Kun an mga Inaasahan Dai Naootob

AN PAGKADESGANAR puedeng magtalubo sa arin man na pag-agoman, dawa kun garo baga magkabagay na marhay an lalaki asin babae kan nag-iilusyonan pa sana. Alagad paanong an duwang tawo na garo baga magkabagay na marhay antes magsumpaan sa kasal nagigin magkalaen na gayo pagkatapos?

An Biblia nagsasabi na an nag-aaragom magkakaigwa nin “kolog asin kamondoan.” (1 Corinto 7:28, The New English Bible) Sa parate, an sarong dahelan kan siring na kahorasaan iyo an pagkabakong sangkap nin tawo. (Roma 3:23) Apuera kaiyan, an saro o an magkapareha tibaad parehong dai nag-aaplikar kan mga prinsipyo sa Biblia. (Isaias 48:17, 18) Pero, kun beses, an lalaki o babae minalaog sa pag-agoman na may bakong realistikong mga inaasahan. Kun ini mangyari, an dai pagkasinabotan puedeng magbunga nin grabeng mga problema.

Bakong Realistikong mga Inaasahan

Kun kamo sarong agom na lalaki o babae, posibleng naglaog kamo sa pag-agoman na igwa nin nagkapirang inaasahan; an kadaklan na tawo iyo. Horophoropa nguna an klase nin buhay na linalaoman nindo. Nagkulang daw an saindong pag-agoman sa inimahinar nindo kaidto? Kun iyo, dai kamo magkonklusyon na dai mareresolberan an mga problema. An pag-aplikar kan mga prinsipyo sa Biblia makakatabang sa saindo na husayon an mga bagay. * (2 Timoteo 3:16) Mientras tanto, marahay kun sisiyasaton nindo an nagkapira sa mga tibaad inaasahan nindo kaidto manongod sa pag-agoman.

Halimbawa, naghona an nagkapira na an buhay may agom magigin pano nin romansa, siring kan ilinaladawan sa mga fairy tale. O tibaad naghona kamo na kamong mag-agom pirmeng magkakaibanan o na mahuhusay nindong duwa an gabos na dai pagkakaoyon sa pasil, maygurang na paagi. Dakol an naniwala na hahaleon nin pag-agoman an pangangaipo sa pagpupugol sa sadiri kun dapit sa seksuwal na mga bagay. Huling an gabos na komun na inaasahan na ini medyo bakong realistiko, iyan siertong magbubunga nin pagkadesganar para sa nagkapira.—Genesis 3:16.

An saro pang bakong realistikong inaasahan iyo na an pag-agoman mismo gigibohon na maogma an sarong tawo. Siempre, an pagkaigwa nin kapareha sa buhay puedeng magin gikanan nin dakulang kagayagayahan. (Talinhaga 18:22; 31:10; Eclesiastes 4:9) Alagad maaasahan daw na an pag-agoman magigin garo milagrosong bolong para sa gabos na dai pagkakaoyon? An mga naghohonang iyo sa parate biglang nakakarealisar na iyan bakong totoo!

Mga Inaasahan na Dai Ikinataram

Bako man gabos na inaasahan bakong realistiko. Sa kabaliktaran, kalabot sa nagkapira kaiyan an mga kamawotan na angay man. Pero puedeng lumataw an mga problema huli sa nagkapirang inaasahan. “Nakakaheling ako nin mga mag-agom na naaanggot sa kada saro huli ta an saro sa  sainda naghahalat na maotob an sarong kamawotan, mantang an agom nia dai man lamang aram an kamawotan na iyan,” an sabi nin sarong parakonseho sa pag-agoman. Tanganing masabotan kun paano ini nangyayari, konsideraron an minasunod na senaryo.

Si Mary nagpakasal ki David, na nakaistar ginatos na kilometros an rayo sa tinuboan na banwaan ni Mary. Bago magpaagom, narealisar ni Mary na an pagbalyo sa sarong bagong lugar magbubunga nin mga kadepisilan—nangorogna ta sia natural na masusupgon. Pero, kompiado sia na tatabangan sia ni David na makaadaptar. Halimbawa, inasahan ni Mary na dai sia babayaan ni David asin tatabangan sia na magin pamilyar sa mga katood kaini. Minsan siring, dai ini nangyayari. Si David nawiwiling makipag-olay sa saiyang dakol na katood—na napapabayaan si Mary, an bagong abot, na magsolosolo. Si Mary nagsasaboot na sia pinapabayaan, medyo inabandonar pa ngani. ‘Taano si David ta dai nanggad nin pakilabot?’ an iniisip-isip nia.

An inaasahan daw ni Mary bakong realistiko? Bako man. Gusto sana nia na tabangan sia kan saiyang agom na makaadaptar sa saiyang bagong palibot. Si Mary masusupgon, asin nadedepisilan siang makipagmidbidan sa kadakol na tawong dai nia bisto. Pero, an totoo iyo na nungkang sinabi ni Mary an saiyang mga saboot ki David. Sa siring, dai aram ni David an inaagihan ni Mary. Ano an mangyayari kun magpapadagos an situwasyon na iyan? Puedeng magdakula an hinanakit ni Mary, asin sa paglihis nin panahon, tibaad isipon nia na an saiyang agom biyong daing labot sa saiyang mga saboot.

Tibaad kamo nakamate na man nin pagkadesganar kun an saindong agom garo baga bakong sensitibo sa saindong mga pangangaipo. Kun siring kaiyan an kamugtakan, ano an magigibo nindo?

Ipakipag-olay Iyan

An dai naootob na mga inaasahan puede talagang magin makologon sa boot. (Talinhaga 13:12)  Pero, may magigibo kamo dapit sa situwasyon na iyan. “Makokombensir nindo an iba kun kamo madonong asin mataram na may pagkarasonable,” an sabi nin sarong talinhaga sa Biblia. (Talinhaga 16:23, Contemporary English Version) Huli kaini, kun sa pagmate nindo igwa kamo nin rasonableng inaasahan na dai naootob, ipakipag-olay iyan sa saindong agom.

Maghingoang pilion an tamang panahon, an tamang kamugtakan, asin an tamang mga tataramon tanganing ipahayag an saindong mga ikinakapurisaw. (Talinhaga 25:11) Magtaram nin kalmado asin magalang. Girumdomon an saindong obheto—bakong mag-akusar sa saindong agom kundi mag-impormar sa saiya manongod sa saindong mga inaasahan asin saboot.—Talinhaga 15:1.

Taano ta maninigo pa nindong gibohon ini? Bako daw na an sarong makonsiderasyon na agom dapat na nakakaaram kan saindong mga pangangaipo? Bueno, tibaad laen sana an punto de vista kan saindong agom alagad maoogma siang konsideraron an saindong mga pangangaipo kun ipapaliwanag nindo iyan. An pagpahayag nindo kan gusto o kaipuhan nindo bakong tanda nin bakong mapangganang pag-agoman, ni tanda man iyan na an saindong agom daing labot.

Kaya dai mag-alangan na ipakipag-olay an mga bagay sa saindong agom. Halimbawa, sa situwasyon na ilinadawan sa enotan, puedeng sabihon ni Mary ki David: “Aadmitiron ko na medyo nadedepisilan ako na makipagmidbidan sa dakolon na tawong dai ko bisto. Sagkod na dai pa ako pamugtak, puede mo daw tabi akong tabangan na makamidbid an gabos?”

 “Listo Kun Dapit sa Pagdangog”

Ngonyan estudyaran an bagay sa saro pang anggulo. Ipamugtak ta baga na kamo dinolok kan saindong agom, asin sia napupurisaw huli ta dai nindo inootob an sarong rasonableng inaasahan. Kun ini mangyari, maghinanyog sa saindong agom! Hingoahon na dai manarahotan tolos. Imbes, “magin listo kun dapit sa pagdangog, maluway kun dapit sa pagtaram.” (Santiago 1:19; Talinhaga 18:13) Sinadol ni apostol Pablo an mga Kristiano: “An lambang saro maghanap, bakong kan saiyang karahayan, kundi kan sa iba.”—1 Corinto 10:24.

Magigibo nindo ini paagi sa pag-imahinar na kamo nasa kamugtakan kan saindong agom. An Biblia nagsasabi: “Kamong mga agom na lalaki, padagos na makiiba sa siring na paagi sa [saindong agom] segun sa kaaraman,” o, siring kan traduksion kan J. B. Phillips’, “kamong mga agom na lalaki maninigo na saboton an agom na kasaro nindo.” (1 Pedro 3:7) Siempre, maninigo man na gibohon kan mga agom na babae an kaparehong paghihingoa mapadapit sa saindang agom.

Girumdomon na dawa gurano pa kamo kabagay kan saindong agom, an saindong mga punto de vista sa gabos na bagay bakong magkapareho. (Helingon an kahon na “Parehong Tanawon, Magkalaen na mga Pananaw.”) Tunay nanggad, ini sarong bendisyon, huli ta marahay na konsideraron an mga bagay sa punto de vista nin iba. An kada saro saindo nagdara sa saindong pag-agoman nin daing kaagid na mga inaasahan basado sa mga bagay na arog baga nin pinaghalean na pamilya asin kultura. Bilang resulta, kamo puedeng nagkakaminootan na marhay alagad ta bakong magkapareho an mga inaasahan.

Halimbawa, tibaad aram na marhay kan Kristianong mag-agom an prinsipyo nin pagkapayo sono sa Biblia. (Efeso 5:22, 23) Alagad paano espesipikong isasagibo an pagkapayo sa laog kan saindong pamilya, asin paano ipapaheling an pagpasakop? Kamong duwa daw ginigiyahan kan prinsipyong ini sa Biblia, asin naghihingoa daw talaga kamong sunodon iyan?

Tibaad igwa man kamo nin magkalaen na mga ideya mapadapit sa iba pang isyu sa pangaroaldaw na pamumuhay. Siisay an maasikaso kan nagkapirang gibohon sa harong? Noarin nindo tatawan nin panahon an mga paryente, asin gurano kadakol na panahon? Paano ipapaheling kan mga Kristianong agom na ineenot ninda an intereses kan Kahadean sa saindang buhay? (Mateo 6:33) Kun manongod sa pinansial na mga bagay, pasil sanang magkautang, kaya kapakipakinabang an pagigin maekonomiya asin mapamaagi. Pero, ano an eksaktong kahulogan nin pagigin maekonomiya asin mapamaagi? An mga bagay na siring kaini kaipuhan na pag-olayan nin prangka asin sa magalang na paagi, na nagtatao nin dakulang pakinabang.

An siring na pag-orolay makakatabang sa saindo na kamtan an orog na katoninongan sa saindong pag-agoman, dawa kun sagkod ngonyan dai pa naootob an nagkapirang inaasahan. Tunay nanggad, mas madali nindong ikakaaplikar an konseho ni apostol Pablo: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro.”—Colosas 3:13.

[Nota sa Ibaba]

[Kahon/Ritrato sa pahina 10]

PAREHONG TANAWON, MAGKALAEN NA MGA PANANAW

‘Imahinara an grupo nin mga turista na nagheheling nin sarong magayon na tanawon. Minsan ngani minamasdan kan bilog na grupo an parehong tanawon, an kada saro hineheling iyan sa laen na paagi. Taano? Huling an kada indibiduwal igwa nin laen-laen na punto-de-vista. Mayo nin duwang tawo an eksaktong nagtitindog sa iyo man sanang lugar. Dugang pa, bakong gabos nakasentro an atension sa parehong kabtang kan tanawon. An kada saro nakakaheling nin sarong laen na kabtang na partikularmenteng nakakapukaw nin interes. Totoo man ini sa laog nin pag-agoman. Minsan ngani sinda magkabagay na marhay, mayo nin magkapareha na eksaktong pareho an pagmansay sa mga bagay. . . . Kabale sa komunikasyon an paghihingoa na pag-iribanon an mga pagkakalaen . . . na magin sarong-laman na relasyon. Ini naghahagad na magtao nin panahon tanganing makapag-olay.’—An Torrengbantayan, Agosto 1, 1993, pahina 4.

[Kahon sa pahina 11]

KUN ANO AN MAGIGIBO NINDO NGONYAN

• Siyasaton giraray an saindong mga inaasahan. Realistiko daw iyan? Labi daw sa rasonable an inaasahan nindo sa saindong agom?—Filipos 2:4; 4:5.

• Hingoahon na pakarhayon an ano man na bakong realistikong mga inaasahan. Halimbawa, imbes na magsabing, “Kita nungkang makontrahan,” magin determinado na maghihingoa kamo na resolberan sa matoninong na paagi an mga dai pagkaintindihan.—Efeso 4:32.

• Ipakipag-olay an saindong mga inaasahan. An pag-orolay manongod sa mga bagay-bagay sarong importanteng marhay na lakdang sa pakanood kun paano mapaheling nin pagkamoot asin paggalang sa lambang saro.—Efeso 5:33.

[Ritrato sa pahina 9]

Magin “listo kun dapit sa pagdangog” sa mga ikinakapurisaw kan saindong agom