Estorya nin Buhay

An Paggibo nin Disipulo Nakaimpluwensia sa Sakong Buhay

Isinaysay ni Lynette Peters

Sinda nagdatong tanganing eebakwit kami. Sarong asentado sa pagbadil an nakaposisyon sa atop kan edipisyo. An mga marino nakadapa sa mga doot asin andam na gamiton an mga badil. Mantang kami naghihidali pasiring sa naghahalat na helikopter kan Domingong agang idto, pinirit ko asin kan kapwa ko mga misyonero na magdanay na kalmado. Tolos-tolos, nakalayog kami. Pakalihis nin sampulong minuto, kami ligtas na nakalunad sa sarong barkong panmilitar, na nakaangkla harani sa baybayon.

KAN suminunod na aga, naaraman niamo na binomba kan mga rebelde an hotel na pinailihan niamo kan nakaaging banggi. An mga taon nin kariribokan sibil sa Sierra Leone sa katapustapusi gruminabe sagkod na magin sarong lubos na guerra. An gabos na dayohan, kairiba na kami, pinuersa na humale sa nasyon paagi sa haros biriglaan na notisya. Tanganing ipaliwanag kun taano ta ako namugtak sa situwasyon na iyan, togotan nindo akong ponan an estorya sa kapinonan.

Nagdakula ako sa British Guiana, na inapod na Guyana poon kan 1966. An enot na mga taon kan sakong buhay duman kan dekada nin 1950 mayo nin pinaghahaditan asin maogma. An kadaklan na magurang halangkaw an pagpahalaga sa edukasyon, asin an mga hoben inaasahan na papakarhayon an saindang pag-eskuela. Nagigirumdoman ko kaidto na sarong klerk sa bangko an naghapot sa sakong ama: “Taano ta nagbabayad ka nin halangkawon na matrikula para sa edukasyon kan saimong mga aki?” Si Tatay nagsimbag: “Solamenteng an pinakamarahay na edukasyon na posible an magarantiya kan saindang pag-asenso.” Kan panahon na idto, inisip nia na an pinakamarahay na edukasyon makukua sa prestihiosong mga eskuelahan. Dai mahaloy, magigin laen an saiyang pagmansay.

 Kan ako 11 anyos, an sakong ina nagpoon na makipag-adal sa Biblia sa mga Saksi ni Jehova. Nagbisita sia sa sarong Kingdom Hall kaiba an sarong kataed. An nadangog ninda kan bangging idto nakakombensir sa saindang duwa na nanompongan na ninda an katotoohan. Pagkatapos, sinambit kan sakong ina sa saro pang kataed kun ano an tinokar. Dai nahaloy sindang tolo nakikipag-adal na sa mga misyonerang si Daphne Harry (kan huri nagin Baird) asin si Rose Cuffie. Mayo pang sarong taon, nabautismuhan si Nanay asin an duwa niang kaamiga. Limang taon pakalihis kaiyan, huminale an sakong ama sa Iglesia kan mga Sabadista asin nabautismohan bilang saro sa Mga Saksi ni Jehova.

Bilang mga hoben, an duwa sa sakong mga tugang na babae asin ako—an tolong pinakamatua sa sampulong aki—guminamit nin dakol na maogmang oras sa erokan nin mga misyonero na inistaran ni Daphne asin Rose. Sa mga okasyon na iyan naghinanyog kami sa mga eksperyensia sa paglilingkod sa langtad na saindang iinestorya. An mga misyonerang ini nagpabanaag nin kagayagayahan sa daing kapagalan na pag-asikaso sa espirituwal na kapakanan nin iba. An saindang halimbawa an nagtadom sa sako kan kamawotan na magin misyonera.

Pero, ano an nakatabang sa sako na magdanay na nakapokus sa bilog na panahon na ministeryo sa tahaw nin mga paryente asin kaeskuela na gabos interesadong marhay sa pagpaoswag nin karera? Dakolon nin nakakaakit na oportunidad—puede akong mag-adal nin abogasiya, musika, medisina, o iba pa. An marahayon na halimbawa kan sakong mga magurang nagtao sa sako kan kaipuhan na paggiya. Iinaplikar ninda sa saindang buhay an katotoohan, mahigos na nag-adal kan Biblia, asin idinusay an saindang sadiri sa pagtabang sa iba na makanood manongod ki Jehova. * Dugang pa, regular sindang nag-iimbitar nin bilog na panahon na mga ministro sa samong harong. An kagayagayahan asin satispaksion na ipinaheling kan mga tugang na ini nagpakosog kan sakong pagmawot na togotan an paggibo nin disipulo na makaimpluwensia sa sakong buhay.

Nabautismohan ako sa edad na 15 anyos. Dangan pagkatapos ko tolos nin haiskul, nagpoon akong magpayunir. Si Phiomena, na nagtatrabaho sa sarong ospital, an enot kong natabangan na umoswag pasiring sa pagdusay asin bautismo. An kagayagayahan na maheling siang namoot ki Jehova nagpakosog kan sakong kamawotan na magpadagos sa bilog na panahon na ministeryo. Dai nahaloy pagkatapos kaiyan, inalok ako nin mas marahay na trabaho sa serbisyo sa gobyerno kun saen nagtatrabaho ako bilang sekretarya. Nagsayuma ako, imbes pinili kong magpadagos sa pagpapayunir.

Nag-iistar pa ako kaidto sa harong niamo, asin padagos kaming binibisita nin mga misyonero. Abaang ogma ko sa paghinanyog sa saindang mga eksperyensia! An gabos na ini nagpakosog kan sakong kamawotan na magin misyonera, dawa ngani garo sadit an posibilidad kaiyan. Nagpapadara pa kaidto asin ngonyan nin mga misyonero sa Guyana. Sarong aldaw kan 1969, nabigla ako alagad naogma na maresibi an imbitasyon na umatender sa  Paadalan sa Biblia kan Watchtower sa Gilead duman sa Brooklyn, Nueva York.

Sarong Asignasyon na Dai Ko Linaoman

Igwa nin 54 estudyante hale sa 21 nasyon sa ika-48 klase sa Gilead. Desisiete sa samo an daraga. Minsan ngani 37 taon na an nakaagi, igwa pa ako nin malinaw na rekuerdo kan limang bulan na idto. Kadakol kan manonodan, bako sanang mga katotoohan sono sa Kasuratan kundi patin praktikal na mga suhestion asin konseho para sa buhay bilang mga misyonero sa ngapit. Halimbawa, nakanood akong sumunod sa instruksion, magin timbang dapit sa mga uso sa moda, asin magmaigot sa ibong nin bakong paborableng mga kamugtakan.

Pirmeng idinoon kan sakong mga magurang an regular na pag-atender sa pagtiripon. An siisay man na dai makaatender sa pagtiripon kun Domingo huli sa helang dai puedeng bigla na sanang magrahay tanganing makaatender sa sarong piano recital o konsierto sa kasunod na banggi. Minsan siring, sa halipot na panahon durante kan Paadalan nin Gilead, dai ko naatenderan an mga pagtiripon. Sarong banggi nin Biernes, prinobaran kong ipangatanosan an sakong pagpalta ki Don asin Dolores Adams, mag-agom na Bethelite na nagpapasakay sa sako sa saindang auto pasiring sa mga pagtiripon. Ay, kadakol kan leksion na pag-aadalan asin report na aandamon! Paano ako makakaatender sa Teokratikong Paadalan sa Pagmiministro asin sa Pagtiripon sa Paglilingkod? Pagkatapos na mangatanosan sa sako nin halipot, sinabi ni Tugang na Adams: “Pagiya ka sa saimong konsensia.” Inako ko an sadol nia asin dai na ako nagpalta sa pagtiripon kan bangging idto o sa arin man na mga bangging nagsurunod. Sa nag-aging mga taon, dai ko tinogotan an ano man na makaolang sa sako sa pag-atender sa Kristianong mga pagtiripon, apuera kun nasa grabe kasakit na mga kamugtakan.

Kan nasa mga kabangaan na an klase, nagkaigwa nin orolay-olay manongod sa mareresibi niamong mga asignasyon. Sa sadiri ko, pirme kong inisip na idedestino liwat ako sa Guyana kun saen kaipuhan na marhay an tabang sa gibohon na paghuhulit. Imahinara an sakong pagkabigla na maaraman na dai ako mabuelta duman. Imbes, idinestino ako sa Sierra Leone, Solnopan na Aprika. Abaang pasasalamat ko ki Jehova na sa katapustapusi naotob an sakong kamawotan na magin misyonera na harayo sa sadiring lugar!

Kadakol kan Manonodan

“Magayon” an pinakamarahay na tataramon tanganing ikapahayag an sakong enot na impresyon kan Sierra Leone, kaibahan na an dakol na bulod asin kabukidan, dagat asin baybayon kaiyan. Pero, an tunay na gayon kan nasyon na ini sa Solnopan na Aprika manonompongan sa mga habitante kaiyan, na dawa an mga dayohan nagigin pamugtak an boot huli sa saindang pagkamoot asin kabootan. Dakula an ikinatabang kaini sa bagong mga misyonero na mapangganahan an kapungawan. Gustohon kan mga taga Sierra Leone na makipag-olay manongod sa saindang mga kostumbre asin kultura asin partikularmente na matabangan an mga bagong abot na magin mahusay sa Krio, an komun na lenguahe kan nasyon.

An mga tawong nagtataram nin Krio igwa nin dakol na malinaw na talinhaga. Halimbawa, Kabalang an nagtatrabaho, gorilya an nagkakakan, na an boot sabihon, bako pirmeng an paratanom an nag-aani. Abaa kaangay na ilinaladawan kaiyan an inhustisyang lakop na marhay sa kinaban!—Isaias 65:22.

An paghuhulit asin paggibo nin disipulo padagos na nakakaogmang marhay. Bihirang makanompong nin sarong tawo na bakong interesado sa Biblia. Sa laog nin dakol na taon, natabangan kan mga  misyonero asin haloy nang mga lingkod an mga tawo—hoben asin gurang—gikan sa gabos na klase nin pamumuhay asin tribo na akoon an katotoohan.

Si Erla St. Hill, an enot kong kapartner na misyonera, sarong mayong kapagalan na trabahador. An saiyang kahigosan sa pag-asikaso sa saiyang mga obligasyon sa erokan nin mga misyonero panduwa sana sa saiyang kaigotan sa ministeryo. Tinabangan nia akong masabotan an kahalagahan nin dakol na bagay, arog baga nin pakimidbidan sa kataraed, pagsongko sa may helang na mga Saksi asin interesado, asin pagsuportar sa mga areglo sa lobong kun posible. Idinoon man nia sa sako an importansia kan nungkang paghale sa teritoryo pagkatapos kan paglilingkod sa langtad na dai minahapit, gurano man kahalipot, tanganing kumustahon an mga tugang na nag-iistar duman. Sa paggibo kan mga bagay na ini, madali akong nagkaigwa nin mga ina, tugang na lalaki, tugang na babae, asin katood, asin an destino ko nagin siring sa sadiri kong lugar.—Marcos 10:29, 30.

Nakapatalubo man ako nin makosog na pagkakatood sa marahayon na mga misyonero na naglingkod kaiba ko. Kabilang sa sainda an sakong kakuarto na si Adna Byrd, na naglingkod sa Sierra Leone sa pag-oltanan kan 1978 asin 1981, asin si Cheryl Ferguson, na sakong kakuarto sa nakaaging 24 taon.

An Guerra Sibil Nagbunga nin mga Pagbalo

Kan 1997, mga sarong bulan pakalihis kan dedikasyon kan bagong mga pasilidad sa sangang opisina sa Sierra Leone, napiritan kaming humale sa nasyon huli sa guerra, siring kan nasambitan sa enotan. Anom na taon bago kaiyan, hinangaan niamo an pagtubod kan mga Saksing taga Liberia na duminulag pasiring sa Sierra Leone tanganing makalikay sa guerra sa Liberia. An nagkapira uminabot na mayo nin ano man na dara. Sa ibong kan depisil na situwasyon, nakikabtang sinda sa ministeryo kada aldaw. Nakakapukaw na marhay sa boot na maheling an saindang pagkamoot ki Jehova asin sa mga tawo.

Ngonyan na kami mismo nagin mga dulag sa nasyon nin Guinea, inarog niamo an halimbawa kan mga tugang na taga Liberia asin nagpadagos na magtiwala ki Jehova asin enoton an intereses kan Kahadean. Pakalihis nin sarong taon, nakabalik kami sa Sierra Leone, alagad bago matapos an pitong bulan, puminutok an ralaban asin kinaipuhan niamo giraray na mag-ebakwit pasiring sa Guinea.

Dai nahaloy sinabihan kami na may mga miembro nin saro sa nagraralaban na mga paksion na nag-iristar sa samong erokan nin mga misyonero sa Kissy asin na an gabos niamong rogaring hinarabon o rinaraot. Imbes na panluyahan nin boot, nagpasalamat na sana kami na buhay kami. Pipira  sana an nawalat sa samong mga rogaring, alagad nahimo niamong atubangon an situwasyon.

Pakatapos kan samong ikaduwang pag-ebakwit, an sakong kakuarto na si Cheryl asin ako nawalat sa Guinea. Nangahulogan ini na dapat kaming makanood nin Pranses. An nagkapira sa mga kapwa ko misyonero tolos na ginamit an saindang nanodan na Pranses, na dai partikularmenteng nahahadit sa mga sala ninda. Para sa sako, habo ko nin saralang pagtaram, kaya nagtataram sana ako nin Pranses kun talagang kaipuhan. Iyan gabos makologon sa boot. Kaipuhan kong ipagirumdom sa sadiri ko aroaldaw kun taano ta yaon ako sa Guinea—tabangan an iba na mamidbid si Jehova.

Luway-luway akong nag-oswag paagi sa pag-adal, paghinanyog sa mga suelto an pagtaram kan lenguahe, asin pagpatabang sa mga aki sa kongregasyon na daing pag-alangan sa pagtaram. Dangan, dai linalaoman, uminabot an napapanahon na mga probisyon gikan sa organisasyon ni Jehova. Poon kan Setyembre 2001, An Satong Ministeryo sa Kahadean nagtao nin mga suhestion para sa pagpresentar kan mga magasin bilang dagdag sa mga ideya para sa pag-alok kan mga libro asin brosyur sa mga tawo na laen-laen an relihiosong mga paniniwala. Mas kompiado ako ngonyan kun nakikikabtang sa ministeryo, dawa dai ako makapagtaram nin siring kaeksakto kan pagtaram ko sa nagimatan kong lenguahe.

An pagdakula sa laog nin sarong dakulang pamilya tunay nanggad na nakatabang sa sako na makaadaptar sa pamumuhay kaiba an dakol na tawo, na kan sarong panahon kaidto 17 katawo sa erokan nin mga misyonero. Durante kan 37 taon ko sa pagmimisyonero, namuhay ako na nakaibanan an sobra sa 100 na iba pang misyonero. Kanigoan na pribilehio na mamidbid an kadakol na tawo, na gabos may magkakalaen na personalidad pero gabos naggigibo na may sarong obheto! Asin kanigoan na kagayagayahan na magin kapwa trabahador nin Dios asin magkaigwa nin kabtang na maheling an mga tawo na inaako an katotoohan sa Biblia!—1 Corinto 3:9.

Sa nag-aging mga taon, nalipasan ko an dakol na mayor na pangyayari sa buhay kan sadiri kong mga kapamilya, arog baga kan kasal kan kadaklan sa nguhod kong mga tugang. Asin dai ko naheling an sakong mga sobrino asin sobrina sa pinakaparate na gusto ko. Nagin sakripisyo idto para sa sako asin sa sakong pamilya, na mayong kaimotan na nagparigon sa sakong boot na magdanay sa gibohon na pagmimisyonero.

Pero, an mga nalipasan ko duman sa samo nakamtan ko sa laen-laen na panahon sa paglilingkod bilang misyonera. Minsan ngani pinili kong magdanay na mayong agom, igwa ako nin dakol na aki sa espirituwal, bako sana an mga inadalan ko sa Biblia kundi an iba man na nagin dayupot sa sako. Dugang pa, naheling ko an saindang mga aki na nagdarakula, nag-aragom, asin nagpadakula man kan saindang sadiring mga aki sa dalan kan katotoohan. An iba sa sainda, arog ko, tinogotan an paggibo nin disipulo na makaimpluwensia sa saindang buhay.

[Nota sa Ibaba]

[Mga Mapa sa pahina 15]

(Para sa aktuwal na format, hilingon an publikasyon)

Idinestino ako sa Sierra Leone, Solnopan na Aprika

GUINEA

SIERRA LEONE

[Ritrato sa pahina 13]

An duwa kong tugang na babae, na kaibanan kong guminamit nin dakol na maogmang oras sa erokan nin mga misyonero kan dekada nin 1950

[Ritrato sa pahina 14]

Kaiba ko an mga kapwa estudyante kan ika-48 klase nin Gilead

[Ritrato sa pahina 16]

Pagdedikar kan bagong mga pasilidad kan sangang opisina sa Sierra Leone