Mapakumbabang Nagpapasakop sa Mamomoton na mga Pastor
Mapakumbabang Nagpapasakop sa Mamomoton na mga Pastor
“Magin kamong makinuyog duman sa mga nangengenot dian sa tahaw nindo asin magin mapagpasakop.”—HEBREO 13:17.
1, 2. Anong mga teksto an nagpapaheling na si Jehova asin si Jesus mamomoton na mga Pastor?
SI Jehova Dios asin an saiyang Aki, si Jesu-Cristo, mamomoton na mga Pastor. Si Isaias nagpropesiya: “Uya! An Soberanong Kagurangnan na Jehova mismo madatong bilang makosog na saro, asin an saiyang takyag mamamahala para sa saiya. . . . Siring sa pastor papastoran nia an saiyang sadiring aripompon. Paagi sa saiyang takyag titiponon nia an mga kordero; asin sa saiyang daghan kakargahon nia sinda. An mga nagpapasuso aatamanon nia.”—Isaias 40:10, 11.
2 An propesiyang iyan manongod sa pagbabalik enot na naotob kan an Judiong mga natatada magbalik sa Juda kan 537 B.C.E. (2 Cronica 36:22, 23) Naotob giraray iyan kan an linahidan na natatada kaldahon sa “Dakulang Babilonya” kan 1919 kan Ciro na Orog na Dakula, si Jesu-Cristo. (Kapahayagan 18:2; Isaias 44:28) Sia an “takyag” ni Jehova para sa pamamahala, na tinitipon an mga karnero asin pinapastoran sinda na may mamomoton na pagmakolog. Si Jesus mismo nagsabi: “Ako an marahay na pastor, asin midbid ko an sakong mga karnero patin midbid ako kan sakong mga karnero.”—Juan 10:14.
3. Paano si Jehova nagpapaheling nin mamomoton na pagmakolog sa pagtratar nia sa saiyang mga karnero?
3 An propesiya sa Isaias 40:10, 11 nagdodoon kan mapagpadangat na pagpastor ni Jehova sa saiyang banwaan. (Salmo 23:1-6) Durante kan saiyang ministeryo sa daga, ipinaheling man ni Jesus an mamomoton na pagmakolog sa saiyang mga disipulo asin sa mga tawo sa pangkagabsan. (Mateo 11:28-30; Marcos 6:34) Ikinaongis ni Jehova sagkod ni Jesus an pagkadaing herak kan mga pastor, o mga namomoon, kan Israel, na daing supog na pinabayaan asin inaprobetsaran an saindang aripompon. (Ezequiel 34:2-10; Mateo 23:3, 4, 15) Si Jehova nanuga: “Ililigtas ko an sakong mga karnero, asin dai na sinda magigin habonon; asin maghohokom ako sa tahaw nin karnero asin karnero. Asin papatindogon ko sa tahaw ninda an sarong pastor, asin papakakanon nia sinda, an sakuya mismong oripon na si David. Sia mismo mapasabsab sa sainda, asin sia mismo magigin saindang pastor.” (Ezequiel 34:22, 23) Sa panahon na ini kan katapusan, si Jesu-Cristo, an David na Orog na Dakula, iyo an “sarong pastor” na ninombrahan ni Jehova na mamahala sa gabos Niang lingkod digdi sa daga, an linahidan nin espiritung mga Kristiano sagkod an “ibang mga karnero.”—Juan 10:16.
Langitnon na mga Balaog sa Kongregasyon
4, 5. (a) Anong mahalagang marhay na balaog an itinao ni Jehova sa saiyang banwaan sa daga? (b) Anong balaog an itinao ni Jesus sa saiyang kongregasyon?
4 Paagi sa pagpatindog sa tahaw kan Saiyang mga lingkod digdi sa daga nin “sarong pastor,”—si Jesu-Cristo—itinao ni Jehova an mahalagang marhay na balaog sa Kristianong kongregasyon. An balaog na ini nin langitnon na Poon iprinopesiya sa Isaias 55:4: “Uya! Bilang saksi sa mga nasyon sia itinao ko, bilang poon asin komandante sa mga nasyon.” An linahidan na mga Kristiano sagkod an mga miembro kan “dakulang kadaklan” tinipon hale sa gabos na nasyon, tribo, banwaan, asin lenguahe. (Kapahayagan 5:9, 10; 7:9) Sinda kompuesto nin sarong internasyonal na kongregasyon, “sarong aripompon,” sa irarom kan pamomoon nin “sarong pastor,” si Cristo Jesus.
5 Nagtao man si Jesus nin mahalagang marhay na balaog sa saiyang kongregasyon sa daga. Nagtao sia nin maimbod na mga katabang na pastor na, bilang pag-arog ki Jehova asin ki Jesus, pinapastoran an aripompon na may mamomoton na pagmakolog. Si apostol Pablo nagtaram manongod sa mamomoton na balaog na ini sa saiyang surat sa mga Kristiano sa Efeso. Sia nagsurat: “‘Kan sia magsakat sa kaitaasan nagdara sia nin mga bihag; nagtao sia nin balaog na mga lalaki.’ . . . Itinao nia an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, sa pagpakarhay giraray kan mga banal, para sa gibohon nin paglingkod, para sa pagpakosog kan hawak ni Cristo.”—Efeso 4:8, 11, 12.
6. Paano ilinaladawan sa Kapahayagan 1:16, 20 an linahidan na mga paraataman na naglilingkod sa mga grupo nin kamagurangan, asin ano an masasabi manongod sa ninombrahan na kamagurangan na kabilang sa ibang mga karnero?
6 An ‘balaog na mga lalaking’ ini mga paraataman, o kamagurangan, na ninombrahan ni Jehova asin kan saiyang Aki, paagi sa banal na espiritu, tanganing pastoran na may pagpadangat an mga karnero. (Gibo 20:28, 29) Sa kapoonpooni, an mga paraataman na ini gabos linahidan na Kristianong mga lalaki. Sa Kapahayagan 1:16, 20, idtong mga naglingkod sa mga grupo nin kamagurangan sa laog kan linahidan na kongregasyon isinisimbolisar kan mga “bitoon” o “mga anghel” na nasa toong kamot ni Cristo, an boot sabihon, nasa kontrol nia. Minsan siring, sa panahon na ini kan katapusan, na padagos na naiinaan an kabilangan kan linahidan na mga paraataman na nasa daga pa, an dakulang mayoriya kan Kristianong kamagurangan sa mga kongregasyon kabilang sa ibang mga karnero. Mantang ninonombrahan ini kan mga representante kan Namamahalang Grupo sa paggiya kan banal na espiritu, sinda man masasabing nasa toong kamot (o, nasa pagdirehir) kan Marahay na Pastor, si Jesu-Cristo. (Isaias 61:5, 6) Huling an kamagurangan sa mga kongregasyon niato nagpapasakop ki Cristo, an Payo kan kongregasyon, maninigo sinda sa satong lubos na kooperasyon.—Colosas 1:18.
Pagkuyog Asin Pagpasakop
7. Anong hatol an itinao ni apostol Pablo mapadapit sa satong aktitud sa Kristianong mga paraataman?
7 Linalaoman kita kan satong langitnon na mga Pastor, si Jehova Dios asin si Jesu-Cristo, na magin makinuyog asin mapagpasakop sa mga katabang na pastor na ibinugtak ninda sa katongdan na may paninimbagan sa laog kan kongregasyon. (1 Pedro 5:5) Paagi sa pagpasabong, si apostol Pablo nagsurat: “Girumdoma nindo idtong mga nangengenot sa saindo, na nagtaram kan tataramon nin Dios sa saindo, asin mantang pinaghohorophorop nindo an resulta kan saindang gawe-gawe aroga nindo an saindang pagtubod. Magin kamong makinuyog duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makakaraot sa saindo.”—Hebreo 13:7, 17.
8. Iniimbitaran kita ni Pablo na ‘horophoropon’ an ano, asin paano kita maninigong ‘magin makinuyog’?
8 Mangnoha na iniimbitaran kita ni Pablo na ‘horophoropon,’ o maingat na masdan, an resulta kan maimbod na gawe-gawe kan kamagurangan asin na arogon an siring na mga halimbawa nin pagtubod. Apuera kaini, sinasadol nia kita na magin makinuyog asin magpasakop sa pagdirehir kan nombradong mga lalaking ini. An nag-espesyalisar sa Biblia na si R. T. France nagpapaliwanag na sa orihinal na Griego, an termino digdi na trinadusir na “magin kamong makinuyog” bakong “an nakatodan na termino para sa pagkuyog, kundi sa literal ‘makombensir,’ na nagpaparisa nin gikan sa boot na pag-ako sa saindang pamomoon.” Kinukuyog niato an kamagurangan bako sanang huli ta dinidirehiran kita kan Tataramon nin Dios na gibohon iyan kundi huli man ta nakombensir kita na nasa isip ninda an intereses kan Kahadean asin an pinakaikakarahay niato. Seguradong magigin maogma kita kun gikan sa boot niatong aakoon an saindang pamomoon.
9. Taano ta, apuera sa pagigin makinuyog, kaipuhan na kita ‘magin mapagpasakop’?
9 Pero, paano kun sa sarong kamugtakan bako kitang kombensido na an pagdirehir kan kamagurangan iyo an pinakamarahay na paagi nin paggibo nin mga bagay? Dian minalaog an pagpasakop. Pasil na kumuyog kun malinaw an gabos na bagay asin kun minaoyon kita, alagad ipapaheling niato na talagang mapagpasakop kita kun minasunod kita dawa kun dai niato personalmenteng nasasabotan an itinataong pagdirehir. Si Pedro, na kan huri nagin sarong apostol, nagpaheling kan arog kaining pagpasakop.—Lucas 5:4, 5.
Apat na Dahelan na Makikooperar nin Gikan sa Boot
10, 11. Sa anong paagi na an mga paraataman “nagtaram kan tataramon nin Dios” sa mga kapwa ninda Kristiano kan enot na siglo asin ngonyan?
10 Sa Hebreo 13:7, 17, na kinotar sa enotan, nagtao si apostol Pablo nin apat na dahelan kun taano ta maninigo kitang magin makinuyog asin mapagpasakop sa Kristianong mga paraataman. An enot iyo na sinda “nagtaram kan tataramon nin Dios” sa sato. Girumdomon na an “balaog na mga lalaki” na itinao ni Jesus sa kongregasyon para sa “pagpakarhay giraray kan mga banal.” (Efeso 4:11, 12) Pinakarhay giraray nia an kaisipan asin gawe-gawe kan enot na siglong mga Kristiano paagi sa maimbod na mga katabang na pastor, na an nagkapira sa sainda pinasabngan na magsurat sa mga kongregasyon. Ginamit nia an siring na ninombrahan nin espiritu na mga paraataman tanganing giyahan asin pakosogon an enot na mga Kristiano.—1 Corinto 16:15-18; 2 Timoteo 2:2; Tito 1:5.
11 Ngonyan, dinidirehiran kita ni Jesus paagi sa “maimbod asin mapagmansay na oripon,” na irinerepresentar kan Namamahalang Grupo kaiyan asin kan nombradong kamagurangan. (Mateo 24:45) Huli sa paggalang sa “poon na pastor,” si Jesu-Cristo, naghihimate kita sa hatol ni Pablo: “Magkaigwa kamo nin paggalang sa mga nagpapagal dian sa saindo asin namamayo sa saindo sa Kagurangnan asin naghahatol sa saindo.”—1 Pedro 5:4; 1 Tesalonica 5:12; 1 Timoteo 5:17.
12. Paanong an mga paraataman “nagbabantay sa [satong] kalag”?
12 An ikaduwang dahelan sa pakikikooperar sa Kristianong mga paraataman iyo na “sinda nagbabantay sa [satong] kalag.” Kun may marisa sinda sa satong aktitud o gawe-gawe na puedeng magsapeligro kan satong espirituwalidad, marikas sindang nagtatao sa sato nin kinakaipuhan na hatol sa katuyohan na pakarhayon giraray kita. (Galacia 6:1) An termino sa Griego na trinadusir na “nagbabantay” literal na nangangahulogan na “dai pagtorog.” Oyon sa sarong nag-espesyalisar sa Biblia, iyan “nagpaparisa nin daing kapagalan na pagpuka kan pastor.” Apuera sa saindang pagpapadanay nin espirituwal na pagkapuka, an kamagurangan tibaad dai pa ngani mapatorog huli sa pagparaisip sa satong espirituwal na ikakarahay. Bako daw na maninigo kitang gikan sa boot na makikooperar sa siring na mamomoton na mga katabang na pastor, na ginigibo an saindang pinakamakakaya tanganing arogon an mamomoton na pagmakolog na ipinaheling ni Jesu-Cristo, an “dakulang pastor kan mga karnero”?—Hebreo 13:20.
13. Kiisay asin sa anong mga paagi maninimbag an mga paraataman asin an gabos na Kristiano?
13 An ikatolong dahelan para sa gikan sa boot na pakikikooperar niato sa mga paraataman iyo na nagbabantay sinda sa sato “bilang an mga maninimbag.” Ginigirumdom kan mga paraataman na sinda mga katabang na pastor, na naglilingkod sa irarom kan langitnon na mga Pastor, si Jehova Dios asin si Jesu-Cristo. (Ezequiel 34:22-24) Si Jehova iyo an Kagsadiri kan mga karnero, na “saiyang binakal paagi sa dugo kan saiyang sadiring Aki,” asin papaninimbagon Nia an nombradong mga paraataman sa kun paano ninda tinatratar an Saiyang aripompon, na maninigong sa paagi na may ‘kabootan.’ (Gibo 20:28, 29) Huli kaini, gabos kita maninimbag ki Jehova sa kun paano kita naghihimate sa saiyang pagdirehir. (Roma 14:10-12) An pagkuyog niato sa nombradong kamagurangan nagpapatunay man kan satong pagpasakop ki Cristo, an Payo kan kongregasyon.—Colosas 2:19.
14. Ano an puedeng magin dahelan kan ‘may pag-agaghang’ paglilingkod kan Kristianong mga paraataman, asin may anong mga resulta?
14 Itinao ni Pablo an ikaapat na dahelan kun taano ta maninigo na mapakumbaba kitang magpasakop sa Kristianong mga paraataman. Sia nagsurat: “Tanganing ini magibo nindang may kagayagayahan asin bakong may pag-agagha, huli ta ini makakaraot sa saindo.” (Hebreo 13:17) An Kristianong kamagurangan nagpapasan nin magabat na paninimbagan huli sa saindang magabat na mga responsibilidad sa pagtotokdo, pagpapastor, pangengenot sa paghuhulit, pag-asikaso sa saindang pamilya, asin pag-asikaso sa mga problema sa kongregasyon. (2 Corinto 11:28, 29) Kun dai kita nakikikooperar sa sainda, orog sana kitang nagpapagabat sa sainda. Maresulta ini sa saindang “pag-agagha.” An pagpaheling niato nin espiritu nin dai pakikikooperar ikinakaanggot ni Jehova asin puedeng makadanyar sa sato. Imbes, kun nagpapaheling kita nin tamang paggalang asin kooperasyon, magigibo kan kamagurangan an saindang mga obligasyon na may kagayagayahan, asin nakakakontribwir ini sa pagkasararo asin magayagayang partisipasyon sa paghuhulit kan Kahadean.—Roma 15:5, 6.
Pagpaheling kan Satong Pagpasakop
15. Paano niato ikakapaheling an satong pagkuyog asin pagpasakop?
15 Igwa nin dakol na praktikal na paagi na makakapakikooperar kita sa nombradong mga paraataman. Sa katuyohan na makaadaptar sa bagong mga kamugtakan sa teritoryo, iinareglo daw kan kamagurangan na gibohon an mga pagtiripon bago maglingkod sa langtad sa mga aldaw asin oras na nagkakaipong liwaton niato an satong rutina? Gumibo kita nin paghihingoa na suportaran an bagong mga areglo. Tibaad mag-ako kita nin dai linalaoman na mga bendisyon. Dalaw daw kan paraataman sa paglilingkod sa satong Pag-adal sa Libro kan Kongregasyon? Logod na lubos kitang makikabtang sagkod na mapupuede sa paghuhulit sa semanang iyan. Tinawan daw kita nin asignasyon sa Teokratikong Paadalan sa Pagmiministro? Maninigong pagmaigotan niatong magin presente asin gibohon an satong asignasyon. Iinanunsiar daw kan paraataman sa Pag-adal sa Libro kan Kongregasyon na turno na kan grupo niato na maglinig sa Kingdom Hall? Logod na itao niato sa saiya an bilog na suporta, sagkod sa kaya kan satong salud asin kosog. Sa mga bagay na ini asin sa dakol pang ibang paagi, ipinapaheling niato an satong pagpasakop sa mga lalaking ninombrahan ni Jehova asin kan Saiyang Aki na mangataman sa aripompon.
16. Kun an sarong magurang sa kongregasyon dai ginigibo an mga bagay nin sono sa idinidirehir, taano ta dai ini magtataong katanosan na kita magrebelde?
16 Kun beses, an sarong magurang sa kongregasyon tibaad dai ginigibo an mga bagay sono sa idinidirehir kan grupong maimbod na oripon asin kan Namamahalang Grupo kaiyan. Kun padagos siang magawe sa paaging ini, maninimbag sia ki Jehova, an “pastor asin paraataman kan [satong] kalag.” (1 Pedro 2:25) Alagad an ano man na pagkukulang o mga sala nin nagkapirang kamagurangan dai magtataong katanosan na kita magkaigwa nin masinuway na aktitud. Dai binebendisyonan ni Jehova an pakisuway asin pagrebelde.—Bilang 12:1, 2, 9-11.
Binebendisyonan ni Jehova an Gikan sa Boot na Kooperasyon
17. Ano an maninigong magin aktitud niato sa satong mga paraataman?
17 Aram ni Jehova Dios na bakong sangkap an mga lalaking ninombrahan nia bilang mga paraataman. Pero, ginagamit nia sinda, asin paagi kan saiyang espiritu, pinapastoran nia an saiyang banwaan digdi sa daga. Totoo iyan sa kamagurangan—asin sa sato gabos—na ‘an puersa na labi sa ordinaryo gikan sa Dios asin bakong gikan mismo sa sato.’ (2 Corinto 4:7) Kun siring, maninigo niatong pasalamatan si Jehova huli sa saiyang ginigibo paagi sa satong maimbod na mga paraataman, asin maninigong ipaheling niato sa sainda an gikan sa boot na kooperasyon.
18. Paagi sa pagpasakop sa mga paraataman niato, ano sa katunayan an ginigibo niato?
18 Ginigibo kan mga paraataman an bilog nindang makakaya tanganing makapamuhay kaoyon kan paglaladawan ni Jehova sa mga pastor na ninombrahan na mangataman sa saiyang aripompon sa huring mga aldaw, na yaon sa Jeremias 3:15: “Tatawan ko kamo nin mga pastor na kaoyon sa sakong puso, asin papasabsabon ninda kamo nin kaaraman asin pakarorop.” Daing duwa-duwa na an kamagurangan sa tahaw niato marahay an ginigibo sa pagtotokdo asin pagprotehir sa mga karnero ni Jehova. Padagos logod niatong ipaheling an pag-apresyar sa saindang pagpapagal paagi sa satong gikan sa boot na kooperasyon, sa satong pagkuyog, asin sa satong pagpasakop. Sa paggibo kaiyan, ipinapaheling niato an satong pag-apresyar sa satong langitnon na mga Pastor, si Jehova Dios asin si Jesu-Cristo.
Bilang Repaso
• Paano pinatunayan ni Jehova asin ni Jesu-Cristo na sinda mamomoton na mga Pastor?
• Apuera sa pagkuyog, taano ta kaipuhan an pagpasakop?
• Sa anong praktikal na mga paagi ikakapaheling niato an satong pagpasakop?
[Mga Hapot Para sa Pag-adal]
[Ritrato sa pahina 27]
An Kristianong kamagurangan nagpapasakop sa pamomoon ni Cristo
[Mga Ritrato sa pahina 29]
Igwa nin dakol na paagi na ikakapaheling niato an satong pagpasakop sa nombradong mga pastor ni Jehova