto de vista, dapat niatong akoon an saiyang hatol asin magpasakop dian asin siring man sa paggiya na yaon sa bilog na Biblia. Maninigo man niatong akoon an nasa isip na aktitud na arog kan ki Cristo asin arogon an saiyang halimbawa. (Filipos 2:5; 1 Pedro 2:21) An panlahid sa mata bakong mayong bayad. Sinabi ni Jesus: ‘Bumakal ka kaiyan sa sako.’ Kaiba sa bayad an satong panahon asin paghihingoa.

Kun kita minahale sa madiklom na lugar asin minalaog sa sarong may ilaw na kuarto, tibaad kaipuhan nin panahon bago makaadaptar an satong mga mata. Kaagid kaiyan, kaipuhan an panahon tanganing pag-adalan an Tataramon nin Dios asin maheling an liwanag kan katotoohan. Kaipuhan an panahon tanganing makapaghorophorop sa satong nanonodan asin mapensar kun gurano kahalagang marhay kan katotoohan. Pero bako man na dakulaon an sakripisyong kaipuhan. Taano? Huli ta makangangalas an liwanag!

[Ritrato sa pahina 14]

‘Bumakal ka sa sako nin panlahid sa mata na ilalahid sa saimong mga mata tanganing makaheling ka’