An Kamawotan ni Adryana

MAY kamawotan si Adryana, sarong sais anyos na aki sa Tulsa, Oklahoma, E.U.A. Ikakakomparar iyan sa kamawotan kan salmistang si David, na nag-awit: “Sarong bagay an hinagad ko ki Jehova—iyan an sakong hahalaton, na ako makapag-erok sa harong ni Jehova sa gabos na aldaw kan sakong buhay, tanganing maheling an pagigin nakakagayagaya ni Jehova asin tanganing masdan na may pagpahalaga an saiyang templo.”—Salmo 27:4.

Kan anom na bulan pa sana si Adryana, nadiskobreng igwa sia nin neuroblastoma, sarong puedeng ikagadan na bukol na nagtutubo sa mga kabtang kan sistema nerbiosa. Naparalisado an duwang tabay nia huli sa helang na ini na nagsasapeligro kan buhay. Binolong sia nin mga doktor paagi sa dakol na operasyon asin sarong taon na chemotherapy.

An ama ni Adryana, na an relihiosong kombiksion bakong kapareho ni Adryana asin kan saiyang ina, nakikomunikar sa sarong institusyon tanganing hagadon na an saiyang aki makapasyar sa sarong bantog na parkeng libangan. Bago itao an kamawotan, ininterbio kan institusyon si Adryana. Ipinahayag nia an saiyang pagpasalamat na tinawan sia nin konsiderasyon alagad sinabi nia sa sainda na mas gusto niang magpasyar sa Bethel, an sentro kan pambilog na kinaban na aktibidad kan Mga Saksi ni Jehova sa Nueva York. Pagkatapos niang maaraman an manongod sa kahagadan kan saiyang ama, namibi si Adryana ki Jehova na logod tawan sia nin oportunidad na makapasyar sa Bethel. Minsan ngani kan primero nag-iisip na an Bethel daing gayo magigin interesante para sa sarong aki, itinao kan institusyon an kamawotan kan dai man kinontra kan saiyang ama an kagustohan nia.

Inibanan kan saiyang ina, tugang na babae, asin sarong katood, sa kaenot-enote nagbiahe si Adryana pasiring sa Nueva York tanganing magpasyar sa Bethel. “Sinimbag ako ni Jehova,” an sabi ni Adryana. “Aram ko na maogma nia kaming aakoon sa Bethel. Naheling ko kun paano ginigibo an mga libro, magasin, asin Biblia. Mas marahay iyan kisa parkeng libangan.”

‘Naheling’ nanggad ni Adryana “an pagigin nakakagayagaya ni Jehova” asin minasdan nia na may pagpahalaga an pagpunsionar kan sentro kan mga aktibidad kan banwaan ni Jehova ngonyan. Kamo maogma man na inaako na pumasyar sa Bethel. Dugang pa sa pambilog na kinaban na opisina prinsipal kan Mga Saksi ni Jehova sa Nueva York, igwa nin mga sangang opisina sa manlaenlaen na iba pang parte kan kinaban.