An Paghanap sa Tamang mga Simbag

Paano ko maiingatan an sakong salud?

Ano an magigibo ko tanganing magin orog na maogma an sakong buhay pampamilya?

Paano ko mapapaoswag an posibilidad na magdanay sa trabaho?

IHINAPOT na daw nindo an arin man sa mga hapot na iyan? Nanompongan na daw nindo an praktikal na mga simbag na talagang epektibo? Kada taon, ipinupublikar an mga 2,000 na laen-laen na librong nag-aalok nin sadol dapit digdi asin sa iba pang importanteng mga tema. Sa Britania sana, an mga parabasa naggagastos nin sagkod sa mga $150 milyones (E.U.) kada taon sa mga librong nagtatao nin sadol manongod sa kun paano makakaya an mga kadepisilan sa buhay. Sa Estados Unidos, an pagpapabakal nin mga librong giya sa personal na pag-oswag minaabot sa mga $600 milyones kada taon. Dai nanggad kamo nagsosolo sa paghanap nin marahay na sadol sa kun paano aatubangon an buhay sa aroaldaw.

Mapadapit sa sadol na manonompongan sa kadakol na publikasyon na ini, an sarong autor nagsabi: “Inootro sana kan dakol na bagong libro an dati nang isinurat.” Iyo, kadaklan sa mga sadol na manonompongan sa mga librong ini ipinapabanaag sana an kadonongan na nakarekord sa saro sa pinakasuanoy na mga libro sa kinaban. An librong ini an pinakamahiwas nanggad an pagkawaras sa kinaban. Trinadusir na an kabilogan o kabtang kaiyan sa mga 2,400 na lenguahe. Sa kabilogan, labing 4.6 bilyones na kopya an naimprenta na sa bilog na globo. An librong iyan daing iba kundi an Biblia.

An Biblia sayod na nagsasabi: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Totoo, an Biblia dai isinurat bilang manwal na giya sa personal na pag-oswag. An pangenot na katuyohan kaiyan iyo na ihayag an kabotan nin Dios para sa katawohan. Dawa siring, an Biblia igwang dakol na impormasyon manongod sa kun paano makakaya an mga problema na ordinaryo na sana sa sato gabos, asin nanunuga iyan na an mga nagsusunod sa paggiya kaiyan makakanood na pakinabangon an saindang sadiri. (Isaias 48:17, 18) Kun iinaaplikar, an praktikal na konseho kaiyan pirmeng epektibo, ano man an etnikong pinaghalean, kultura, o inadalan nin sarong tawo. Taano ta dai estudyaran an masunod na artikulo asin kamo mismo an magdesisyon kun baga praktikal an sinasabi kan Biblia dapit sa mga tema na siring kan salud, pamilya, asin trabaho?