An Maringis na Kinaban Ngonyan
An Maringis na Kinaban Ngonyan
SI Maria 64 anyos asin namuhay nin solo. Nanompongan siang gadan sa saiyang harong, na hinampak asin tinilok paagi sa sarong kable.
Binugbog nin anggot na sururog an tolong pulis, na inaakusaran na dinukot ninda an duwang menor de edad. Binuboan kan sururog nin gasolina an duwa sa mga pulis asin sinolo sinda, asin tinumtom sinda kan kalayo. Nakadulag an ikatolong pulis.
Sarong apod sa telepono nin dai nagpamidbid an nagbunga nin labi-labi kanakakakubhan na diskobremiento. An bangkay nin apat na nagbabakasyon na lalaki nakotkot sa sarong tatamnan. Tinakopan an saindang mata, asin binogkos an saindang kamot. Ihinayag nin autopsia na sinda ilinobong nin buhay.
An mga karatan na ini bakong mga eksena hale sa maringis asin madahas saka makatatakot na marhay na mga pelikula. An mga baretang ini gabos tunay na estorya na nagin pangenot na bareta sa sarong nasyon sa Latin Amerika dai pa sana nahahaloy. Pero, an nasyon na iyan bako nanggad an solamenteng nasyon na nag-aagi nin siring na mga karatan sa kinaban ngonyan.
An maringis na mga gibo nagin nang ordinaryong mga pangyayari. An mga pambobomba, pagsalakay nin mga terorista, paggadan, pangongolog, pambabadil, asin panlulupig dikit sanang kabilangan nin siring na mga insidente. Paorootro, ipinapaheling kan bareta sa media an klarong paglaladawan nin mga karatan, asin dakol na tawo an dai na nabibigla na maheling o madangog an siring na karingisan.
Tibaad magngalas nanggad kamo: ‘Ano an nangyayari sa kinaban ngonyan? Biyo na daw na nawara an pagpakundangan sa mga saboot nin iba asin paggalang sa buhay?’ Taano ta kaipuhan niatong mabuhay sa sarong kinaban na arog kaini?
Ngonyan isipon nindo si Harry, sarong 69 anyos na lalaki na nagkaigwa nin kanser. An saiyang agom igwa nin helang na tinatandaan nin tuminagas na mga tisyu sa hotok asin gulod asin asosyado orog na sa parsial o kompletong paralisis, alagad an saiyang mga kataed asin katood boluntad na nagtatabang. “Dai ko aram kun paano na kami kun mayo an gabos na tawong ini na nagtatabang sa samuya,” an sabi ni Harry. Sa Canada, kun saen sia nakaistar, ihinahayag nin sarong pag-adal na labing 50 porsiento nin mga nag-aataman sa mga may edad na an nagtatabang sa saro na bako nindang kaanoano. Daing duda, may midbid kamong ordinaryong mga tawo na parateng nagpapaheling nin kabootan asin pakikipagkapwa-tawo. Iyo, an mga tawo may potensial na magin mapagmalasakit asin maboot imbes na magin maringis.
Kun siring, taano ta igwa nin mga karatan? Ano an nagpapangyari sa mga tawo na gumawe nin maringis? Puede daw magbakle an mga nagtatratar sa iba nin may karingisan? Matatapos pa daw an karingisan? Asin kun iyo, paano asin noarin?
[Picture Credit Line sa pahina 3]
Tren: CORDON PRESS